Gidiyooni cu⁄uduũ gu Sebaahi haa Salimuuna
8
1 Kabiraa da Efurayiimu gi maasiri Gidiyooni tuba, “Sindii soꞌoy laqadi teesaaqay? Sindii soꞌoy maydi eteeda gaã ilii qwatla kaydi haa Wamidiyaani?” Inay gugi iliiquru⁄iri hari dihhay.2 Gidiyooni gigi ilaki⁄isi inay tuba, “Ana, idoo mala ganiĩ yondiidi, bere ilakhuukhuꞌusa haa hatira gaã yonditiri unkuray? Ilabuꞌuru gu slanslaaoo da sabiibu gu Efurayiimu guti hhouubaslii ba⁄ay da buꞌuru gu sabiibu gu hiidayuumoo gooi Abiyeseeri? 3 Iliitleemu hingii lu⁄i dabaiĩ kokunay Oreebu haa Seebu, giyaadimiisee da deni da Wamidiyaani. Inkoo, ana hanti malee laqi, bere dini ilakhuukhuꞌusi haa unkuray?” Gidiyooni giyaa iliikaay teesaaqay, qupidaa koina daqa dosii gii slakwairi.
4 Gidiyooni sliimaa haa danaee hhakira kosi gu miyaa tami, gungaa sliimaa sirakomamidee haa ina, giyaa iliidayri duudu gu Yoridaanige, gi tooinaa tlo⁄osiri duudukee hari bara da ilacindoo gu rawaa. Inay giyaamati ba⁄aa⁄aadiri hari khisla, gi ilakoniri siragusiru fa⁄ayaa dooina.
5 Ina gi kaay sa hida gu tongoo da Sukooti tuba, “Hhooa, qaw sa sirikaarii dooi mukaatee, sa gimba hiĩ ba⁄aa⁄aadiri haa hinqoriimidiri hari khisla. Kara, ana see kahha tooaa ilakomaamida sirakooma watemi Seeba haa Salimuuna gu Midiyaani.”
6 Teesaaqay see, giyaadimiisee da deni da Sukooti gi kaayri tuba, “Inkoo, sirikaarii doogu saga soꞌoy hadisana mukaatee, kara inay kahhiyay kaba⁄a Seeba haa Salimuuna?”
7 Da hheꞌesi, Gidiyooni gi ilaki⁄isi tuba, “Sa gimbakee kilesi, Taataa Iliitleemu gimaa iliilu⁄iye dabaiĩ koii Seeba haa Salimuuna, slaqoo kokuna hagimaati doohhima hari leqeewaa haa hari foqooray gu kongoqomee.”
8 Daqateesaa, Gidiyooni haa hida kosi miyaa tami gi iliihadakay hida gu yaamu gu Penieeli, kara gi firiniri ⁄agoo. Hida gu Penieeli gugi ilaki⁄isiri, idoo dugwaa ilii ilaki⁄isi gooay ha hida gu Sukooti. 9 Gidiyooni gi kaay sa hida gu Penieeli tuba, “Ana gamaa iliiki⁄e haani kaba⁄i, hagumaa muumu⁄uma tlankoki.”
10 Inkoo, mutemi Seeba haa Salimuuna yaa tongoo da Karikoorige wanay sliimaa haa raqa dooina da sirikaarii elefu mibi haa kooani, hatee kilesi daa meti raqa da sirikaarii da ilacindoo gu rawaa. Danaee koina sirikaarii elefu mibeeri mibi haa mibeeri cada, gwaa khue gwatla hari pangaaee digaati cu⁄i. 11 Gidiyooni haa hida kosi gi tafaꞌasiri amoo da ilacindoo gu biraa, daraa hhiyumaamidiye hida, daraa bara da ilacindoo gu rawaa gu tongoo da Nooba haa Yogibeeha waara. Inay gi iliitlairi sirikaarii daa kahha ilakhuukhuꞌusa gauusa haa inay. 12 Seeba haa Salimuuna, watemiti da cada da Wamidiyaani, gi lakiti. Gidiyooni gigi sirakoomi alungo haa gigi ooymi haa gi ⁄isimi tlaꞌamee da didiri daqa sirikaarii goõ.
13 Da hheꞌesi, Gidiyooni, nanku Yoaasi, yaagi ki⁄i gaugo, yaagii cati harii gweegwe⁄eda da Hereesi. 14 Gidiyooni gi ooy qaraimoo leẽ gu yaamu gu Sukooti haa gugi maamisi ina. Qaraimokee gi handikimi sa Gidiyooni, umaiĩ gu giyaadimiisee haa gaduũ gu kaari gu Sukooti. Faadoo dooina gonkoinaa yaa hida mibeeri fanqu haa fanqu. 15 Da hheꞌesi, Gidiyooni gi ki⁄i daqa hida gu tongoo da Sukootige, gi kaay sa inay tuba, “Hiislaydaaiisi, idoo hanaa iliiwahaahantiri, gaa ilii kaadiri tuba, ‘Sigi soꞌoy hadisana mukaatee hida koku gwaa ba⁄aa⁄aadee hari khisla, kara unkuray kahhaday kaba⁄a Seeba haa Salimuuna? Yuꞌudiyaa, Seeba haa Salimuuna nahhaã tiꞌii.’ ” 16 Ina hirigi waaudi giyaadimiisee da yaamu gu Sukooti haa gigi caacaahhamisi hida gu hhapetee hari amoo da ⁄agitiru inay hari leqeewaa haa foqooray gu kongoqomee. 17 Slime, Gidiyooni gi muumu⁄umi tlankoo gu Penieeli haa gi cu⁄i hhawatee gu yaamu hhakee.
18 Da hheꞌesi, ina gi maasi Seeba haa Salimuuna tuba, “Hhawatee hhakira giyaa cu⁄udiri yade Taboorige, yaati malee slaqamisiyay?”
Inay gi ilaki⁄isiri tuba, “Yaati ugu slaqamisiyay, giyaati arini yaꞌay gu mutemi pahha.”
19 Gidiyooni gigi ilaki⁄isi inay tuba, “Hhakee yaa hiidayuuma dooi, hhiee koi loi gu guraꞌa leẽ daqa iyoo dooii. Ana seelima pandaa da Taataa Iliitleemu gu slafa, bere giyaa aloo cu⁄udaaiiba, ana see hanguu aloo cu⁄aaba unkuray.” 20 Da hheꞌesi, ina gii fookidi daqa Yetiheerige, nankosi gu badiisu, sugugi kaay tuba, “Qadidi, cu⁄eki hida hhanki!” Teesaaqay see, Yetiheeri gi tlaꞌamuudi hiiowa pangaa gosi, sa gimba yaa kahhi qaraimoo.
21 Teꞌesii Seeba haa Salimuuna gi kaayri sa Gidiyooni tuba, “Khoca handi cu⁄ude ugu loi, sa gimba hiĩ ti yondu gu heedi gu kooma ⁄uuru.” Gidiyooni gigi cu⁄i ina loi haa gi babacimi idadu hingiraa tlemiri gwaa isoo gu gamiyayuu koinay waaree.
Qayriya da muunaiĩ da Gidiyooni
22 Waisraeeli gi kaayri sa Gidiyooni tuba, “Ugu handi tawaalinte haa qariqaaqari dandi tawaaline ha laqwaloo doogu haa yaꞌay koina gu hhawatee, sa gimba ugu handii ilabuꞌunti dabaiĩ gu Wamidiyaanigo.”
23 Gidiyooni gigi ilaki⁄isi inay tuba, “Ana hangu tawaalimaaba ma nankoy see hangu tawaalinaaba unkuray. Taataa Iliitleemu nangu tawaalina unkuray.” 24 Da hheꞌesi, Gidiyooni gi kaay sa inay tuba, “Hangu slaꞌa firoo idoo leẽ, kila heedi sini qaye namirii giyaanii ⁄utli.” Wamidiyaanitira, idoo daa iliiwanee gooay Waisimaeeli, yaati daamaamisiyay namirii daa boo⁄imisi hari sahaabu.
25 Hida gugi ilaki⁄isiri ina tuba, “Sugu hadisana hari muunaiĩ koti.” Inay gi hhafiifiniri qayroo hhapeege haa kila heedi gii kwahhi rawaa kosii namirii giyaa hii⁄utli gaugo. 26 Hiiloaruũ gu namirii da sahaabu giyaa firimi, ma sugu hadisiri yaa day kiloo mibeeri cada. Gimati teesaaqay see, slime yaa slay, idadu wakinay guri tlemedu, qayroo gu daahhiya daa daamaamisiye ha watemi da Midiyaani, haa heeleꞌesay gwaa isoo gu gamiyaa koinay waara. 27 Gidiyooni gi boo⁄imisi qayriya da muunaiĩ hari sahaabutee, gigi qaasi yaamu kosii gu Ofiraage. Waisraeeli goõ gi yondiidiri slipalauuma hari amoo da keebeeꞌemidu gi firiiriniri pandaa da kootiteesii. Gimbakee gi hatliroo tleehhidi daqa Gidiyoonige haa hida gu mara gosi.
28 Teesaaqay, Wamidiyaani digigi kaba⁄i sumuku ha Waisraeeli, ma sagaiĩ koina see giyaa kara waratlasiriiba. Qatlay gu slafimaa gu Gidiyooni, hhapee da Israeeli gi ibiti hari qasaw koraraa mibeeri cigahha.
Gwaaꞌaraa da Gidiyooni
29 Gidiyooni, hari uma waku Yerubaali, nanku Yoaasi gi ki⁄i sa ibinaa mara gosii loi. 30 Gidiyooni yaa kona yaꞌay mibeeri fanqu gu hhawatee, sa gimba yaa khabiibimi tigay wa⁄a. 31 Slime, ina yaa kona hadee da afay taysi Sekeemuge, hadetee yaa laqwalidi sa ina naw, gurigi aydi uma na Abimeleeki.a 32 Gidiyooni, nanku Yoaasi gi gwaai, tay kona koraraa gu gaduumaa. Ina dugugi qaasi aysa da Yoaasige, taataa gosi, yaamu gu Ofiraage hhapee da Waabiyeseerige.
33 Gidiyooni giyaa ilii hhami kilesi, Waisraeeli gi iliiki⁄iri tlakwaroo haa gi yondiidiri slipalauuma hari amoo da firiiriru iliitleemamee Baali. Inay gi qadidisiri Baali-Beriiti, ma iliitleemu gooina tleehhidi. 34 Waisraeeli yaa hiislayriiba Taataa Iliitleemu, Iliitleemu gooina, naa afiigweedi inay dabaiĩ gu fa⁄ayaa dooinaa da wa⁄a, daa niini⁄iti inay bareemoo goõ. 35 Slime, inay yaa yondiidiriiba gimba gu hhou daqa hida gu mara gu Yerubaalige, hari uma waku Gidiyooni, sa gimba goõ gu hhou giyaa yondiidi daqa Waisraeelige.