Tlintiꞌisaraa da badiisasaa hari amoo da makhanay du⁄iya
13
1 Taataa Iliitleemu yaa kaay sa Musaa tuba, 2 “Sini tlintiꞌiside hari amoo da makhanay du⁄iya badiisasaa goõ gu hhawatee gu Waisraeeli haa badiisasaa gu kuꞌunaanay gooina, sa gimba ti koi.”3 Da hheꞌesi, Musaa gi kaay sa hida tuba, “Slawaw baloti, Taataa Iliitleemu giyaa iliica⁄asi unkuray hhapee da Misirigo, daqa dangwaa ilii tongagaisi unkuray. Ina hangwaatii ca⁄asi unkuray hari daba gosi gu kooma ⁄uuru. Balotii, unkuray hhanti ⁄agintay idoo lensee daa ilii qaasi hamiira. 4 Baloti da slehheẽ gu Abiibu,a unkuray waautay hhapee da Misirigo. 5 Taataa Iliitleemu hanguri day hhapee da Wakanaanige, Wahiitige, Waamoorige, Wahiifige haa Wayebuusige, hhapee giyaa seelimi sa ayiĩ kokuna tuba, sangu hadisi, hhapetee doó guuma ilibaa haa dinu. Qatlaykee kwanda ga losonuusidee losonaki balotee, kila kori slehhekii. 6 Balalu fanqu hati ⁄agintay mukaatee doóba iliiqaasa hamiira, haa baloo da fanqu hati losonuusiday losona gu Taataa Iliitleemu. 7 Qatlaykeesii gu balalu hhakee gu fanqu hamaati ⁄agintay mukaatee doóba iliiqaasa hamiira. Gu lou, mukaatee lensee daa ilii qaasi hamiira dugumaa hhanti slay tla⁄aã googunay haa hhapee doogunay.
8 Baloteesii hamaa kaaday sa yaꞌay kokuna ubee, hati lalaalaqaday teesaaqay, sa gimba gu gimbakee sangwaa yondiidi Taataa Iliitleemu baloo gaa iliica⁄adiri hhapee da Misirigo. 9 Losonaki ti gimba gu caqariya pahha tleehhidi dabaiĩ kokunay haa gimba gu hiislawaraa pahha pandaca⁄ay kokunay. Teesaaqay, balalu sliimaa sariyaa da Taataa Iliitleemu ma afaiĩ kokunay wante. Teesaaqay laqa, sa gimba Taataa Iliitleemu hangwaatii ca⁄asi hhapee da Misirigo hari daba gosi gu kooma ⁄uuru. 10 Inkoo, baloti kwanda ga losonuuside qatlaykaꞌay kosii dagaa ilii ilakhuukhuꞌusi kila kori.”
11 Musaa gi ilakoomi kaawa sa hida tuba, “Taataa Iliitleemu hangurimaa day hhapee da Wakanaanige, hhapetee sangumaa qay, ma tooguna tleehhiti giyaa ilii seelimi gooay sa unkuray haa ayiĩ kokuna. 12 Teesaaqay, unkuray kwanda gamaa hadisidee sa Taataa Iliitleemu badiisasaa goõ gu hhawatee. Kara, kila badiisu gu hhawata gu kuꞌunaanay ti kosi tleehhidi. 13 Kila daqumoo gu badiisu guti afiigwetay hari amoo da buaraa ⁄ambeenimoo. Bere teesaaqay gooba hagu gaasida hari amoo da afaqeetisa isa. Kara, kila badiisu gu hhawata tla⁄aã gu yaꞌay kokunay hagu afiigweta. 14 Balalu gwaa khocee nankoogu bere gumaa maasi tuba, ‘Gimbakee amoo dosi na mala?’ Sugumaa kaade ubee, ‘Taataa Iliitleemu hindaa hiica⁄asi Misirigo hari daba gosi gu kooma ⁄uuru gaa ilii tongaiimaage wane. 15 Faraaw hari atana gosi, yaa siꞌi geemawa dandiray ma waaudani. Taataa Iliitleemu yaa cu⁄i badiisasaa gu Misiri, badiisasaa da yaꞌay gu hhawatee haa badiisasaa gu kuꞌunaanay. Haã na idoo soó hadise sadaaka da badiisasaa gu laqwaloo da hhawatee gu kuꞌunaanay. Slime haã na idoo soó afiigweede badiisu gu yaꞌay koi.’ 16 Gimbaki ti caqariya tleehhidi dabaiĩ kokunay haa pandaca⁄ay kokunay, sa gimba Taataa Iliitleemu hindaatii ca⁄asi hhapee da Misirigo hari daba gosi gu kooma ⁄uuru.”
Unguruiya da tlongiya haa aslaa
17 Faraaw giyaa iliigeemay Waisraeeli, ma waaudiri, Iliitleemu giyaa hiicatisiiba inay, ma sirakoniri amoo doó hiicata hari hhapee da Wafiliisiti, amotee damati qunqumaadi see. Sa gimba Iliitleemu yaa kaay tuba, “Hida hhanki maa hhanti hiifookiyay ilahudaa koina haa gi ki⁄iyay Misirige, hingimaa iliislaslayee haa gau.” 18 Teesaaqay, Iliitleemu giyaatii catisi inay hari amoo da niini⁄ida daa hiicatidi hari kongoqomee, yade khuꞌusa tlawa da didiri da Saamu. Waisraeeli yaa waaudiri hhapee da Misirigo, tay hingii ila⁄utliri naraꞌa sa gau.
19 Musaa yaa hiioy fararu gu Yoseefu, idoo Yoseefu giyaa ilii seelimi gooay sa Waisraeeli, giyaa ilii kahhiye gwaaꞌa. Musaa yaa teesaaqay laqi, sa gimba Yoseefu yaa kaay tuba, “Gu lou, Iliitleemu hangumaa pihhi unkuray kwanda gari waautee fararu koi hhapetaa.”
20 Teꞌesaa, Waisraeeli gi waaudiri hhapee da Sukootigo, gi tluhhusiri kambii taysi Etaamuge, kenga gu kongoqomeege. 21 Taataa Iliitleemu gi giyaadi sa inay. Hari tleemaa ina gi giyaadi hari unguruiya da tlongiya, hari amasi sigigi giyaadi hari unguruiya da aslaa, ma sigii cencuudisi amoo dooina. Inkoo, inay yaatii dahhasiri khocu amasi haa tleemaa. 22 Taataa Iliitleemu giyaa baciiba pandaa da Waisraeeligo, unguruiyatee da tlongiya da qatlay gu tleemaa, haa unguruiya da aslaa da qatlay gu amasi.