Khaboo da Saamsooni
14
1 Baloo waka, Saamsooni gii gweegwe⁄edi yaamu gu Timunaage, gi arimi yade sagameeriya waka Filiisitoꞌoo. 2 Qatlay giyaa iliiki⁄i ayage, gi kaay sa taataa gosi haa iyoo dosi tuba, “Ana haani arimi sagameeriya waka Filiisitoꞌoo, yade yaamu gu Timunaage, inkoo sini khabintee ma hadee doy tleehhiti.”3 Taataa gosi haa iyoo dosi sugugi kaayri tuba, “Hhakaa hadee ma lensee daqa hiidayuuma dooguu, baku daqa hida kotii, sa khaboo kayde daqa Wafiliisitige doóba daba⁄u?” Teesaaqay see, Saamsooni gi kaay sa taataa gosi tuba, “Sini khabintee sagameeriyatee, sa gimba ina hiniĩ muunaboo⁄eesidi ana hari khisla.” 4 Taataa gosi haa iyoo dosi yaa caahhiriiba tuba, gimbakee yaa daqa Taataa Iliitleemu dahhi. Taataa Iliitleemu yaa damaamidi amoo dari kaba⁄araa Wafiliisiti, sa gimba, qatlaykee Wafiliisiti naa tawaaliniri Waisraeeli. 5 Da hheꞌesi, Saamsooni gii gweegwe⁄edi Timunaage sliimaa haa taataa gosi haa iyoo dosi. Inay giyaa iliidayri qaymamu gu misabiibuge yade Timunaage, cirakiray diidawu gwaagi iliitlai yaa buruqi. 6 Teꞌesii, Muuna gu Taataa Iliitleemu yaagi iliikhay Saamsooni hari ⁄uuru, ina gii feehhisi diidawkee hari dabaiĩ kosi, ubee dakhwadimoo pahha guningii feehhisi, tay konaaba khasima see dabaiĩ kosii. Teesaaqay see, yaa kaayiiba gimbakee sa taataa gosi haa iyoo dosi. 7 Da hheꞌesi, ina gii gweegwe⁄edi yade Timunaage, haa gi cocoi haa sagameeriyatira. Sagameeriyatee gi muunaboo⁄eesidi Saamsooni hari khisla.
8 Balalu angaamaka giyaa iliicatiri, Saamsooni yaa ki⁄i yade Timunaage, sa khaboo sagameeriyatira. Qatlay giyaa ilii amooge wane, ina gii slakhadi kenga gu amooge, ma arimi sayni gu diidawukira. Yuꞌudiyaa, daa wana baꞌareeriya sayni gu diidawikiray haa daa wana dinu teꞌesii. 9 Ina gi fatli dinukee hari dabaiĩ kosi, haa gi ilakoomi hari hhiyuuma dosi, tay tosaa ⁄agina dinukee. Ina giyaa iliiday daqa taataa gosii haa iyoo dosi, sigigi hadisi dinukee inay see gi ⁄aginiri. Teesaaqay see, sigaa kaayiiba inay tuba, dinukee gwanti fatli sayni gu diidawgo.
10 Da hheꞌesi, taataa gu Saamsooni gi hadakay mara guũ sagameeriyatiray. Saamsooni gi ⁄isimi losona yade, idoo daa iliiwane gooay ou gu qaraiya da qatlaykee. 11 Taataa haa iyoo da sagameeriyatee gwaa iliianiri Saamsooni, yaagii leehhiri qaraiya mibeeri tami yaamugo, ma waniri sliimaa haa Saamsooni losonage.
12 Saamsooni gi kaay sa qaraiyatee tuba, “Ana sangu hatlima unkuray tikinaaniyoo. Bere hoó hiidahhasiday baraslawa tikinaaniyotee, balalu hhankii fanqu gu losonage, ana sangoo hadisa qayroo mibeeri tami gu ⁄abakwi poy haa qayroo wakinay mibeeri tami gu losona. 13 Teesaaqay see, bere hangoóba hiidahhasa baraslawa, unkuray sinoó hadisiday ana qayroo mibeeri tami gu ⁄abakwi poy haa qayroo wakinay gu losona mibeeri tami.” Inay gugi ilaki⁄isiri tuba, “Ee, hatlimi maga akhasani.”
14 Ina sigigi kaay inay tuba,
“Waꞌay gu ⁄agimiisaygo,
daay ca⁄i idoo da ⁄agoo,
waꞌay kosaa gu kooma ⁄uuru,
daay ca⁄i idoo da nuunuqa.”
Qoomay gu balalu tami qaraiyatee yaa hiidahhasiriiba ilaki⁄isa tikinaaniyotee.
15 Baloo da cigahhage, gi kaayri sa hadee da Saamsooni tuba, “Aare nanaami hhawata googi, ma sandi kaay tikinaaniyoti, bere suti, igi hagiti da⁄ana hari aslaa, sliimaa haa hida goõ gu mara gu taataa googi. Inkoo, unkuray handaati kwahhasuusidirii tiꞌii, mandi afii⁄utlidiri khooslay goori ga kone?”
16 Da hheꞌesi, hadee da Saamsooni gi ⁄aa⁄adi pandaa dosii, haa sugugi kaadi tuba, “Ugu haniti wakida ana! Hani slaꞌadaaba sumuku. Ugu haã hatlinti tikinaaniyoo sa hida koi, teesaaqay see, ugu siniĩ kaadiiba ana ilaki⁄isa dosi.” Saamsooni sagagi kaay tuba, “Haã kaayiiba samati taataa goy, gimati iyoo doy see, igi sigi soꞌoy iliikaawa?” 17 Hadee dosi gi ilakonti ⁄aa⁄imu pandaa dosii, balalu hhakee goõ fanqu gu losona. Teesaaqay, baloo da fanquge, Saamsooni gi kaay sa hadee dosi, sa gimba gwaa iliiquraaru⁄uda hari khisla. Hadee da Saamsooni gi ilakeesidi sa hida kosi tikinaaniyotee.
18 Baloo da fanquge, letu giyaa ilii kahhade hiihuua, hhawatee gu yaamu gi kaayri sa Saamsooni tuba,
“Ti idoo mala da cuua dinu gooay?
Ti idoo mala da kooma ⁄uuru diidaw gooay?”
Saamsooni sigigi ilaki⁄isi inay tuba,
“Bere haã aloo dooslidaaiiba hari tiiniya doy,
etaa haã aloo hiidahhasidaaiiba baraslawa tikinaaniyoo doy.”
19 Teꞌesii, Muuna gu Taataa Iliitleemu yaagi iliikhay Saamsooni hari ⁄uuru, ina gi waaudi yaamu gu Asikeloonige, gi cu⁄i hhawatee mibeeri tami haa gii oy qayroo koina. Ina gi hadisi qayroo hhakee sa hhakira guũ baraslawee tikinaaniyoo dosi. Da hheꞌesi gi waaudi, gi ki⁄i aya gu taataa gosii haa iyoo dosi, tay kona qupidaa gu dihhi. 20 Teesaaqay, hadeti da Saamsooni dagagi taatahhi sa danaꞌa gosi, hiĩ gwaa amoo leehhisimoo gosi balotira ilee da khaboo.