Waisraeeli tlo⁄osaraa da tlawa da didiri da Saamu
14
1 Da hheꞌesi, Taataa Iliitleemu gi kaay sa Musaa tuba, 2 “Kaay sa Waisraeeli ki⁄iyee alunge, tluhhusiyee kambii pandaa da tongoo da Pihakhirooti tla⁄aã gu tongoo da Migidooli haa tlawa da didiri da Saamu, pandaa dosi ilaciyaa haa yaamu gu Baali-Sefooni. 3 Faraaw ilahudeesi tuba, ‘Waisraeeliti bahhangaruurumisiyay, kongoqomee hiĩ gointi inay digiriĩ slanqadi hiica⁄a.’ 4 Ana, hagu ⁄isima muuna gu Faraaw ma karahhi, ina higi siragusina inay. Teꞌesii, ana laqama wanqamee doy da didiri hari amoo da hhamisaraa ina haa sirikaarii dosi goõ. Teesaaqay, Wamisiri hinoo caahhiyay ana ti Taataa Iliitleemu.” Inkoo, Waisraeeli gi tluhhusiri kambii teꞌesii, idoo sigaa ilii kaay gooay.5 Faraaw, mutemi gu Misiri sugwaa ilii kaay tuba, Waisraeeli hiĩ lakiti, ina haa yondimiisee dosi gii fookiri ilahudaa koina, gi kaayri tuba, “Hanti malee laqani? Waisraeeli haginti geemayni, ma waaudiri haa sindi kara yondiidiyaaiiba tongee pahha!” 6 Da hheꞌesi, Faraaw sugugi ilakhuukhuꞌusi kokoteeni gosi gu gau, daa dukhudukhuukhune ha faraasi, gi waaudi sliimaa haa sirikaarii dosi. 7 Kara, ina gii oyi kokoteenanuu kosi gu hhoi mibeeri mibi lahhoꞌo, haa kokoteenanuu wakinay goõ gu gau gu hhapee da Misiri, daroó giyaadiye ha sirikaarii da deni. 8 Taataa Iliitleemu gi ⁄isimi muuna gu Faraaw, mutemi gu Misiri ma karahhi. Da hheꞌesi, gi siragusimi Waisraeeli gwaa waaudee Misirigo hari ⁄atlimaa. 9 Wamisiri gi siragusiniri Waisraeeli hari faraasasuu koina goõ, kokoteenanuu gu gau haa sirikaarii dosi doó hiidadawa faraasige. Inay gi slayri Waisraeeli hiĩ tluhhusiri kambii kenga gu tlawa da didirige, ilaciyaa haa Pihakhirooti gwaa tluntlubaage waaree haa yaamu gu Baali-Sefooni.
10 Faraaw giyaa ilii daadaausi, Waisraeeli gi ariniri Wamisiri yaa khociyay aluũ koinaa. Inay gi tlaꞌamuudiri hari khisla, gi ilii⁄aa⁄iri Taataa Iliitleemu. 11 Waisraeeli gi kaayri sa Musaa tuba, “Aysasu yaati hhakii gu buꞌudisa iliiqamidu dandiray hhapee da Misirige, handiraagi khaydi tay, ma kaka⁄ani kongoqomeege? Handaani soꞌoy hiica⁄asidi hhapee da Misirigo? 12 Ugu sugwaa kaawaniibaslii gimbaki, gaa ilii kahhane Misirige, dandi bee handi mayde, ma yondiidani sa Wamisiri? Sa gimba ti naraꞌa tongee da Wamisiri tleehhida ba⁄ay da kaka⁄u tiꞌii kongoqomeege!”
13 Musaa gi kaay sa Waisraeeli tuba, “Hhanti kontay tlaꞌamee, qadimida naraꞌa! Letuti antay, idoo Taataa Iliitleemu hangu ilii ilabuꞌune unkuray. Wamisiriti ga khuꞌuuꞌuntee tiꞌii letuti, etaa hagimaa kara antaaiiba. 14 Taataa Iliitleemu gauusi sa unkuray, unkuray ti kaanahhasa kilesi.”
Ba⁄aru hari amoo da tlawa da didiri da Saamu
15 Teꞌesii, Taataa Iliitleemu gi kaay sa Musaa tuba, “Sini soꞌoy ilii⁄aa⁄ii⁄iminta ana? Ugu kaay sa Waisraeeli ilakonee khocu pandaage. 16 Tlaysii hhadaa doogu hari daba laga tafaꞌasida rawaa gu tlawa da didirige, ma hiideehhedi maꞌay gu tlawatee. Teesaaqay, Waisraeeli ma tlo⁄osiri hari tla⁄aã gu tlawatee hari daqa da kaaruu. 17 Yuꞌudiyaa, ana ⁄isima muunaiĩ gu Wamisiri, ma karaarahhiri, inay hiigunay haa gi siragusinay Waisraeeli tla⁄aã gu tlawateesii. Ana dini daareesi hari amoo da hhamisaraa Faraaw, sirikaarii dosi goõ, kokoteenanuu kosi gu gau sliimaa haa yondimiisee dosi doó hiidadawa faraasige. 18 Qatlay goó iliihhamise Faraaw, kokoteenanuu kosi haa yondimiisetee tosi doó hiidadawa faraasige, ana dinoó daareesi, Wamisiri yoó caahhiyay tuba, ana na Taataa Iliitleemu.”
19 Da hheꞌesi, malayika gu Iliitleemu guraa giyaamaamida Waisraeeli, gi ki⁄i aluũ koinay. Kara, unguruiyatira see da tlonga gi qadida kaydi aluũ koinay. 20 Unguruiyatee gi qaditi tla⁄aã gu kambii gu Waisraeeli haa Wamisiri. Amasi piray, tlongiya hiraagi khaydi ⁄oona hari bara da Wamisiri haa hiraagi khaydi cencee hari bara da Waisraeeli. Inkoo, amasi piray, raqoo hhanki gu cada hingaa iliisasatiriiba ilaciyaage.
21 Teꞌesii, Musaa gi tafaꞌasi daba gosi rawaa gu tlawage, Taataa Iliitleemu gi ila⁄upi alunge maꞌay gu tlawatee hari ilafahhiya da dihhi, daa ilacindoo gu rawaa dahha. Ilafahhiyatee gi fahhanti amasi piray, gii deehhedi tlawatee bareemoo cada, tla⁄ange dagi tosaa gii ca⁄i hhapee da kaaruu. 22 Teesaaqay, Waisraeeli gi tlo⁄osiri hari daqatee da kaaruu daa hiideehhedi tlawatee, tay bi⁄eenaa gu maꞌay tooinaa wanay hari bara da ⁄uya haa hari bara da basa.
23 Wamisiritee gi siragusiniri Waisraeeli gii guniri tla⁄aã gu tlawateesii, hari faraasi goõ gu gau gu Faraaw, kokoteenanuu kosi haa yondimiisee goõ doó hiidadawa faraasi dosii. 24 Daa ilii daadaausi pisaraa, Taataa Iliitleemu gi yuꞌudi raqa da sirikaarii da Wamisiri unguruiyatiraa da aslaago haa da tlongiyago, gigii tlaꞌameedeesi hari khisla. 25 Iliitleemu gi ⁄isimi taylaaee gu kokoteenanuu koina, ma mayri niini⁄imidu. Teesaaqay, gigi maadiri hari maana. Teꞌesii Wamisiri gi kaayri tuba, “Taataa Iliitleemu gauusi sa Waisraeeli, paaree ma lakidani.”
Hhamisaraa da Wamisiri
26 Da hheꞌesi, Taataa Iliitleemu gi kaay sa Musaa tuba, “Tafaꞌasi daba googu rawaa gu tlawa da didirige, maꞌay maa hiiki⁄iri, ma ilakhupisiri Wamisiri, kokoteenanuu koina gu gau haa yondimiisee dooina doó hiidadawa faraasige.” 27 Musaa gi tafaꞌasi daba gosi rawaa gu tlawateesii qatlay daa iliipisi, higi tosaa gii ki⁄idi giyoó iliiwante gooay. Wamisiri yaa koisiri lakida maꞌay hhakee, Taataa Iliitleemu gigi ila⁄upi waꞌay gu tlawateesii. 28 Maꞌay hingigi iliikiki⁄iri haa higi ilakhupisiri kokoteenanuu haa yondimiisee doó hiidadawa faraasige. Raqa goõ da sirikaarii da Faraaw daa siragusinti Waisraeeli waꞌay gu tlawage, dagaati hhamisi sumuku, lensee yaa ba⁄amiiba.
29 Teesaaqay see, Waisraeeli yaati tlo⁄osiri hari daqa da kaaruu hari tla⁄aã gu tlawatee, tay da tosaa wana bi⁄eenaa gu maꞌay hari bara dooina da ⁄uya haa hari bara da basa. 30 Balotee, Taataa Iliitleemu ginaa ilii ilabuꞌumi Waisraeeli dabaiĩ gu Wamisirigo. Waisraeeli gi aniri Wamisiri kenga gu tlawage, hiĩ kaka⁄iri. 31 Qatlay Waisraeeli giyaa iliianiri yondu gu didiru gu bakaꞌasa, daa yondiidi ha Taataa Iliitleemu daqa Wamisirige, gugi gwaa⁄iri hari khisla ina haa gugi ⁄imbiri Taataa Iliitleemu haa yondimiisay gosi Musaa.