Hida daa tlaatlahhasi hiiguuma hiikurunkurida da hida gu Iliitleemuge
23
1 Da hheꞌesi, Musaa gi kaay tuba, “Hhawata daa hiitlupi baku daa afakereꞌedi slaꞌay gosi, ina hhantii guna hiikurunkurida da hida gu Taataa Iliitleemuge.2 Heedi daa laqwali daqa hadee da afaygo, ina gimati laqwaloo dosi da mibi naqatloo see, hhantii gunay hiikurunkurida da hida gu Taataa Iliitleemuge.
3 Amoonimoo baku Moaabimoo, baku heedi lensee gu laqwaloo dosi, ina gimati laqwaloo dosi da mibi naqatloo see, hhantii gunay hiikurunkurida da hida gu Taataa Iliitleemuge. 4 Sa gimba, qatlay gaa iliica⁄adiri Misirigo, inay yaa amoodabaayiriiba unkuray hari ⁄agoo haa maꞌay. Kara, inay yaa buiri peesay sa Balaꞌaamu nanku Beyoori gu yaamu gu Petoori hhapee da Araamu-Naharayiimuge,a ma ilawaasi unkuray. 5 Teesaaqay see, Taataa Iliitleemu, Iliitleemu googuna gwaa itatiisiiba Balaꞌaamu, ina yaatii fooki ilawaasatira gi ⁄aafaraa tleehhiti daqa doogunay, sa gimba Taataa Iliitleemu, Iliitleemu googuna, hindi slai dandiray. 6 Teesaaqay, etaa unkuray hagi hhanti iliiayday inay, ma ibiidiri hari qasaw haa pihharaa, koraraa goõ gu laqwaloo dooguna goõ daa khoca.
7 Unkuray hhanti wakiday kabiraa da Waedoomu, sa gimba inay ti hhiee kokuna. Slime, Wamisiri hagi hhanti wakiday, sa gimba unkuray see yaati yaamulooee gooba hhapee dooinay. 8 Teesaaqay see, yaꞌay haa okookoiĩ gu hida gwaa Edoomu dahhee haa Misiri, hhaã goó ibiidee tla⁄aã googunay, digimaa ila⁄imbi, ma firiiriniri sliimaa haa hida gu Taataa Iliitleemu.”
Slasla⁄iima hhanti wanta kambiige
9 Musaa gi kaay kara tuba, “Qatlay ga ilii gau kaydee haa fa⁄ayaa dooguna, haa gi tluhhusiday kambii, kila heedi hingi ga⁄aye haa gimba goõ gu tlaku. 10 Bere, hhawata waku tla⁄aã googunay hiĩ slasla⁄uudi, sa gimba hingii iliituutuqi pisagaroo dosi hari amasi, heedikee kwanda gii ca⁄iye gesaa kambiigo haa hhanti hiiday waꞌay gu kambiige tleemaa tlupu. 11 Qatlay gu khwayaiĩ ina hingi hhunciye, letu giyooy huuꞌude ina yaa asu ki⁄i kara kambiige.
12 Unkuray kwanda ga paslisidee daqa kenga gu kambiige, ga ilii kweeruumisu kakaydee. 13 Tla⁄aã gu khooslay googunay ga kontee, kooloo kwanda gi wane. Qatlay ga ilii kweeruusa kayde, foofoolisi bonda hari kooloo, goo hheꞌeside kweerusa, tipe sanka doogu bondakeesii. 14 Sa gimba, Taataa Iliitleemu, Iliitleemu googuna khookhocina hari tia haa hari yaqa kambii googunay, mangu ga⁄ay haa ma hiilu⁄i fa⁄ayaa dooguna dabaiĩ kokunay. Teesaaqay, unkuray kambii googuna kwanda gu tlintiꞌisidee sa Iliitleemu, ina hhanti arina idoo lensee doó muriidisa tla⁄aã googunay, gii fookidi haa hangugi may unkuray.”
Sariyaa paslaapasloo
15 Musaa gi kara kaay tuba, “Bere tongimoo yaani lakidi daqa dooguu, ugu hagu hhanti ki⁄isida daqa looimoo gosii. 16 Ina mayku ibiidiye tla⁄aã googunay, daqa gi slaiyege, yaamu gimaa hiileehhiyege ina. Ugu hhanti yondita, idoo lensee da tlakwi daqa dosii.
17 Tla⁄aã googunay da hhanti wana Israeelimoo gwaa slipalauudu, baku Israeelitoꞌoo daa slipalauti da daqa daa tlintiꞌisi da ilifiriiriru iliitleemamee. 18 Etaa, ugu haraa hhanti khayda bueemaa doó slaye hari slipalauumaa, guniti hadeegoo baku guniti hhawatago, mara gu Taataa Iliitleemuge, Iliitleemu googunay, sa hiigaasa seeliru daa seelimi, sa gimba Taataa Iliitleemu, Iliitleemu googuna dugoó slahhaaꞌasi ha hhawata haa hadee gwaa slipalauumidee.
19 Ugu hhanti kopisinta sa hhia googu Israeelimoo idoo hari ilaki⁄isa, gini peesaygoo, gini ⁄agoo goo, gini idoo wakaa, baku idoo doó kopisine hari ilaki⁄isa. 20 Teesaaqay see, ugu hiidahhasida kopisiru hari ilaki⁄isa, sa hhakaꞌa gu yaamulooee gooba, hhia googu Israeelimoo, hhanti bui ilaki⁄isa. Taataa Iliitleemu, Iliitleemu googu magu ⁄aafi ugu yondu googuu gonge ga yondite, hhapee ga iliiguuma kaydee maga hii⁄utlidi.
21 Bere ugu hangii faditi daqa Taataa Iliitleemuge, Iliitleemu googu, hhantii kaaꞌada hiigaasa gimbakee gangii faditi, sa gimba Taataa Iliitleemu, Iliitleemu googu kwanda gi slaiye idotee daqa doogwaa. Bere ugu haguba hiigaasa hiifadidukee, teꞌesii ugu hoo konta dakoo da tlakwaroo. 22 Teesaaqay see, bere ugu hangi tlaatlahhasida qaasaraa hiifadidu, teꞌesii ugu hoo kontaaba dakoo. 23 Gimba ga gimbuuside hari afa googu, kwanda hagu iliikonte gugi yondita, sa gimba ugu haati qaasidi hiifadidu googu hari muuna googu pandaa da Taataa Iliitleemu, Iliitleemu googu, hari afa googu ugu loi.
24 Bere ugu hiicatida hari tla⁄aã gu qaymoo da sabiibu da danaꞌa googu, hiidahhasida ⁄agoo sabiibu idoo ga iliislaꞌade. Teesaaqay see, khuꞌumi naraꞌa, hhanti wee⁄eda sabiibu haa gugii hufida khoosliya dooguu. 25 Kara, bere ugu hiicatida hari qaymoo da danaꞌa googu da kooma baruũ, ugu hiidahhasida pisigiru pisigaa hari dabaiĩ koku haa gi ⁄aginta. Teesaaqay see, hhanti sikida hari catay baruũ gwaa qadimidu.”