Sariyaa da qwatla Gau
20
1 Da hheꞌesi, Musaa gi kaay sa Waisraeeli tuba, “Qatlay ga ilii qwatla kaydee gau haa fa⁄ayaa dooguna haa gi antay faraasi, gaararuu gu gau haa raqa da didiri da sirikaarii ba⁄ay tooguna see, hhanti tlaꞌamutay, sa gimba Taataa Iliitleemu, Iliitleemu googuna gwaa hiica⁄asu unkuray hhapee da Misirigo, yoo sliimaa wana haa unkuray. 2 Qatlay ga iliidaadaauusidee waauda gauge, hhapalooay gu didiru yaa khay gi qadidi pandaage haa gi gimbuusi sa raqa da sirikaarii. 3 Ina kaay tuba, ‘Ye Waisraeeli itatiisa! Letuti qwaatla kayday haa fa⁄ayaa dooguna. Hhanti simbariigwaꞌatay, hhanti tlaꞌamutay, hhanti dakhadakhaday, baku dangu hhanti tlaatlaꞌasi fa⁄ayaa dooguna. 4 Sa gimba, Taataa Iliitleemu, Iliitleemu googuna, ina loi noo hadakay sliimaa haa unkuray haa sangugi qwaatli haa fa⁄ayaa dooguna, mangu ilabuꞌumi unkuray.’5 Slime, giyaadimiisee da deni da raqa da sirikaarii, inay kaayiyee sa sirikaarii goõ tuba, ‘Wanaa heedi tla⁄aã googunay, gwaa tleehhu mara gu ⁄abu, haa gu kahhi ⁄aafa? Bere wana, ba⁄ay ina hiti ki⁄iye ayage, ba⁄atii gwaai gauge, heedi waku gi ilabuusli marakee. 6 Wanaa heedi tiꞌii tla⁄aã googunay, gwaa daamisu sabiibu qaymoo dosii haa gi kahhi ⁄agoo see ⁄aamu gosi? Bere wana, ba⁄ay ina hiti ki⁄iye ayage, ina ba⁄atii gwaai gauge, heedi waku gi hha⁄aluudi sa ⁄aamukee. 7 Kara, wanaa heedi tiꞌii tla⁄aã googunay, gwaa hiidaamisu sagameeriya, haa hiĩ daadaauusi khaboo? Bere wana, ba⁄ay ina hiti ki⁄iye ayage. Bere ina gau kay haa gi gwaai gauge, hhawata waku khabina sagameeriyatee.’ 8 Kara, giyaadimiisee da deni, hiiroogisiyay kaawa tuba, ‘Wanaa heedi tiꞌii tla⁄aã googunay guũ tlaꞌamuudu baku hiĩ muuna gwaai? Bere wana, ba⁄ay ina hiti ki⁄iye aya gosii, ina ba⁄atii ⁄isina deneꞌee kosi see ma muunaiĩ kaka⁄iri da ina gooay.’ 9 Qatlay giyaadimiisee da deni gi ilii hheꞌesiyee gimba haa raqa da sirikaarii, teꞌesii inay kwanda gii leehhiyee giyaadimiisee guri giyaadee raqoo gu sirikaarii.
10 Qatlay goo iliidaadaauusidee iliitlaꞌaraa yaamu, unkuray gesaa kaawa sa hida gu yaamu hhakee, bere inay slaiyay qasaw. 11 Bere inay ⁄imbiyay haa gi afiiooyinay kaꞌafafee koina, hida goõ gu yaamu hhakee, tongee dooguna tleehhidiyay haa gi yondiidiyay yondu sa unkuray. 12 Bere inay siꞌiyay ilagaamisu gu qasaw haa giigumisiyay unkuray gauge, teꞌesii unkuray ha niini⁄itay yaamu koina haa gigi iliitlaꞌaday hari gau. 13 Qatlay Taataa Iliitleemu, Iliitleemu googuna giyoo iliilu⁄iye yaamu hhakee dabaiĩ kokunay, unkuray cu⁄a hari pangaaee hhawatee goõ gu waaree yaamu hhakeesii. 14 Teesaaqay see, tigay haa daaqay, kuꞌunaanay haa idadu goõ gu waaree yaamu hhakeesii, hagii dahhasiday hiiowa sa unkuray. Unkuray hhaꞌaluumitay hari idadu hhakee, sanguũ hadisi ha Taataa Iliitleemu, Iliitleemu googuna daqa fa⁄ayaa doogunaa. 15 Teesaaqay, haganimaa laqaday yaamu goõ, hhaã gu segenge waaree haa hhapetee gamaa aalintee.
16 Teesaaqay see, daqa yaamu gu hhapapu hhaã Taataa Iliitleemu, Iliitleemu googuna sangu hadisiye unkuray magi aalintiri, teꞌesii hhanti mayday idoo lensee da slafa. 17 Unkuray ti hhamisa sumuku Wahiiti, Waamoori, Wakanaani, Wapereesi, Wahiifi haa Wayebuusi, idoo Taataa Iliitleemu, Iliitleemu googuna gooay, giyaa ilii ilafahhi unkuray. 18 Inay hiti cu⁄akina, maa ba⁄atii caacaahhamisiyay unkuray, ma sirakontiri ou gooina goõ gu slahhaaꞌasa giyoó yondiidiyee, giyoó ilii firiirinee iliitleemamee koina, unkuray hagi yonditay tlakwaroo pandaa da Taataa Iliitleemu, Iliitleemu googuna.
19 Qatlay gamaa iliitlaꞌadee bi⁄ina gu yaamu, tleehha kitariidaayimaiĩ, may guntiri yaamu hhakeesii. Unkuray, hhanti tlaaqaday khai gu ⁄aamu gu yaamu hhakee, sa gimba unkuray hiidahhasiday ⁄agoo ⁄aamu gu khai hhakee, teesaaqay hagi hhanti tlaaqaday. Khai hhakee ti hida gooba, haa gigi iliitlaꞌaday! 20 Teesaaqay see, hiidahhasiday tlaqanay khai hhaã gu ⁄aamu gooba haa girigi tleehheday kitariidaayimaiĩ hhakee, qatlaykaꞌa naqatloo yaamu hhakee gimaa ilii ⁄utlidee.”