Sagadahha da mibi: Cu⁄uduũ gu badiisasaa
11
1 Inkoo, Taataa Iliitleemu gi kaay sa Musaa tuba, “Kahhada wanta sagadahha leẽ garaa khawe daqa Faraawge haa hhapee da Misirige. Qariqaaqari hangu geemay, ma waautiri teꞌesaa. Kara, giyoó ilii teesaaqay laqiye, hangu gusina, ma waautiri sumuku. 2 Ugu kaay sa Waisraeeli goõ, hhawatee haa tigay ubee, firiirinee daqa hida danaee koinaa, ma sigi qaqay idadu daa boo⁄imisi hari feesa haa sahaabu.” 3 Taataa Iliitleemu gi ⁄isimi Wamisiri, ma laqaniri hhoinay daqa Waisraeelige. Kara, Musaa loi see gi heedi gu didiru tleehhidi, dugugi muriidi hari khisla ha yondimiisee da Faraaw haa hida goõ gu hhapetee da Misiri.4 Teꞌesii, Musaa gi kaay sa Faraaw tuba, “Taataa Iliitleemu hinti kaay taqay, ‘Letuti hari amasidiira hiicata hari tla⁄aã gu hhapee da Misiri. 5 Badiisasaa goõ gu yaꞌay gu hhawatee kaka⁄iyay gu hhapee da Misiri, tlaatleesi badiisu gu Faraaw goó ibiida kitiĩ gosii gu tawaalooge, daqa badiisukaꞌa naqatloo gu tongitoꞌoo doó saadima baruũ tlaa⁄age, sliimaa haa badiisasaa goõ da kuꞌunaanay. 6 Teꞌesii, doo wana ⁄aa⁄imu gu didiru hhapee da Misirige, ⁄aa⁄imu gu kahha hiica⁄a, ma hiica⁄a see etaa, maa kara hiica⁄iyaaba. 7 Teesaaqay see, tla⁄aã gu Waisraeelige, hhaku gwehheraa see gumaa iliigwehheelima heedi, ma kuꞌunaanimoo see. Unkuray ma caahhadiri tuba, Taataa Iliitleemu yoóti paslisi Wamisiri haa Waisraeeli.’ ” 8 Musaa gii faakisi hari amoo da kaawaraa sa Faraaw tuba, “Yondimiisee toku goõ, yoo khayay haa gi keebeeꞌemidiyay pandaa dooii hari murumuꞌuumaa, tay gi kakaanay tuba, ‘Ugu waaudi sliimaa haa hida koku goõ goó sirakomamidee ugu.’ Qariqaaqari gimbakee giyoó iliicatiye, ana waauda tiaa hhapee da Misirigo.” Da hheꞌesi, Musaa gi waaudi daqa Faraawgo, tay hiĩ qupidi hari khisla.
9 Taataa Iliitleemu yaa kaay sa Musaa tuba, “Faraaw gu akhasiyaaba ugu, gimba gooi gu bakaꞌasa, ma hiiroogidi hhapee da Misirige.” 10 Teesaaqay, Musaa haa Haruuni gi yondiidiri gimbakee gu bakaꞌasa pandaa da Faraawge. Teesaaqay see, Taataa Iliitleemu gi ⁄isimi muuna gu Faraaw ma karahhi, gi siꞌi geemawa Waisraeeli, ma waaudiri hhapee dosaa.