Raaꞌamee da Deboora haa Baraaka
5
1 Balotee, Deboora haa Baraaka nanku Abinoaamu, gi raairi tuba,2 “Giyaadimiisee da deni yaa hiica⁄adi,
ma giyaadiri sa Waisraeeli,
hida hingaa hiica⁄asiri hari muunaiĩ koina loi.
Hhaꞌaleesa Taataa Iliitleemu!
3 Ye Watemi, itatiisa gimbaki!
Ye hida gu deni, taatla eaa!
Ana raaꞌa sa Taataa Iliitleemu, Iliitleemu gu Israeeli.
4 Ye Taataa Iliitleemu, gaa iliica⁄adi hhapee da Seyiirigo,
gaa iliicatidi hari qaymamu gu Edoomu,
hhapee yaa rinqirinqiti, raw see yaagii ⁄eetisi maꞌay,
tlongiyoo yaagi tuutuqiri maꞌay.
5 Omeeri yaa rinqirinqidiri pandaa da Taataa Iliitleemuge,
oõ gu Sinaay gooay giyaa ilii rinqirinqidi,
Pandaa dooguu Taataa Iliitleemu, Iliitleemu gu Israeeli.
6 Balalu gu Samugaarige, nanku Anaati,
haa balalu gu Yaeelige, balabalaluu gu deni yaa konaaiiba hida,
hida gwaa hhiyumaamidee haraa amamu gu afay hiicacaacatiyay.
7 Khamaslaslaa da kooma ⁄uuru yaa hiifaakiri Israeeligo,
yaa hiifaakiri, qatlaykaꞌa naqatloo gaa iliica⁄i, ana, Deboora,
gaa iliiqadidi, iyoo da hhapee da Israeeli pahha.
8 Qatlay giyaa iliileehhiri iliitleemamee da ⁄abi,
dagii kaꞌadi gau gu didiri kaꞌafafaa gu yaamu hhakeesii.
Teꞌesii daa slayba imbagoo ma tlaamoo see tla⁄aã gu hida elefu mibeeri cigahha hhapee da Israeelige.
9 Muuna goy sliimaa wana haa sirikaarii da deni da Israeeli,
sliimaa haa hida hhakira gungaa hiica⁄asee hari muunaiĩ koina loi, tla⁄aã gu hidage.
Hhaꞌaleesa Taataa Iliitleemu!
10 Ye unkuray goó iliidadawee daqwaai gu ⁄abakwi,
ye unkuray goó ibimidee janfafuu gu kaarige,
haa unkuray goó khookhocimee amamuge hari yeꞌeeroo,
kakaama gimbaki.
11 Raaꞌa hiicata da raaꞌamiisee, goó seehhuusee wa⁄eemaage.
Kakaama kaba⁄amuu gu Taataa Iliitleemu,
catimisa yondu gu haaki dosi,
yondu gu haaki gu khamaslaslaa gu koomee ⁄uuru Israeelige.
Da hheꞌesi, hida gu Taataa Iliitleemu,
gii gweegwe⁄ediri, kaꞌafafaa gu yaamuge.
12 Waisraeeli gi kaayri tuba, ‘Tlayii, Deboora, tlayii!
Tlayii, Tlayii, raai!
Ye Baraaka! Ugu see tlayii,
hari waaudi hida koku gaa hii⁄utlidi,
Ye nanku Abinoaamu.’
13 Da hheꞌesi, Waisraeeli gwaa meetee,
yaagi ilii⁄eetiri giyaadimiisee dooina,
hida gu Taataa Iliitleemu,
gi qwatla kayri haa fa⁄ayaa dooina da kooma ⁄uuru.
14 Hida wakinay yaagi khayri yedaa daqa daa ilii ibimaamidiye kabiraa da Efurayiimu,
hiica⁄amuu gooina yaati kabiraa da Amaleeki dahhiyay,
inay gi sirakoniri hhiee koina kabiraa da Benyamiini.
Hiidayuuma da Makiirigo daagii ⁄eeti sirikaarii da deni,
haa daqa kabiraa da Sabuloonigo giyaadimiisee da deni.
15 Hida gu deni gu Isakaari yaa sliimaa wanay haa Deboora,
Gu lou, Isakaari yaa sliimaa wana haa Baraaka,
gugi sirakoniri cira hiihuuꞌuma naqatloo.
Teesaaqay see, tla⁄aã gu kabiraa da Rubeenige,
yaa konay qiiqiꞌimoo wa⁄a muunaiĩ koinay.
16 Ugu haa soꞌoy ibiti tla⁄aã gu qwamu gu bee⁄uge,
ma itatiimisidi firimbaaee goó eteedimee raqoo gu bee⁄u?
Tla⁄aã gu kabiraa da Rubeenige,
yaa konay qiiqiꞌimoo wa⁄a muunaiĩ koinay.
17 Kabiraa da Gileyaadi yaati meti hari tlo⁄osaa gu duudu gu Yoridaani.
Kabiraa da Daani, saa soꞌoy meetiri meelige?
Kabiraa da Aseeri, yaati tlakhati kenga gu tlawa da didirige,
yaati ibiti daqa doó iliiqadimidiye meelaluu.
18 Kabiraa da Sabulooni ti hida gwaa hiica⁄asee ibinaa dooina sa gwaaꞌaraa,
kabiraa da Nafutaali see yaa iliisatiri gwaaꞌaraa,
kanga⁄amee da daqeemoo gu iliigauge.
19 Watemi yaa khayri haa gi gauusiri haa dandiray,
watemi gu Kanaani yaa qwaatliri,
taysi Taanakige ilaciyaa haa maꞌay gu Megiido,
teesaaqay see, yaa hiioyriiba feesa ma khooslay see.
20 Rawaa gu rawgo, tice⁄eeri gi qwaatliri,
tica⁄eerii yaagi sirakoniri amamu koina,
gi qwaatliri haa Siseera.
21 Duudu gu Kisooni ilawa⁄iya dosi gi takoobidi inay segenge loii,
duudukira gu segu gu Kisihooni.
Ye muuna goy, hari ⁄atlimaa, khoce pandaage!
22 Tankeebay gu faraasi gi ⁄isiniri kukukhumoo,
faraasi gu koomee ⁄uuru, yoóti tu⁄umidi hari ⁄uuru.
23 Malayika gu Taataa Iliitleemu gi kaay tuba,
‘Yaamu gu Meroosi, digi ilawaasiye,
digi ilawaasiye hari khisla, yaamulooee dosi goõ,
sa gimba yaa khayriiba sa iliiawa Taataa Iliitleemu,
gwaa iliiayriiba Taataa Iliitleemu giyaa ilii gauusi haa hida gu koomee ⁄uuru.’
24 Yaeeli daga ⁄aafiye ba⁄ay da tigay goõ,
hadee da Hebeeri gu kabiraa da Mukeeni,
daga ⁄aafiye ba⁄ay da tigay goõ, goó ibiidee hemamuuge.
25 Siseera yaa firimi maꞌay, Yaeeli sugugii eesidi ilibaa,
qulu⁄uu gu mureege, suguraagi khaydi ilibaa gu kwa⁄ama.
26 Yaeeli gi tafaꞌasidi daba gosi, gi oodi kikiaa da hemaa,
daba gosi gu ⁄uya gi ooy nondoo da heedi goó tleehha.
Ina gii maahhasidi Siseera hari nondoo, gi tlupitlupiti saga gosi,
gii kaꞌasidi haa gugi mutidi pandaca⁄ay dosi.
27 Siseera gii gupu⁄i haa gi huui,
haa gi tosaa qaati yeꞌeeroo gu Yaeelige.
Teꞌesii daqa giyaa iliiqaati,
ginaa iliihuui, tay hiĩ gwaai.
28 Iyoo dosi Siseera gi yuꞌuti hari pooa,
gi ⁄aa⁄adi hari aluũ gu pooa, gi kaadi tuba,
‘Siĩ soꞌoy hiikaaꞌadi khaymuu gaari dosi?
haã soꞌoy hiikaai akhasa kukukhumoo gu gaari dosi?’
29 Tigay deneꞌee kosi gu koomee waaway gigi ilaki⁄isiri ina,
gu lou, gi ilahudeemisidi muuna gosii gimbakee ina lenkosi tuba,
30 ‘Goo ilatahhe dabimaamidiyay amoo da deehhiru khooslay gosi giyaa hii⁄utli,
sagameeriya leẽ baku sagameeru cada daqa sirikaarimoo lenge,
qayroo gu kalay paslaapasloo sa Siseera,
qayroo gu kalay paslaapasloo daa hambuhambuudisi,
qayroo daa hambuhambuudisi naraꞌa sa isa doy!’
31 Ye Taataa Iliitleemu hhamisi fa⁄ayaa doogu goõ!
Hida sliimaa gu slaee ugu, letu pahha tleehhidiyee,
idoo giyoó iliibiifiꞌiside hari cencee da didiri!”
Da hheꞌesi, hhapee da Israeeli gi ibiti hari qasaw koraraa mibeeri cigahha.