Ilagaamisu sa gwaaꞌaraa da kooma macimaa
21
1 Musaa gi kaay sa Waisraeeli tuba, “Bere heedi duguũ slay duguũ gaasi kweerage, hhapee sangu hadisiyege haa Taataa Iliitleemu, Iliitleemu googuna maga hii⁄utlidiri, kara unkuray hanguba caahha see heedi guũ gaasu ina, 2 teꞌesii, gaduũ kokuna haa ilabuꞌumiisee dooguna yaa hiica⁄iyay haa gi ilakhuiyay, ti segaruũ mala teꞌesaa daqa da iliiwane tuuꞌuna yaamu gu coomoo naqatloo. 3 Da hheꞌesi, gaduũ gu yaamu hhakee gu coomooge waaree haa daqa da iliiwane tuuꞌunatee, yaa hiioyay tiiniya dari kahhiye yondiidu yondu lensee, gimati yooki see daga kahhi iliikufa. 4 Inay gi leehhisiyay tiiniyatee hiihuuꞌuma da kahhiye doosla, baku ilii daamisu pisagaroo haa da iliiwane hhaahhiya doó guuma. Yade hiihuuꞌuma kiray tiiniyatee inay giti afaqeetisiyay isa dosi. 5 Hhapalooee, hhakee yaꞌay gu Laawi kwanda gi hadakayee yade, sa gimba Taataa Iliitleemu, Iliitleemu googuna giyaay leehhi inay, ma sugu yondiidiri ina haa ma ⁄aafiri hida hari uma gosi Taataa Iliitleemu. Slime inay na konay hiidahhasa da kereꞌemisu gimba gu kabaaba⁄u haa iliitlaꞌadu. 6 Da hheꞌesi, gaduũ goõ gu yaamu hhakee gu coomooge waaree haa daqa da iliiwane tuuꞌunatee, inay hhunciyay dabaiĩ koina rawaa gu tiiniya teesii diĩ afaqeetisi isa dosi yade hiihuuꞌumage. 7 Inay kwanda gi kaayiyee tuba, ‘Dabaiĩ koti hiĩ tuutuqiriiba ceedee da heediki, gimati ilaa koti see hiĩ aniriiba heedi guũ gaasu ina. 8 Ye Taataa Iliitleemu, handi ilamooyinte dandiray hida koku gu Israeeli, gaa afiigweti Misirigo. Handi hhanti fata dandiray kona dakoo da ceedee da heediki diĩ qaasi gubasli dakoo.’ 9 Teesaaqay, unkuray hagani iliifiiciday ceedee da heedi gubasli dakoo tla⁄aã googunaa, sa gimba unkuray ha yonditay gimba gu haaki pandaa da Taataa Iliitleemuge.”Sariyaa da khaboo hadee daay oy gaugo
10 Musaa gi kara kaay sa Waisraeeli tuba, “Qatlay unkuray ga ilii qwatla kaydee gau haa fa⁄ayaa dooguna, Taataa Iliitleemu, Iliitleemu googuna gii lu⁄i fa⁄ayaa dooguna dabaiĩ kokunay, unkuray gii ooday inay gi tongee dooguna tleehhidiyay. 11 Bere heedi hiĩ arimi teꞌesii tla⁄aã gu tongeteesii hadee leẽ da hhoi, kara ina dugungii dafidi ha ina, higii dahhasi khaboo, ma hadee dosi tleehhiti. 12 Teꞌesii, ina higiri waaudi hadetee aya gosii, hadetee kwanda gi hhate saga gosi haa gi sikida carafee kosi. 13 Hadetee kwanda gi bacide qayroo giyaa daamisidi qatlay dagaa iliioy tongaiimaago. Hadetee kwanda gi ibite mara gu hhawata keesii qoomay gu slehheẽ leẽ, tay gaita sa gwaaꞌaraa da taataa gosi haa iyoo dosi. Da hheꞌesi, hhawatakee gi asu hiidahhasi khaboo haa gi hadee dosi tleehhita. 14 Qariqaaqari bere ina duguba muunaboo⁄eesa ha hadetee, gi hiidahhasi mawa ma waauti daqa gi iliislaꞌade ina. Teesaaqay see, sa gimba, hadetee daganti ⁄uureesi ma hadee dosi tleehhiti, ina dugu hiigeemayaaba magi laqi ina tongitoꞌoo pahha haa gigi naadina daqa hhawata wakuu.”
Haaki da badiisu
15 Musaa gi kaay kara tuba, “Bere hhawata kona tigay cada, ina gi slai hadee leẽ ba⁄ay da waka, tay tigay hhakee cada koinaa sugwaa laqwaliri ina yaꞌay gu hhawatee. Teesaaqay see, badiisu ti nawu gu hadetaꞌa gi slaiyegooba. 16 Qatlay damaa iliidaye baloo da deehhiru aalimee sa yaꞌay kosi, etaa ina hhanti hadisi haaki da badiisuꞌuumaa, sa naw gu hadetaꞌa gi slaiye hari khisla, gi may hadisa sa badiisu loi, ina gu naw gu hadetaꞌa gi slaiyegooba hari khisla. 17 Ina kwanda gu ⁄imbiye badiisukee gu hadetaꞌa gi slaiyegooba tuba, ina na badiisu gosi, gi hadisi sa ina haaki dosi, bara da khooslay gosi waa cada, ba⁄ay da hikira gu coko⁄u.”
Naw goóba akhamisu
18 Musaa gi ilakoomi gimba tuba, “Bere heedi kona naw gwaa atanuudu, gwaa piiruusluudu haa goóba muriida taataa gosi haa iyoo dosi, haa yoó akhasiyaaba taataa gosi haa iyoo dosi, goó ilii ⁄aakaꞌasiyee, 19 taataa gosi haa iyoo dosi kwanda gu leehhisiyee ina kaꞌafu gu yaamuge, haa gi qadidi pandaa da gaduũ gu yaamuge. 20 Inay kwanda gi kaayiyee sa gaduũ tuba, ‘Naki koori yaa darabi haa yaa doomuudi, hindoo akhamisiyaaba dandiray, yaa hheehhuudi haa ti oonimiisay.’ 21 Teꞌesii, hida goõ gu yaamu hhakee, nakee guti cakhadinay hari tle⁄eẽ hiti amoo gwaai. Teesaaqay, hagani iliifiiciday sumuku tlakwaroti tla⁄aã googunaa. Waisraeeli goõ akhasiyay gimbaki haa gi tlaꞌamuudiyay hari khisla.”
Heedi daa hiitluhhumisi khaimooge dugwaa ilawaasi
22 Musaa gi ilakoomi gimba tuba, “Bere heedi hiĩ yondiidi dakoo daraa hiiboo⁄odi duguma gaasi, da hheꞌesi dugugi gaasi haa slaqwa dosi dagagi kancisi khaimooge, 23 etaa, tuuꞌuna dosi haga hhanti mayday rawaa gu khaimooge da iliikahhiye hiiamasuuda, kwanda hagu qaasidee letutee loi loi. Sa gimba, kila heedi doó hiitluhhumisiye khaimooge, dugwaa ilawaasi ha Iliitleemu. Unkuray hhanti slasla⁄uudisiday hhapee sangu hadisiye ha Taataa Iliitleemu, Iliitleemu googuna, ma tooguna tleehhiti balalu sliimaa.”