Sariyaa waka
22
1 Musaa gi kaay kara sa Waisraeeli tuba, “Bere haã anti slee baku bee⁄a da danaꞌa googu hiĩ hhanti, haga hhanti mayda ma hhanti, ugu kwanda haga ki⁄iside daqa looimoo gosii. 2 Bere looimokee yoó ibiidiyaaba ilaciyaa haa ugu, baku hagu hhidinta ina ti miyaa, kuꞌunaanimokee owakuu aya googuu, ibiidiye teꞌesii qatlaykaꞌa naqatloo looimoo gosi, gumaa iliidabiidukaye. Teꞌesii, ugu hagu ki⁄isida kuꞌunaanimokee sa looimoo gosi. 3 Laqe namati teesaaqay leẽ, bere haã slaydi daqway gosi, baku qayriya dosi, baku idoo waka giĩ hhamisi. Etaa ugu hagu hhanti mayda iliiawa ina. 4 Kara, bere haã arinti daqway gu danaꞌa googu, baku slee dosi hiĩ huuꞌudi amooge, etaa ugu hhanti mayda iliiawa hhia googu. Ugu haa ina, hangu iliiaydee kuꞌunaanimokee, ma qadidi hari yeꞌeeroo kosi.5 Tigay hhanti daamisiyay qayroo gu hhawatee, gimati hhawatee see, hhanti daamisiyay qayroo gu tigay, sa gimba heedi goó yondiida teesaaqay, ti slahhaaꞌasa pandaa da Taataa Iliitleemu, Iliitleemu googuna.
6 Bere haã slaydi cuuru gu cira⁄a kenga gu amooge, baku rawaa gu khaimooge baku hhapeege, qatlaykee cira⁄a hiĩ ilii khuupuuꞌuti haaoo dosi baku qanaoo kosi, ugu hhantii ooda cira⁄atee haa haaoo dosi. 7 Teꞌesii, ugu ha geemayda cira⁄atee ma waauti. Teesaaqay see, hiidahhasida hiiowa haaoo dosi. Bere teesaaqay laqada, dugu pihhi haa haibita ibidinaa da tleedi.
8 Qatlay ga iliitleehhede mara gu ⁄abu, tleehhi bi⁄inaa hiikhangaꞌasa da soomaiĩ gu pembee, maraa maydi khawa dakoo da tuutuqa ceedee mara googuu, bere heedi yaa hiihuui teꞌesaa.
9 Ugu hhanti daamisida pisagaroo paslaapasloo qaymoo dooguu da sabiibuge. Bere teesaaqay laqada, ⁄aamukee goõ yooti kitlaku, ugu hagu ⁄agintaaba. Ti ⁄aamu gu pisagarotira kilesiiba gaã daamisidi na kitlaku, slime ⁄aamu gu sabiibu see.
10 Hhanti dooslida qaymoo hari awu diĩ ilakufi sliimaa haa daqway.
11 Hhanti daamisida qayroo daa boo⁄imisi hari puteeri gu quubu gu bee⁄u sliimaa haa puteeri gu ⁄abakwi poy.
12 Khiidiidimi sansabiloo soomaiĩ cigahhage gu qayriya dooguu ga daasidege.”
Sariyaa da khaboo
13 Musaa gi kaay kara tuba, “Bere hhawata hiĩ khabimi hadee haa girigi guꞌumina, qariqaaqari gigi may, 14 gigi iliitloohhi haa gigi muriidisi hari kaawaraa tuba, qatlay giyaa iliikhabimi yaa slayiiba kikituꞌuumaa daqa dosii. 15 Teꞌesii, taataa haa iyoo da hadetee, hiraa khayay ilatlawa da kikituꞌuumaa da sagameeriya dooina daqa gadunge kaꞌafu gu yaamuge. 16 Taataa gu sagameeriyatee kwanda gi kaaye sa gaduũ hhakee tuba, ‘Ana haa hadisi hotoy, ma daga khabimi ha heediki, ma hadee dosi tleehhiti, inkoo ina gi slaiyaaba kara. 17 Kara, giĩ iliitloohhi hari gimba gu ilamuree tuba, hotoy giĩ slayiiba kikitoꞌoo. Teesaaqay see, ilatlawa da kikituꞌuumaa da hotoy na nahaã tiꞌii.’ Da hheꞌesi, taataa haa iyoo da sagameeriyatee hiitlaaꞌasiyay qayroo gu buburuu pandaa da gaduũ gu yaamuge. 18 Teꞌesii, gaduũ gu yaamu gu hiioyay hhawatakee haa gugi difiyay hari hhadoo. 19 Slime inay gu ⁄agitinay hhawatakee, ma bui kunduru⁄umay miyaa leẽ gu feesa sa taataa gu sagameeriyatee, sa gimba ina hiĩ qay uma gu tlaku sa kikitoꞌoo da Israeeli. Kara sagameeriyatee kwanda gi ilakonte hadee dosi tleehhida, etaa ina saga kereꞌesiyaaba tarakaa balalu sliimaa gu ibinaa dosi. 20 Teesaaqay see, bere gimbaki guti lou tuba, diĩ arimiiba halaamaa da kikituꞌuumaa daqa sagameeriyateesii, 21 sagameeriyatee dagaraati khay afamaraa gu mara gu taataa gosii. Teꞌesii hhawatee gu yaamu hhakee, giti cakhadinay hari tle⁄eẽ hiti amoolaa gwaꞌata, sa gimba ina hiraani khaydi ilamuree Israeelige, hari amoo da yondiida slipalauuma haa hhawata waku qatlay giyaa ilii mara gu taataa gosii wante. Teesaaqay hagani iliifiiciday sumuku tlakwaroo tla⁄aã googunaa.
22 Bere hhawata duguũ ooymi hari gui hadee da heedi waku, cada koinaa, hhawata haa hadetee kwanda digi cu⁄iye. Teesaaqay hagani iliifiiciday tlakwaroo Israeeligo.
23 Bere kikitoꞌoo dagaay daamisi ha hhawata, hhawata waku hingigi slaslayay amooge haa kikitoꞌotee haa girigi gui, 24 unkuray kwanda hagii ca⁄asidee cada koinaa kaꞌafu gu yaamuge haa gigi cakhadintay hari tle⁄eẽ hiti amoolaa kaka⁄iyay. Sagameeriyatee dagati gaasi, sa gimba ina yaa cunqusidiiba dagama iliiay, ina giyaamati yaamuge wanta. Hhawatakee duguti gaasi, sa gimba ina hiĩ muriidisi hadee da danaꞌa gosi. Teesaaqay hagani iliifiiciday tlakwaroo tla⁄aã googunaa.
25 Teesaaqay see, bere hhawata hingi slaslay kweerage haa sagameeriya daa hiidaamisi sa hhawata waku, gigi ooy hari ⁄uuru haa gigi paahhana, teꞌesii ti hhawatakee kilesi guũ laqu teesaaqay duguni gaasi. 26 Sagameeriyatee haga hhanti laqaday idoo lensee, sa gimba ina hiĩ yonditiiba tlakwaroo lensee daraa hiiboo⁄odi gaasaraa. Gimbaki ti hikaꞌa pahha gu heedi gu iliitlaꞌa danaꞌa gosi haa gugi gaasi hari taariru, 27 sa gimba hhawatakee giyaati slay sagameeriyati yade kweerage, sagameeriyatee giyaamati cunqusidi see, yaa wanaaba heedi gu ilabuꞌuru ina.
28 Bere hhawata hingi slaslay haa sagameeriya da kahha kikitoꞌoo, haa da kahhiye hiidaamisu, gigi ooy hari ⁄uuru haa gigi paahhana, digigi ilaslaslay, 29 hhawatakee kwanda gi buiye taataa gu sagameeriyatee kurundu⁄umay mibeeri kooani gu feesa. Slime kwanda ina gi khabiye sagameeriyatee, sa gimba ina giĩ muriidisi, etaa saga kereꞌesiyaaba tarakaa ibinaa dosii goõ.
30 Hhawata hhanti khabina hadetira daa may taataa gosi, etaa hhanti muriidisi buburuu gu taataa gosi.”