Sagadahha da gweleti: Ingagimoo
10
1 Taataa Iliitleemu gi kaay sa Musaa tuba, “Taa⁄a daqa Faraawge, sa gimba ana muuna gosi haa muunaiĩ gu yondimiisee dosi hagiĩ karahhasi, ma laqami gimba gu bakaꞌasa tla⁄aã gooinay. 2 Slime unkuray maa hiidahhasiday ilakesidu sa yaꞌay kokuna haa okookoiĩ kokuna, idoo gaa iliibelendeqesi Wamisiri hari yondu gimbakee gu bakaꞌasa tla⁄aã gooinay. Teesaaqay laqa unkuray ma caahhadiri tuba, ana na Taataa Iliitleemu.”3 Teesaaqay, Musaa haa Haruuni gi hadakayri daqa Faraawge haa sugugi kaayri tuba, “Taataa Iliitleemu, Iliitleemu gu Waeburaaniyaa kakaakana tuba, ‘Ilakonta sisiu laqaru murumuꞌuumaa pandaa dosii malaalee naqatloo? Geemay hida kosi ma waaudiri, magu firoo kayri. 4 Bere hoó siꞌida geemawa hida kosi ma waaudiri, heetlaalee haraa khay ingagimoo hhapee dooguu. 5 Hhapee goõ da Misiri yootii hhantuta sa ingagimokee goo ilaslaaba hhapetee. Ingagimokee yooti ⁄agina idadu daa ilameesi ha tlubaykira gu tle⁄eẽ. Slime yoo meesiyaaba idoo lensee rawaa gu khai gwaa tiꞌidee qaymamuge. 6 Ingagimokee yooti haci maraai kokuu, maraai gu yondimiisee dooguu haa maraai gu Wamisiri goõ. Ayiĩ kokuna baku okookoiĩ kokuna see, kahhiyay arimaa, ingagimoo gu wa⁄a da hinkaa gooay, yadaa digaa ilii laqwaligo haa letuti naqatloo.’ ” Da hheꞌesi, Musaa gi waaudi daqa Faraawgo.
7 Yondimiisee da Faraaw gi maasiri ina tuba, “Heediki hindi ilahufidi malaalee naqatloo? Geemay hida hhanki ma waauꞌudiri, ma firoo kayri Taataa Iliitleemu, Iliitleemu gooina. Inkoo, ugu haã antiibaslii tuba, hhapee da Misiri hiĩ tlakwaakwaydi?”
8 Teꞌesii, Musaa haa Haruuni digiraagi khay daqa Faraawge, ina sigigi kaay tuba, “Taa⁄amida yondiida sa Taataa Iliitleemu, Iliitleemu googuna. Inkoo, hangu maasa, ti haã miyaa loi na hadakayay sliimaa haa unkuray?”
9 Musaa gugi ilaki⁄isi ina tuba, “Dandiray hati waaudana haa qaraiya doori, gaduũ koti, yaꞌay koti gu hhawatee haa gu tigay, haa kuꞌunaanay goori goõ, sa gimba, ti kwanda ga ⁄isiru kayne losona sa Taataa Iliitleemu.”
10 Faraaw sigigi kaay hari belendeqesa tuba, “Bere hangoo geemaw, ma waautiri sliimaa haa tigay kokuna haa yaꞌay kokuna, gu louu hoo slaꞌaday iliiawa da Taataa Iliitleemu! Ana haã arimi pandataa, unkuray kontay piimaa da tlakwi muunaiĩ kokunay. 11 Suti! Hhawatee kilesi na hadakayee, ma firoo kayri Taataa Iliitleemu, sa gimba hikee na gimba ga firiirintee.” Teꞌesaa, Musaa haa Haruuni digigi gusimi pandaa da Faraawgo.
12 Taataa Iliitleemu gi kaay sa Musaa tuba, “Tafaꞌasi daba googu rawaa gu hhapee da Misirige, ingagimoo maa khay, ma ⁄agimi baruũ goõ hhapee da Misirige ha idadu goõ daa ilameesi ha tlubaykira gu tle⁄eẽ.” 13 Teesaaqay, Musaa gi tafaꞌasi hhadaa dosi rawaa gu hhapee da Misirige. Taataa Iliitleemu hiraagi khay pupuiya bara da ilacindoo gu rawaago, gi fahhanti hhapee da Misirige tleemaa tlupu haa amasi piray. Daa iliipisi pupuiyatee hiraagi khaydi ingagimoo. 14 Ingagimoo gii qoomi hhapee goõ da Misiri. Ingagimokee yaa raqa da didiri hari khisla, etaa daa hiica⁄iiba ingagimoo da hinkaa gooay, haa maa hiica⁄iyaaba kara. 15 Ingagimokee yaa ilaslaabi hhapee goõ da Misiri, hhapee goõ yaati boo⁄aydi. Gi ⁄aginiri baruũ goõ haa ⁄aamu gwaa meetu khaige, daa ilameesi ha tlubaykira gu tle⁄eẽ. Wantaaba loo⁄iya lensee daa meti rawaa gu khaige baku barunge hhapee goõ da Misiri.
16 Teꞌesii, Faraaw gi eteedi cira Musaa haa Haruuni sigigi kaay tuba, “Ana haã yondiidi tlakwaroo pandaa da Taataa Iliitleemu, Iliitleemu googunay, slime haa daqa doogunay. 17 Inkoo, hangu tlaatlaqasa hani ilamooyintee tlakwaroo doy, waati kilesi. Sini firintee Taataa Iliitleemu, Iliitleemu googuna, sini kwahhiye gwaaꞌarati daqa dooaa.”
18 Da hheꞌesi, Musaa gi waaudi daqa Faraawgo, gi firookay Taataa Iliitleemu. 19 Taataa Iliitleemu hiraagi khay pupuiya da dihhi ilacindoo gu biraago. Pupuiyatee gi tlaysidi ingagimokee haa gigi leehhisidi tlawa da didirige da Saamu. Wanaaba ingagimoo lensee gwaa meetu hhapee da Misirige. 20 Teesaaqay see, Taataa Iliitleemu gi karahhasi muuna gu Faraaw, ina yaa geemayiiba Waisraeeli ma waaudiri.
Sagadahha da gweleti: ⁄oona
21 Taataa Iliitleemu gi kaay sa Musaa tuba, “Tafaꞌasi daba googu raw khuꞌusa, ⁄oona dii looi ma ilaslaabidi hhapee goõ da Misiri, ⁄oona dii looi haã heedi hitii dahhasi slaapaaꞌasa see.” 22 Da hheꞌesi, Musaa gi tafaꞌasi daba gosi rawge, ⁄oona dii looi gi ilaslaabidi daqeemoo goõ gu hhapee da Misiri, qoomay gu balalu tami. 23 Hida hingaay dahhasiriiba ariiriru, gimati waauda see daqeemoo giyaa iliiwanee qoomay gu balalu tami. Teesaaqay see, yade Goseenige daqeemoo giyaa ilii ibimaamidiye Waisraeeli, yaati cencee kilesi.
24 Teꞌesii, Faraaw gi eteedi Musaa, sugugi kaay tuba, “Taa⁄amida firima Taataa Iliitleemu. Slime tigay kokuna haa yaꞌay kokuna hadakayee sliimaa haa unkuray. Teesaaqay see, kuꞌunaanay goguna meeti tiꞌii.”
25 Musaa gi kaay tuba, “Ti kwanda sandi ⁄imbide hiiowaraa kuꞌunaanay goori gu sabiihu haa sadaaka da da⁄araa da hadisa sa Taataa Iliitleemu, Iliitleemu goori. 26 Dandiray, kwanda ga waaudane haa kuꞌunaanay goori, wantaaba tankeebiya lensee da meeta alunge. Sa gimba, daqa kuꞌunaanay goraa loi, dandiray hagani iliislayna idadu guri firoo Taataa Iliitleemu goori. Kara, dandiray hhidina ti kuꞌunaanimoo haloo haguni hadisana sadaaka sa Taataa Iliitleemu, goo daane yade hoo asu caahhana.”
27 Teesaaqay see, Taataa Iliitleemu gi ⁄isimi muuna gu Faraaw ma karahhi, gi siꞌi geemawa Waisraeeli ma waaudiri. 28 Faraaw gi kaay sa Musaa tuba, “Waaudi tiaa pandaa dooaa! Bere hanoo arimaa kayda kara ana, haguũ ilii⁄oo⁄i, caahhi balotee hati gwaꞌata.” 29 Musaa gugi ilaki⁄isi tuba, “Naraꞌa idoo gaã iliikaadi gooay! Etaa haa khawaaba magu arimi kara.”