Sagadahha da cada: Tlambee⁄a⁄aa
8
1 Da hheꞌesi, Taataa Iliitleemu gi kaay sa Musaa tuba, “Taa⁄a daqa Faraawge sugu kaade ubee, ‘Taataa Iliitleemu yaa kakaakana taqay tuba, geemay hida kosi ma waaudiri magu firoo kayri. 2 Bere hoo siꞌida geemawa ma waaudiri, ina sagadahhi hhapee doogu goõ hari tlambee⁄a⁄aa. 3 Duudu gu Nayli yooti ilawa⁄i tlambee⁄a⁄aa. Tlambee⁄a⁄aa yootii gunay mara googuu, sagay kokuu goo iliiguꞌudege, buburuu googuu, maraai gu yondimiisee dooguu haa maraai gu hida koku goõ. Tlambe⁄a⁄atee yootii gunta daqeemoo kokunay gu iliitantiitiruge haa waꞌay gu khooslay googunay gu iliigwaciru gubaraa. 4 Kara, tlambee⁄a⁄atee yootii dadayay rawaa gu slaqwa dooguu, slaqoo gu hida kokuu haa slaqoo gu yondimiisee dooguu goõ.’ ”5 Taataa Iliitleemu gi kaay sa Musaa tuba, “Kaay sa Haruuni ubee, ‘Tafaꞌasiye daba gosi gu kooma hhadaa rawaa gu duudadaage, fereejaaeege haa tlawooge. Teꞌesii, tlambee⁄a⁄aa yaa hiica⁄iyay haa giiqonay hhapee goõ da Misiri.’ ” 6 Teesaaqay, Haruuni gi tafaꞌasi daba gosi rawaa gu maꞌay gonge gu Misiri. Teꞌesii tlambee⁄a⁄aa yaagii ca⁄iri haa gi ilaslaabiri hhapee goõ da Misiri. 7 Teesaaqay see, miisliisee da Misiri gi laqiri teesaaqay, hari qeeraa gu miislay gooina. Inay see hiraagi khayri tlambee⁄a⁄aa hhapee da Misirige.
8 Da hheꞌesi, Faraaw gi eteedi Musaa haa Haruuni, sigigi kaay tuba, “Firima Taataa Iliitleemu ma hiica⁄asi tlambee⁄a⁄aa daqa dooaa haa daqa hida koaa. Ana ha geemawu hida kokuna ma waaudiri, ma hadisa kayri sadaaka sa Taataa Iliitleemu.” 9 Musaa gi kaay sa Faraaw tuba, “Aare ugu kaay qatlay ga slaꞌade, ma sugu firimi daqa Iliitleemuge, yondimiisee doogu haa hida koku, tlambee⁄a⁄aa ma waauti daqa doogunaa haa maraai kokunaa. Tlambee⁄a⁄aa da duudu gu Naylige waaree kilesi na meetiyay.”
10 Faraaw gi kaay sa Musaa tuba, “Heetlaalee.” Musaa gi kaay tuba, “Hiica⁄iye ga iliigimaamiside gooay, ugu ma caahhadi tuba, wanaaba waku da Taataa Iliitleemu goori gooay. 11 Tlambee⁄a⁄aa waauta daqa doogwaa, maraai kokaa, daqa yondimiisee doogwaa haa daqa hida kokaa. Tlambee⁄a⁄aa hiti meetiyay duudu gu Naylige kileesii.”
12 Musaa haa Haruuni giyaa iliiwaaudiri daqa Faraawgo, Musaa gi ilii⁄aa⁄i Taataa Iliitleemu, ma kwahhi tlambee⁄a⁄atee daqa Faraawgo. 13 Taataa Iliitleemu gi yondiidi, idoo Musaa giĩ ilii firimi gooay. Tlambee⁄a⁄aa gi kaka⁄adi waꞌay gu maraaige, efenuge haa qaymamuge. 14 Hida gii kurunkuriniri tlambee⁄a⁄atee upaiĩ haa upaiĩ, hhapee goõ da Misiri gi hhaahhiisidi. 15 Teesaaqay see, Faraaw giyaa ilii arimi dingii slakwai, muuna gosi gi ilakoomi karahha. Ina yaa siꞌi itatiisa Musaa haa Haruuni, idoo Taataa Iliitleemu gooay giyaa ilii kaay.
Sagadahha da tami: Titiirii
16 Da hheꞌesi, Taataa Iliitleemu gi kaay sa Musaa tuba, “Kaay sa Haruuni, tafaꞌasiye hhadaa dosi haa hiimaahhasiye ceceiya da hhapee, ceceiyatee hiifookita titiirii hhapee gonge da Misiri.” 17 Musaa haa Haruuni gi laqiri teesaaqay. Haruuni gi tafaꞌasi hhadaa dosi haa gii maahhasi ceceiya da hhapee. Ceceiyatee gi titiirii tleehhiti haa gi slampidi hida haa kuꞌunaanay. Ceceiya goõ da hhapee da Misiri gi titiirii tleehhiti. 18 Miisliisee da Misiri hari miislay gooina gi koisiri harikhawa titiirii, teesaaqay see yaay dahhasiriiba. Titiiritee gi slampidi daqa hidage haa daqa kuꞌunaanayge. 19 Miisliisetee gi kaayri sa Faraaw tuba, “Gimbaki ti ⁄uuru gu Iliitleemu.” Teesaaqay see, muuna gu Faraaw gi ilakoomi karahha, yaa siꞌi itatiisa Musaa haa Haruuni, idoo Taataa Iliitleemu giyaa ilii kaay gooay.
Sagadahha da cigahha: Baꞌara
20 Da hheꞌesi, Taataa Iliitleemu gi kaay sa Musaa tuba, “Heetlaalee looy tlayda hari tumpaatumpu loo hadakayda daqa Faraawge, qatlay giyoo ilii duudu kaye, ugu la sugoo kaada ubee, ‘Taataa Iliitleemu kakaakana taqay tuba, geemay hida kosi ma waaudiri, magu firoo kayri. 21 Bere hoo siꞌida geemawa hida kosi ma waaudiri, haraa khay raqoo gu baꞌara daqa dooguu, daqa yondimiisee dooguu haa maraai kokunay. Maraai goõ gu Wamisiri hiti haciyay raqoo gu baꞌara, slime haa hhapee goõ da Misiri. 22 Teesaaqay see, baloteesii himaa yondiidi gimba gu pasla hhapee da Goseenige, doo iliiꞌibiidiye hida kosi, damaa wanaaba raqoo gu baꞌara, ma caahhadi tuba, ina Taataa Iliitleemu wana hhapetii. 23 Ina qaasi pasloo tla⁄aã gu hida kosii haa hida kokuna. Gimbaki gu bakaꞌasa hiica⁄i heetlaalee.’ ” 24 Taataa Iliitleemu gi yondiidi idoo giĩ ilii kaay gooay. Raqoo gu deni gu baꞌara gii guniri mara gu Faraawge, maraai gu yondimiisee dosi haa hhapee goõ da Misiri. Hhapee goõ da Misiri dagagi tlakweemisi ha baꞌarakee.
25 Da hheꞌesi, Faraaw gi eteedi Musaa haa Haruuni, sigigi kaay tuba, “Taa⁄amida hadisa sadaaka sa Iliitleemu googuna tiꞌii hhapetii.” 26 Teesaaqay see, Musaa gugi ilaki⁄isi tuba, “Suti! Hiti naraꞌaaba dandiray teesaaqay laqaraa, sa gimba sadaaka ga hadisane sa Taataa Iliitleemu goori, yoo muuna tlakweesida Wamisiri. Bere hoo hadisana sadaaka doo muuna tlakweesa Wamisiri, inay hindoo cakhadinay hari tle⁄eẽ. 27 Dandiray kwanda ga hhiyuudane, hhiyuuma da balalu tami kongoqomeege, ma hadisa kayni sadaaka sa Taataa Iliitleemu goori, idoo hindii ilii ilakaay gooay.”
28 Da hheꞌesi, Faraaw sigigi kaay tuba, “Hangu geemaw ma hadakaydiri, ma hadisa kaydiri sadaaka sa Taataa Iliitleemu, Iliitleemu googuna kongoqomeege. Hangu geemaw teesaaqay see, hhanti hadakayday segenge. Inkoo sini firintee.” 29 Musaa gugi ilaki⁄isi tuba, “Qatlay goo iliiwaaude kilesi, ana sugoo firima Taataa Iliitleemu, heetlaalee raqoo hhakee gu baꞌara yooti waaudiyay daqa Faraawgo, daqa yondimiisee dosaa haa daqa hida kosaa goõ. Inkoo, ugu sandi kaade gimba gu lou, handi hhantii corida kara, hagi siꞌida geemawa hida ma waaudiri, ma hadisa kayri sadaaka sa Taataa Iliitleemu.”
30 Musaa yaagi waaudi daqa Faraawgo haa gi firimi Taataa Iliitleemu. 31 Taataa Iliitleemu gi yondiidi, Musaa guũ iliifirimi gooay. Raqoo gu baꞌara gi waaudiri daqa Faraawgo, daqa yondimiisee dosaa haa daqa hida kosaa, wanaaba baꞌarimoo gwaa meetu see. 32 Teesaaqay see, qatlaykii Faraaw muuna gosi gi ilakoomi karahha, ina yaa geemayiiba Waisraeeli ma waaudiri.