Saamsooni kaba⁄i Wafiliisiti
15
1 Qariqaaqari coko⁄o, qatlay gu buꞌuuꞌuru gu ganoo, Saamsooni yaay oy dakhwada, gi cehheemisu kay hadee dosi. Ina gi kaay sa kumbaꞌa gosi tuba, “Ana slaꞌa hiidawa sagay gu hadee dooii, maga arimaa kay.” Teesaaqay see, kumbaꞌa gosi yaa ⁄imbiiba ina ma hiiday sagay kosii.2 Kumbaꞌa gosi sugugi kaay ina tuba, “Gu lou, ana haati ilahudeesi ambee, hagaati wakidi sumuku. Teesaaqay, ana hagagi hadisi sa danaꞌa googu magi khabimi. Teesaaqay see, hotooina da coko⁄i dati hhoi ba⁄ay da ina see. Hhooa khabimaka hatee.”
3 Teꞌesii, Saamsooni gi kaay tuba, “Qatlaykii, ana hoo koomaaaba iliiquru⁄umoo, sa idoo goo laqe daqa Wafiliisitige.” 4 Teesaaqay, Saamsooni gi waaudi haa gi ooymi mondadee miyaa tami, gigi ilakufimi hari hhaysaiĩ koina mondadee cadacada. Da hheꞌesi, gi iliikufimi mumbaalaiĩ hhaysaiĩ gu mondadee hhakeesii giyaa ilakufimi cadacada. 5 Da hheꞌesi, gi ooymisi aslaa mumbaalaiĩ hhakee haa gi geemay mondadee hhakee, giiguuma kayri qaymamu gu Wafiliisitige. Mondadee hhakee, gi da⁄iri upaiĩ gu ganoo daa sihhidimisi haa ganoo daa kahhiye buꞌuru. Slime gi da⁄iri qaymamu goõ gu sabiibu haa qaymamu gu miseyituuni.
6 Wafiliisiti gi maasiri tuba, “Ti miyaa ni laqi taqay?” Inay sigigi kaay tuba, “Ti Saamsooni, kumbaꞌakira gu Mutimuna. Ina niĩ teesaaqay laqi, sa gimba kumbaꞌa gosi yaa hadisi hadee dosi, dagama khabi ha qaraimokira gwaa leeleehhisu ina baloo da khaboo dosii.” Teesaaqay, Wafiliisiti gigi da⁄a kayri hari aslaa hadetee sliimaa haa taataa gosi. 7 Saamsooni gi kaay sa Wafiliisiti tuba, “Sa gimba unkuray haã yonditiri teesaaqay, gu lou ha kaanahhasaaba, ana see hati gesaa bua ⁄imbu daqa doogunay.” 8 Ina gi iliitlai Wafiliisiti hari ⁄uuru haa gi cu⁄i hida wa⁄a. Da hheꞌesi, gi waaudi haa gi ibiidi, maraiya da tlaa⁄a da didirige daa Etaamuge waara.
9 Da hheꞌesi, Wafiliisiti gi ilakhiinaaꞌadiri, gi tluhhusiri kambii gooina hhapee da Yuudage, haa gi iliitlairi yaamu gu Leehi. 10 Kabiraa da Yuuda gigi maasiri inay tuba, “Haani soꞌoy khaydiri ma qwaatlidiri haa dandiray?”
Inay gigi ilaki⁄isiri tuba, “Dandiray hanti khayni, ma oowani Saamsooni, magu laqani, idoo ina gooay giyaani laqi dandiray.”
11 Da hheꞌesi, hida elefu tami gu kabiraa da Yuuda, gi iliihadakayri Saamsooni yade maraiyatiray da tlaa⁄a da didirige da Etaamu haa sugugi kaayri ina tuba, “Ugu hhidintaa tuba Wafiliisiti hindoó tawaalinay dandiray? Inkoo, ti idoo mala haã sandii yonditi?” Ina gigi ilaki⁄isi tuba,
“Ana hanti yondiidi teesaaqay, idoo inay gooay giyaa yondiidiri daqa dooii.”
12 Inay sugugi kaayri tuba, “Dandiray hanti khayni magu khiidini haa magu hiilu⁄ani dabaiĩ gu Wafiliisitige.”
Saamsooni sigigi kaay inay tuba, “Inkoo, unkuray loi sini seelintee tuba, hani gaasidaaiiba.”
13 Inay gugi ilaki⁄isiri tuba, “Dandiray hagu gaasanaaba, haguti khiidina kilesi haa gugii lu⁄ana dabaiĩ koinay.” Da hheꞌesi, gugi khiidiniri hari hhagumeeraa cada gu ⁄abi haa gugii ca⁄asiri teꞌesaa maraiyago. 14 Qatlay ina giyaa iliidaadaausi yaamu gu Leehige, Wafiliisiti gwaagi iliitlairi tay maahhaminay. Teꞌesii, Muuna gu Taataa Iliitleemu yaagi iliikhay Saamsooni hari ⁄uuru. Hhagumeerii daraa khiidimi dabaiĩ kosii gi kereꞌemidiri ubee, puteeri pahha diginiĩ iliinaahhaꞌadi ha aslaa, hhagumeerii hhakee kosi gi huhuiri hhapeege dabaiĩ kosaa. 15 Teꞌesii, Saamsooni gi arimi faraa da ⁄abi da tlanqaatu gu daqway, gigii oy, gi cu⁄i hida elefu leẽ hari faratee.
16 Teꞌesii, Saamsooni gi kaay tuba,
“Hari tlanqaatu gu daqway,
upaiĩ haa upaiĩ gu tuueenaa.
Kara, hari tlanqaatu gu daqway,
haã cu⁄i hida elefu leẽ.”
17 Qatlay ina giyaa iliihheꞌesi gimba, gii lihhi faratira da tlanqaatu, daqatee dagarigi ay uma na Ramaati-Leehi, maꞌaana dosi na oõ gu tlanqaatu.
18 Da hheꞌesi, Saamsooni gi arimi wakhaa hari khisla. Ina gi firimi Taataa Iliitleemu gi kaay tuba, “Ye Iliitleemu, ugu siniĩ hadisidi ana yondimiisay googu kaba⁄ati da didiri. Inkoo, haniti maydaa ma gwaai hari wakhaa, haa gii huua dabaiĩ gu hida hhankii doóba daba⁄u?” 19 Da hheꞌesi, Iliitleemu gi tlaaꞌasi bonda yade Leehige, teꞌesii maꞌay yaagii ca⁄iri. Saamsooni gi kitahhi maꞌay hhakee haa gi slay ⁄uuru kara. Teesaaqay hhahhiyatee dagarigi ay uma na Eeni-Hakoore,a hhaahiyatee wanta haa letuti naqatloo yade yaamu gu Leehige.
20 Saamsooni gi ilabuꞌumiisay gu Waisraeeli tleehhidi qoomay gu koraraa mibeeri cada, qatlay Wafiliisiti giyaa iliitawaaliniri hhapee dooina.