Musaa haa rukutiya daa ooyiiyima aslaa
3
1 Letu waka, Musaa yaa deꞌeeꞌena kuꞌunaanay gu Yeetiro kumbaꞌa gosi, hhapalooay gu hhapee da Midiyaani. Letutee Musaa gi deꞌeẽ kay kuꞌunaanay segenge hari aluũ gu kongoqomee, ina gi day Horeebuge, oõ gu Iliitleemu.a 2 Yade Malayika gu Taataa Iliitleemu yaagi iliica⁄i Musaa, buruburiya da aslaage tla⁄aã gu rukutiyage. Yuꞌudiyaa! Musaa yaati bakai arimaa rukutiya ooda aslaa ci⁄araa see dabasli. 3 Teꞌesii, Musaa gi ilahudeesi tuba, “Hiisata coomooge, ma arimi gimbaki gu bakaꞌasa, gu rukutiya da ooyiiyima aslaa ci⁄araa see daba.”4 Qatlay Taataa Iliitleemu giyaa ilii arimi, Musaa hingii fookidi, ma arimi rukutiya, gugi eteedi tla⁄aã gu rukutiya teesaa tuba, “Musaa! Musaa!”
Musaa gi iidi tuba, “Ana waara tiꞌii.”
5 Taataa Iliitleemu sugugi kaay tuba, “Haa hhantii satida tiꞌii. Bace ye⁄eetoo koku, sa gimba daqati gaã iliiqaditi ti Daqa daa Tlintiꞌisi. 6 Ana na Iliitleemu gu taataa googu, Iliitleemu gu Aburahaamu, Iliitleemu gu Isaaka haa Iliitleemu gu Yakoobo.” Musaa giyaa ilii akhasi gimbakee, gi ilakhupisi pandaa dosi, sa gimba yaa tlaꞌamuudi arimaa Iliitleemu.
7 Taataa Iliitleemu gi kaay sa Musaa tuba, “Gu lou, haã arimi labaꞌasu gu hida koi gu Misirige waaree, haa haã akhasi ⁄aa⁄imu gooina doó ⁄isine ha hida goó wariiqadimidee inay. Ana ha khua labaꞌasu gooina. 8 Teesaaqay, haanii ⁄eeti magi ilabuꞌumi inay dabaiĩ gu Wamisirigo, magii ca⁄asi hhapeteesaa, magi leehhisi hhapee da hhoige haa da didiri. Hhapetee doó guuma ilibaa haa dinu hari khisla, hhapee da kabiraa da Wakanaani, Wahiiti, Waamoori, Wapereesi, Wahiifi haa Wayebuusi. 9 Inkoo yuꞌudiyaa! ⁄aa⁄imu gu Waisraeeli yaani day daqa dooii, haã arimi idoo digoó ilii labaꞌasiye ha Wamisiri. 10 Inkoo, hagu ya⁄aba ugu daqa Faraawge maa hiica⁄asidi hida koi Waisraeeli hhapee da Misirigo.”
11 Teꞌesii, Musaa gi kaay sa Iliitleemu tuba, “Ana ti miyaa gu hadakawa daqa Faraawge haa hagii ca⁄asa Waisraeeli hhapee da Misirigo?”
12 Iliitleemu gi kaay sa Musaa tuba, “Ana hoo sliimaa waara haa ugu. Ugu hagoo hheꞌeside hiica⁄asa Waisraeeli Misirigo, hanimaa firiirintay ana Iliitleemu tiꞌii okii. Hatee namaa amoo da laqaru daqa dooguu tuba, ti ana Iliitleemu nuguũ ya⁄abi ugu.”
13 Teꞌesii, Musaa gi kaay sa Iliitleemu tuba, “Inkoo goo iliihadakawe daqa Waisraeelige haa sigigi kaawa ambee, ‘Iliitleemu gu ayiĩ kokuna hinaani ya⁄abi daqa doogunay,’ inay hinigi maasiyay tuba, ‘Uma gosi na miyaa?’ Ana sigooti mala kaawa?”
14 Iliitleemu gi kaay sa Musaa tuba, “ana waara, hiĩ gu waara. Kaay teesaaqay sa Waisraeeli ubee, ‘ana waara,’ hinaani ya⁄abi daqa doogunay.”
15 Slime, Iliitleemu gi kaay sa Musaa tuba, “Kaay sa Waisraeeli ubee, ‘Taataa Iliitleemu, ana na Iliitleemu gu ayiĩ kokuna, Iliitleemu gu Aburahaamu, Iliitleemu gu Isaaka, haa Iliitleemu gu Yakoobo hinaani ya⁄abi daqa doogunay. Hiĩ na uma goyi koraraa haa koraraa goóba hiifaakoo, hiĩ na uma hanarii slaslaydee laqwaloo dooguna goõ.’
16 Inkoo, taa⁄a kurunkurii gaduũ gu Waisraeeli haa sigi kaade ubee, ‘Taataa Iliitleemu, ana na Iliitleemu gu ayiĩ kokuna, Iliitleemu gu Aburahaamu, Iliitleemu gu Isaaka haa Iliitleemu gu Yakoobo, hagwaani iliica⁄i haa sugugi kaay ambee, hangwaani arimi unkuray haa haã arimi, idoo dangoó iliilabaꞌasiye hhapee da Misirige. 17 Ana hangii fadidi hiica⁄asa unkuray labaꞌasu googunaa hhapee da Misirigo, hangugi leehhisa hhapee da kabiraa da Wakanaanige, Wahiitige, Waamoorige, Wapereesige, Wahiifige haa Wayebuusige, hhapee doó guuma ilibaa haa dinu hari khisla.’
18 Gaduũ gu Israeeli goo itatiisiyay ugu. Doo hheꞌesiye ugu haa gaduũ gu Israeeli ha hadakayday daqa mutemi gu Misirige haa sugugi kaaday ubee, ‘Taataa Iliitleemu, Iliitleemu gu Waeburaaniyaa hindaani iliica⁄i dandiray. Handi ila⁄imbide, ma hhiyuudani hhiyuuma da balalu tami yade kongoqomeege, ma hadisa kayni sadaaka sa Taataa Iliitleemu goori.’ 19 Teesaaqay see, ana khua ambee, mutemi gu Misiri dangu geemayaaba ma waautiri, bere duguba ⁄uureesa ha daba gu kooma ⁄uuru. 20 Teesaaqay, ana ha tafaꞌasa daba goy, haa gi sagadadahha Wamisiri hari gimba gu bakaꞌasa goo yondiide yade. Qariqaaqari gimbakee giyoo buꞌudiye, mutemi dangoo geemay ma waautiri hhapee dosaa.
21 Kara, ana ha ⁄isima Wamisiri ma laqaniri hhoinay sa unkuray Waisraeeli. Qatlay goó iliiwaautee hhapee da Misirigo, hoo waautaaiiba hari dabaiĩ kilesi. 22 Kila hadee haã da Israeelitoꞌoo firinta daqa danaoo dosii haã da Misiritoꞌoo, baku daqa hadee doó ibiida waꞌay gu mara gosii, ma sagahadisi idadu gu feesa, sahaabu haa qayroo. Goo hheꞌesidee, ha daamisiday qayroo sa yaꞌay kokuna gu hhawatee haa gu tigay. Teesaaqay, hagani ilii afii⁄utliday Wamisiri khooslay gooina.”