Pasaaka
12
1 Taataa Iliitleemu gi kaay sa Musaa haa Haruuni giyaa ilii kahhiyee hhapee da Misirige tuba, 2 “Slehheki daqa doogunay ti slehheẽ gu tlaatleesoo da kori tleehhidi. 3 Unkuray kaawa sa marimariya goõ da Waisraeeli ubee, baloo da mibige da slehhekii, kila heedi hiioye ⁄ambeenimoo sa hida gu mara leẽ. 4 Bere hida gu mara leẽ ti coko⁄u hiidahhasiyaaiiba hiifaakisa ⁄ambeenimoo leẽ, hingi ilagaasiyee haa hida danaee koina gu ilaciyaa. Inay hiileehhiyee ⁄ambeenimoo leẽ gii dahhasiyee ⁄agoo inay gonkoinaa. 5 ⁄ambeenimoo baku dakhwadimoo gu hiileehhedee, kwanda ti kone kori leẽ haa gubasli sletu lensee.6 Kuꞌunaanimokee lugu ilakontay naraꞌa balotaꞌa naqatloo da mibi haa cigahha da slehhekee. Balotee, marimariya goõ da Waisraeeli, himaati isoo qutlidiyay kuꞌunaanaykee letu gimaa iliihuuꞌude. 7 Teꞌesii, inay ginimaa iliioyay ceedee da kuꞌunaanaykee haa gigi maakhiyay gompaai haa giidimaiĩ gu afamaraaee gu maraai gi ilii⁄aginee kuꞌunaanaykee. 8 Harima amasi hhakee leẽ, himaa ⁄aginay fuꞌumay diĩ waalimi aslaage. Gimaati ⁄aginay sliimaa haa naanu gu naa⁄a gwaa qadaw haa mukaatee doóba iliiqaasa hamiira. 9 Unkuray hagi hhanti ⁄agintay hari qanca ma iladahhasa see maꞌayge. Fuꞌumay hhakee kwanda digi waaline goõ, sagaiĩ, tankeebay haa idadu goõ gu guraꞌa. 10 Kara, hhanti meesiday fuꞌumiya lensee, doo iliidaye heetlawa naqatloo. Fuꞌumiya doo meeta da⁄akana aslaage. 11 Taqay ganoo ilii ⁄agintay. Unkuray lootii khitay jurungaguu kokuna hari coo⁄aai khireeri kokunay, tay haã daamisidiri ye⁄eetoo, haa kontay hhadoo dabaiĩ kokunay. Kara, ⁄agimakuna ciraai. Hatee ti Pasaakaa da Taataa Iliitleemu.
12 Hari amasi hhakee leẽ, hiicata hari hhapee da Misiri haa hati cu⁄a badiisasaa goõ gu laqwaloo da hida haa kuꞌunaanay gu hhapetee. Slime, hagi hukuma iliitleemamee goõ gu Misiri. Ana na Taataa Iliitleemu. 13 Inkoo, ceedetee ti caqariya tleehhita dari laqaru maraai ga iliiwante unkuray. Qatlay goo iliiarime ceedetee, hootii cata hari rawaa kokuna. Etaa! Unkuray slaydaaiiba sagadahha lensee da hhamisaraa, goo ilii maahhase hhapee da Misiri.”
14 Taataa Iliitleemu gi kaay tuba, “Koraraa gooba hiifaakoo, laqwaloo dooguna goõ daa khoca maa losonuusiyay balotee sa hiislawaraa da yondu gooi. Daqa laqwaloo doogunay goõ, haã na ilakaawa da koraraa haa koraraa goóba hiifaakoo tleehhita. 15 Balalu fanqu, ⁄agintay mukaatee doóba iliiqaasa hamiira. Baloo da pandaa da balalu hhakee gu fanqu, hiica⁄asiday hamiira goõ maraai kokunaa. Heedi gu ⁄agima idoo daa mahhaaꞌadi balalu hhakeesii gu fanqu, hikee kwanda dugu siꞌiye sumuku ha Waisraeeli. 16 Baloo da pandaa haa baloo da fanqu hamaa kontay hiikurunkurida daa tlintiꞌisi. Balalu hhakeesii gu cada, hhanti yonditay yondu lensee. Ti yondu gu hiiqamidu gu ⁄agoo kilesi, namaa yondiida.
17 Unkuray losonuusiday, losona gu mukaatee doóba iliiqaasa hamiira, sa gimba balotii, ana ganaa iliica⁄asi raqoo kokuna hhapee da Misirigo. Balotee laga ilakontay losonuusa daqa laqwaloo doogunay goõ daa khoca, ti ilakaawa da koraraa haa koraraa goóba hiifaakoo tleehhita. 18 Inkoo, tlaatleesa da khwayaiĩ gu baloo da mibi haa cigahha da slehheẽ gu pandaa, mukaatee doóba iliiqaasa hamiira gani ⁄agintay, baloo da mibeeri cada haa leẽ naqatloo hari khwayaiĩ da slehhekee leẽ. 19 Balalu hhakeesii gu fanqu, hhanti kontay hamiira lensee maraai kokunay. Heedi gu ⁄agima idoo da kooma hamiira, hikee gimati yaamulooay baku yaamulooay gooba kwanda dugu siꞌiye sumuku ha Waisraeeli. 20 Balalu hhakeesii, hhanti ⁄agintay idadu gu koomee hamiira. Daqeemoo sliimaa goó ilii ibitee ⁄agima mukaatee doóba iliiqaasa hamiira.”
21 Teꞌesii, Musaa gi eteedi gaduũ goõ gu Israeeli, sigigi kaay tuba, “Taa⁄amida cira leehhaw ⁄ambeenimoo sa hida gu kila maraai kokuna, lugu isa hiiquutliday sa losona gu Pasaaka. 22 Ceedee dosi laga taatliday dahhange haa layi ooday elemu gu khaimoo doo eteedine hisoopo ligii tika⁄aday ceedeteesii, hagagi maakhaday gompaai haa giidimaiĩ gu afamaraaee gu maraai kokunay. Kara, hari amasi hhakee heedi lensee hhantii ca⁄i khoorooge heetlawa naqatloo. 23 Taataa Iliitleemu, hiicati hari hhapee da Misiri, ma cu⁄i Wamisiritee. Qatlay giyoo iliiarine ceedee diĩ maakhi gompaaige haa giidimainge, yootii cati hari rawaa gu maraai kokuna, yoo hiigeemayaaba cu⁄udiisay, ma hiiguumi maraai kokunay, mangu hhamisi unkuray.
24 Unkuray haa laqwaloo dooguna, oowa ilakaawati koraraa haa koraraa goóba hiifaakoo. 25 Qatlay, unkuray gamaa iliiguntee hhapetaꞌay sangumaa hadisiye ha Taataa Iliitleemu, giyaa iliifadidi gooay sa unkuray, kwanda sugumaa ⁄isintee losona. 26 Kara, qatlay yaꞌay kokuna hangumaa ilii maasiyee tuba, ‘Losonaki maꞌaana mala kona?’ 27 Unkuray sigi kaadee taqay ubee, ‘Haã ti sadaaka da Pasaaka da Taataa Iliitleemu, sa gimba ina yaa hiicati hari rawaa gu maraai gu Waisraeeli yade Misirige. Teꞌesii, ina yaa cu⁄i Wamisiri, dandiray hindigi ilabuꞌumi gwaaꞌaraago.’ ” Qatlay Musaa giyaa iliihheꞌesi cocoꞌomoo gimbakee, Waisraeeli gi keebeeꞌemiti haa gi firiniri Taataa Iliitleemu. 28 Teꞌesii, Waisraeeli gi yondiidiri nama idoo Taataa Iliitleemu gooay giyaa ilafahhi Musaa haa Haruuni.
29 Qatlay daa iliiday amasidiira, Taataa Iliitleemu gi cu⁄i badiisasaa goõ da Misiri, tlaatleesi badiisu gu Faraaw goó ibiida kitiĩ gu tawaaloo dosii, haã badiisasaa da hida daa khiidimi jeerage. Slime badiisasaa goõ da kuꞌunaanay see digaati cu⁄i. 30 Inkoo Faraaw, yondimiisee dosi haa hida goõ gu Misiri gii tlayri hari amasi. Teꞌesii, hhapee da Misirige dagii ca⁄i ⁄aa⁄imu haa gaiidimoo gu didiru, sa gimba mara lensee hhaku daaba iliigwaaꞌa heedi.
Hiica⁄araa da Waisraeeli Misirigo
31 Teꞌesii, Faraaw gi eteedi Musaa haa Haruuni hari amasi, sigigi kaay tuba, “Ca⁄aw! Waauda daqa hida koaa. Taa⁄amida unkuray sliimaa haa Waisraeelitee, taa⁄amida yondiida sa Taataa Iliitleemu, idoo sinaa iliikaadiri gooay. 32 Unkuray owaw raqoo kokuna gu kuꞌunaanay la waautay. Slime, ana see hani ⁄aafidee.”
33 Wamisiri gi ilakwikwihhiri Waisraeeli, ma waaudiri cira hhapee dooinaa. Inay yaa ilahudeesiri gi kaayri tuba, “Gu lou, bere teesaaqay gooba, kaka⁄ana gonkotaa!” 34 Teesaaqay, Waisraeeli gi hubidiri gubaraa gooina gu mukaatee daa kahhiye iliiqaasa hamiira haa khooslay gooina gu iliitlada⁄amisu, tay giĩ khiidiniri hari qayroo haa gigi geregediri kwahhuge. 35 Slime, Waisraeeli yaati yondiidiri idoo sigaa ilii kaay gooay ha Musaa. Teesaaqay, inay gi firiiriniri Wamisiri, ma sigi qaqay qayroo, sliimaa haa khooslay daa boo⁄imisi hari feesa haa sahaabu. 36 Taataa Iliitleemu gi pihhi hhoinay sa Waisraeeli digima slai ha Wamisiri, inay gi hadimisiri sa Waisraeeli idadu sliimaa giyaa firiiriniri. Teesaaqay, Waisraeeli ginaa ilii afii⁄utliri Wamisiri khooslay gooina.
Waisraeeli waaudimoo gooina Misirigo
37 Waisraeeli yaa waauti yaamu gu Rameseesigo, gi hhiyuudiri hari yeꞌeeroo yaamu gu Sukooti naqatloo. Faadoo da hhawatee gwaa waaree, ti elefu mibeeri mibi lahhoꞌo, tigay haa daaqay digaa faadiiba. 38 Kara, raqa da didiri da hida yaa sirakonti inay, sliimaa haa raqoo gu deni gu kuꞌunaanay, tla⁄aã gooinay yaa wanay yakway, aaraa haa bee⁄u gwaa sliimaa khocee haa inay. 39 Sa gimba yaati cira waaudiri Misirigo, Waisraeeli yaa hiidahhasiriiba ilakhuukhuꞌusa ⁄agoo da hhiyuuma dooina, ti gubarakira kilesi ginaa konay daaba iliiqaasa hamiira. Teꞌesii, inay gi tooinaa da⁄aa⁄aniri mukaatee daaba iliiqaasa hamiira.
40 Inkoo, Waisraeeli yaa ibiidiri hhapee da Misirige koraraa miyaa cigahha haa mibeeri tami. 41 Baloo da hiifaakoo da koraraa hhakee miyaa cigahha haa mibeeri tami, balotee loi loi daganaa iliiwaaudi hida gu marimariya goõ gu Taataa Iliitleemu hhapee da Misirigo. 42 Hari amasi hhakee Taataa Iliitleemu yaati guuli hiica⁄asaraa da Waisraeeli hhapee da Misirigo. Namati amasi hhakee leẽ, inay see haa laqwaloo dooina goõ daa khoca, haraatii boo⁄iri guulimee gi laqanay muree daqa dosi.
Ou gu Pasaaka
43 Taataa Iliitleemu yaa kaay sa Musaa haa Haruuni tuba, “Haã na ilakaawa da losona gu Pasaaka. Heedi lensee gu yaamulooay gooba hhanti ⁄agina ⁄agoo da Pasaaka. 44 Tongee daa kirigi hari peesay, bere gaã daba⁄adi hiidahhasida ⁄agoo Pasaaka. 45 Khocimiisay gu yaamulooay gooba ma yondimiisay lensee hhanti ⁄agina ⁄agotee. 46 ⁄ambeenimoo gu Pasaaka kwanda duguti ⁄agine mara lenge. Fuꞌumiya dosi lensee hagari hhanti hiica⁄aday khoorooge mara duguũ ilii isahiiquutligo. Kara, hhanti qeetisiday faraa dosi lensee. 47 Marimariya goõ da Waisraeeli kwanda gi losonuuside losonakee gu Pasaaka.
48 Heedi lensee gu yaamulooay gooba goó ibiida tla⁄aã googunay, bere slai losonuusa losona gu Pasaaka gu Taataa Iliitleemu sliimaa haa unkuray, ti kwanda gesaa hhawatee goõ gu mara gosi digi daba⁄iye. Teꞌesii, dugu asu faadi yaamulooay pahha haa asu ⁄agina ⁄agoo da Pasaaka. Hhawata lensee daba daba⁄u hhanti ⁄agina. 49 Sariyatee ti leẽ daqa Waisraeelige haa daqa yaamulooee gooba goó ibiidee sliimaa haa unkuray.”