Matiga haa leẽ da mibi
26
1 Musaa gi ilakoomi gimba tuba, “Qatlay gamaa iliiguntee hhapetiray sangu hadisiye ha Taataa Iliitleemu, Iliitleemu googuna, maga hii⁄utlidiri gi tooguna tleehhita haa gi ibitay teꞌesii, 2 unkuray kwanda gayii oodee matiga da buꞌuru gu pandaa gu baruũ goõ gamaa slaydee hhapee sangu hadisiye ha Taataa Iliitleemu, Iliitleemu googuna, barukee kuꞌusakunay kiyaarayge. Da hheꞌesi, la hadakayda daqa gimaa hiileehhiye Taataa Iliitleemu, Iliitleemu googuna, uma gosi ma ibiidi teꞌesii. 3 Ugu la ilii hadakayda hhapalooay gu waara qatlaykee yonduge, haa sugugi kaada ubee, ‘Letuti ana haã kaay daqa Taataa Iliitleemuge, Iliitleemu googu ambee, hangii guumi hhapee, Taataa Iliitleemu giyaa seelimi sa ayiĩ koti tuba, sandi hadisi.’ 4 Teꞌesii, hhapalooay hiioy kiyaaraykee dabaiĩ kokaa haa gugi qaasi hhapeege pandaa da masabaahu da Taataa Iliitleemu, Iliitleemu googu. 5 Da hheꞌesi, ugu ha ilaki⁄isida gimbaki pandaa da Taataa Iliitleemu, Iliitleemu googuu ubee, ‘Taataa goy yaa Araamimoo gwaa hhangwaayuusu tay haa yade, da hheꞌesi gii gweegwe⁄edi Misirige haa hida angaamaka. Ina haa motoliya dosi angaamaka, gi ibiidiri yade, gi hhapee da didiri tleehhidi da kooma ⁄uuru haa hida wa⁄a. 6 Teesaaqay see, Wamisiri hindigi labaꞌasiri dandiray hari ⁄uuru, haa hindaa ilahufidiri haa hindigi tongagaisiri hari yondu gwaa karahhu. 7 Da hheꞌesi, gi ilii⁄aa⁄ani Taataa Iliitleemu, Iliitleemu gu ayiĩ koti, ina hindigi akhasi ⁄aa⁄imu goori, gi arimi li⁄eemoo goori, maana doori haa labaꞌasu goori. 8 Teesaaqay, Taataa Iliitleemu hindaagii ca⁄asi hhapee da Misirigo hari daba gosi gu kooma ⁄uuru, ina gi ⁄isimi gimba gu hiitlaꞌameedeesa haa gimba gu didiru gu bakaꞌasa hari khisla. 9 Ina hindiraagi khay tiꞌii daqatii haa sindigi hadisi hhapeti doó guuma ilibaa haa dinu. 10 Inkoo, ana sugwaani leehhisi ugu, Taataa Iliitleemu matiga da baruũ gu pandaa gu hhapee sinaa hadisidi ugu.’ Teꞌesii, ugu ha qaasida kiyaaraykee hhapeege, pandaa da Taataa Iliitleemu, Iliitleemu googu, haa gi firinta pandaa dosii. 11 Da hheꞌesi, ugu sliimaa haa Walaawi haa hhakaꞌa gu yaamulooee gooba gu waaree tla⁄aã googunay haa hida gu mara googu, ⁄agintay haa hhaꞌaluumitay sa idadu goõ gu hhoi sanguũ hadisi ha Taataa Iliitleemu, Iliitleemu googuna.12 Kila kori gu tamiige, na kori gu hadisa leẽ da mibi. Teesaaqay, kila heedi tla⁄aã googunay kwanda gi hadisiye sa Walaawi, sa hhakaꞌa gu yaamulooee gooba, sa makeebee haa sa mogombiisee, ma slayri ⁄agoo gi slaiyee qatlay gi iliiwanee yaamu kokunay. Qatlay gamaa iliihheꞌesidee hadisa leẽ da mibi teesaaqay, 13 da hheꞌesi, ugu kaay sa Taataa Iliitleemu, Iliitleemu googuu ubee, ‘Ana haã hadisi mara gooaa daqatira daa tlintiꞌisi haa hagagi hadisi sa Walaawi, sa hhakaꞌa gu yaamulooee gooba, sa makeebee haa sa mogombiisee, idoo hanaa ili ilakaadi gooay ugu. Ana haa mayiiba ilakaawa doogu, haa dinaa afahhamiiba ma leẽ see. 14 Ana haa ⁄agimiiba leẽ da mibi daa tlintiꞌisi qatlay gaa ilii gaimaamide, kara haa kwahhiiba khoorooge mara gooaa leẽ da mibi, qatlay gaa ilii slasla⁄uudi, kara haa hadisiiba daqa dosi lensee sa hida gwaa kaka⁄ee. Ana haa akhasi Taataa Iliitleemu goy, ana haã yondiidi gimba goõ hanaa ilakaadi. 15 Inkoo, yuꞌuda tay hhapeege, taysaa rawaa gu rawgo daqa doogwaa daa tlintiꞌisigo, ⁄aafi hida koku Israeeli, sliimaa haa hhapee sandaa hadisidi, idoo gaa ilii seelinti gooay sa ayiĩ koti, hhapee doó guuma ilibaa haa dinu.’ ”
Sirakoomi ilakaawa da Taataa Iliitleemu
16 Musaa gi ilakoomi gimba tuba, “Letuti, Taataa Iliitleemu, Iliitleemu googuna, danguũ ilakaay ma sirakontiri ilakaawati goõ da haaki haa sariyati goõ. Unkuray khuꞌuma naraꞌa, gi akhamisiday hari ilahudaa kokuna goõ haa hari ibinaa dooguna goõ. 17 Letuti, unkuray haã kaadiri tuba, Taataa Iliitleemu, na Iliitleemu googuna haa ha ibitay amamu kosii, ha iliikontay ilakaawa goõ da haaki haa sariyaa dosi goõ haa ha akhamisiday afoo dosi. 18 Letuti, Taataa Iliitleemu hiĩ kaay pandataa tuba, unkuray ti hida kosi loi gu kaari, idoo giyaa iliifadidi gooay, haa tuba kwanda ga oodee ilakaawa dosi goõ. 19 Kara, ina hiĩ kaay tuba, hangu hiitlaysi rawaage, ba⁄ay da hhapapu wakinay see giyaa tleehhi, unkuray ha slayday hhaꞌaleesa, dumbeesa haa muree. Unkuray hida kosi tleehhitay, hhaã gu khooslay gosi, idoo giyaa ilii fadidi gooay.”