Iliitleemu hiitlaaꞌasi ilabuꞌuru gu Waisraeeli
6
1 Da hheꞌesi, Taataa Iliitleemu gi kaay sa Musaa tuba, “Inkoo, ha anta Faraaw idoo hagu laqe, ana sugu laqama ⁄uuru gu daba goy, haa sa gimbakee ina geemay hida koi ma waaudiri. Kara hari daba goy gu kooma ⁄uuru, ina higi gusina inay, ma waaudiri hhapee dosaa.”2 Slime, Iliitleemu gi kaay sa Musaa tuba, “Ana na Taataa Iliitleemu. 3 Ana haa iliica⁄i Aburahaamu, Isaaka haa Yakoobo, hinigi caahhiri na Iliitleemu gooina gu kooma ⁄uuru goõ. Teesaaqay see, hari uma goy ana Taataa Iliitleemu, ana hangaay ca⁄asiiba daqa dooinay. 4 Slime ana haa qaasi ila⁄imbidu goy haa inay ambee, sigi hadisa hhapee da Kanaani, giyaa iliiꞌibiidiri wakaꞌalee yaamulooee gooba pahha.
5 Inkoo, ana haã akhasi ⁄aa⁄imu gu Waisraeeli, da tongagaiiꞌimisiye ha Wamisiri, ana hangii slay ila⁄imbidu goy gaa qaasi haa inay. 6 Inkoo, kaay sa Waisraeeli taqay ubee, ‘Ana na Taataa Iliitleemu. Ana hangwii ca⁄asa, ma hiica⁄adiri labaꞌasu gu Wamisirigo. Ana hangu ilabuꞌuma tongaiimaa doogunaa. Kara, hari ⁄uuru gu daba goy, ha ⁄agitima Wamisiri tlakwaroo loi haa hangugi afiigweeda unkuray. 7 Ana hangu hida koi tleehhidisa, ana Iliitleemu googuna tleehhida. Unkuray gani ilii caahhaday tuba, ana na Taataa Iliitleemu, Iliitleemu googuna, gwaa hiica⁄asu unkuray labaꞌasu gu Wamisirigo. 8 Ana hangu leehhisa hhapetiray gaa seelimi hadisa sa Aburahaamu, Isaaka haa Yakoobo. Ana sangu hadisa hhapetee ma tooguna tleehhiti. Ana na Taataa Iliitleemu.’ ”
9 Musaa gi ilatlay sa Waisraeeli gimba goõ daani kaay ha Iliitleemu. Teesaaqay see, inay gwaa ⁄imbiriiba ina, sa gimba gu slahhaaꞌamee da didiri muunaiĩ koinay haa sa tongaiimaa da dihhi.
10 Da hheꞌesi, Taataa Iliitleemu gi kaay sa Musaa tuba, 11 “Taa⁄a daqa Faraawge, mutemi gu Misiri, sugu kaade ubee, geemaye Waisraeeli waaudiyee hhapee dosaa.”
12 Teꞌesii, Musaa gi kaay sa Taataa Iliitleemu tuba, “Yuꞌudiyaa, Waisraeeli hiniĩ itatiisiriiba ana, inkoo Faraaw hini malee itatiisi ana goó kwaakwaꞌamida?” 13 Da hheꞌesi, Taataa Iliitleemu gi gimbuusi haa Musaa haa Haruuni, gigi ilafahhi tuba, hadakayee daqa Faraawge, mutemi gu Misiri, haa yaay ca⁄asiyee Waisraeeli hhapee da Misirigo.
Motoliya da Musaa haa da Haruuni
14 Hhaã na umaiĩ angaamaka gu okookoiĩ gu motoliya da Waisraeeli.
Yaꞌay gu Rubeeni nanku badiisu gu Israeelia yaa Khanooki, Paalu, Khesirooni haa Kariimi. Hhakee naa okookoiĩ gu motoliya da Rubeeni.
15 Yaꞌay gu Simi⁄ooni yaa Yemueeli, Yamiini, Ohaadi, Yakiini, Sohhaari haa Sawli, hiĩ iyoo dosi yaa Kanaanitoꞌoo. Hhakee naa okookoiĩ gu motoliya da Simi⁄ooni.
16 Hhaã naa umaiĩ gu yaꞌay gu Laawi haa laqwaloo dooina, Gerisooni, Kohaati haa Meraari. Laawi yaa ibiidi koraraa miyaa leẽ haa mibeeri tami haa fanqu.
17 Yaꞌay gu Gerisooni yaa Libuuni haa Simeeyi, motoliya dooina daqaati eteedi hari umaiĩ koina.
18 Yaꞌay gu Kohaati yaa Amuraamu, Isihaari, Heburooni haa Usieeli. Kohaati yaa ibiidi koraraa miyaa leẽ mibeeri tami haa tami.
19 Yaꞌay gu Meraari yaa Mahaali haa Muusi. Hhakee na okookoiĩ gu motoliya da Laawi haa laqwaloo dooina.
20 Amuraamu gi khabimi Yokebeedi, hhioo da taataa gosi, ina sugugi laqwalidi Haruuni haa Musaa. Amuraamu yaa ibiidi koraraa miyaa leẽ mibeeri tami haa fanqu.
21 Yaꞌay gu Isihaari yaa Koora, Nefeegi haa Sikiiri.
22 Yaꞌay gu Usieeli yaa Misaeeli, Elisafaani haa Sitihiiri.
23 Haruuni gi khabimi Eliseeba, hotu Aminadaabu, hhioo dosi Nakhasooni, ina sugugi laqwalidi Nadaabu, Abiihu, Eleyasaari haa Itihhamaari.
24 Yaꞌay gu Koora yaa Asiiri, Elikaana haa Abiyasaafu. Hhakee naa okookoiĩ gu motoliya da Koora.
25 Eleyasaari nanku Haruuni gi khabimi leẽ da sagameeru gu Putieeli, ina sugugi laqwalidi Finehaasi.
Hhakee naa okookoiĩ gu motoliya da Laawi, afamaraa gooinay.
26 Hida hhanki, Haruuni haa Musaa siginaa kaay ha Taataa Iliitleemu tuba, “Ca⁄asaw Waisraeeli hhapee da Misirigo raqoo gu motoliya haa motoliya.” 27 Namati inay loi loi Musaa haa Haruuni naa gimbuusiri haa Faraaw, mutemi gu Misiri, sa hiica⁄asaraa Waisraeeli hhapee da Misirigo.
Musaa haa Haruuni iliikonay ilakaawa da Iliitleemu
28 Balotira Taataa Iliitleemu giyaa ilii gimbuusi haa Musaa hhapee da Misirige, 29 sugwaa kaay tuba, “Ana na Taataa Iliitleemu. Kaay sa Faraaw mutemi gu Misiri, gimba goõ sugu giimaamise.”
30 Teesaaqay see, Musaa gi kaay sa Taataa Iliitleemu tuba, “Ana ti heedi goó kwaakwaꞌamida, Faraaw hini itatiisiyaa ana?”