Laqwalaraa haa diireemoo da Musaa
2
1 Inkoo, yaa wana heedi waku gu motoliya da Walaawi, gwaa khabimu hadee slime da motoliya da Walaawi. 2 Hadetee gii loaydi, gii daadi naw. Ina giyaa iliianti nakee gu hhou, gugi yakwidi qoomay gu slehheeri tami. 3 Inkoo, giyaa iliianti hiidahhasidaaba ilakooma yakumiru nakee, gi boo⁄imisidi lokondiya hari cikwahha. Lokondiyatee gigi khwacimisidi hari munda⁄aayee hari waꞌay haa hari khooroo, nakee gugi qaasidi waꞌay gu lokondiyateesii. Da hheꞌesi, lokondiyatee gigi yakwidi tla⁄aã gu cikwahhage kenga gu duudu gu Naylige. 4 Hhioo da nakee gi nahhati ciyoomoo haa daqatee, ma anti idoo daa hiica⁄a daqa nankooinay.5 Da hheꞌesi, sagameeriya da Faraaw yaagii gweegwe⁄eti duudu gu Naylige mangi hhuncidi, tay tongee dosi da tigay khookhocinay kenga gu duuduge. Sagameeriya da Faraaw gi arinti lokondiyatee tla⁄aã gu cikwahhage, gi ya⁄abidi leẽ da tongitoꞌoo dosi, maa hiioodi lokondiyatee. 6 Qatlay sagameeriyatee giyaa ilii tlaaꞌasidi lokondiyatee, gi arinti daa⁄u ⁄aa⁄i, sugugi ⁄awaarinti, gi kaadi tuba, “Hiĩ ti leẽ gu yaꞌay gu Waeburaaniyaa.”
7 Teꞌesii, hhioo da nakee hingaagii ca⁄asidi, gi kaadi sa sagameeriya da Faraaw tuba, “Sigaa dabiidaa omidiisoꞌoo tla⁄aã gu tigay gu Waeburaaniyaago, ma sigi ominti naki?”
8 Sagameeriya da Faraaw gi kaadi tuba, “Ee, taa⁄a.” Da hheꞌesi, hhioo da nakee gi waauti, yaagi eteti iyoo da nakee. 9 Sagameeriya da Faraaw gi kaadi sa hadetee tuba, “Oyii naki hani iliiayde omidoo, ana hagi bua sa yondu gu omidoo.” Da hheꞌesi, hadetee gugii oodi nakee haa gugi ominti. 10 Nakee giyaa iliidiiray, iyoo dosi gugi leehhisidi daqa sagameeriya da Faraawge, ina gugii oodi haa gugi nankosi tleehhidisidi. Teꞌesii, sagameeriya da Faraaw gurigi aydi uma na Musaa,a gi kaadi tuba, “Hagwaatii ca⁄asi waꞌay gu maꞌaygo.”
Musaa lakidimoo gosi hhapee da Midiyaanige
11 Musaa giyaa ilii diiray, letu waka yaa ilakhookhocukay Waeburaaniyaa deneꞌee kosi, maa arimi, idoo giyaa iliiyondimaamidiyee yondu gwaa karahhu. Teꞌesii, gi arimi Misirimoo difi Eburaanimoo, leẽ gu hida kosi. 12 Musaa gi yuꞌudi bareemoo goõ, giyaa ilii arimi heedi hhaku coomooge, gu arima ina, gi gaasi Misirimokee haa gugi yakwi hari amoo da tiparaa seehhinayge. 13 Heetlaalee dosii, Musaa gii ca⁄i kara, gi arimi Waeburaaniyaa cada qwaatliyay. Ina gi maasi hikira guũ dakusu tuba, “Ugu ha soꞌoy difiifinta Eburaanimoo danaꞌa googu?”
14 Heedikira gugu ilaki⁄isi ina tuba, “Ti miyaa nugwaa qaasi ugu, ma giyaadimiisay haa hakiimuu goori tleehhiti? Ugu haniti slaꞌadaa gaasa ana, idoo gaã iliigaasidi goóay Misirimokira?” Teꞌesii, Musaa gi tlaꞌamuudi haa gi ilahudeesi tuba, “Hida goõ kwanda hiti khuiyay gimbaki gaã yondiidi.”
15 Faraaw giyaa iliiakhasi gimbaki, gi taarimi gaasa Musaa. Teesaaqay see, Musaa gi lakidi Faraaw haa gi ibinaa kay hhapee da Midiyaanige. Qatlay Musaa giyaa iliiday hhapeteesii, gii fiifisi ilaciyaa haa wa⁄amu waku. 16 Inkoo, hhapalooay gu Midiyaani yaa kona sagameeru fanqu. Inay yaagi khayri wa⁄amuuge sa hheku maꞌay, inay gi hacimisiri milambabee, ma wayri kuꞌunaanay gu taataa gooina. 17 Deꞌemiisee wakinay yaagi khayri haa gi gusiniri sagameerukee. Teꞌesii Musaa ginaa iliitlay, gi iliiay sagameerukee haa gi way kuꞌunaanay gooina.
18 Sagameerukee giyaa ilii dayri ayage daqa taataa gooinay Yeetiro,b ina gigi maasi tuba, “Letuti haani soꞌoy ki⁄idiri cira taqaaqay?”
19 Inay gugi ilaki⁄isiri tuba, “Misirimoo leẽ hindaani ilabuꞌumi dandiray, dabaiĩ gu deꞌemiisetiraa. Slime heedikee sindaani hheeki maꞌay, haa gi way kuꞌunaanay goori.”
20 Taataa gooina gi maasi inay tuba, “Kaanokuna heedikee? Hagwaani soꞌoy maydiri? Eteedakuna ma ⁄agimi fa⁄a.”
21 Musaa gi ⁄imbi ibinaa aya gu heedikeesii. Da hheꞌesi, heedikee gi hadisi sa Musaa, sagameeriya dosi Sipoora, ma hadee dosi tleehhiti. 22 Sipoora gi laqwalidi naw, Musaa gi kaay tuba, “Haani lakidi hhapee da dahaage.” Inkoo, nakee gurigi ayi uma na Gerisoomu.c
Waisraeeli ⁄aa⁄imu gooina tongaiimaage
23 Qariqaaqari daa iliicati balalu wa⁄a, mutemi gu Misiri gi hhami. Waisraeeli gi ⁄aa⁄iri hari slahhaaꞌamee tongaiimaa dooinayge. ⁄aa⁄imu gooina gu slaꞌa iliiawaraa, gi day daqa Iliitleemuge. 24 Iliitleemu gi akhasi ⁄aa⁄imu gooina gu slahhaaꞌamee, gii slay ila⁄imbidu gosi giyaa hiifadidi haa Aburahaamu, Isaaka haa Yakoobo. 25 Teesaaqay, Iliitleemu gi arimi Waisraeeli haa gi caahhi labaꞌasu gooina.