Sariyaa da Iliitleemu daa handikimi tle⁄enge
27
1 Da hheꞌesi, Musaa sliimaa haa gaduũ gu Israeeli gi kaay sa hida tuba, “Itatiisa hari gwaa⁄amee ilakaawati goõ hanguũ ilafahhi unkuray letuti. 2 Balotaꞌa gamaa iliitlo⁄osidee duudu gu Yoridaani haa gii guntay hhapee sangu hadisiye ha Taataa Iliitleemu, Iliitleemu googuna, qadidisa tle⁄eẽ gu deni haa gigi khwacimisiday. 3 Rawaa gu tle⁄eẽ hhakeesii handikima gimba goõ gu sariyati, qatlay gamaa iliitlo⁄osidee haa gii guntay hhapee sangu hadisiyege ha Taataa Iliitleemu, Iliitleemu googuna, hhapee doó guuma ilibaa haa dinu, idoo Taataa Iliitleemu, Iliitleemu gu ayiĩ kokuna gooay sangwaa iliifadidi. 4 Qatlay gamaa iliitlo⁄osidee duudu gu Yoridaani, qadidisa tle⁄eẽ hhakee rawaa gu oõ gu Ebaalige, haa gigi khwacimisiday, idoo hanguũ ilii ilafahhi gooay unkuray letuti. 5 Teꞌesii unkuray kwanda ga tleehhedee sa Taataa Iliitleemu, Iliitleemu googuna masabaahu da tle⁄eẽ. Hari hhanti yonditay khosliya lensee da sikhima, qatlay ga iliitleehhedee tle⁄eẽ hhakee. 6 Unkuray tleehha masabaahu sa Taataa Iliitleemu, Iliitleemu googuna hari tle⁄eẽ daaba tlupidu. Rawaa gu masabaahuteesii hadisiday sadaaka da da⁄araa sa Taataa Iliitleemu, Iliitleemu googuna. 7 Kara, unkuray ha hadisiday sadaaka da qasaw rawaa kosii, ⁄agima haa hhaꞌaluumida pandaa da Taataa Iliitleemu, Iliitleemu googunay. 8 Unkuray dangu hhanti afahhana handikiru rawaa gu unguruꞌukeesii gaã qadidimisidiri, gimba goõ gu sariyati. Qatlay ga iliihandikintee, boo⁄isa naraꞌa hari handikaa da iladeni.”Ilawaasa Oõ gu Ebaaligo
9 Da hheꞌesi, Musaa sliimaa haa hhapalooee da Walaawi, gi kaayri sa hida goõ gu Israeeli tuba, “Ye Waisraeeli, qaba la itatiisiday. Letuti, unkuray haã hida gu Taataa Iliitleemu, Iliitleemu googuna tleehhitiri. 10 Inkoo, unkuray kwanda ga muritee afoo da Taataa Iliitleemu, gi sirakomamitay ilakaawa haa sariyaa dosi hanguũ ilafahhi unkuray letuti.”
11 Baloteesii, Musaa gi ilakaay hida tuba, 12 “Qatlay gamaa iliitlo⁄osidee duudu gu Yoridaani, kabiraa lahhoꞌo da Israeeli maa qadimita rawaa gu oõ gu Gerisiimuge, ma kaayri gimba gu ⁄aafaraa. Kabirati na kabiraa da Simi⁄ooni, Laawi, Yuuda, Isakaari, Yoseefu haa Benyamiini. 13 Kara, kabiraa waka lahhoꞌo da Israeeli, maa qadimita oõ gu Ebaalige, ma kaayri gimba gu ilawaasa. Kabirati na kabiraa da Rubeeni, Gaadi, Aseeri, Sabulooni, Daani haa Nafutaali.
14 Da hheꞌesi, Walaawi ilaki⁄isiyay, haa gi kakaanay sa hida goõ gu Israeeli hari afoo da didiri tuba,
15 ‘Dugu ilawaasiye heedi goó boo⁄imisa sanaamuu gu khafinay, gu tlaa⁄a baku hari sikhima haa gigi qadidisi hari siiri, magi firiirimi idoo daa boo⁄imisi hari dabaiĩ gu dakwidiisay, hatee ti idoo doó slahhaaꞌasa Taataa Iliitleemu, Iliitleemu googuna.’
Hida goõ ilaki⁄isiyee, ‘Guti lou!’
16 ‘Dugu ilawaasiye heedi goó qooqiida taataa gosi haa iyoo dosi.’
Hida goõ kaayiyee, ‘Guti lou.’
17 ‘Dugu ilawaasiye heedi goó hiisatimisa tlaa⁄a da digimaa gu heedi danaꞌa gosi.’
Hida goõ kaayiyee, ‘Guti lou.’
18 ‘Dugu ilawaasiye heedi gu papa⁄eedeesa heedi gwaa ilahhamu.’
Hida goõ kaayiyee, ‘Guti lou.’
19 ‘Dugu ilawaasiye heedi goó hiigwacaꞌasa haaki da hhakaꞌa gu yaamulooee gooba, gu makeebee baku mogombiisee.’
Hida goõ kaayiyee, ‘Guti lou.’
20 ‘Dugu ilawaasiye hhawata guri gua hadee da taataa gosi, sa gimba ina hiti muriidisi buburu gu taataa gosi.’
Hida goõ kaayiyee, ‘Guti lou.’
21 ‘Dugu ilawaasiye heedi guroó gua makay.’
Hida goõ kaayiyee, ‘Guti lou.’
22 ‘Dugu ilawaasiye heedi guroó gua hhioo dosi, gini hotu taataa gosi baku hotu iyoo dosi.’
Hida goõ kaayiyee, ‘Guti lou.’
23 ‘Dugu ilawaasiye heedi guri gua kumboꞌoo dosi.’
Hida goõ kaayiyee, ‘Guti lou.’
24 ‘Dugu ilawaasiye heedi gu gaasa heedi hari hhaaboo.’
Hida goõ kaayiyee, ‘Guti lou.’
25 ‘Dugu ilawaasiye heedi goó oowa tlupa sa gaasa heedi gubasli dakoo.’
Hida goõ kaayiyee, ‘Guti lou.’
26 ‘Dugu ilawaasiye heedi gumaaba oowa naraꞌa gimba gu sariyati hari yondiidu.’
Hida goõ kaayiyee, ‘Guti lou.’ ”