Deboora
4
1 Qariqaaqari Ehuudi giyaa ilii gwaai, Waisraeeli gi kara yondiidiri tlakwaroo pandaa da Taataa Iliitleemuge. 2 Teesaaqay, Taataa Iliitleemu gigii lu⁄i inay dabaiĩ gu Yabiinige, mutemi gu Kanaani, hiĩ gwaa tawaalimu taysi yaamu gu Hasoorige. Sirikaarimoo gosi gu didiru, uma gosi naa Siseera, ina yaati yaamulooay gu yaamu gu Haroseeti-Hagoyiimu. 3 Siseera yaa kona gaararuu miyaa dagati gwaa koomee taylaaee gu sikhimi. Qatlay gu koraraa mibeeri cada, ina gi labaꞌasi hari khisla Waisraeeli, gi ilii⁄aa⁄iri Taataa Iliitleemu magi iliiay inay.4 Inkoo, yaa wanta tletimiisoꞌoo da hadee, uma gosi naa Deboora, hadee da Lapidooti. Qatlaykeesii Deboora naa ilabuꞌumiisoꞌoo da Waisraeeli. 5 Deboora yaati ou gosi, gu ibinaa biraa gu khaimoo gu mutendimooge. Mtendimokee yaati tla⁄antla⁄a gu yaamu gu Raama haa yaamu gu Beteelige wana, hhapee da omeeri gu Efurayiimuge. Waisraeeli giyaagi iliikhakhayri, ma ilabuꞌunti gimba gooina. 6 Letu waka, Deboora gi eteti Baraaka nanku Abinoaamu yadaa yaamu gu Kedeesigo, hhapee da Nafutaaligo. Baraaka giyaa iliikhay sugugi kaay tuba, “Taataa Iliitleemu, Iliitleemu gu Israeeli guũ ilafahhi tuba, ‘Taa⁄a kurunkurii hida koku oõ gu Taboorige, la hiileehheda hida elefu mibi daqa kabiraa da Nafutaaligo haa Sabuloonigo. 7 Ana haguu faafahha Siseera, sirikaarimoo gu didiru gu sirikaarii da mutemi Yabiini, maraa khay sirikaarii dosi haa gaararuu kosi, ma qwaatli haa ugu duudu gu Kisoonige, haa gugwii lu⁄i dabaiĩ kokuu.’ ”
8 Baraaka gi kaay sa Deboora tuba, “Bere hadakayda sliimaa haa ana, ana see hadakaw. Inkoo, bere igi hadakaydaaba sliimaa haa ana, hadakawaaba.”
9 Deboora gi ilaki⁄isidi tuba, “Naraꞌa hadakaw sliimaa haa ugu, teesaaqay see, slaydaaba muree lensee da kaba⁄araa, sa gimba Taataa Iliitleemu hiilu⁄i Siseera dabaiĩ gu hadeege.” Teesaaqay, Deboora gi hadakaydi sliimaa haa Baraaka yaamu gu Kedeesi naqatloo. 10 Baraaka gi eteedi kabiraa da Nafutaali haa Sabulooni taysi Kedeesige, hida elefu mibi gugi sirakoniri. Deboora gi hadakaydi sliimaa haa ina.
11 Qatlaykee, Hebeeri gu kabiraa da Mukeeni, hingaati pasli haa Wakeeni danaee kosi, hhaã gu laqwaloo da Hobaabu, kumbaꞌa gu Musaa. Ina gi tluhhusi hemaa dosi ilaciyaa haa khaimoo gu didiru gu mualooni gu Sananiimuge waara, ilaciyaa haa yaamu gu Kedeesi. 12 Qatlay Siseera sugwaa ilii kaay tuba, Baraaka nanku Abinoaamu, hiĩ ilakhiinaaꞌadi haa sirikaarii dosi oõ gu Taboorige, 13 Siseera gii kurunkuri sirikaarii dosi goõ, gaararuu kosi miyaa dagati gu sikhima haa hida goõ gwaa sliimaa waaree haa ina, yadaa Haroseeti-Hagoyiimugo duudu gu Kisooni naqatloo.
14 Deboora gi kaadi sa Baraaka tuba, “Tlayii! Haã na baloo, Taataa Iliitleemu giĩ iliilu⁄i Siseera dabaiĩ kokuu. Taataa Iliitleemu hiĩ giyaadi pandaa dooguu.” Teesaaqay, Baraaka yaagii ⁄eeti oõ gu Taboorigo, dugugi sirakoomi ha hida elefu mibi. 15 Baraaka gi iliitlai Siseera, Taataa Iliitleemu gi gusimi Siseera haa sirikaarii dosi goõ hari pangaa pandaa da Baraakago. Siseera gii ca⁄i gaari dosaa, gi tosaa lakidi hari yeꞌeeroo. 16 Teꞌesii, Baraaka sliimaa haa sirikaarii dosi, gi sirakoomi sirikaaritee da Siseera sliimaa haa gaararuu hhakee Haroseeti-Hagoyiimu naqatloo. Sirikaaritee goõ da Siseera dagagi cu⁄i hari pangaa ma heedi lensee hhaku gwaa meetu.
17 Teesaaqay see, Siseera gi taa⁄adi hari yeꞌeeroo hemaa da Yaeeli naqatloo, hadee da Hebeeri, Mukeeni. Ina yaa teesaaqay laqi, sa gimba ibinaa da qasaw yaa wanta tla⁄aã gu mutemi Yabiini gu yaamu gu Hasoori haa hida gu mara gu Hebeeri.
18 Yaeeli gii ca⁄adi sa amoodabaawa Siseera sugugi kaadi tuba, “Kwahhasi, looimoo goy, kwahhasi dayii waꞌayge, hhanti tlaꞌamuta.” Siseera gii day waꞌay gu hemaa da Yaeelige, Yaeeli gugi ilacuudi hari burangeetii.
19 Siseera gi kaay sa Yaeeli tuba, “Haã wakhiidi, toogwaa, sini qayde maꞌay, ma kitahhi.” Ina gii oodi mujeeti gu ilibaa, sugugii eesidi haa sugugi hadisidi gi kitahhi. Da hheꞌesi gugi ilacuudi ina.
20 Siseera sagagi kaay tuba, “Qadidi afamaraa gu hemaage. Bere, heedi lensee yoo khay haa gigi maasi tuba, ‘Hematii, wanaa heedi lensee?’ sugu kaade ubee, ‘hhaku.’ ”
21 Da hheꞌesi, Yaeeli, hadee da Hebeeri, gii oodi kikiaa da hemaa haa nondoo daba gosii, gugi ilii hadakaydi aslaaꞌamee, sa gimba ina yaa qaati hingiraati kwakwahhi sa ba⁄adaa gu didiri, ina gugi tosaa ilii tluhhusidi kikiatira pandaca⁄ay gosii yaati amoolaa hiidaadi hhapeege. Siseera gi tosaa gwaai teꞌesii.
22 Baraaka giyaa ilii sirakomaamidiye Siseera, Yaeeli yaagii ca⁄adi khoorooge, magu amoodabaadi ina. Ina sugugi kaadi tuba, “Khoca, sugu laqama heedi ga dabimaamite.” Teesaaqay, Baraaka gii day waꞌay gu hemaa da Yaeelige, teꞌesii gugi arimi hhapeege, Siseera hiĩ gwaai, haa kikiatira da hemaa pandaca⁄ay dosii wanta.