Musaa sugu hadisi hiidahhasa da yondu gimba gu bakaꞌasa
4
1 Musaa gi ilaki⁄isi Iliitleemu tuba, “Inkoo yooti malee, bere Waisraeeli hinoo ⁄imbiyaaiiba, baku hinoo itatiisiyaaiiba ana, inay gi kaayiyay tuba, Taataa Iliitleemu yaani iliica⁄iiba ugu?”2 Teꞌesii, Taataa Iliitleemu gi kaay sa Musaa tuba, “Hatee idoo mala gaã oodi daba googuu?”
Musaa gi ilaki⁄isi tuba, “Ti hhadaa.”
3 Taataa Iliitleemu gi kaay sa Musaa tuba, “Kwahheka hhapeege.”
Musaa gigi kwahhi hhadatee hhapeege, hhadatee gii fookiti deesu, Musaa gigi lakidi. 4 Da hheꞌesi, Taataa Iliitleemu gi kaay sa Musaa tuba, “Tafaꞌasi daba googu, oowaku hhaysooge!” Musaa gi tafaꞌasi daba gosi, gugi ooyi, deesukee giifookidi kara gi hhadaa tleehhidi daba gosii. 5 Taataa Iliitleemu gi kaay tuba, “Teesaaqay, Waisraeeli yoo ⁄imbiyay tuba, Ana Taataa Iliitleemu, Iliitleemu gu ayiĩ koina, Iliitleemu gu Aburahaamu, Iliitleemu gu Isaaka, haa Iliitleemu gu Yakoobo, hagwaani iliica⁄i ugu.”
6 Kara, Taataa Iliitleemu gi kaay sa Musaa tuba, “Lu⁄ii daba googu hari waꞌay gu jurungii doogu muunaiĩ kokuu.” Musaa gii lu⁄i daba gosi muunainge. Qatlay giyaa iliibaci daba gosi muunaingo, daakhay kona buubaa, hiĩ ⁄abaakway poy ilibaa pahha.
7 Da hheꞌesi, Iliitleemu gi kaay tuba, “Lu⁄ii kara daba googu hari waꞌay gu jurungii doogu muunaiĩ kokuu.” Musaa gii lu⁄i daba gosi muunainge. Qatlay gwaa iliibaci, daa khay gu hhou, hiĩ ki⁄i idoo da iliiwane gooay daqeemoo wakinay gu slaqwa dosi.
8 Teꞌesii, Taataa Iliitleemu gi kaay sa Musaa tuba, “Bere yoó ⁄imbiyaaiiba ugu, baku yoó iliigaasiyaaiiba gimba gu bakaꞌasa gu pandaa, yoo ⁄imbiyay giyoo ilii anee gimba gu bakaꞌasa gu cada. 9 Teesaaqay see, bere yoó ⁄imbiyaaiiba gimbaki gu cada gu bakaꞌasa, baku yoó itatiisiyaaiiba ugu, oyii maꞌay duudu gu Nayligo kuꞌusaki hhapee da kaarunge. Maꞌay hhakee yooti ceedee tleehhidiyay hhapee da kaarunge.”
10 Musaa gi kaay sa Taataa Iliitleemu tuba, “Ye Looimoo goy, yadaa tlaatleesoogo ana haa hhidima cocoꞌomoo naraꞌa, gimati qatlaykira gaa iliitlaatleesidi gimba haa ana tongimoo googu. Cufaraã goy gu hiiloou.”
11 Teꞌesii, Taataa Iliitleemu gugi maasi ina tuba, “Ti miyaa naa tleehhi afa gu heedi? Ti miyaa noó laqi heedi ma afana⁄adi baku qapana? Ti miyaa noó hadisi sa heedi ⁄uuru gu khuꞌuduũ baku ilahhama? Ti ana goobaslii Taataa Iliitleemu? 12 Inkoo taa⁄a, ana hoo sliimaa waara haa ugu, hagu caacaahhamisa gimba goo gimbuuside.”
13 Musaa gi kaay tuba, “Ye Looimoo goy, hhooa hagu tlaatlaqasa ambee, ya⁄abi heedi waku ma yondu kay yondukee.” 14 Teꞌesii, Taataa Iliitleemu gi qupidi sa Musaa, sugugi kaay tuba, “Caba wana hhia googu Haruuni, Mulaawimoo? Ana khua ina khui cocoꞌomoo naraꞌa. Yuꞌudiyaa ina yaa khoci, sa amoodabaawa ugu, qatlay goo iliiarine ugu, ina yoo hhaꞌaluudi hari khisla muuna gosii. 15 Ugu hoo gimbuusida haa ina, haa sugugi cocoꞌoda gimba goõ giyoo gimbuusiye. Ana hangoo iliiaw unkuray cadakokunaa cocoꞌomoo, haa hangugi caacaahhamisa gimba goo yonditee. 16 Haruuni noo kwasluumuuday googu tleehhidi daqa hidage. Ina noo afa googu tleehhidi, ugu yooti Iliitleemu pahha daqa dosii. 17 Inkoo, ugu oyii hhadati daba googuu, magari yonditi gimbakira gu bakaꞌasa.”
Musaa ki⁄i Misirige
18 Da hheꞌesi, Musaa yaagi ki⁄i daqa Yeetiroge kumbaꞌa gosi, sugugi kaay tuba, “Kalaamay hani geemayde, ma ki⁄i daqa hida koii Misirige, magi arimaa kay, bere kahhiyay slafiyay.”
Yeetiro sugugi kaay tuba, “Taa⁄a hari qasaw.”
19 Musaa giyaa ilii kahhiye waaudimoo Midiyaanigo, Taataa Iliitleemu yaa kaay sa ina tuba, “Ki⁄e Misirige, sa gimba hida goõ gwaa slaee gaasa ugu hiĩ kaka⁄iri.” 20 Da hheꞌesi, Musaa gii oyi hadee dosi haa yaꞌay kosi, gigii daamisi rawaa gu daqutoꞌooge, gi tlaatleesi hhiyuuma da ki⁄eemoo hhapee da Misirige. Musaa gii oyi daba gosii, hhadatira dugwaa ilii ilafahhi ha Iliitleemu.
21 Taataa Iliitleemu gi kaay sa Musaa tuba, “Goo daade Misirige, loo yondita pandaa da Faraawge, gimba goõ gu bakaꞌasa sugwaa hadisi ⁄uuru guri yondiidu. Teesaaqay see, ana hoo laqa muuna gosi ma karahhi, ina ma may geemawa Waisraeeli ma waaudiri. 22 Ugu kwanda goo kaade sa Faraaw ubee, ‘Hiĩ na gimba daa kakaakane ha Taataa Iliitleemu tuba, “Israeeli ti nankoy, nankoy gu badiisu. 23 Ana suguũ kakaami ambee, geemay nankoy ma waaudi, mani firoo kay ana! Inkoo, ugu haã siꞌidi geemawa ma waaudi. Yuꞌudiyaa, ha gaasa nankoogu gu badiisu.” ’ ”
24 Qatlay Musaa giyaa ilii Misiri kakaakaye, amooge daqa da ilii guꞌudee dahaa, Taataa Iliitleemu hingigi slaslayri haa Musaa, haa gugi daadaauusi gaasa. 25 Teesaaqay see, Sipoora hadee dosi yaagii oodi tlaa⁄u gwaa karahhu gu afacokhu, gi kereꞌesidi ufiya da nankosi, ufiyatee girigi nangusidi yeꞌeeroo gu Musaa. Sipoora gi kaadi sa Musaa tuba, “Gu lou, sa gimba gu daba⁄uki, ugu ti hhawata goy gu ceedee.” 26 Sipoora gwaati eteti Musaa tuba, “Hhawata goy gu ceedee,” sa gimbakee gu daba⁄u nankosi. Teesaaqay, Taataa Iliitleemu gugi may Musaa slafi.
27 Taataa Iliitleemu gi kaay sa Haruuni tuba, “Taa⁄a kongoqomeege hangu slaslaw kayde haa Musaa.” Haruuni gi waaudi, hingigi slaslayri haa Musaa oõ gu Iliitleemuge, gugi humbaꞌadi. 28 Musaa gi gimbuusi sa Haruuni gimba goõ sugwaani kaay ha Taataa Iliitleemu, magu gimbuusi, haa gimba goõ gu bakaꞌasa giyaani ilafahhi magu yondiidi.
29 Da hheꞌesi, Musaa haa Haruuni gi waaudiri, gii kurunkuriri gaduũ goõ gu Waisraeeli. 30 Haruuni sigigi gimbuusi gimba goõ, Taataa Iliitleemu giyaani gimbuusi sa Musaa, Musaa gi yondiidi, gimba gu bakaꞌasa pandaa da hidage, 31 hida gi ⁄imbiri. Inay giyaa ilii akhasiri tuba, Taataa Iliitleemu yaani khay sa iliiawaraa Waisraeeli, haa yaani arimi labaꞌasu gooina, goõ gi keebeeꞌemidiri haa gi firiiriniri Iliitleemu.