Raaꞌamee da ilabuꞌuru
15
1 Teꞌesii, Musaa haa Waisraeeli gi raairi sa Taataa Iliitleemu raaꞌameti tuba,“Raaꞌa sa Taataa Iliitleemu,
sa gimba hiĩ kaba⁄i hari daareesa.
Faraasi haa hida kosi goó iliidadawee,
gingii hhamisi tlawa da didirige.
2 Taataa Iliitleemu ti ⁄uuru goy haa ti raꞌamee doy,
ina loi hinti ilabuꞌuru goy tleehhidi.
Ina ti Iliitleemu goy, ana hagu hhaꞌaleesa,
ti Iliitleemu gu taataa gooi, ana hagu daareesa.
3 Taataa Iliitleemu ti khamaslu gu gau.
Taataa Iliitleemu na uma gosi.
4 Kokoteenanuu gu gau gu Faraaw haa sirikaarii dosi,
gindii slakhi tlawa da didirige.
Sirikaarii da deni da Faraaw,
hindii hhaniri tlawateesii da didirige da Saamu.
5 Inay digingii hhamisi ha slagwiyoo gu ilasegi gu maꞌay,
hindii hhaniri slagwiyoo hhakeesii tlaa⁄a pahha.
6 Ye Taataa Iliitleemu, daba googu gu ⁄uya,
kona ⁄uuru hari khisla.
Ye Taataa Iliitleemu hari daba googu gu ⁄uya,
hoó tlupita fa⁄ayaa.
7 Hari ⁄uuru gu wanqamee doogu,
hoó slaslakhada hida goó kanimisee ugu.
Ugu hoó ya⁄abida qupidaa koku gu dihhi,
yoó hhamisiyay inay slarahhaa daa kaadi pahha.
8 Hari himpoo da urunga doogu,
maꞌay yaa hiikurunkuridiri.
Gondadee gu maꞌay gi qadimidiri rawaa khuꞌusa bi⁄inaa pahha,
slagwiyoo gi kwa⁄iri tla⁄aã gu tlawa da didirige.
9 Fa⁄aymoo hingaa hiiduubi tuba,
‘Hagisiragusima haa hagi oowa inay.
Deehhima khooslay gooina giĩ afii⁄utli sa hida,
kwayru gu muuna goy ti amoolaa hiifaaki.
Pangaa goy hagu slootisa,
daba goy gi hhamisi inay.’
10 Teesaaqay see, ugu haa hiifahhadi hari himpoo doogu,
tlawa da didiri higigi ilakhupisidi.
Inay gii hhaniri tlaa⁄u pahha,
maꞌay gu didirige.
11 Ye Taataa Iliitleemu,
ti miyaa tla⁄aã gu iliitleemameege gu ugu pahha?
Ti miyaa gu ugu pahha,
tlintiꞌisa doogu dati ina leẽ kilesi
daqa idadu goõ gaa tleehhedi,
doó gwaa⁄iye hhaꞌaleesa dooguu,
haa goó yondiida gimba gu bakaꞌasa?
12 Ugu gwaa tafaꞌasu daba googu gu ⁄uya,
hhapee gi gwi⁄idi fa⁄ayaa doori.
13 Ugu hari slaꞌamuu koku goóba hiifaakoo,
hariĩ giyati hida giyaa afiigweti.
Hagiriĩ giyati hari ⁄uuru googu,
daqataꞌa naqatloo gaa tlintiꞌisidi goó ilii ibite.
14 Hida gu hhapapu goõ hiĩ akhasiri gimbakee,
haa dakhadakhiyay.
Hida goó ibiide hhapee da Filiisitige,
digiĩ ooyi ha slahhaaꞌamee.
15 Hida gu deni gu hhapee da Edoomu, gi tlaꞌamuudiri,
giyaadimiisee da hhapee da Moaabu,
hiĩ tlaꞌamuti, ti amoo dakhadakhiyay.
Hida goõ goó ibiidee hhapee da Kanaanige,
hiĩ muunaiĩ hiicooboꞌodiri.
16 Tlaatlaꞌamisu haa tlaꞌamee hiĩ ilii tlairi inay.
Sa gimba gu ⁄uuru gu daba googu,
fa⁄ayaa da Waisraeeli hinti tlakhati tlaa⁄u pahha.
Ye Taataa Iliitleemu,
hida koku giyaa afiigweti hiti amoolaa tlo⁄osiyay.
17 Ugu hagiraa khayda hida koku,
haa hagira ilakhiinaaꞌata rawaa gu oõ gu aaliru googuu.
Ye Looimoo goy, teꞌesii daqa gaa hiileehhedige,
ma daqa da ibinaa doogu tleehhiti Taataa Iliitleemu,
daqa gaa tlintiꞌisidi, gaati tleehhidi hari dabaiĩ koku.
18 Ye Taataa Iliitleemu, hati tawaalinta
koraraa haa koraraa goóba hiifaakoo.”
19 Qatlay faraasi da Faraaw, kokoteenanuu kosi sliimaa haa yondimiisee dosi daa ilii dadaadawa faraasi, giyaa iliiguniri tla⁄aã gu tlawa da didirige hari daqa da kaaruu, Taataa Iliitleemu yaagii ki⁄isi maꞌay gu tlawatee, gi ilakhupisiri inay. Qatlaykee Waisraeeli yaa hheꞌesiri yaa tlo⁄osiri hari tla⁄aã gu tlawatee hari daqa da kaaruu.
Raaꞌamee da Miriyaamu
20 Inkoo, Miriyaamu tletimiisoꞌoo da Taataa Iliitleemu haa hhioo da Haruuni, gii oodi ingima daba gosii. Teꞌesii, tigay goõ gi sirakoniri ina, inay see konay ingimaiĩ koina, tay tooinaa seehhuusiyay. 21 Miriyaamu, sigigi raaꞌadi tuba,
“Taataa Iliitleemu, sugu raaꞌadee,
sa gimba hiĩ kaba⁄i hari daareesa.
Faraasi haa hida kosi goó hiidadawee,
gingii hhamisi tlawa da didirige.”
Maꞌay gu qada gu Maaraa
22 Da hheꞌesi, Musaa hirigi giyaadi Waisraeeli teꞌesaa tlawa da didirigo da Saamu, kongoqomee da Suuri naqatloo. Balalu tami yaa khociri kongoqometeesii, yaa slayriiba maꞌay see. 23 Qatlay giyaa ilii dayri daqa doó eteedine Maaraa, yaa hiidahhasiriiba kitahhu maꞌay kosi, sa gimba yaa qadayay. Sa gimbakee daqatee dagarigi ayi na Maaraa.a 24 Teesaaqay, hida goõ gi iliiquru⁄iri Musaa, kakaana tuba, “Inkoo, ha mala kitahhana?”
25 Teꞌesii, Musaa gi ilii⁄aa⁄i Taataa Iliitleemu, sugugi laqami eleema da khaimoo. Musaa gii slakhi eleematee waꞌay gu maꞌayge, maꞌay hhakee gi nuqu tleehhidiri.
Taysi Taataa Iliitleemu gi hadisi sa Waisraeeli ilakaawa haa sariyaa, ma arimi bere qadimidiyay naraꞌa. 26 Taataa Iliitleemu gi kaay sa inay tuba, “Bere itatiisiday naraꞌa afoo doy, ana Iliitleemu googuna, haa gi yonditay gimba daa ⁄imbi pandaa dooii, bere akhamisiday haa gi ooday ilakaawa doy goõ, haraa khawaaba ga⁄ay lensee daqa doogunay, da hikira gooay garaa khay daqa Wamisirige, sa gimba ana na Taataa Iliitleemu goó hhoeemisa unkuray.”
27 Da hheꞌesi, Waisraeeli giyaa ilii waaudiri Maaraago, gi dayri Elimuu naqatloo. Daqatee yaa konta hhaahhiyoo mibi haa cada haa khai doó eteedine mitende mibeeri fanqu. Inay gi tluhhusiri taysi kambii ilaciyaa haa maꞌay.