Yefiita ilabuꞌumiisay gu Israeeli tleehhida
11
1 Inkoo, hhapee da Gileyaadige yaa wana khamaslu gu gau, uma gosi naa Yefiita. Taataa gosi naa Gileyaadi haa iyoo dosi yaa slipalautoꞌoo. 2 Slime, Gileyaadi yaa kona yaꞌay wakinay daqa hadee dosii loi. Yaꞌay gu hadetee giyaa ilii dinaraarayri gi gusiniri Yefiita ayago, sugugi kaayri ina tuba, “Ugu kontaaba haaki da slawaraa aalimee daqa taataa gooraa, sa gimba ugu ti naw gu slipalautoꞌoo.” 3 Teesaaqay, Yefiita gi lakidi hhiee kosi gi ibinaa kay hhapee da Toobuge. Qatlay giyaa ilii Toobuge wane, hida gu ibinaa tlakwi hingigi ilagaasiri haa ina haa gugi sirakomamidiri ina.4 Qariqaaqari qatlay waku, Waamooni gi tlaatleesiri qwatla haa Waisraeeli. 5 Qatlay gau giyaa iliihamuudi, Waisraeeli, gaduũ gu hhapee da Gileyaadi gi ayri Yefiita yade hhapee da Toobuge. 6 Inay giyaa iliidayri Toobuge, sugugi kaayri tuba, “Khoca, harigiyaadi sirikaarii doori, handi iliiayde, ma qwaatlani haa Waamooni.”
7 Yefiita gi kaay sa giyaadimiisetee da Gileyaadi tuba, “Unkuray hanaa wakidiriibaslii haa hanigi gusintiri ana, ma hiica⁄i mara gu taataa gooaa? Inkoo, sinaani soꞌoy iliikhaydiri ana, tay maanage wantay?”
8 Giyaadimiisetee da hhapee da Gileyaadi sugugi kaayri Yefiita tuba, “Inkoo, dandiray handii fookidani daqa dooguu, ma waauti haa dandiray, ma qwatla kaydi haa Waamooni. Ugu giyaadimiisay goori gu hida goõ gu Gileyaadi tleehhita.”
9 Yefiita gi kaay sa gaduũ hhakee gu Gileyaadi tuba, “Bere hani ki⁄isiday ayage, ma qwaatli haa Waamooni, Taataa Iliitleemu gigii lu⁄i dabaiĩ koii inay, gu lou ana hoo giyaadimiisay googuna tleehhida?”
10 Giyaadimiisee da Gileyaadi gi kaayri sa Yefiita tuba, “Taataa Iliitleemu na ilatlaymiisay goori tleehhidi. Gu lou, teesaaqay laqana gaã iliikaadi gooay ugu.” 11 Yefiita gi waaudi haa gaduũ hhakee gu Gileyaadi, hida gugi giyaadimiisay haa khamaslu gooina gu gau tleehhidisiri. Yefiita gi ilaki⁄i kaawa gimba gosi giyaa hiifadidi pandaa da Taataa Iliitleemuge yade Misipaage.
12 Da hheꞌesi, Yefiita gi ya⁄abi ya⁄abimiisee dosi daqa mutemi gu Waamoonige, sugugi kaayri tuba, “Naanaqamoo mala konta haa dandiray, hanti amoolaa khaydi sa ilii tlaꞌaraa hhapee doori?”
13 Mutemi gu Waamooni gi ilaki⁄isi ya⁄abimiisetee da Yefiita tuba, “Unkuray Waisraeeli gaa iliica⁄adiri hhapee da Misirigo, haatii oodiri hhapee dooi, tlaatleesi duudu gu Arinoonigo, duudu gu Yabooki haa duudu gu Yoridaani naqatloo. Inkoo, sinaa ki⁄iside hari qasaw hhapetee tooi.”
14 Yefiita gi kara ya⁄abi ya⁄abimiisee dosi daqa mutemi gu Waamoonige, 15 ma sugu kaayri tuba, “Dandiray, Waisraeeli haa hiiowaniiba hhapee da Wamoaabu ma hhapee da Waamooni see. 16 Qatlay Waisraeeli giyaa iliica⁄iri hhapee da Misirigo, yaatii catiri hari kongoqomee yaati amoolaa dayri tlawa da didirige da Saamu, haa gi dayri Kadeesi naqatloo. 17 Da hheꞌesi, Waisraeeli gi ya⁄abiri ya⁄abimiisee daqa mutemi gu Edoomuge, magu firiniri tuba, ‘Hhooa handi mayde, ma hiicatani hari hhapee doogu,’ mutemikee gi tosaa siꞌi. Slime, ya⁄abimiisetee gi firiniri mutemi gu Moaabu, ina see gi tosaa siꞌi. Teesaaqay, Waisraeeli gi meetiri Kadeesige.
18 Da hheꞌesi gi hhiyuudiri gii catiri hari kongoqomee hari amoo da hiikhangaꞌasa da hhapee da Edoomu haa Moaabu, yaati amoolaa dayri hari bara da ilacindoo gu rawaa gu hhapee da Moaabu. Teꞌesii gi tooinaa tluhhusiri kambii hari tlo⁄osaa gu duudu gu Arinooni. Inay yaa hiiguniriiba hhapee da Moaabuge, sa gimba Arinooni naa digimaa gooina.
19 Teꞌesii Waisraeeli gi ya⁄abiri ya⁄abimiisee daqa mutemi Sihooni gu Waamoori yade Hesiboonige, gugi firiniri tuba, ‘Hhooa, handi mayde, ma hiicatani hari hhapee doogu, ma daani hhapee doorii.’ 20 Teesaaqay see, Sihooni yaa ⁄imbiiba Waisraeeli, ma hiicatiri hari hhapee dosi. Sihooni gii kurunkuri sirikaarii dosi goõ, gi tluhhusi kambii yade tongoo da Yahaasage gi tosaa qwaatli haa Waisraeeli.
21 Taataa Iliitleemu, Iliitleemu gu Israeeli, gii lu⁄i Sihooni sliimaa haa sirikaarii dosi dabaiĩ gu Waisraeelige, gigi tooinaa kaba⁄iri. Teesaaqay, Waisraeeli gii oyri hhapee goõ da Waamoori gwaa ibimaamidee hhapeteesii. 22 Waisraeeli gii ⁄utliri hhapee goõ da Waamoori tlaatleesi duudu gu Arinoonigo, duudu gu Yabooki naqatloo. Slime kongoqomeego duudu gu Yoridaani naqatloo.
23 Inkoo, Taataa Iliitleemu, Iliitleemu gu Israeeli, gi gusimi Waamoori pandaa da Waisraeeligo. Ugu ti slaꞌadaa mandi afiioodi hhapee doori? 24 Ugu buꞌudisi hari idotee sugwaa hadisi ha Kemoosi, iliitleemu googu. Nama teesaaqay leẽ, kila hhapee sandaa hadisi haa Taataa Iliitleemu, Iliitleemu goori, hatee ti toori. 25 Ugu goo ilatahhade kontaa ⁄uuru ba⁄ay da Balaaki, nanku Sipoori, hiĩ gwaa mutemi gu hhapee da Moaabu? Ina hingaa kabaaba⁄iyaaba baku yaa gauusiiba haa Waisraeeli. 26 Koraraa miyaa tami, Waisraeeli yaa yaamu gu Hesiboonige ibimaamidiyay haa tongagu kosi, yaamu gu Aroyeerige haa tongagu kosi, haa yaamu goõ, gwaa kenga gu duudu gu Arinooni waaree. Qatlaykee goõ, ugu saa soꞌoy maydi hiiowa? 27 Ana haadakusiiba idoo lensee, ugu naa dakusida daqa dooii, hari amoo da gauusa haa ana. Inkoo, Taataa Iliitleemu, hiĩ gu ilabuꞌumiisay, letuti loi ilabuꞌuna naanaqamoki tla⁄aã gu Waisraeeli haa Waamooni.” 28 Teesaaqay see, mutemi gu Waamooni, yaa iliiqaasiiba ya⁄abotee da Yefiita.
Seeliru gu Yefiita
29 Da hheꞌesi, muuna gu Taataa Iliitleemu yaagi iliikhay Yefiita. Ina gi tosaa waaudi haa gii cati hari hhapee da Gileyaadi haa Manaase, gi ki⁄i yaamu gu Misipaage gu hhapee da Gileyaadige waaree. Teꞌesaa, gi ilakoomi khocu pandaage haa sirikaarii dosi hhapee da Waamooni naqatloo. 30 Yefiita gi seelimi pandaa da Taataa Iliitleemuge gi kaay tuba, “Bere, Waamooni hagiyoo hiilu⁄uda dabaiĩ koii, 31 qatlay goo iliiki⁄e ayage, haani kaba⁄i Waamooni gaugo, idoo doó hiica⁄a da pandaa, afamaraa gu mara gooaa, sa amoodabaawa ana, hatee gooti hadisa sadaaka da da⁄araa sa ugu.”
32 Da hheꞌesi, Yefiita haa sirikaarii dosi gi tlo⁄osiri duudu gu Yoridaani, gi gauusiri haa Waamooni. Taataa Iliitleemu gii lu⁄i Waamooni dabaiĩ gu Yefiitage. 33 Yefiita gi slay kaba⁄amuu gu didiru, gii ⁄utli yaamu mibeeri cada, gwaa tla⁄aã gu yaamu gu Aroyeerige waaree, haa tongagu gwaa niini⁄idee yaamu gu Miniiti haa Abeeli-Keramiimu. Waisraeeli gi kaba⁄iri Waamooni.
34 Yefiita giyaa iliikikaaki⁄iye aya gosii yade Misipaage, yuꞌudiyaa, sagameeriya dosi yaagii ca⁄adi sa amoodabaawa ina, tay tosaa difida ingima haa tosaa seehhuusida. Sagameeriyatee, leẽ kilesi ginaa kona, yaa konaaba naw lensee ma hotu waka see da cadii. 35 Yefiita giyaa ilii arimi hotosi, gi feehhimisi qayroo kosi sa slahhaaꞌamee haa gi kaay tuba, “De hotoy! Igi haã ⁄isinti ana ma li⁄i haa gi mooroꞌoda, sa gimba haã seelimi pandaa da Taataa Iliitleemuge, ana hiidahhasaaba hiifookida seelirukee koi.”
36 Sagameeriyatee tosi gi kaadi tuba, “Taataa, bere haã seelinti pandaa da Taataa Iliitleemuge, yondiidi daqa dooii, idoo gaã ilii seelinti gooay, sa gimba suguũ qay kaba⁄amuu gu didiri daqa fa⁄ayaa dooguu Waamooni.” 37 Da hheꞌesi, ina gi kaadi sa taataa gosi tuba, “Hagu firima idoo leẽ kilesi, ugu, sini qayde slehheeri cada, ma hadakay haa deneꞌee koi onke, ma ⁄aa⁄imu kayni haa inay, sa gimba ana ti gwaaꞌa, kahha kikitoꞌoo.”
38 Taataa gosi gi kaay sa hotosi tuba, “Taa⁄a yade slehheeri hhakee gu cada.” Teesaaqay, ina gi tosaa waauti sliimaa haa sagameeru danaee kosi, inay gi gaiidiri sa kikituꞌuumaa dosi yade omeerige, sa gimba ina hiti gwaꞌata dagakahhi khaboo. 39 Qariqaaqari hiifaakoo da slehheeri hhakeesii gu cada, yaagi ki⁄idi daqa taataa gosii. Taataa gosi gi yondiidi daqa dosii, idoo giyaa ilii seelimi gooay. Sagameeriyatee yaati kahhada kikitoꞌoo.