Abimeleeki
9
1 Letu waka, Abimeleeki, nanku Yerubaali, gi hadakay taysi yaamu gu Sekeemuge, daqa hhiee haa hiidayuuma goõ da iyoo dosi, sigigi kaay tuba, 2 “Maasa giyaadimiisee da Sekeemu ubee, ‘Gimba haloo na hhoi daqa doogunay. Unkuray danguti tawaalina ha yaꞌay goõ gu hhawatee gu Yerubaali baku naw leẽ kilesi nangu tawaalina? Slawaw, ana ti ceedee dooguna.’ ” 3 Hhiee gu iyoo dosi giyaa iliiakhasiri gimbakee, inay gi kakaaniri gimbakee sa giyaadimiisee goõ da Sekeemu, giyaadimiisetee gi ⁄imbidi sirakooma Abimeleeki, sa gimba giyaa kaay tuba, “Ina ti hhia goori.” 4 Teesaaqay, giyaadimiisee da Sekeemu gii oyri sekeeli mibeeri fanqu da feesa mara gu didirugo gu Baali-Beriiti. Abimeleeki feesatee giraati buaaidi hida gwaa daraarabee haa hida goóba yondiida yondu lensee, ma ⁄imbiri sirakooma ina. 5 Abimeleeki hingigi sirakomamidi haa inay, gi hadakayri mara gu taataa gosii taysi Ofiraage. Teꞌesii gi cu⁄iri hhiee kosi mibeeri fanqu rawaa gu tlaa⁄a lenge. Teesaaqay, Yotaamu, yaꞌaycataa gu Yerubaali, yaa ba⁄ami, sa gimba ina yaa nahhadi. 6 Da hheꞌesi, giyaadimiisee goõ gu Sekeemu haa Beeti-Miilo, higii kurunkuridiri khaimoo gu mualoonige, gwaa ilaciyaa waara haa tlankoo taysi Sekeemuge. Teꞌesii, inay gii leehhiri Abimeleeki ma mutemi gooina tleehhidi.7 Yotaamu sugwaa iliikaay gimbakee, gi ilakhiinaaꞌadi cina da oõ gu Gerisiimuge, gi kaay hari afoo da didiri tuba, “Hani itatiisidee, ye giyaadimiisee da Sekeemu, bere slaꞌaday Iliitleemu mangu itatiisi unkuray see. 8 Letu waka, khai gi dabiidu kayri mutemi gooina, magu maakhiri du⁄iya. Inay gi kaayri sa khaimoo gu miseyituuni tuba, ‘Ugu, handi tawaalinte dandiray.’
9 Khaimokee gu miseyituuni gi ilaki⁄isi tuba, ‘Unkuray goo ilatahhadee, ana hiidahhasaa mawaraa yondu gooi gu hiica⁄amisu du⁄iya, doó muriidiye hari khisla ha iliitleemamee haa hida, gi tawaaliru kaw khai?’
10 Da hheꞌesi, khai gi kaayri sa ⁄ancimoo tuba, ‘Ugu khoca, handi tawaalinte dandiray.’
11 ⁄ancimoo gi ilaki⁄isi inay tuba, ‘Unkuray goo ilatahhadee, ana hiidahhasaa mawaraa yondu gooi gu ⁄aamuuda ⁄aamu gu hhou haa gu nuqu, gi tawaaliru kaw khai?’
12 Da hheꞌesi, khai gi kaayri sa musabiibu tuba, ‘Ugu khoca handi tawaalinte dandiray.’
13 Musabiibu gi ilaki⁄isi inay tuba, ‘Unkuray goo ilatahhadee, ana hiidahhasaa mawaraa yondu gooi gu hiica⁄amisu difaay, hiĩ goó hhaꞌaleesa iliitleemamee haa hida, hangugi ilahufidukaw sa tawaaliru gu khai?’
14 Hiifaakoge, khai goõ gi iliihadakyri khaimoo gu leqeewaa haa gi kaayri sa khaimokee tuba, ‘Ugu khoca, handi tawaalinte dandiray.’
15 Khaimoo gu leqeewaa gi ilaki⁄isi tuba, ‘Bere, gu lou, unkuray hani slaꞌaday hiileehha, hanigi maakhaday du⁄iya ana, ma mutemi googuna tleehhidi, khocaa ibiida mahhatu gooii. Bere, slaꞌadaaiiba teesaaqay laqaraa, aslaa hiica⁄ade leqeewaa koaa haa gi hhamisida khai gu miereesi gu Lebanoonige waaree!’ ”
16 Yotaamu gi ilakoomi kaawa tuba, “Inkoo, goo ilatahhadee, hanti yonditiri hari muuna gu hhou haa hari muree, Abimeleeki gi mutemi tleehhidi? Unkuray goo ilatahhadee hanti yonditiri hhoinay sa Yerubaali haa hida gu mara gosi, idoo daa iliiboo⁄i gooay? 17 Unkuray ilahudeesa taataa goy yaati naahhi aloo hhamisi ibinaa dosi, gi gauusi sa unkuray haa hangugi afiigweedi dabaiĩ gu Wamidiyaanigo. 18 Letuti haã iliitlaꞌadiri hida gu taataa gooi haa gi cu⁄udiri yaꞌay gu hhawatee mibeeri fanqu rawaa gu tlaa⁄a lenge. Kara, unkuray gii leehhidiri Abimeleeki, nanku tongitoꞌoo da taataa, ma mutemi gu hida gu Sekeemu tleehhidi, sa gimba ina ti hiidayuumoo googuna. 19 Inkoo, ye giyaadimiisee da Sekeemu, bere gimbakee gunti yonditiri hari muuna gu hhou haa hari amoo da muriida Yerubaali haa hida gu mara gosi, hhaꞌaluumida sliimaa haa Abimeleeki, ina see ma hhaꞌaluudi sliimaa haa unkuray. 20 Bere teesaaqay gooba, aslaa yaa hiica⁄ade daqa Abimeleekigo haa gi hhamisida hida gu Sekeemu haa Beeti-Miilo. Kara aslaa yaa hiica⁄ade daqa hida gu Sekeemuugo haa Beeti-Miilo haa gi hhamisida Abimeleeki.”
21 Da hheꞌesi, Yotaamu giyaa iliihheꞌesi kaawa teesaaqay, gi tosaa lakidi yaamu gu Beerige. Ina gi ibiidi taysi, sa gimba yaa tlaꞌamuudi hhia gosi Abimeleeki.
22 Qariqaaqari, Abimeleeki gi tawaalimi hhapee da Israeeli koraraa tami. 23 Iliitleemu haraagi khay muuna gu tlaku tla⁄aã gu Abimeleekige haa giyaadimiisee da Sekeemu, inay gugi siꞌiri Abimeleeki. 24 Iliitleemu giyaa ⁄agitiitina giyaadimiisee da Sekeemu sliimaa haa hhia gooina Abimeleeki, sa gimba gu darabimaa giyaa yondiidiri daqa yaꞌay gu hhawatee mibeeri fanqu gu Yerubaali. ⁄agitiru gu cu⁄udunkee gwaa slayri inay, sa gimba Abimeleeki giyaati cu⁄i inay, hari amoo da iliiawaraa ha hida hhakee gu Sekeemu. 25 Hida gu Sekeemu gi qaasiri hida gu iliitlaee Abimeleeki yaqaa cina da onko. Hida hhakee gii ⁄utliri khooslay gu hida goõ, gwaa hiicatee hari ilaciyaa koina. Abimeleeki sugugi kaay gimbakee.
26 Inkoo, heedi waku yaa wana, uma gosi naa Gaali, nanku Ebeedi. Ina gi looy sliimaa haa hhiee kosi, gi ibinaa kayri Sekeemuge. Giyaadimiisee da Sekeemu gugi ⁄imbiri ina. 27 Inay gii ca⁄iri qaymamu koinay gu sabiibuge sa buꞌuru gu sabiibu, haa gigi tinqiniri. Da hheꞌesi, inay gi boo⁄imisiri difaay gi losonuusiri mara gu didiruge gu iliitleemu gooinay. Teꞌesii qatlay giyaa ilii ⁄agiiginee haa kitahhaahhanee gi laumisiri Abimeleeki. 28 Gaali, nanku Ebeedi, gi kaay tuba, “Abimeleeki na miyaa haa Sekeemu na miyaa? Dandiray gi yondiidana sa Abimeleeki? Inkoo, ina ti nanku Yerubaaligo? Sebuuli caba na yondimiisay gosi gu didiru? Unkuray, Gidiyooni haa Sebuuli yondiida sa hida gu Hamoori, taataa gu yaamu koti gu Sekeemu! Inkoo, dandiray soꞌoy yondiidana sa Abimeleeki? 29 Bere hida hhanki hinti aloo tawaaloo dooii wanay, haguũ aloo baca Abimeleekikee. Ana suguũ aloo kaawa ina ambee, ‘Roogisii sirikaarii doogu, goo hheꞌeside, laa asu khayda, ma gauusani haa ugu!’ ”
30 Sebuuli, yondimiisay gu didiru gu yaamu gu Sekeemu, giyaa ilii akhasi gimba gu Gaali, nanku Ebeedi, gi slahhaai hari khisla. 31 Sebuuli gi ya⁄abi ya⁄aboo hari hhaaboo daqa Abimeleekige, gi kaay tuba, “Gaali, nanku Ebeedi, sliimaa haa hhiee kosi, hindii guniri yaamu gu Sekeemuge, ilafahhaahhadiyay hida gu yaamu hhakee, ma gauusiri haa ugu. 32 Inkoo, hari amasi hhanki, ugu ki⁄e haa sirikaarii doogu, ligii caagwa kayday qaymamuuge ilaciyaa haa yaamu. 33 Hari heetlawaa, qatlay letu giyoo iliibiifiꞌiside, iliitlaꞌaw yaamu hhakee. Qatlay Gaali sliimaa haa sirikaarii dosi giyoo iliica⁄iyee, ma gauusiri haa unkuray, hagiyooti yonditay, idoo ga iliidahhasidee.”
34 Hari amasi, Abimeleeki sliimaa haa sirikaarii dosi goõ gi waaudiri yaamu gu Sekeemuge. Abimeleeki gi deehhimi raqoo cigahha haa gi nahhamidu kayri ilaciyaa haa yaamu. 35 Gaali, nanku Ebeedi, gii ca⁄i khoorooge haa gi qadidi kaꞌafu gu yaamuge. Qatlaykee Abimeleeki haa sirikaarii dosi yaagii ca⁄iri daqatiraa giyaa ilii nahhamidiri, magii caagwiri inay.
36 Gaali giyaa ilii arimi inay, gi kaay sa Sebuuli tuba, “Yuꞌudiyaa, hida yaa hii⁄eemaamidiyay cinaanaa gu omeerigo!”
Sebuuli gi kaay sa ina tuba, “Ugu mahhateerii gu omeeri giniĩ anti, ubee ti hida pahha.”
37 Teꞌesii, Gaali gi kara kaay tuba, “Yuꞌudiyaa! Hida yaa hii⁄eemaamidiyay tla⁄aã gu hhapeege haa raqa waka yaa yada dahhada bara da khaimoo gu Mualooni gu Qwasleeri.”
38 Da hheꞌesi, Sebuuli gi kaay sa Gaali tuba, “Inkoo, hiiduubidu googu kale wana? Caba ti ugu naa kaadi tuba, ‘Abimeleeki ti miyaa? Sugu soꞌoy yondita?’ Inkoo, hhakee na hida gaa qooqiti, taa⁄a gauusi haa inay!”
39 Gaali gii ca⁄i, gi giyaadi sa giyaadimiisee da Sekeemu, ma gauusiri haa Abimeleeki. 40 Gaali dugugi kaba⁄i haa gi tosaa lakidi, tay dugugi tosaa sirakoomi alungo ha Abimeleeki. Hida wa⁄a digigi ilaqaꞌadi haa gi huhuiri amoo sliimaa kaꞌafu gu yaamu naqatloo. 41 Abimeleeki gi ibiidi tongoo da Aruumage, haa Sebuuli gi gusimi Gaali haa hhiee kosi yaamu gu Sekeemugo.
42 Heetlaalee dosii, Abimeleeki gi akhasi tuba, hida gu Sekeemu hindii ca⁄iri yaamugo haa hiĩ waaudiri qaymamuuge. 43 Teesaaqay, Abimeleeki gii oy sirikaarii dosi, gigi deehhimi raqoo tami, ma nahhamidu kayri taysi qaymamuuge. Inay giyaa iliianiri hida yaa khociyay yaamugo, yaagii ca⁄iri daqa giyaa ilii nahhamidiri, gigi tooinaa cu⁄iri hida hhakee. 44 Abimeleeki haa raqoo kosi gu sirikaarii gi tu⁄umidiri pandaage, ma tlaatlahhasa kayri hida kaꞌafu gurii guuma yaamuge. Raqoo kosi cada wakinay gi iliitlairi hida gwaa qaymamuuge waaree haa gigi cu⁄uri goõ. 45 Balotee goõ, Abimeleeki gi gauusi haa hida gu yaamu hhakee. Yaamu hhakee gigii ⁄utli haa gi cu⁄i hida goõ gwaa waaree teꞌesii. Da hheꞌesi, ina gi hhamisi yaamu hhakee hari aslaa haa gi hitimisi cakhasaa yaamu hhakeesii dama may tiꞌida idoo lensee.
46 Giyaadimiisee goõ gwaa tlankoo gu Sekeemuge waaree, giyaa ilii akhasiri gimbakee, gi lakidiri booma da mara gu didiruge gu iliitleemu gooina daa eteediidine na Eli-beriiti. 47 Abimeleeki sugugi kaay ha heedi waku tuba, hida goõ gwaa tlankokeesii waaree gu Sekeemuge, hingii kurunkuridiri daqa lenge yade. 48 Abimeleeki haa sirikaarii dosi gi waaudiri oõ gu Salimoonige. Ina gii oy kiraara gi tlatlafi eleema da khaimoo haa gigii tleke⁄esi kwaahha dosii. Da hheꞌesi, ina gi kaay sa hida hhakira gwaa sliimaa waaree haa ina tuba, “Slehheesaw! Yondiida, idoo gaã ilii yondiidi gooay ana!” 49 Kila heedi gi tlatlafi eleema hatira pahha da Abimeleeki haa gugi sirakoniri Abimeleeki. Elemu hhakee, gigi iladicimisiri bi⁄inaa gu boomage, gigi da⁄iri hari aslaa, ma hhamisiri hida goõ, gwaa waꞌay gu boomage waaree. Teesaaqay, fadoo da hida goõ gwaa kaka⁄ee tlankokeesii gu Sekeemu, angamalee yaa hida elefu leẽ, hhawatee haa tigay.
50 Da hheꞌesi, Abimeleeki haa sirikaarii dosi gi hadakayri yaamu gu Tebeesige, gigi ilagiidiri haa gii ⁄utliri yaamu hhakee. 51 Teesaaqay see, tla⁄aã gu yaamu hhakeesii ya wana tlankoo gwaa hii⁄atlu. Giyaadimiisee goõ haa hida goõ gu yaamu hhakee, hhawatee haa tigay yaa teꞌesii lakidiri, hingigi ilakhiidiniri waꞌay kosii. Inay gii dadayri rawaa gu tlankokeesii. 52 Abimeleeki gi ilii hadakay tlankokee haa gigi iliitlai. Inkoo, ina giyaa iliidaadaausi kaꞌafu gu tlankooge, magu da⁄i hari aslaa, 53 hadee waka yaagii kwahhadi tlaa⁄a da saadiru rawaa gu tlankoogo, gi cakhati Abimeleeki saga gosii. Tlaa⁄atee gii kaꞌasidi faraa da saga gosi.
54 Da hheꞌesi, Abimeleeki gi cira eteedi qaraimoo gosi, gwaa geregedu khasima gosi, sugugi kaay tuba, “Oyii pangaa googu, hani gaaside, hida maa hhanti kaayay tuba, dinaati gaasi ha hadee.” Qaraimokira gii oy pangaa gosi, gugi tosaa muti, Abimeleeki gi gwaai. 55 Waisraeeli giyaa iliianiri tuba, Abimeleeki hiĩ gwaai, gi waaudiri haa kila heedi gi ki⁄i aya gosii.
56 Teesaaqay, Iliitleemu ginaa ilii ⁄agitimi Abimeleeki sa dakoo dosi giyaa yondiidi daqa taataa gosii hari amoo da cu⁄uduũ hhiee kosi mibeeri fanqu. 57 Slime, Iliitleemu gi ⁄isimi hida gu Sekeemu digima ⁄agitimi sa tlakwaroo dooina giyaa yondiidiri. Teesaaqay, ilawaasa da Yotaamu nanku Yerubaali yaagi iliikhaydi Abimeleeki haa giyaadimiisee da Sekeemu.