Sagadahha da kooani: Kaka⁄u gu kuꞌunaanay
9
1 Da hheꞌesi, Taataa Iliitleemu gi kaay sa Musaa tuba, “Taa⁄a daqa Faraawge sugu kaade ubee, ‘Taataa Iliitleemu, Iliitleemu gu Waeburaaniyaa, kakaakana tuba, geemay hida kosi ma waaudiri, magu firoo kayri ina. 2 Bere hoo siꞌida geemawa inay ma waaudiri, hagigi ilakonta tlaatlahhamisu inay, 3 daba gu Taataa Iliitleemu hiraa khay sagadahha da tlakwi daqa kuꞌunaanay googunay goõ, daqa faraasige, daqwaai, gamiyaa, yakway, bee⁄u haa aaraa. 4 Teesaaqay see, Taataa Iliitleemu yooti paslisi kuꞌunaanay gu Waisraeeli haa kuꞌunaanay gu Wamisiri, wantaaba kuꞌunaaniya lensee da Waisraeeli da gwaaꞌa.’ ” 5 Taataa Iliitleemu gi qaasi qatlay haa gi kaay tuba, “Heetlaalee, ana Taataa Iliitleemuu hoo yondiidi gimbaki hhapee da Misirige.”6 Heetlaalee dosii Taataa Iliitleemu gi yondiidi, idoo giĩ ilii kaay gooay. Kuꞌunaanay goõ gu Wamisiri gi kaka⁄i. Teesaaqay see, wantaaba kuꞌunaaniya lensee da Waisraeeli daa gwaꞌati. 7 Faraaw gi ya⁄abi hida maa mairi, gimba gu kuꞌunaanay gu Waisraeeli. Inay sugugi kaayri tuba, wantaaba kuꞌunaaniya dooina lensee diĩ gwaꞌati. Teesaaqay see, Faraaw yaa ⁄imbiiba geemawa Waisraeeli ma waaudiri.
Sagadahha da lahhoꞌo: Cuncufeeray
8 Da hheꞌesi, Taataa Iliitleemu gi kaay sa Musaa ha Haruuni tuba, “Owaw ⁄ura da tanuuri, Musaa gi wincalaakhiye rawaage pandaa da Faraawge. 9 ⁄uratee hiti ceceiya dii slaahhislaahhi tleehhita hhapee goõ da Misiri. Slime yooti ⁄isinta cuncufeeray goo hiikaꞌamida daqa hidage haa daqa kuꞌunaanayge hhapee goõ da Misiri.” 10 Teesaaqay, yaagii oyri ⁄ura tanuurigo haa gi qadimidiri pandaa da Faraawge. Musaa gigi wincalaakhi ⁄uratee rawaage, daagii ca⁄i cuncufeeray gwaa hiikaꞌamidu daqa hidage haa daqa kuꞌunaanayge. 11 Miisliisetira yaay dahhasiriiba qadimidu pandaa da Musaage, sa gimba gu cuncufeeray gwaa slaqoo koinay waara, haa slaqoo gu hida goõ gu Misiri. 12 Teesaaqay see, Taataa Iliitleemu gi ⁄isimi muuna gu Faraaw gi karahhi, ina yaa itatiisiiba Musaa haa Haruuni, tiraaqay Taataa Iliitleemu gooay giyaa ilii kaay sa Musaa.
Sagadahha da fanqu: Tlubay gu tle⁄eẽ
13 Da hheꞌesi, Taataa Iliitleemu gi kaay sa Musaa tuba, “Heetlaalee tlayii hari tumpaatumpu, la hadakayda daqa Faraawge, sugoo kaade ubee, ‘Taataa Iliitleemu, Iliitleemu gu Waeburaaniyaa kakaakana tuba, geemay hida kosi ma waaudiri, magu firiiriru kayri. 14 Bere hagi geemaydaaba, qatlaykii haraa khay sagadadahhu gu ⁄uuru daqa dooguu, daqa yondimiisee dooguu haa daqa hida kokuu goõ. Teꞌesii, ugu hoo caahhada tuba, wanaaba waku da ina gooay khooroo gonge. 15 Sa gimba, inkoo naqatloo hiĩ aloo tafaꞌasi daba gosi, haa gugii maahhasa ugu haa hida koku, hari sagadahha diĩ aloo hhamisa unkuray sumuku rawaa gu khooroogo. 16 Teesaaqay see, ina hinti hhamisiiba ugu sa piimati loi, ma sugu laqami ⁄uuru gosi, slime uma gosi, duguma kakaami khooroo gonge. 17 Inkoo, ugu kahhada toogwaa laqaaqanta darabimaa daqa hida kosii, ugu slaꞌadaaba magi geemaydi inay, ma waaudiri. 18 Inkoo, heetlaalee qatlay da hinkaa gooay, haraa khay tlubay gu didiru gu tle⁄eẽ, hiĩ gu kahha hiica⁄a hhapee da Misirige, tlaatleesoo dosaa haa letuti naqatloo. 19 Teesaaqay, ilakaay cira kuꞌunaanay googu haa tongee doogu yaa ki⁄iyee ayage deꞌengo, ma ba⁄aniri. Sa gimba, kila heedi baku kuꞌunaanimoo doo ilamaye khoorooge hiti gwaai, qatlay tlubay gu tle⁄eẽ giyoo iliitlubiye.’ ”
20 Yondimiisee wakinay gu Faraaw gwaa muriidee gimba gu Taataa Iliitleemu, inay gii slehheesiri harikhawa tongee haa kuꞌunaanay gooina maraai koinay. 21 Teesaaqay see, hhakira gwaaba muriida gimba gu Taataa Iliitleemu, gi mayri tongee haa kuꞌunaanay gooina qaymamuge.
22 Da hheꞌesi, Taataa Iliitleemu gi kaay sa Musaa tuba, “Tafaꞌasi daba googu rawaa gu raw khuꞌusa, tlubay gu tle⁄eẽ ma tlubi hhapee goõ da Misiri. Tlubaykee iliitlubiye hida, kuꞌunaanay haa baruũ goõ qaymamu gu Misirige.” 23 Teesaaqay, Musaa gi waratlaysi hhadaa dosi raw khuꞌusa. Taataa Iliitleemu yaagi ya⁄abi tiiriꞌisinoo, tlubay gu tle⁄eẽ, haa mankaraaiya da gwaasla⁄aa daa hiimankaꞌasidi hhapee naqatloo. Teꞌesii, Taataa Iliitleemu hiraagi khay tlubay gu tle⁄eẽ hhapee goõ da Misiri, 24 gwaa kooma mankaraaiya haa gwaasla⁄aa. Wanaaba tlubay gwaa tlubu da hinkaa gooay hhapee da Misirige, yadaa tlaatleesoogo giyaa ilii hhapee tleehhiti. 25 Tlubaykee gu tle⁄eẽ yaa tlakweemisi idadu goõ gwaa qaymamuge waaree haa daqeemoo goõ hhapee da Misirige. Yaa cu⁄i hida, kuꞌunaanay haa yaa tlakweemisi baruũ haa khai goõ qaymamuge. 26 Tlubayki gu tle⁄eẽ, ti yaamu gu Goseeni kilesi ginaa ilii tlubiiba, yaamu daa ilii ibimaamidiye ha Waisraeeli.
27 Da hheꞌesi, Faraaw gi eteedi Musaa haa Haruuni sigigi kaay tuba, “Qatlaykii ana haã yondiidi tlakwaroo. Taataa Iliitleemu, ina ti kona haaki, ana haa hida koi haã dakusani. 28 Firima Taataa Iliitleemu, sa gimba tiiriꞌisinoo haa tlubay gu tle⁄eẽ hindii ilaqai. Inkoo, ana hangu geemaw, ma waautiri ha metaaiiba kara.” 29 Musaa gugi ilaki⁄isi tuba, “Qatlay goo iliica⁄e yaamugo, hoo waratlaysa dabaiĩ koi rawaage haa gi firima Taataa Iliitleemu. Tiiriꞌisinoo hiifaakida haa tlubay gu tle⁄eẽ yoo wanaaba kara, ma caahhadi tuba, khooroo goõ dati Taataa Iliitleemu. 30 Teesaaqay see, ana khua ambee, ugu haa yondimiisee doogu kahhaday kontaaiiba gwaa⁄amee daqa Looimoo Iliitleemuge.”
31 (Baruũ goõ gwaa wa⁄u haa hiĩ gwaa daadaauusu hiifahha humbalaalay goõ dugwaati tlakweemisi. 32 Teesaaqay see, baruũ waku gwaa khahha wa⁄araa dugwaa tlakweemisiiba, sa gimba yaa kahhi ⁄atlaraa).
33 Da hheꞌesi, Musaa gi waaudi daqa Faraawgo, gii ca⁄i yaamugo. Musaa gi tafaꞌasi dabaiĩ kosi rawaage daqa Taataa Iliitleemu khuꞌusa. Teꞌesii, tiiriꞌimisu, tlubaykee gu tle⁄eẽ haa tlubay goõ gii faaki. 34 Faraaw giyaa ilii arimi tlubay gu tle⁄eẽ haa tiiriꞌimisu hingii faaki, gi yondiidi tlakwaroo kara. Ina haa yondimiisee dosi muunaiĩ koina gi karaarahhiri. 35 Teesaaqay, muuna gu Faraaw gi ilakoomi karahha, ina yaa geemayiiba Waisraeeli ma waaudiri, idoo Taataa Iliitleemu gooay giyaa ilii giyaadi kaawaraa hari amoo da Musaa.