Gau gu Yefiita haa kabiraa da Efurayiimu
12
1 Inkoo, giyaadimiisee da kabiraa da Efurayiimu gi eteediri sirikaarii dooina haa gi tlo⁄osiri duudu gu Yoridaani, gi dayri yaamu gu Safoonige daa ilii ibimaamidiye Yefiita. Da hheꞌesi, inay gi maasiri Yefiita tuba, “Haã soꞌoy qwatla kaydiri haa Waamooni haguba eteeda dandiray, ma sliimaa hadakayni haa ugu? Inkoo haguti da⁄ana ugu sliimaa haã mara googu see.”2 Teꞌesii, Yefiita gigi ilaki⁄isi inay tuba, “Ana sliimaa haa hida koi haa kona naanaqamoo gu didiru haa Waamooni. Ana hangwaa eteedi unkuray mani iliiaydiri, teesaaqay see, unkuray haa khaydiriiba mani ilabuꞌuntiri dabaiĩ koinaa. 3 Ana gaa iliiarimi unkuray hani iliiaydaaiiba, ana haa waaudi, ma qwatla kay haa Waamooni, tay muuna goy dabage wana. Teesaaqay see, Taataa Iliitleemu hindigi iliiay, gigi kaba⁄ani inay. Inkoo unkuray haani soꞌoy khaydiri tiꞌii, ma qwaatlidiri haa ana?”
4 Da hheꞌesi, Yefiita gii kurunkuri hida goõ gu hhapee da Gileyaadi, gi qwaatliri haa kabiraa da Efurayiimu. Hida gu Gileyaadi gi kaba⁄iri kabiraa da Efurayiimu, sa gimba Waefurayiimu yaa kaayri tuba, “Unkuray hida gu Gileyaadi ti lakidimiisee, haati lakitiri daqa kabiraa da Efurayiimugo haa kabiraa da Manaasego.” 5 Hida gu Gileyaadi gii ⁄utliri daqeemoo gu ilasegiiba guri tlo⁄omisu duudu gu Yoridaani, Waefurayiimu mari slanqadiri tlo⁄osa. Qatlay sliimaa daa iliica⁄iye lakidimiisay gu kabiraa da Efurayiimu, gi firina ma hiicati hari teꞌesa, hida gu Gileyaadi gu maasiyay ina tuba, “Ugu ti Efurayiimoo goo?” Bere ina ilaki⁄isi tuba, “Suti,” 6 inay sugugi kaayiyay tuba, “Naraꞌa, aare kaay gimbaki, ‘Shibolethi,’ bere ina kaay, ‘Siboleeti,’ ” sa gimba ina hingii dahhasiiba kaawa gimbakee naraꞌa, inay gugi ooyri haa gugi gaasiri teꞌesii daqeemoo hhakeesii guri tlo⁄omisu duudu gu Yoridaani. Waefurayiimu elefu mibeeri cigahha haa cada digaa cu⁄i qatlaykeesii.
7 Yefiita gi ilabuꞌumiisay gu Waisraeeli tleehhidi qoomay gu koraraa lahhoꞌo. Da hheꞌesi, Yefiita gi hhami, dugugi qaasi yaamu kosiige gu hhapee da Gileyaadige waara.
Ibisaani, Elooni haa Abidooni
8 Qariqaaqari Yefiita giyaa iliihhami, Ibisaani gu yaamu gu Beteleheemu, gi ilabuꞌumiisay gu Waisraeeli tleehhidi. 9 Ina yaa kona yaꞌay gu hhawatee mibeeri tami haa yaꞌay gu tigay mibeeri tami. Yaꞌay kosi gu tigay digigi khabiibimi ha hhawatee wakinay gu afamaraa gosiiba, yaꞌay kosi gu hhawatee sigigi khabiibimi sagameeru mibeeri tami gu afamaraa gosiiba. Ibisaani gi ilabuꞌumiisay gu Israeeli tleehhidi qoomay gu koraraa fanqu. 10 Ibisaani gi hhami, dugugi qaasi yaamu gu Beteleheemuge.
11 Qariqaaqari, Ibisaani giyaa iliihhami, Elooni gu kabiraa da Sabulooni, gi ilabuꞌumiisay gu Israeeli tleehhidi, qoomay gu koraraa mibi. 12 Da hheꞌesi, Elooni see gi hhami, dugugi qaasi yaamu gu Ayiyaloonige, hhapee da Sabuloonige.
13 Qariqaaqari, Elooni giyaa iliihhami, Abidooni nanku Hileeli gu yaamu gu Piratihooni, gi ilabuꞌumiisay gu Israeeli tleehhidi. 14 Ina yaa kona yaꞌay gu hhawatee mibeeri cigahha haa okookoiĩ mibeeri tami, gwaa iliidadaadawee daqwaai mibeeri fanqu. Ina gi ilabuꞌumiisay gu Israeeli tleehhidi, qoomay gu koraraa dagati. 15 Da hheꞌesi, Abidooni nanku Hileeli, Mpiratoonimoo gi hhami, dugugi qaasi yaamu gu Piratoonige gwaa hhapee da kabiraa da Efurayiimuge waaree, daqeemoo gu omeeri gu Waꞌamaleekige.