7
1 Da hheꞌesi, Taataa Iliitleemu gi kaay sa Musaa tuba, “Yuꞌudiyaa, ana hagu Iliitleemu pahha tleehhidisi daqa Faraawge, Haruuni hhia googu hagu tletimiisay googu tleehhidisa. 2 Ugu hoo gimbuusida sa hhia googu Haruuni, gimba goõ sugoo ilakaawe. Haruuni yoo kaay sa Faraaw tuba, geemay Waisraeeli ma waaudiri hhapee dosaa. 3 Teesaaqay see, ana ha ⁄isima muuna gu Faraaw ma karahhi. Ana gamati ilakoomi see, laqaaqaru gimba gu bakaꞌasa hhapee da Misirige, 4 Faraaw yoo itatiisiyaaba unkuray. Teꞌesii ana ha yondiida hari ⁄uuru goy, gi ⁄agitima hari khisla hhapee da Misiri haa gii ca⁄asa hida koi, Waisraeeli Misirigo. 5 Qatlay goo iliiyondiide hari ⁄uuru goy hhapee da Misirige, haa gii ca⁄asa Waisraeeli, teꞌesii Wamisiri yoo caahhiyay tuba, ana na Taataa Iliitleemu.”6 Musaa haa Haruuni gi laqiri teesaaqay, idoo Taataa Iliitleemu gooay giyaa ilii ilafahhi. 7 Qatlay giyaa ilii gimbuusiri haa Faraaw, Musaa yaati kona koraraa mibeeri gweleti, Haruuni yaati kona koraraa mibeeri dagati haa tami.
Hhadaa da Haruuni deesu tleehhida
8 Taataa Iliitleemu gi kaay sa Musaa haa Haruuni tuba, 9 “Qatlay Faraaw sangoo iliikaayiye tuba, ‘Laqama gimba gu bakaꞌasa,’ ugu looti kaada sa Haruuni ubee, ‘Oyii hhadaa doogu, haa kwahhakay hhapeege pandaa da Faraawge,’ hhadatee yoo deesu tleehhita.”
10 Teꞌesii, Musaa haa Haruuni gi hadakayri daqa Faraawge, gi yondiidiri, idoo digaani ilii ilafahhi gooay ha Taataa Iliitleemu. Haruuni gii kwahhi hhadatira tosi hhapeege pandaa da Faraawge haa yondimiisee dosi, hhadatee gi deesu tleehhiti. 11 Da hheꞌesi, Faraaw see gi eteedi hida gu koomee caahhamuu, miisliisee haa qwasleeri gu Misiri. Miisliisetee da Misiri, inay see gi yondiidiri teesaaqay hari miislay gooina. 12 Kila heedi gii kwahhi hhadaa dosi hhapeege, gi deesu tleehhiti. Teesaaqay see, hhadaa da Haruuni gi gwi⁄iminti hhadoo hhakee koina. 13 Gimati teesaaqay see, muuna gu Faraaw gi ilakoomi karahha, ina yaa itatiisiiba Musaa haa Haruuni, Taataa Iliitleemu gooay giyaa ilii kaay.
Sagadadahhu mibi
Sagadahha da pandaa: Ceedee
14 Da hheꞌesi, Taataa Iliitleemu gi kaay sa Musaa tuba, “Muuna gu Faraaw yaati karahhi, sisaasiꞌi geemawa Waisraeeli, ma waaudiri. 15 Taa⁄a daqa Faraawge hari heetlawaa, qatlay giyoo ilii duudu gu Nayli kaye. Baqadaku kenga gu duuduge, mangi ariirintiri haa ina. Ugu oyii daba googuu hhadatira daa hiifookiti gi deesu tleehhiti. 16 Da hheꞌesi, sugu kaade ubee, ‘Taataa Iliitleemu, Iliitleemu gu Waeburaaniyaa hinaani ya⁄abi daqa dooguu, ina yaa kakaakana tuba, geemay hida kosi ma waaudiri, magu firoo kayri kongoqomeege. Teesaaqay see, yuꞌudiyaa! Inkoo naqatloo ugu haguũ siꞌidi itatiisa. 17 Teesaaqay, Taataa Iliitleemu yaa kakaakana tuba, inkoo gimbakiige hagu caahhada ina na miyaa. Ana hiimaahhasa maꞌay gu duudu gu Nayli hari hhadati, maꞌay goõ hitii fookidiyay ceedee. 18 Samaakii gu waara duudu gu Naylige hiti kaka⁄i goõ, duudu goõ yooti tli⁄i tlakwaroo. Wamisiri yoo hiidahhasiyaaiiba kitahhu maꞌay kosi.’ ”
19 Da hheꞌesi, Taataa Iliitleemu gi kaay sa Musaa tuba, “Kaay sa Haruuni hiioye hhadaa dosi haa gi tafaꞌasiye rawaa gu maꞌay gu Misirige, rawaa gu hhaahhiyooge, seꞌeemooge, rawaa gu tlawoo gu digidakwige haa tlawoo goõ gu denige, goõ hitii fookidiyay ceedee. Daqeemoo goõ gu hhapee da Misiri yooti haciyay ceedee, khooslay gonge see gu khai haa khooslay gu tle⁄eẽ.”
20 Musaa haa Haruuni gi laqiri tiraaqay, idoo digaa ilii ilafahhi gooay ha Taataa Iliitleemu. Haruuni gi waratlaysi hhadaa dosi pandaa da Faraawge haa yondimiisee dosi, gii maahhasi maꞌay gu duudu gu Nayli. Teꞌesii maꞌay goõ gu duudu gii fookidiri gi ceedee tleehhidiri. 21 Samaakii goõ duudu gu Naylige gi kaka⁄i, duudu gi tli⁄i, Wamisiri yaa hiidahhasiriiba kitahhu maꞌay kosi. Hhapee goõ da Misiri gi hacidi ceedee kila daqa.
22 Teesaaqay see, miisliisee da Misiri hari miislay gooina gi laqiri namati teesaaqay. Muuna gu Faraaw gi ilakoomi karahha, ina yaa itatiisiiba Musaa haa Haruuni, idoo Taataa Iliitleemu gooay sigaa ilii kaay. 23 Da hheꞌesi Faraaw gi waaudi, gi ki⁄i mara gosii, gimbakee see gungii ca⁄u gwaa iliiqaasiiba muuna gosii. 24 Wamisiri goõ gi ⁄agwidiri kenga gu duudu gu Naylige, ma slayri maꞌay gu kitahhu, sa gimba yaa hiidahhasiriiba kitahhu maꞌay gu duudu gu Nayli. 25 Balalu fanqu yaa buꞌudiri, Taataa Iliitleemu giyaa ilii Sagadahhi duudu gu Nayli.