Musaa haa Haruuni pandaa da mutemi gu Misirige
5
1 Qariqaaqari, Musaa haa Haruuni gi hadakayri daqa Faraawge, sugugi kaayri tuba, “Taataa Iliitleemu gu Israeeli kakaakana taqay tuba, ‘Geemay hida koi ma waaudiri, ma sini⁄isiru kayri losona yade kongoqomeege.’ ”2 Faraaw gigi maasi inay tuba, “Hikee Taataa Iliitleemu ti miyaa, ana gugi akhasa haa gi geemaw Waisraeeli ma waauꞌudiri? Ana hagu hhidima Looimokee, kara ha geemawaaba Waisraeeli ma waaudiri.”
3 Musaa haa Haruuni sugugi kaayri tuba, “Iliitleemu gu Waeburaaniyaa hingii slaslay haa dandiray. Inkoo, hagu tlaatlaqasana handi geemayde, ma hhiyuudani hhiyuuma da balalu tami kongoqomeege, ma hadisakani sadaaka sa Taataa Iliitleemu goori. Bere teesaaqay gooba, ina hindi cu⁄i hari ga⁄ay gu tlaku, baku angamalee hari amoo da gau.”
4 Mutemi gu Misiri sigigi kaay tuba, “Ye unkuray Musaa haa Haruuni, sa soꞌoy koiiꞌimisiday maweesa hida yondu gooina? Unkuray goõ ki⁄a yondu googunay!” 5 Kara, Faraaw gi kaay tuba, “Yuꞌudaa, hida hhanki ti wa⁄a, unkuray hagi tlaatlahhaahhamisiday yondiida yondu.”
6 Baloteesii loi loii Faraaw gi ilafahhi giyaadimiisee da tongee haa wariiqadimiisee da hida, sigigi kaay tuba, 7 “Tlaatleesa da letutaa, hida hhanki sigi hhanti hadimisiday slaarahhaa sari boo⁄imisu tufaarii,a idoo gaa iliiyonditiri gooay wakaꞌalee. Inay loi na dabiidu kayee slaarahhatee. 8 Teesaaqay see, faadoo da tufaarii gi boo⁄imisiye inkoo, namati hatira pahha da balalu sliimaa hhanti afariibukuta, ma tufaariya lensee. Hida hhanki yaati naa⁄amuumuudiri, na idoo sa maahhaahhaminee, kakaanay tuba, ‘Handi geemayde, ma hadisa kayni sa Iliitleemu goori sadaaka.’ 9 Inkoo, hida hhakee sigii roogisidee yondu gwaa karahhu hari khisla, ma maguumidiri, ma mayri cocoꞌomoo haa itatiimisu gimba gu afaꞌafuuma.”
10 Teesaaqay, giyaadimiisetee da tongee haa wariiqadimiisee gi kaawa kayri sa hida gu Israeeli tuba, “Faraaw yaani kaay taqay ‘Sangu hadisaaba kara slaarahhaa sari boo⁄imisu tufaarii. 11 Unkuray loi, taa⁄amida dabiidaa slaarahhaa kweeraakweera, daqeemoo goo iliidahhasidee slawaraa. Teesaaqay see, yondu googuna dugu sagaa deehhiyaaba coko⁄o see.’ ” 12 Da hheꞌesi, hida goõ gi pasidiri hhapee goõ da Misiri, sa dabiidu gu slaarahhaa sari boo⁄imisu tufaarii. 13 Wariiqadimiisee dooina gigi ilakwikwihhiri kakaanay tuba, “Gaasaw yondu googuna gu balalu sliimaa, wakaꞌalee gooay sanguraa ilii khakhaakhaye slaarahhaa.” 14 Wariiqadimiisee da Waisraeeli, daa qamidi ha giyaadimiisee da tongee da Faraaw, digigi difi haa digigi maasi tuba, “Haã soꞌoy maydiri hiigaasa yondu googuna gu boo⁄imisu tufaarii sa⁄alee haa letuti, faadotira gooay da wakaꞌalee?”
15 Da hheꞌesi, wariiqadimiisee da Waisraeeli gi hadakayri, gi ilii⁄aa⁄iri Faraaw, kakaanay tuba, “Handii soꞌoy yonditi taqay dandiray tongee doogu? 16 Dandiray tongee doogu sandi hadiidimisiyaaba kara slaarahhaa, tay dandi ⁄uureemisi paqanpaqaru tufaarii, hatira pahha da balalu sliimaa. Kara tongee doogu danditi difiifina, kara tay dakoo dati hida koku.”
17 Teesaaqay see, Faraaw sigigi kaay tuba, “Naa⁄amiisee unkuray! Unkuray ti naa⁄amiisee, na idoo sa kakaakantee tuba, ‘Handi geemayde, ma hadisa kayni sadaaka sa Taataa Iliitleemu.’ 18 Inkoo, taa⁄amida yondiida yondu, sangu hadisiyaaba slaarahhaa coko⁄o see. Teesaaqay see, unkuray kwanda ga paqanpaqatee tufaarii, namati faadotira loi loi pahha da pandaa.”
19 Teꞌesii wariiqadimiisee da Waisraeeli gi baraslayri tuba, maanage wanay, sigiĩ ilii kaay tuba, “Sagaa deehhedaaiiba coko⁄o see, faadoo da tufaarii ga boo⁄imisidee balalu sliimaa.” 20 Qatlay giyaa iliiwaaudiri daqa Faraawgo, hingigi slaslayri haa Musaa haa Haruuni, gi baqamidiyay mangi slaslayri haa inay. 21 Inay gi kaayri sa Musaa haa Haruuni tuba, “Taataa Iliitleemu arine gimbaki haa hukune unkuray, sa gimba haã ⁄isintiri dandiray, ma tli⁄ani pandaa da Faraawge haa hida gu tawaaloo dosi. Unkuray sigiĩ hadisidiri pangaaee guri cu⁄uduũ dandiray.”
Musaa iliiquru⁄i Taataa Iliitleemu
22 Da hheꞌesi, Musaa gigi may inay haa gi ki⁄i daqa Taataa Iliitleemuge, gi kaay tuba, “Ye Looimoo gu Goõ, ugu sa soꞌoy yondimaamita tlakwaroo sa hida hhanki? Kara ugu hanaa soꞌoy ya⁄abidi ana? 23 Qatlay gaã iliihadakay ma gimbuusi haa Faraaw hari uma googu, ina hiraani khay labaꞌasu gu didiru loi daqa hida hhankii. Ugu haã yonditiiba idoo lensee sa ilabuꞌuru hida koku.”