Hiica⁄araa
Laqwaloo da Waisraeeli daa waauti Misirige
1
1 Hhaã na umaiĩ gu yaꞌay gu Israeelia gwaa hadakawee Misirige sliimaa haa ina, kila naw haa hida goõ gu mara gosi. 2 Umaiĩ koina na nahhaã Rubeeni, Simi⁄ooni, Laawi, Yuuda, 3 Isakaari, Sabulooni, Benyamiini, 4 Daani, Nafutaali, Gaadi haa Aseeri. 5 Laqwaloo goõ da Yakoobo yaa hida mibeeri fanqu.b Qatlaykee Yoseefu yaa hheꞌesi yaa giyaadi yade Misirige.6 Qariqaaqari, Yoseefu haa hhiee kosi goõ, haa laqwaloo goõ da qatlaykira gi kaka⁄iri goõ. 7 Teesaaqay see, Waisraeeli yaa laqwaliri haa gii tlakhweesiri hari khisla, gii qoniri daqeemoo paslaapasloo gu hhapee da Misiri.
Labaꞌasu gu Waisraeeli hhapee da Misirige
8 Inkoo, mutemi gu ⁄abu gwaa hhidima Yoseefu, gi tawaalimi Misirige. 9 Ina gi kaay sa hida kosi tuba, “Yuꞌudaa Waisraeeli, idoo gi ilii wa⁄a, kara ⁄uuru gooina guti didiru ba⁄ay da koori see. 10 Inkoo, kwanda ga dabiidane amoo da sagaadeehha haa da tlaatlahhasa inay ma mayri hiitlakhweesa. Bere teesaaqay gooba, gau bere yaay ca⁄i, inay hingigi ilagaasiyay haa fa⁄ayaa doori, qwaatliyay haa dandiray haa gi lakidiyay hhapee dooraa.”
11 Teesaaqay, Wamisiri gii leehhiri hida gu wariiqadimidu Waisraeeli haa gigi labaꞌasiyay hari yondu gwaa karahhu. Waisraeeli gi tlehhidiri sa Faraaw mutemi gu Misiri, yaamu gu Pitoomu haa Rameseesi gu koomee kuugiyoo gu iliiqamidu baruũ. 12 Teesaaqay see, Waisraeeli yaa ilakoniri hiitlakhweesa hhapee da Misirige, digaamati labaꞌasi see. Sa gimbakee, Wamisiri gi tlaꞌamuudiri hari khisla Waisraeeli. 13 Teesaaqay, Wamisiri gi tongagaisiri Waisraeeli hari ⁄uuru. 14 Hari amotee gi ⁄isiniri ibinaa da Waisraeeli gi karahhadi, sa yondu gwaa karahhu gu khwarankhwareemisu laami, paqanpagaru tufaarii haa yondu goõ gu qaymamu. Yondukeesii goõ, Waisraeeli digaa tongagaisi hari ⁄uuru.
15 Da hheꞌesi, mutemi gu Misiri gi eteedi laqwaliidiisee daa iliiaꞌaaꞌawa tigay gu Waeburaaniyaa, umaiĩ koina niĩ, Sifiraa haa Puuya, sigigi kaay tuba, 16 “Qatlay ga ilii laqwaliidimisidee tigay gu Waeburaaniyaa, khuꞌuma naraꞌa, bere dingii day naw hikee ti gaasakuna, bere hotu mawakana ma ibiti.” 17 Teesaaqay see, sa gimba laqwaliidisetee yaa gwaa⁄iyay Iliitleemu, inay yaa yondiidiriiba, idoo sigaa ilii kaay gooay ha mutemi gu Misiri. Teesaaqay, inay yaati mayri yaꞌay gu hhawatee gu Waisraeeli ma ibiidiri.
18 Mutemi gu Misiri ginaa iliieteedi laqwaliidisetee gigi maasi tuba, “Haã soꞌoy teesaaqay laqadiri? Haã soꞌoy maydiri cu⁄uduũ yaꞌay gu hhawatee?”
19 Laqwaliidiisetee gi ilaki⁄isiri mutemi Faraaw tuba, “Tigay gu Waeburaaniyaa ti tigay gu Misiri pahhaaba, inay konay ⁄uuru, yoótii dadayay yaꞌay laqwaliidiisee see kahhiyay dawaraa daqa dooinay.”
20 Teesaaqay, Iliitleemu gi yondiidi hhoinay sa laqwaliidisetee. Waisraeeli gii tlakhweesiri haa gi ilakoniri hiiroogida hari khisla. 21 Sa gimba laqwaliidisetee yaa gwaa⁄iyay Iliitleemu, Iliitleemu gigi pihhi slawaraa yaꞌay koina, inay loi.
22 Da hheꞌesi, Faraaw gi ilakaay hida kosi goõ tuba, “Kila naw doo hiidaye daqa Waeburaaniyage, kwahhakunay waꞌay gu duudu gu Naylige. Bere hotu daganingii day hatee mawakana ma ibiti.”