Toola
10
1 Qariqaaqari, Abimeleeki giyaa iliihhami, Toola nanku Puuya, Puuya nanku Doodo gu kabiraa da Isakaari, yaagii ca⁄i sa ilabuꞌuru gu Waisraeeli. Toola yaa taysi ibimaamidi Samiirige, hhapee da kooma omeeri da Efurayiimu. 2 Ina yaa ilabuꞌumiisay gu Israeeli qoomay gu koraraa mibeeri cada haa tami. Da hheꞌesi gi hhami, haa dugugi tosaa qaasi yade hhapee da Samiirige.Yayiiri
3 Qariqaaqari Toola giyaa ilii hhami, dagii ca⁄i Yayiiri gu Gileyaadi, qoomaay gu koraraa mibeeri cada haa cada, ina see gi ilabuꞌumiisay gu Waisraeeli tleehhidi. 4 Yayiiri yaa kona yaꞌay gu hhawatee mibeeri tami, gwaa iliidadaadawee daqwaai mibeeri tami. Slime yaa konay yaamu mibeeri tami hhapee da Gileyaadige, haã letuti naqatloo doó eteedine Hawooti-Yayiiri. 5 Yayiiri gi hhami, ina see dugugi qaasi taysi Kamoonige.
Waisraeeli mawaraa ⁄imba Iliitleemu
6 Kara, Waisraeeli gi yondiidiri tlakwaroo pandaa da Taataa Iliitleemuge, gi firiiriniri iliitleemamee niĩ Mabaali, Maasihirooti, haa iliitleemamee gu Araamu, Sidooni, Moaabu, Amooni haa iliitleemamee gu Wafiliisiti. Inay gi mayri Taataa Iliitleemu, ma yondiida see sugwaa kara yondiidiriiba. 7 Teesaaqay, Taataa Iliitleemu gi qupidi hari khisla sa Waisraeeli, ina gigii lu⁄i dabaiĩ gu Wafiliisitige haa Waamoonige. 8 Koraraa mibi haa dagati, Wafiliisiti haa Waamooni gi labaꞌasiri haa gii kala⁄iri Waisraeeli gwaa yade ibimaamidee Gileyaadige, hhapee da Waamoorige dari bara da ilacindoo gu rawaa gu duudu gu Yoridaani waara. 9 Waamooni see gi tlo⁄osiri duudu gu Yoridaani, ma gauusiri haa kabiraa da Yuuda, Benyamiini haa Efurayiimu. Waisraeeli gi slayri maana da didiri hari khisla. 10 Waisraeeli gi ilii ⁄aa⁄iri Taataa Iliitleemu gi kaayri tuba, “Haã yondiidani tlakwaroo pandaa dooguu, sa gimba haguũ mayni ugu Iliitleemu goori haa gi yondiidani sa iliitleemamee da Mabaali.”
11 Taataa Iliitleemu gi kaay sa inay tuba, “Ana hanaabaslii ilabuꞌuru unkuray daqa Wamisirigo, Waamoori, Waamooni, Wafiliisiti, 12 Wasidooni, Waꞌamaleeki haa Wamidiyaani giyaa iliikala⁄iri unkuray, hanigi ilii⁄aa⁄adiri, ana hangugi ilabuꞌumi dabaiĩ koinaa? 13 Teesaaqay see, unkuray haniĩ maydiri, gi tlaatleesidiri yondiida sa iliitleemamee wakinay. Inkoo, ana hangu kara afiigweedaaba unkuray. 14 Unkuray taa⁄amida ilii⁄aa⁄aw iliitleemametee gaa hiileehhidiri, mangu ilabuꞌuniri maana doogunaago!”
15 Teꞌesii, Waisraeeli gi kaayri sa Taataa Iliitleemu tuba, “Gu lou, haã yondiidani tlakwaroo. Handi ⁄agitinte ga iliislaꞌade gooay. Teesaaqay see, haguũ tlaatlaqasani, letuti handi ilabuꞌunte dandiray.” 16 Da hheꞌesi, inay gi kwahhiri segenge iliitleemamee gu dahaa, gi tlaatleesiri kara yondiidu sa Taataa Iliitleemu. Taataa Iliitleemu yaa hiidahhasiiba hiikaasa arimaa maana da Waisraeeli.
17 Waamooni gii kurunkuridiri gi tooinaa tluhhusiri kambii gooina taysi Gileyaadige. Waisraeeli see gii kurunkuridiri haa gi tluhhusiri kambii gooina taysi Misipaage. 18 Waisraeeli haa giyaadimiisee dooina hingigi maamisiri tuba, “Miyaa na tlaatleesi gauusa haa Waamooni? Heedi gu teesaaqay laqa, ina na giyaadimiisay tleehhidi gu hida goõ goó ibiidee hhapee da Gileyaadige.”