Gidiyooni kaba⁄araa da Wamidiyaani
7
1 Yerubaali, uma gu caduu na Gidiyooni, haa hida goõ gwaa sliimaa waaree haa ina, gii tlayri hari tumpaatumpu haa gi waaudiri, gi tluhhusa kayri kambii kenga gu hhaahhiya da Haroodige. Kambii gu Wamidiyaani haraa bara da goraa gooina wana, hiihuuꞌumage ilaciyaa haa oõ gu Mooree. 2 Taataa Iliitleemu gi kaay sa Gidiyooni tuba, “Sirikaarii ga konte ti wa⁄a hari khisla, daqa dooii hiilu⁄a Wamidiyaani dabaiĩ koinay. Waisraeeli hingoo ba⁄atii hhaꞌaleesiyay pandaa dooii gi kaayay tuba, hinginti ilabuꞌuniri hari ⁄uuru gooina loi. 3 Inkoo, ugu sigi kakante hida goõ ubee, heedi gwaa tlaꞌamuudi haa goó dakhadakha, ina ki⁄iye aya gosii haa waaudiye oõ gu Gileyaadigo.” Teesaaqay, hida elefu mibeeri cada haa cada gi ki⁄iri, gi meetiri hida elefu mibi.4 Taataa Iliitleemu gi kaay sa Gidiyooni tuba, “Faadoo da sirikaaritee kahhada dati didiri hari khisla. Inkoo, leehhisaki maꞌay gu duuduge taysi hagi koimisa inay. Heedikaꞌa sugoo kaawe ambee, ‘Hiĩ waaudi sliimaa haa ugu,’ hikee waaudiye haa ugu. Teꞌesii, bere hoo kaawa ambee, ‘Hiĩ waaudiyaaba sliimaa haa ugu,’ hikee hhanti waaudi haa ugu.”
5 Teesaaqay, Gidiyooni gi leehhisi sirikaaritee duudukeesii haa Taataa Iliitleemu gi kaay sa Gidiyooni tuba, “Paslisi hari bara leẽ hida goõ, goo kitahhamee maꞌay hari cufeeri, taqay gwehheraa gooay giyoó iliikitahhiye, hhakaꞌa goõ, goo keebeeꞌemidee ma kitahhaniri maꞌay, gi leehhimisiyay maꞌay hari dabaiĩ koina afaiĩ koinay, hhakee qaasaki hari bara da cadii.” 6 Faadoo da hida gwaa kitahhamee maꞌay hari amoo da hiislagumiru maꞌay hari dabaiĩ koina, yaa hida miyaa tami. Wakinay goõ gwaa meetee, yaati keebeeꞌemidiri gi kitahhaniri maꞌay hari afaiĩ koina.
7 Taataa Iliitleemu gi kaay sa Gidiyooni tuba, “Daqa hida hhakeesii gu miyaa tami guũ kitahhamee hari amoo da slapiru gwehheeri pahha, hagi ilabuꞌuma Waisraeeli haa hagii lu⁄a Wamidiyaani dabaiĩ kokuu. Hida hhakee wakinay ki⁄iyee ayeemaa koinay.” 8 Teesaaqay, Gidiyooni gigi may Waisraeelitee, kila heedi ma ki⁄i aya gosii. Ina gi tosaa meeti haa hida hhakira gu miyaa tami, gwaa hiiowee ⁄agoo haa parandaiĩ gu danaee koina.
Kambii gu Wamidiyaani yaa hiihuuꞌumage wana, hari bara dooina da biraa. 9 Harima amasi hhakee leẽ, Taataa iliitleemu gi kaay sa Gidiyooni tuba, “Tlayii! Taa⁄a, iliitlaii kambii gu Wamidiyaani, sa gimba hanginii lu⁄i dabaiĩ kokuu. 10 Inkoo, bere ugu haã tlaꞌamuti iliitlaꞌa kawa, taa⁄a sliimaa haa yondimiisay googu Puura. 11 Taysi ugu hoo akhasida gimba gi kakaakanee. Qariqaaqari, ugu dugoó muuna hii⁄atlisi gi iliitlaꞌa kayda kambikee.” Gidiyooni gi hadakay sliimaa haa yondimiisay gosi Puura, gii ⁄eetiri haa gi dayri daqa daa iliiwane sirikaarii daraa pandaa waara, daa ga⁄aa⁄awa hari khasima teꞌesii kambiige. 12 Wamidiyaani, Waꞌamaleeki haa hida gu hhapapu wakinay gu ilacindoo gu rawaa, yaati ibimaamidiyay hiihuuꞌumage. Inay yaati wa⁄a ingagimoo pahha. Gamiyaa koina, digaa hiidahhasiiba faadoo, yaati wa⁄a ubee, seehhinay gu kenga gu tlawa da didiri pahha.
13 Gidiyooni giyaa iliiday teꞌesii, gi akhasi heedi leẽ catimisi sa danaꞌa gosi tletaa kosi, kakaana tuba, “Haã tletimi tletaa. Yuꞌudiyaa, haã arimi mukaatimoo gu wee⁄oo, gwaa hiigarangaaridu hingii huui kambii lenge gu Wamidiyaani, gi iliihuui hemaa haa gigii fooki biraa gi rawaa khuiri. Hemaa gi taataahhati hhapee.”
14 Danaꞌa gosi gugi ilaki⁄isi tuba, “Gimbaki ti idoo wakaaba, ti pangaa gu Gidiyooni, nanku Yoaasi, Israeelimoo. Iliitleemu hingii lu⁄i dandiray Wamidiyaani haa sirikaarii goõ dabaiĩ kosii.”
15 Gidiyooni giyaa ilii akhasi catimisu gu tletaa hhakee haa ilakeesa dosi, gi keebeeꞌedi haa gi firimi Iliitleemu. Da hheꞌesi, ina gi ki⁄i kambii gu Waisraeelige haa gi kaay sa inay tuba, “Tlawaw! Taataa Iliitleemu hingii lu⁄i sirikaarii da Wamidiyaani dabaiĩ kokunay.” 16 Ina gi deehhimi hida hhakira gu miyaa tami, raqoo tamige, sigigi hadimisi parandaiĩ dabaiĩ koinay, haa sibidadu gwaa koomee mumbaalaiĩ waꞌay koinay.
17 Ina gi kaay sa inay tuba, “Hani khuꞌuntee, yondiida idoo ga ilii yondiide gooay ana. Khuꞌuma, qatlay goo iliidawe digimaa gu kambiige, yondiida idoo ga ilii yondiide gooay ana. 18 Qatlay goo iliifahhe paranda, ana sliimaa haa raqa doy, unkuray see gonkokunaa lootii fahhamintay parandaiĩ kokuna daqeemoo sliimaa gu kambiige, haa gi kaaday hari afoo da didiri tuba, ‘Hati lalaalaqana taqay sa Taataa Iliitleemu haa sa Gidiyooni!’ ”
19 Daa iliiday amasidiira, Gidiyooni haa raqa dosi da hida miyaa leẽ, cirakiray gi dayri digimaa gu kambii gu Wamidiyaanige. Teꞌesii yaati tlaatleesoo gu qatlay gu hiifooka, raqa da ⁄abi da Wamidiyaani gwaa ga⁄awee, baloo da raqa da segigo, yaa daadaauusiri kambii gu fa⁄ayaa dooinay. Inay gii fahhaminiri parandaiĩ koina haa gi cu⁄iri sibeedoo gwaa dabaiĩ koinay waaree. 20 Raqoo hhakira gu tami sliimaa dooina, gii fahhaminiri parandaiĩ koina haa gi cu⁄iri sibeedoo koina. Dabaiĩ koinay gu basage gi ooyiri mumbaalaiĩ haa hari dabaiĩ koina gu ⁄uya gi ooyiri parandaiĩ haa gi tooinaa hiifahhaminay, tay kakaanay hari afoo da didiri tuba, “Hati kona pangaaee, ma qwaatlani sa Taataa Iliitleemu haa sa Gidiyooni!” 21 Inay gi qadimidiri kila heedi daqa dosii, niini⁄ida da kambii goõ. Sirikaarii goõ da Wamidiyaani gi lakiti, tay tooinaa cunqumisiyay.
22 Hida gu Gidiyooni giyaa iliifahhaminiri parandaiĩ koina miyaa tami, Taataa Iliitleemu gi ⁄isimi Wamidiyaani, mangi tlaatleesiri cu⁄uduũ hari pangaaee inay haa inay kambiige. Sirikaarii daa meti gi lakiti Beeti-Siita naqatloo yade khuꞌusa Sereera, gi dayri digimaa gu Abeeli-Mehoola naqatloo, ilaciyaa haa Tabaati. 23 Waisraeeli gu kabiraa da Nafutaali, Aseeri haa Manaase gonkoinaa digigi eteedi, gi sirakoniri alungo Wamidiyaani. 24 Gidiyooni gi ya⁄abi ya⁄abimiisee hhapee da omeerige da Efurayiimu, ma kakaaniri tuba, “⁄eetaw qwatla haa Wamidiyaani haa tlaatlahhasakina pandaa dooinay hari amoo da hii⁄utla daqeemoo goó guumee maꞌay, daroó tlo⁄osiye hida duudu gu Yoridaani, yade naqatloo Beeti-Baara.”
Teesaaqay, hida goõ gu hhapee da Efurayiimu, yaagi khayri haa gii ⁄utliri duudu gu Yoridaani, Beeti-Baara naqatloo. 25 Inay gi ooyiri Oreebu haa Seebu, giyaadimiiseti cada da deni da Wamidiyaani. Inay gi gaasiri Oreebu hhafida gu Oreebuge, haa Seebu gugi gaasiri daqa giyaa iliitinqiiqinee sabiibu, doó eteedine na Seebu. Inay gi sirakoniri alungo Wamidiyaani haa haraagi khayri sa Gidiyooni saga gu Oreebu haa Seebu giyaa iliidaadaausiri duudu gu Yoridaanige.