Hiidawaraa da Saamsooni
13
1 Waisraeeli gi yondiidiri kara tlakwaroo pandaa da Taataa Iliitleemuge. Teesaaqay, Taataa Iliitleemu gigi may digima tawaalimi ha Wafiliisiti koraraa mibeeri cigahha.2 Qatlaykee, yaa wana heedi waku gu yaamu gu Soora, uma gosi naa Manoowa, gu kabiraa da Daani. Ina yaa kona hadee, hadetee yaa mogombitoꞌoo. 3 Letu waka, malayika gu Taataa Iliitleemu yaagi iliica⁄i hadetee haa sagagi kaay tuba, “Igi ti mogombitoꞌoo ha kontaaba yaꞌay. Teesaaqay see, igi ha slayda hubay haa hiidaada naw. 4 Inkoo, hangi ga⁄ayde, hhanti kitahhanta difaay baku idoo lensee doó ooniidisa, hhanti ⁄aginta idoo lensee da slasla⁄iima, 5 sa gimba, yuꞌudiyaa igi slayda hubay haa hiidaada naw. Quubu gu saga gu nakee etaa dugu hhanti hhaadi, sa gimba nakee dugumaati tlintiꞌisi sa Iliitleemu guraꞌa gu iyoo dosaa. Ina tlaatleesi ilabuꞌuru Waisraeeli deneꞌee kosi dabaiĩ gu Wafiliisitigo.”
6 Da hheꞌesi, hadetee gi kaawa kaydi sa hhawata gosi tuba, “Heedi gu Iliitleemu hinaani iliikhay ana. Kalay gosi hinti kalay gu malayika gu Iliitleemu pahha, gu hiitlaꞌameedeesa hari khisla. Ana haguũ maasiiba yaani kaadahhi, gimati ina see, siniĩ kaayiiba uma gosi. 7 Teesaaqay see, ina hiniĩ ilakaay tuba, ‘Hiiloayda haa hiidaada naw. Kara hiniĩ ilakaay tuba, hhanti kitahhada difaay, baku idoo lensee doó ooniidisa, hhanti ⁄aginta idoo lensee da slasla⁄iima. Nakee dugumaati tlintiꞌisi sa Iliitleemu, laqwaloo dosaa gwaaꞌaraa dosi naqatloo.’ ”
8 Da hheꞌesi, Manoowa gi firimi Taataa Iliitleemu, gi kaay tuba, “Ye Looimoo gu Goõ hagu firima, heedikira koku gaani ya⁄abidi daqa doorii, yaa khaye kara mandi caacaahhamisi, idoo gamaa iliiomine nakee damaa hiidaye.”
9 Iliitleemu gi akhasi firoo da Manoowa, malayika gu Iliitleemu gi iliihadakay kara hadetira, giyaa ilii qaymooge wante. Teesaaqay see, hhawata gosi Manoowa yaa wanaaba. 10 Hadetee gi tu⁄uti ciraai, gi eteeda kaydi hhawata gosi, sugugi kaadi tuba, “Yuꞌudiyaa heedikira gwaa iliica⁄u ana balotira, hinaani iliica⁄i kara!”
11 Manoowa gi waaudi haa gi sirakoomi hadee dosi daqa heedikira naqatloo. Giyaa iliiday daqa heedikiray gugi maasi tuba, “Ugu na heedikiraa gwaa gimbuusu haa hadee doy?” Heedikira gi ilaki⁄isi tuba, “Ana na ina.”
12 Da hheꞌesi, Manoowa gugi maasi tuba, “Qatlay gimba googu gimaa iliibuꞌudiye, kitlakwa da ibinaa da naki namaa mala haa yondu gosi namaa mala?”
13 Malayika gu Taataa Iliitleemu gi kaay sa Manoowa tuba, “Hadee doogu kwanda gi iliikonte yondiidu gimba goõ gaã ilafahhi ina. 14 Etaa, ina hhanti ⁄aginta sabiibu, hhanti kitahhanta difaay, baku gimati idoo lensee doó ooniidisa, baku gimati ⁄agoo idoo lensee doó slasla⁄eedeesa. Ina kwanda gi yondite gimba goõ, idoo ga ilii ilafahhi gooay.”
15 Manoowa gi kaay sa malayika gu Taataa Iliitleemu tuba, “Hhooa ibiidi, ma sugu ilakhuukhuꞌusani dakhwadimoo sa ugu.”
16 Malayika gu Taataa Iliitleemu gi ilaki⁄isi Manoowa tuba, “Hanimati tlaatlahhasidi see ma ibiidi, ha ⁄agimaaba ⁄agoo dooguna. Teesaaqay see, bere slaꞌada ilakhuukhuꞌusa sadaaka da da⁄araa, hadisi sa Taataa Iliitleemu.” (Sa gimba, Manoowa yaa caahhiiba tuba, hikee ti Malayika gu Taataa Iliitleemu.)
17 Teꞌesii, Manoowa gi maasi Malayika gu Taataa Iliitleemu tuba, “Sandi kaade uma googu na miyaa, qatlay gimbakee gaã gimbuusidi gimaa iliibuꞌudiye, dandiray magu muriidani.”
18 Malayika gu Taataa Iliitleemu gi ilaki⁄isi Manoowa tuba, “Ugu sa soꞌoy slaꞌada caahha uma goy? Sa gimba uma goy guti bakaꞌasagoo?” 19 Da hheꞌesi, Manoowa giioy dakhwadimokira sliimaa haa sadaaka da gubaraa, ina gi hadisi sadaaka sa Taataa Iliitleemu, teꞌesii rawaa gu hhafidage. Malayika gu Taataa Iliitleemu gi yondiidi gimba gu bakaꞌasa, qatlaykee Manoowa haa hadee dosi tooinaa khuꞌunay. 20 Qatlay buruburiya da aslaa giyaa ilii ooyiiyinte masabaahugo raw khuꞌusa, malayika gu Taataa Iliitleemu gi cindarooisi rawge waꞌay gu buruburiyateesii da aslaage. Manoowa haa hadee dosi giyaa iliianiri gimbaki, Inay gi khuupuuꞌumidiri hhapeege. 21 Malayika gu Taataa Iliitleemu yaa iliica⁄iiba kara Manoowa haa hadee dosi. Manoowa gi baraslayri tuba, hiĩ ti Malayika gu Taataa Iliitleemu.
22 Manoowa gi kaay sa hadee dosi tuba, “Gu lou ha kaka⁄ana, sa gimba haã arini Iliitleemu.”
23 Teesaaqay see, hadee dosi gugi ilaki⁄isidi tuba, “Bere Taataa Iliitleemu hiĩ aloo slai cu⁄uduũ dandiray, hiĩ aloo ⁄imbiyaaba sadaaka doori da da⁄araa haa sadaaka da gubara dabaiĩ kotaa, sindii laqanaaba gimbakee goõ, kara sindii kaayiyaaba ilakaawati goõ.”