Maꞌay tlaa⁄a da didirigo
(Faadoo 20:1-13)
17
1 Marimariya goõ da Waisraeeli gi waauti kongoqomee da Siniigo, gi hhiyuti daqeemoo haa daqeemoo, idoo Taataa Iliitleemu giyaa ilii ilakaay gooay inay. Inay gi tluhhusiri kambii taysi Refidiimuge. Inkoo, daqateesii maꞌay gu kitahhu yaa hhaki sa hida. 2 Teesaaqay, inay gi iliiquru⁄iri Musaa kakaanay tuba, “Sandi qayde maꞌay gu kitahhu!” Musaa sigigi kaay tuba, “Sini soꞌoy ilii quraaru⁄uday? Hagu soꞌoy koiiꞌimisiday Taataa Iliitleemu?”3 Teesaaqay see, teꞌesii hida yaa konay wakhaa hari khisla, inay gi ilii quru⁄iri Musaa kakaanay tuba, “Handaa soꞌoy hiica⁄asidi hhapee da Misirigo, handiraagi khaydi tiꞌii dandiray, yaꞌay koti haa kuꞌunaanay goori, ma kaka⁄ani hari wakhaa?”
4 Teꞌesii, Musaa gi ilii⁄aa⁄i Taataa Iliitleemu, gi kaay tuba, “Ye Taataa Iliitleemu, sigi mala yondiida hida hhanki? Hida hhanki hiĩ daadaauusiri hini cakhadinay hari tle⁄eẽ!”
5 Taataa Iliitleemu gi kaay sa Musaa tuba, “Ugu catii pandaa da hida hhakeesii, lahubita gaduũ angaamaka gu Waisraeeli. Slime lahubita daba googuu hhadatira garaa hiimaahhasidi duudu gu Nayli. 6 Yuꞌudiyaa, ana qadida pandaa dooguu rawaa gu tlaa⁄a da didirige oõ gu Horeebuge. Ugu hagoo hiimaahhasida tlaa⁄atee, maꞌay yoo hiica⁄iyay waꞌay kosaa sa hida ma kitahhaniri.” Inkoo, Musaa gi teesaaqay laqi pandaa da gaduũ gu Israeelige. 7 Musaa, daqatee girigi ayi, uma na “Maasa” haa “Meeriiba,”a sa gimba teꞌesii, Waisraeeli yaa naanaqamidiri haa yaa koimisiri Taataa Iliitleemu, gi kaayri tuba, “Gu lou, Taataa Iliitleemu tla⁄aã goorii wana baku wanaaba?”
Waisraeeli kaba⁄araa gau gu Waꞌamaleeki
8 Qatlaykee Waꞌamaleeki yaagi khayri, gi gauusiri haa Waisraeeli teꞌesii Refidiimuge. 9 Musaa gi kaay sa Yosuuwa tuba, “Leehhii hhawatee wakinay, la gauusakayda haa Waꞌamaleeki. Heetlaalee, ana qadida rawaa gu cina da onke, tay haã ooyi daba gooii hhadatira da Iliitleemu.”
10 Teesaaqay, Yosuuwa gi yondiidi, idoo sugwaa ilii kaay gooay ha Musaa, gi gwatla kay haa Waꞌamaleeki. Nama qatlaykeesii lenge Musaa, Haruuni haa Huuri gi ilakhiinaaꞌadiri rawaa gu onke. 11 Qatlaykee sliimaa, Musaa giyaa ilii waratlaysi hhadatira rawaage hari daba gosi, Waisraeeli gi kaba⁄iri, haa giyaa ilii⁄eetisi daba gosi, Waꞌamaleeki gi kaba⁄iri. 12 Qariqaaqari dabaiĩ gu Musaa gi ba⁄aa⁄aadiri, Haruuni haa Huuri yaagii oyri tlaa⁄a, gigi qaasiri ilaciyaa ha Musaa, gigi ilii ibiidi. Da hheꞌesi, Haruuni haa Huuri gi ilaꞌayri waratlaysaraa rawaage dabaiĩ gu Musaa, leẽ gi waratlaysi daba gu ⁄uya haa waku daba gu basa. Teesaaqay, dabaiĩ gu Musaa digaati waratlaysi rawaage, letu yaati amoolaa hiihuuꞌudi. 13 Yosuuwa gi hhamisi sumuku sirikaarii da Waꞌamaleeki hari pangaa.
14 Da hheꞌesi, Taataa Iliitleemu gi kaay sa Musaa tuba, “Gimbaki gu kaba⁄amuu handikimaku kitaabuuge, ma gimba gu hiislaslaw tleehhidi. Kara, gimbaki Yosuuwa gi akhasiye hari eaa kosi loi ubee, ana hagi hhamisa sumuku Waꞌamaleeki khoorotaa.”
15 Musaa gi tleehhi masabaahu, girigi ayi uma na “Taataa Iliitleemu ti kaba⁄amuu goy bendeeraa pahha.” 16 Musaa gi kara kaay tuba, “Sa gimba dabaiĩ gu Waꞌamaleeki digaa waratlaysa rawaage daqa kitiĩ gu tawaaloo da Taataa Iliitleemu naqatloo! Taataa Iliitleemu gwaatli haa Waꞌamaleeki laqwaloo haa laqwaloo.”