Sariyaa da cubuquru haa tarakaa
24
1 Da hheꞌesi, Musaa gi kaay tuba, “Bere hhawata hiĩ khabimi hadee, gi mayda slawa ila⁄imba pandaa dosii, sa gimba hiĩ arimi daqa dosii gimba gu slipalauuma, hhawatakee saga kereꞌesi tarakaa, sagagi hadisi tarakatee haa gigi gusina, ma waauti mara gosaa. 2 Qatlay hadetee gi iliiwaaute daqa hhawata gosaa, daga hiidahhasi khaboo ha hhawata waku. 3 Hhawatakee see gu cada bere gi waki hadetee, ina saga kereꞌesi tarakaa, sagagi hadisi dabaiĩ kosii haa gigi gusina, ma waauti mara gosaa, baku bere hhawatakee kosi gwaai, 4 inkoo, hhawatakira kosi gu pandaa sagaa kereꞌesu tarakaa, etaa ina gi khabinaaba kara, sa gimba hadetee hiĩ slasla⁄uti. Gimbakee yoóti slahhaaꞌasa pandaa da Taataa Iliitleemuge. Ugu haraa hhanti khayda tlakwaroo, hhapetaꞌage sugu hadisiye ha Taataa Iliitleemu, Iliitleemu googuna, balalu sliimaa ma aalimee dooguna tleehhiti.Sariyaa paslaapasloo
5 Bere heedi hinti khabimi inkoo tuutuu, etaa ina dugu hhanti leehhisi gauge, baku sugu hhanti hadisi yondu waku lenseei. Ina hiti ibiidi mara gosii qoomay gu kori leẽ sumuku, ma muunaboo⁄eesi hadee dosi.
6 Heedi lensee hhanti qaasi laanii tlaa⁄a da ilii saadiruu baku tlaa⁄u guri saadiru, sa iinaa gi kone. Teesaaqay laqaraa ti hiiowaraa pahha slafimaa gu heedikee laanii.
7 Bere heedi duguũ ooymi fiisi heedi tla⁄aã gu hhiee kosaa Waisraeeli, haa gugi tongimoo tleehhidisi, baku gugi naadina, heedikee guũ fiisu kwanda dugu gaasiye. Teesaaqay hagani iliifiiciday tlakwaroo tla⁄aã googunaa.
8 Bere heedi duguũ ooy ha ga⁄ay gu buubaa, unkuray kwanda ga ilakontee naraꞌa ilakaawa da hhapalooee Walaawi. Idoo giyaa ilii ilafahhi gooay inay, unkuray see, yondiida hari diliqimaa. 9 Slawaw, idoo Taataa Iliitleemu, Iliitleemu googuna giyaa laqi Miriyaamu amooge, unkuray gaa ilii hhiyuumage wantee hhapee da Misirigo.
10 Bere ugu haã kopisinti sa danaꞌa googu idoo waka, ugu hhantii daada waꞌay gu mara gosii, maa hiioodi idotaꞌa gi hadisiye laanii. 11 Ugu khoorooge ibiidi, may heedikee siĩ kopisinti suguraa khaye laanitee khoorooge. 12 Bere heedikee ti kwaꞌalimoo, ugu hhanti guꞌudee kayda, tay ha konta qayru gosi guri ilacuuwa mara googuu. 13 Ugu sugwaa ki⁄iside qayru gosi, letu gi iliikahhade hiihuua, ma slay idoo dari ilacuuwa. Teꞌesii ina kaay ⁄iisoo daqa dooguu, haa dati arina ti yondu gu haaki pandaa da Taataa Iliitleemu, Iliitleemu googuna.
14 Ugu hhanti labaꞌasida kwaꞌalimoo hiĩ gaa qaasidi, ma sugu yondiidi ugu, ina gimati Israeelimoo baku ti leẽ gu hhakaꞌa gu yaamulooee gooba goó ibiidee yaamu kokunay. 15 Balalu sliimaa sugu buꞌude bueemaa kosi, qatlay letu gi iliikahhade hiihuua, sa gimba ina ti kwaꞌalimoo haa hinti iliipaꞌami bueemaa hhakee. Ina ba⁄atii ilii⁄aa⁄i Taataa Iliitleemu, ugu hagi slayda dakoo da tlakwaroo.
16 Ayiĩ digi hhanti cu⁄i sa dakoo da yaꞌay koina, gimati yaꞌay see, digi hhanti cu⁄i sa dakoo da ayiĩ koina. Kila heedi duguti gaasiye, sa dakoo dosi ina loi.
17 Unkuray hhantii balambaahhaday haaki da hhakaꞌa gu yaamulooee gooba, gu makeebee, gimatii owa see qayru gu mogombiisoꞌoo, ma laanii tleehhidi. 18 Inkoo slawaw tuba, unkuray yaati tongee hhapee da Misirige, Taataa Iliitleemu, Iliitleemu googuna dangwaagi afiigweedi yadaa. Haã na idoo sanguũ ilafahhi, ma yonditiri gimbaki.
19 Qatlay ga iliibuꞌunte baruũ qaymoo dooguu, dugugi afahhana upa, hhanti ki⁄ida sa hiiowaraa upakee. May sa hhakaꞌa gu yaamulooee gooba, gu makeebee haa sa mogombiisee. Teesaaqay, Taataa Iliitleemu, Iliitleemu googuna ⁄aafi ugu yondu gonge gu dabaiĩ koku. 20 Qatlay ga iliiwee⁄eede ⁄aamu gu seyituuni khai kosaa, hhanti ilaki⁄ida we⁄inay waa da cada. May hikee guũ meetu sa hhakaꞌa gu yaamulooee gooba, gu makeebee haa sa mogombiisee. 21 Qatlay ga iliiwee⁄eede ⁄aamu gu sabiibu qaymoo doogwaa da misabiibugo, hhanti ilaki⁄ida kara we⁄inay. May hikee guũ meetu sa hhakaꞌa gu yaamulooee gooba, gu makeebee haa sa mogombiisee. 22 Ana idoo sanguũ ilakaay teesaaqay, ti sa gimba tuba, unkuray yaati tongee hhapee da Misirige. Ta⁄ameesaa yondiida teesaaqay, hagii slaslayday idoo gaa iliiwantee.”