⁄agoo na maana haa kwarakhoo
16
1 Marimariya goõ da Waisraeeli gi waauti Elimuugo, gi daadi kongoqomee da Siniige, daa tla⁄antla⁄a gu Elimuu haa hhapee da Sinaay waara. Balotee yaati baloo da mibi haa kooani da slehheẽ gu cada, tlaatleesa da baloo giyaa ilii waaudiri hhapee da Misirigo. 2 Taysi kongoqometeesii, marimariya goõ da Waisraeeli gi iliiquru⁄udi Musaa haa Haruuni. 3 Inay sigigi kaayri tuba, “Taataa Iliitleemu ba⁄ay hindaati aloo cu⁄i yade Misirige, hhapee gaa ilii ibimaamidane, gi ⁄agini fuꞌumay haa mukaatee haati amoolaa akhaakhani. Inkoo, unkuray handaraani khaydiri tay kongoqomeege, raqati goõ ma kaka⁄adi hari qori.”4 Da hheꞌesi, Taataa Iliitleemu gi kaay sa Musaa tuba, “Yuꞌudiyaa, ana hii⁄eetisa ⁄agoo tlubay pahha rawaa gu rawgo sa unkuray. Balalu sliimaa hida hiica⁄iyay haa hufidiyay ⁄agoo da letutee kilesi. Hari amoti, ana hagi koisa, ma arimi bere sirakonay baku sirakonaaiiba ilakaawa doy. 5 Baloo da lahhoꞌo qatlay gimaa ilii ilakhuukhuꞌusiye ⁄agotee giraani khayri waꞌay gu marage ti hufidiyee waa cada ba⁄ay da hatee giyoó hufidiyee balalu sliimaa.”
6 Teesaaqay, Musaa haa Haruuni gi kaayri sa Waisraeeli goõ tuba, “Hari khwayaiĩ hoo asu caahhaday tuba, Taataa Iliitleemu nangwaa hiica⁄asi unkuray hhapee da Misirigo! 7 Kara, heetlaalee hari heetlawa hoo antay wanqamee da Taataa Iliitleemu, sa gimba ina hiĩ akhasi quru⁄umoo ga quraaru⁄udee daqa dosii. Inkoo, dandiray niĩ miyaa handimati iliiquru⁄udiri see?” 8 Kara, Musaa sigigi kaay tuba, “Hari khwayaiĩ Taataa Iliitleemu sangu hadisi fuꞌumay ma ⁄agintiri. Kara, hari heetlawaa sangu hadisi mukaatee, ⁄agintay ti amoolaa akhaakhantay, sa gimba hiĩ akhasi quru⁄umoo ga quraaru⁄udee daqa dosii. Dandiray ti haã miyaa, handimati iliiquru⁄udiri see? Gu lou, ti Taataa Iliitleemu guni ilii quraaru⁄uday.”
9 Da hheꞌesi, Musaa gi kaay sa Haruuni tuba, “Marimariya goõ da Waisraeeli saga kaade ubee, ‘Kurunkuridaaruu pandaa da Taataa Iliitleemuge, sa gimba ina hiĩ akhasi quru⁄umoo googuna.’ ”
10 Qatlay Haruuni giyaa ilii gimaamisiye haa marimariyatee goõ da Waisraeeli, inay gonkoinaa gi yuꞌudiri bara da kongoqomeege, cirakiray wanqamee da Taataa Iliitleemu dagagi arimi tlongiyage.
11 Taataa Iliitleemu gi kaay sa Musaa tuba, 12 “Haã akhasi quru⁄umoo gu Waisraeeli. Inkoo, sigi kaade ubee, ‘Hari khwayaiĩ ⁄agintay fuꞌumay, haa hari heetlawaa ⁄agintay mukaatee ti amoolaa akhaakhantay. Teꞌesii, hoo asu caahhaday tuba, ana na Taataa Iliitleemu, Iliitleemu googuna.’ ”
13 Inkoo, hari khwayaiĩ hhakee, kwarakhoo wa⁄a yaagi khaydi, gi ilaslaabidi kambii gu Waisraeeli. Heetlaalee dosi hari heetlawaa dagii ca⁄i rau, slime gi ilaslaabi hari kenga gu kambii gooina goõ. 14 Raukee giyaa ilii hhancooi, dagii ca⁄i idadu gu digidakwi gu cohhi loo⁄oo pahha kongoqomeege. 15 Qatlay Waisraeeli giyaa iliianiri idadu hhakee yaati bakairi, hingigi maamisiri tuba, “Haã na mala?” Sa gimba yaa caahhiriiba ti idoo mala. Musaa gi kaay sa inay tuba, “Haã ti ⁄agoo sanguu hadisi ha Taataa Iliitleemu, ma ⁄agintiri. 16 Taataa Iliitleemu hiĩ taqay ilafahhi tuba, ‘Kila heedi hufidiye ⁄agoo, idoo giyoó ilii⁄aginee gooay. Kara, kila heedi hubidiye kopaaee cadaa sa kila heedi gu waara hemaa dosii.’ ”
17 Inkoo, Waisraeeli gi teesaaqay laqiri, tla⁄aã gooinay wakinay gi hufidiri ⁄agoo wa⁄a haa wakinay ⁄agoo coko⁄u. 18 Inay giyaa ilii ilakhuiri kopaaee cada, yaa ariniri, heedi gwaa hufidu wa⁄a, yaa hiimeesiiba idoo. Kara, heedi gwaa hufidu coko⁄o, yaa afariibukudiiba idoo. Kila heedi yaati hufidi idoo giyaa hiidahhasi ⁄agoo.b
19 Musaa gi kaay sa inay tuba, “Heedi lensee hhanti meesi ⁄agoo, heetlawaa naqatloo.” 20 Teesaaqay see, wakinay yaa iliiqaasiriiba gimba daa kaay ha Musaa, gi meesiri ⁄agoo heetlawa naqatloo. ⁄agotee giyaa meesiri, dagagi ilii guumi kwicaa haa gi ufiufidi. Teesaaqay, Musaa gi slahhaai hari khisla sa hida hhakee.
21 Hari heetlawaa, kila heedi yaati hufidi ⁄agoo, idoo giyaa ilii⁄agiiginee gooay. Tleemaa giyaa iliida⁄adi hari khisla, ⁄agotee gii cooboꞌoti. 22 Baloo da lahhoꞌo da kuiyage gi hufidiri ⁄agotee waa cada, kila heedi kopaaee cigahha. Gaduũ goõ gu marimariya goõ da Waisraeeli, gi ilii hadakayri Musaa, sugugi kaayri gimbakee. 23 Musaa gi kaay sa inay tuba, “Haã na ilakaawa da Taataa Iliitleemu. ‘Heetlaalee ti baloo da hiifiifisa, ti Sabaato daa tlintiꞌisi ha Taataa Iliitleemu. Inkoo, teesaaqay laqa letuti, taa⁄amida qamidaw haa iladahhasa ⁄agoo ga slaꞌadee. ⁄agoo doó meeta qaasakana heetlaalee naqatloo.’ ”
24 Teesaaqay, inay gi qaasiri ⁄agoo waka heetlawa naqatloo, idoo Musaa gooay giyaa ilii ilakaay inay. ⁄agotee yaa ufiufidiiba ma kwicaa see yaa hiiguntiiba. 25 Musaa gi kaay sa hida tuba, “Letuti, ⁄agima ⁄agotee, sa gimba letuti ti Sabaato da Taataa Iliitleemu. Letuti slaydaaiiba ⁄agoo yade khoorooge. 26 Balalu lahhoꞌo hati hufitay ⁄agoo. Teesaaqay see, baloo da fanqu ti Sabaato, ⁄agotee maa wantaaba.”
27 Teesaaqay see, baloteesii da fanquge hida wakinay gii ca⁄iri sa hufidu kawa ⁄agoo, yaa slayriiba idoo lensee. 28 Teꞌesii Taataa Iliitleemu gi kaay sa Musaa tuba, “Malaalee naqatloo, gani ilii sisiꞌiday akhamisu ilakaawa doy haa sariyaa doy? 29 Caahha, ana Taataa Iliitleemu sangwaati hadisi balotee da Sabaato, ma hiifiifisidiri. Haã na idoo baloo da lahhoꞌoge sangunoó ilii hadisi ⁄agoo da balalu cada. Inkoo, baloteesii da fanqu kila heedi hiifiifisiye aya gosii, hhantii ca⁄i.” 30 Teesaaqay, hida gii fiifisiri baloo da fanquge.
31 Waisraeeli ⁄agotee girigi ayri na “Maana.”c ⁄agotee daa ⁄abaakwi da pisagaroo da ⁄aylalaa pahha, haa cuuꞌu gosi yaati mukaatee day slahhislahhi pahha, daa maakhi dinu.
32 Musaa gi kaay tuba, “Haã na ilakaawa da Taataa Iliitleemu tuba, ‘Unkuray owaw kopaaee cada gu koomee maana, laga qaasiday sa laqwaloo dooguna daa khoca, himaa hiidahhasiyay arimaa ⁄agoo hangwaa ⁄agimisi kongoqomeege, hangwaa iliica⁄asi hhapee da Misirigo.’ ”
33 Teꞌesii, Musaa gi kaay sa Haruuni tuba, “Oyii kuuruu, lahii kuꞌusida kopaaee cada gu maana kuurukeesii. Da hheꞌesi, lugu qaasiday pandaa da Taataa Iliitleemuge, maanatee laga qaasiday sa laqwaloo dooguna daa khoca, maga aniri.”
34 Teꞌesii, Haruuni gi qaasi kuurukee gu maana waꞌay gu sandikoo da ilatlatlawge, pandaa da khongoroꞌosay cada daa iliihandikimi ila⁄imbidu mibi, duguma ga⁄ay, idoo Taataa Iliitleemu gooay giyaa ilii ilakaay Musaa. 35 Waisraeeli gi ⁄aginiri maana koraraa mibeeri cigahha, yaati amoolaa dayri digimaa gu hhapee da Kanaanige, hhapee da hhoi da ilii ibinaa. Kara inay giyaati ⁄aginiri yaati amoolaa dayri digimaa gu hhapee da Kanaanige.
36 (Piimoo daraa ilakhui maana ti kopaaee cada, haã gwaa leẽ da daqa da mibi gu kipiimoo doó eteedine eefa. Eefa ilakhuꞌua dosi ti debee leẽ pahha.)