Gidiyooni ilabuꞌumiisay gu Israeli tleehhida
6
1 Waisraeeli gi yondiidiri kara tlakwaroo pandaa da Taataa Iliitleemuge. Qatlay gu koraraa fanqu ina gigi tosaa hiilu⁄i dabaiĩ gu Wamidiyaanige. 2 ⁄uuru gu Wamidiyaani gii kala⁄i hari khisla Waisraeeli, inay yaati amoolaa folidiri bondeeri gu iliinahhamidu omeerige haa maraooge, daqeemoo hhakee gi boomaa dooina tleehhiti. 3 Qatlay sliimaa Waisraeeli giyaa iliidaamisiri pisagaroo dooina qaymamuuge, Wamidiyaani, Waꞌamaleeki haa hida gu hhapapu wakinay gu ilacindoo gu rawaa, yaati khayri gi tooinaa iliitlairi hhapee dooina. 4 Hida gu hhapapu hhakee yaati tluhhusiri kambabuu qaymamu koinay, haa gi tlakweemisiri baruũ gu hhapee goõ, yaati amoolaa dayri digimaa gu yaamu gu Gaasage. Inay yaa mayriiba idoo lensee sa Waisraeeli, gini bee⁄u goo baku yakway baku daqwaai. 5 Inay yaati khayri hari kuꞌunaanay gooina haa hemamuu koina ubee, raqoo gu ingagimoo pahha. Teesaaqay, yaati maana faadoo hida haa gamiyaa koina, inay gi iliitlairi hhapee da Israeeli haa gigi tlakweemisiri. 6 Waisraeeli digigi kwaeeli tleehhidisi hari khisla ha Wamidiyaani, inay gi ilii⁄aa⁄iri Taataa Iliitleemu, ma digi iliiay ha ina.7 Waisraeeli giyaa ilii⁄aa⁄iri Taataa Iliitleemu, sa gimba gu Wamidiyaani, 8 Taataa Iliitleemu gi ya⁄abi tletimiisay daqa Waisraeelige, ina gi kaay sa inay tuba, “Taataa Iliitleemu, Iliitleemu gu Israeeli, taqay kakaakana tuba, ‘Hangwaa hiica⁄asi Misirigo, hhapee da tongaiimaago. 9 Ana hangwaa ilabuꞌumi dabaiĩ gu Wamisirigo haa dabaiĩ gu Wakanaanigo, labaꞌamiisee doogunaa goõ. Slime, Wakanaani gigi gusimi, ma hiica⁄iri pandaa doogunaa haa sangugi hadisi hhapee dooina. 10 Unkuray sangugi kaay ambee, “Ana na Taataa Iliitleemu, Iliitleemu googuna, hhanti keebeeꞌemitay gi firiirintay iliitleemamee gu Waamoori, hhaã hhapee dooina ga ilii ibimaamitee.” Teesaaqay see, unkuray haa akhasidiriiba afoo doy.’ ”
11 Malayika gu Taataa Iliitleemu gi hadakay, gi ibiidi biraa gu khaimoo gu mualoonige taysi Ofiraage, khaimoki gwaati Yoaasi, Mwabiyeseerimoo. Teꞌesii, nankosi Gidiyooni yaati heeleꞌeeꞌemisi ganoo, daqa daa ilii tinqiiqine sabiibu, ma daga may arimaa ha Wamidiyaani. 12 Malayika gu Taataa Iliitleemu gi iliica⁄i Gidiyooni, gi kaay sa ina tuba, “Taataa Iliitleemu sliimaa wana haa ugu, ye khamaslu gu kooma ⁄uuru.”
13 Gidiyooni gi kaay tuba, “Ye looimoo goy, bere Taataa Iliitleemu sliimaa wana haa dandiray, gimbaki sliimaa sindii soꞌoy iliica⁄i dandiray? Kanoo yondukira kosi gu bakaꞌasa, sandaa catimisi ha ayiĩ koti, giyaa kaayri tuba, ‘Taataa Iliitleemu naa hiica⁄asi dandiray hhapee da Misirigo.’ Inkoo, Taataa Iliitleemu hinditi may haa hindigii lu⁄i dabaiĩ gu Wamidiyaanige.”
14 Taataa Iliitleemu gugi iliifookidi, gi kaay sa Gidiyooni tuba, “Taa⁄a hari ⁄uuru ga konte, ilabuꞌuma Israeeli dabaiĩ gu Wamidiyaanigo. Caba ti ana nugu ya⁄abiibima ugu?”
15 Gidiyooni gugi maasi tuba, “Ye looimoo goy, malee hiidahhasa ilabuꞌuru Israeeli? Motoliya doy na kontaaba ⁄uuru daqa kabiraa gonge da Manaase. Kara, ana loi na asu coko⁄i hari khisla daqa hiidayuuma doorii!”
16 Taataa Iliitleemu gi ilaki⁄isi Gidiyooni tuba, “Ana ha sliimaa waara haa ugu, ugu hagi hhamisida Wamidiyaani ubee, hati qwaqwatlintlita pahha haa heedi leẽ.”
17 Gidiyooni gi kaay tuba, “Inkoo, bere haã slay hhoinay gu didiru daqa dooguu, sini laqante idoo da laqama tuba, gu lou ti ugu na gimaamisida haa ana. 18 Haguũ firimi, hhanti waauta tiaa, ana haati amoolaa ki⁄a haa suguraagi khaw sadaaka dooi, haa gaga qaasa pandaa dooguu.” Ina gi ilaki⁄isi tuba, “Ana ibiida tiꞌii, haati amoolaa ki⁄ida ugu.”
19 Gidiyooni gi waaudi aya gosii, gi isahiiquutli dakhwadimoo haa gi tlada⁄asi debee da gubaraa gu ganoo, gi boo⁄imisi mukaatee doóba iliiqaasa hamiira. Ina gi tosaa qaasi fuꞌumay kiyaarayge haa dabacu gugii eesi ⁄aluge. Da hheꞌesi, sugugi leehhisi khoorooge, malayika gwaa ibiidu biraa gu khaimokeesii gu mualoonige, haa sugugi hadisi.
20 Malayika gu Iliitleemu gi kaay sa Gidiyooni tuba, “Oyii fuꞌumay haa mukaatetee doóba iliiqaasa hamiira, ligi qaasida rawaa gu hhafidakii ha lahiieesida dabacukee rawaa kosii.” Gidiyooni gi teesaaqay laqi. 21 Malayika gu Taataa Iliitleemu gi tafaꞌasi hhadaa dosi daa daba gosii waara, cina dosi gi nangusidi fuꞌumay hhakira haa mukaatetira doóba iliiqaasa hamiira. Cirakiray, aslaa gii ca⁄adi hhafidakakeesaa, gi hhamisidi sumuku fuꞌumay hhakee haa mukaatetee. Malayika gu Taataa Iliitleemu gii hhancooi ilaa kosaa. 22 Qatlay Gidiyooni giyaa ilii baraslay tuba, yaati Malayika gu Taataa Iliitleemu, gi maahhi hari bakaꞌaraa da didiri, gi kaay tuba, “Hoo arima ana, ye Looimoo gu Goõ, Taataa Iliitleemu, sa gimba hanguũ ariirini haa malayika googu pandaa haa pandaa!”
23 Taataa Iliitleemu gi kaay sa ina tuba, “Qasaw wane haa ugu! Hhanti tlaꞌamuta. Gwaꞌataaba.”
24 Gidiyooni gi tleehhi sa Taataa Iliitleemu masabaahu taysi, haa girigi ay uma na “Taataa Iliitleemu ti qasaw.” Letuti naqatloo masabaahutee wanta taysi Ofiraage, yaamu gu Waabiyeseerige.
25 Hari amasi hhakee leẽ, Taataa Iliitleemu gi kaay sa Gidiyooni tuba, “Oyii karaamoo gu taataa googu, hikaꞌa gu caduu gu kooma koraraa fanqu. Ugu la muumu⁄unta masabaahu da Baali, hatee da kone ha taataa googu, haa la tlaaqada sanaamuu da Aseera da ilaciyaa kosii waara. 26 Da hheꞌesi, tleehhi sa Taataa Iliitleemu, Iliitleemu googu, masabaahu da hhoi rawaa gu kanga⁄amee da kooma hhafida. Hari magiiduu gu sanaamuu da Aseera gaa tlaaqadi, sini hadiside sadaaka da karaamokee gu cada, ma sadaaka da da⁄araa tleehhiti.”
27 Teꞌesii, Gidiyooni gii oy yondimiisee dosi mibi, idoo dugwaa ilii ilakaay gooay ha Taataa Iliitleemu. Inkoo, sa gimba yaa tlaꞌamuudi hida gu aya gosi haa hida gu yaamu kosi, gimbaki ba⁄ay da yondiida hari tleemaa, gugi yondiidi hari amasi.
28 Hida gu yaamu hhakee giyaa iliitlayri hari tumpaatumpu, gi aniri masabaahu da Baali dagaã muumu⁄umi haa sanaamu da Aseera daa ilaciyaa kosii waara, dagaã tlaaqi. Kara, karaamokira gu cada, duguũ hadisi sadaaka rawaa gu masabaahu da ⁄abige daa tleehhi!
29 Inay haa inay hingigi maamisiri tuba, “Miyaa niĩ yondiidi taqay?”
Inay giyaa iliikwaꞌadiri gimbakee naraꞌa, sigigi kaay tuba, “Gidiyooni, nanku Yoaasi, niĩ yondiidi teesaaqay.”
30 Yaamulooee gi kaayri sa Yoaasi tuba, “Leehhisa nankoogu tiꞌii magu gaasani, sa gimba hiĩ muumu⁄umi masabaahu da Baali haa gi tlaaqi sanaamuu da Aseera, daa ilaciyaa kosii waara.”
31 Yoaasi gi kaay sa raqatira goõ daa niini⁄iti ina tuba, “Hati slaꞌadaaii qadida sa Baali? Hagu ilabuꞌutaaii? Heedi gu qadida sa ina, dugu gaasi dati kahhi see dawaraa tumpaatumpu. Bere, gu lou Baali ti iliitleemu, ina qadidiye ina lenkosi, sa gimba masabaahu dosi daganiĩ muumu⁄umi.” 32 Letutee, Gidiyooni gurigi ayri uma na “Yerubaali” maꞌaana dosi na “Baali, singii ⁄aa⁄iye, ina lenkosi pandaa dosii,” sa gimba yaa muumu⁄umi masabaahu dosi.
33 Wamidiyaani, Waꞌamaleeki haa hida gu hhapapu goõ goó ibiidee kenga gu duudu gu Yoridaanige, gi ilagaasiri sirikaarii dooina, gi tlo⁄osiri duudukee hari bara da cadii, haa gi tluhhusiri kambii hiihuuꞌuma gu Yesireelige. 34 Da hheꞌesi, muuna gu Taataa Iliitleemu, yaagi iliikhay Gidiyooni. Gidiyooni gi slay ⁄uuru, gii fahhi paranda sa eteeda Waabiyeseeri, maa khayri, magu sirakoniri ina. 35 Ina gi ya⁄abi ya⁄abimiisee hhapee goõ da Manaasege, maa khayri sa gau haa magu sirakoniri ina. Slime, wakinay gigi ya⁄abi, maa eteediri kabiraa da Aseeri, Sabulooni haa Nafutaali, inay see yaagi khayri hingigi ilagaasiri haa ina.
36 Gidiyooni gi kaay sa Iliitleemu tuba, “Bere gu lou, ilabuꞌunta Waisraeeli hari daba goy, gaa iliifaditi gooay, 37 yuꞌudiyaa ha qaasa fala da bee⁄imoo, biiraa gu iliidifooge ganoo. Bere rau yoó wana rawaa gu falage kilesii, haa hhapee goõ yoo kaaruũ, ana hoo asu caahha ambee, ilabuꞌunta Waisraeeli hari daba goy, idoo gaã iliikaadi gooay.” 38 Teesaaqay daganaa iliica⁄i. Heetlaalee dosii, Gidiyooni gii tlay hari tumpaatumpu, gi tinqimi falatira, rau gwaa rawaa gu falateesii waara, gi hacisi maꞌay qulu⁄uuge.
39 Da hheꞌesi, Gidiyooni gi kaay sa Iliitleemu tuba, “Hhanti slahhaaꞌada sa ana. Hagu firima, hani maydee, ma kara kaay waa leẽ. Hanii geemayde, ma yondiidi hari falati koisa leẽ. Qatlaykii, fala hhanti konta rau, hhapee da birakee daga ilaslaabiye ha rau.” 40 Hari amasi hhakee, Iliitleemu gi teesaaqay laqi. Falatee yaa kaaruũ haa hhapee goõ dagaati ilaslaabi ha rau.