25
1 Musaa gi ilakoomi gimba tuba, “Bere hida cada konay naanaqamoo, inay leehhisiyee gimba gooina balasaage digima ilabuꞌumi. Teꞌesii hakiimuu kereꞌesi gimbakee, hari geemawa heedi gubasli dakoo haa gi ⁄agitina heedi gu kooma dakoo. 2 Bere heedi gu kooma dakoo hiraay boo⁄i difoo khwacoo, hakiimuu ilafahhi ina, ma qaati hhapeege haa ma dugu difi pandaa dosii khwacoo qoomay gu dakoo dosi gooay. 3 Teesaaqay see, dugu hhanti difi khwacoo gu hiicatee mibeeri cigahha. Bere ina dugu difi hiicata da khwacoo mibeeri cigahha, teꞌesii hhia googu Israeelimoo dugu muriidisi pandaa da hidage.4 Qatlay slee doogu gi iliikala⁄ante baruũ biiraage, haga hhanti khiidinta afa gosi.
Sariyaa da khaboo da aalimee
5 Bere hhiee cada gu hhawatee yoó ibiidiyay tongoo lenge, leẽ gi hhana guba mawaraa naw, hadee da hikee guũ hhamu daga hhanti khabi ha hhawata waku hiĩ gu afamarakee gooba. Hhia gu hikee guũ hhamu, kwanda gi aaline kwaꞌalitoꞌotee. 6 Naw gu badiisu da laqwaliye, duguritiay uma gu hhiakira gwaa hhamu, uma gosi ba⁄atii hhana hhapee da Israeelige.
7 Teesaaqay see, bere hhiaki gu hikee guũ hhamu slaiyaaba aaliru mogombiisoꞌotee, ina hadakayde daqa gadunge kaꞌafu gu yaamuge haa sigigi kaada tuba, ‘Hhia gu hhawata goy hiĩ siꞌi ilakooma uma gu hhia gosi Israeelige, ina sini slaiyaaba hiigaasa yondu gosi gu hhia gu heedi goy gwaa hhamu.’ 8 Teꞌesii, gaduũ gu yaamu kwanda gu eteediyee hhawatakee haa gi gimbuusiyay haa ina. Bere ina ilakona siaraa aaliru mogobiisoꞌotee, 9 mogombiisoꞌotee gu ilii hadakayda ina teꞌesii pandaa da gaduũ gu yaamuge, gugi afabacida ya⁄atiya dosi leẽ haa gugi iliicubuquda cubuqari pandaage, gi ilaki⁄isida tuba, ‘Taqay dugunoó iliilaqi heedi goó sia ilakooma pandaage motoliya da hhia gosi!’ 10 Motoliya da heedikee dagati caahhi Israeelige tuba, ti motoliya da heedi daa afabaci ya⁄atiya.
Sariyaa paslaapasloo
11 Bere hhawatee cada qwaatliyay, da hheꞌesi hadee da leẽ tla⁄aã gooinay yaagi khayda sa ilabuꞌuru hhawata gosi, hadetee gi ooda slaꞌay gu hhawatakee gu qwaqwatliitlima haa hhawata gosi, 12 hadetee, kwanda haga afakereꞌeside daba gosi, saga hhanti ⁄awaarinta.
13 Hhanti kontay tle⁄eẽ guri ilakhuꞌudu waa cada curuqeerii kokunay, leẽ gwii loou haa leẽ gwii slaahhuslaahhu. 14 Hhanti kontay khooslay cada gu ilakhuꞌudu maraai kokunay, leẽ gu didiru haa leẽ gu coko⁄u. 15 Unkuray kwanda ga kontee tle⁄eẽ gu haaki guri ilakhuꞌudu, kara kooma khooslay gu lou guri ilakhuꞌudu, ma ibitiri balalu wa⁄a hhapee sangu hadisiyege ha Taataa Iliitleemu, Iliitleemu googuna. 16 Sa gimba, kila heedi goó yondiida gimbakee gu hiicoridu, ina ti slahhaaꞌasa daqa Taataa Iliitleemuge, Iliitleemu googuna.
17 Slawaw gimbakira Waꞌamaleeki giyaa laqiri daqa doogunay, gaa ilii amooge wantee, gaa ilii hhapee da Misiri dahhadee. 18 Qatlay unkuray gaa ilii ba⁄aa⁄atiri haa danguũ afiifaaki ⁄uuru sa hhiyuuma dooguna, Waꞌamaleeki gi cu⁄iri hhakira goõ gwaa aluũ kokunay waaree. Waꞌamaleeki yaa tlaꞌamuudiriiba Iliitleemu. 19 Teesaaqay, qatlay Taataa Iliitleemu, Iliitleemu googuna sangumaa iliiqaye hiifiifisa, iliitlaꞌadugo ha fa⁄ayaa dooguna goõ, danguũ niini⁄iti bareemoo sliimaa hhapee sangu hadisiye maga hii⁄utlidiri, kwanda ga cu⁄udee Waꞌamaleeki goõ. Dangu hhanti afahhana.”