Yeetiro ilakhookhocu kawa Musaa
18
1 Inkoo, Yeetiro hhapalooay gu Midiyaani, kumbaꞌa gu Musaa, gi akhasi gimbakira goõ daa yondiidi ha Iliitleemu sa Musaa haa Waisraeeli. Slime, ina yaa akhasi idoo Taataa Iliitleemu giyaa iliica⁄asi Waisraeeli hhapee da Misirigo.2 Qatlaykee Musaa yaa hheꞌesi yaa ki⁄isi hadee dosi Sipoora daqa taataa gosi Yeetiro. Yeetiro gi kwahhasuusi hotosi Sipoora, 3 sliimaa haa yaꞌay kosi cada. Uma gu naw gu badiisu naa Gerisoomua sa gimba Musaa yaati kaay tuba, “Ana hanti yaamulooay gooba tleehhidi daqa hhapapu gu dahaage.” 4 Naw gu caduu uma gosi na Elieseeri,b sa gimba Musaa yaa kaay tuba, “Iliitleemu gu ayiĩ koti hinaa iliiay, hinigi ilabuꞌumi, dinima may gaasa hari pangaa ha Faraaw.”
5 Yeetiro, kumbaꞌa gu Musaa sliimaa haa yaꞌay gu Musaa haa hadee da Musaa, gugi ilii hadakayri Musaa kongoqomeege. Teꞌesii daqa giyaa ilii tluhhusi kambii yaa ilaciyaa haa oõ gu Iliitleemu. 6 Yeetiro yaa ya⁄abi ya⁄aboo daqa Musaage tuba, “Ana Yeetiro, kumbaꞌa googu, amooge waara haa khoca sliimaa haa hadee doogu haa yaꞌay koku cada.”
7 Teesaaqay, Musaa gii ca⁄i, gi amoodabaay kumbaꞌa gosi, giyaa iliiday daqa dosii, gi keebeeꞌedi pandaa dosi haa gugi humbaꞌadi ina. Inay, hingigi cehheemisiri haa da hheꞌesi gii guniri hemaage. 8 Musaa gi ilakeesi sa kumbaꞌa gosi gimba goõ Taataa Iliitleemu giyaa yondiidi daqa Faraawge haa daqa Wamisirige sa Waisraeeli. Kara, ina gi ilakeesi labaꞌasu gooina goõ giyaa slayri amooge, haa idoo digaa ilii ilabuꞌumi ha Taataa Iliitleemu.
9 Yeetiro dugugi muunaboo⁄eesi ha gimba sliimaa gu hhou daa yondiidi Taataa Iliitleemu sa Waisraeeli, haa idoo giyaa ilii ilabuꞌumi inay dabaiĩ gu Wamisirigo. 10 Yeetiro gi kaay tuba, “Dugu hhaꞌaleesiye Taataa Iliitleemu, ina gwaani ilabuꞌumi ugu dabaiĩ gu Wamisirigo haa dabaiĩ gu Faraawgo. Gu lou, ina yaa ilabuꞌumi Waisraeeli dabaiĩ gu Wamisirigo. 11 Inkoo, ana haã caahhi Taataa Iliitleemu guti didiru ba⁄ay da iliitleemamee goõ. Ina yaa ilabuꞌumi Waisraeeli daqa Wamisirigo, hhaã gungoo hiiduubee yaa yondiidiri daqa dooinay hari darabimaa.” 12 Teꞌesii, Yeetiro kumbaꞌa gu Musaa, gi hadisi sadaaka da da⁄araa haa sadaaka waka sa Iliitleemu. Haruuni yaagi khay sliimaa haa gaduũ goõ gu Israeeli, ma ⁄aginiri ⁄agoo sliimaa haa kumbaꞌa gu Musaa pandaa da Iliitleemuge.
Yeetiro ilakaawage Musaa
13 Heetlaalee dosii, Musaa gi ibiidi kitiĩ gosii, ma kereꞌemisi gimba gu Waisraeeli. Inay see Waisraeeli gi qadimidiri tay Musaa guũ niini⁄idiri tlaatleesa da heetlawaago khwayaiĩ naqatloo. 14 Kumbaꞌa gosi Musaa giyaa ilii arimi gimba sliimaa doó yondiidiye ha Musaa sa hida hhanki, gi kaay tuba, “Ti idoo mala haã ga yondimaamite daqa hida hhankii? Ugu haã soꞌoy ibiti ugu lenkoogu, tay duguũ niini⁄idi ha hida tlaatleesa da heetlawaa dinti amoolaa hiihuui letu?”
15 Musaa gi kaay sa kumbaꞌa gosi tuba, “Ti sa gimba hida yoó khakhay daqa dooii, slaiyay caahha slaꞌamuu gu Iliitleemu. 16 Inay bere konay naanaqamoo, yoóti khayay daqa dooii, ana gi tooaa kereꞌesa gimba gooina. Kara, inay hagiyoóti caacaahhamisa ilakaawa haa sariyaa da Iliitleemu.”
17 Teꞌesii kumbaꞌa gosi Musaa gi kaay tuba, “Gimba ga yondimaamite guti hhouuba! 18 Gu lou, ugu sliimaa haa hida hhanki hanguti ba⁄aa⁄adisiday diitiray. Yonduki gutii loou hari khisla daqa dooguu, haguu dahhasidaaba geregeda ugu lenkoogu. 19 Inkoo, ugu hani itatiiside ana, sugu slaꞌa kaawa gimba, slime ha firima ambee, Iliitleemu sliimaa wane haa ugu. Ugu ti naraꞌa qadoo sa hida pandaa da Iliitleemuge, haraagi khayda gimba gooina daqa dosii. 20 Ugu caacaahhamisi hida ilakaawa haa sariyaa da Iliitleemu. Kara, inay sigi laqante idoo doó ilii ibiidiye, haa yondu giraa hiiboo⁄iri yondu. 21 Teesaaqay kilesiiba, ugu leehhii hida gu koomee waaway, goó gwaa⁄ee Iliitleemu, goó gimbuusee gimba gu lou, haa hida gu wakee slawaraa idadu hari amamu gu ilamuree. Inay leehhakii ma hida gu deni tleehhidiri gu wariiqadidee raqoo gu hida elefafaa, mibeeri mibi, mibeeri kooani haa mibi. 22 Balalu sliimaa, hida hhakee na kereꞌemisiyay gimba gu hida. Gimbakaꞌa gu denu giyaa leehhimisiye daqa dooguu, hikee gu digidaku mayku, magu kereꞌemisiri inay kilakoina. Hari amotee hiidahhasiyay hiislahhaslahheesa yondu googuu, sa gimba yondiidiyay sliimaa haa ugu. 23 Bere teesaaqay laqada, haa bere Iliitleemu gwaa teesaaqay ilakaay ugu, hiidahhasida hiikaasa yondukee. Kara, hida hhakee goõ ki⁄iyay ayeemaa koinay hari qasaw.”
24 Musaa gi akhasi gimba gu kumbaꞌa gosi haa gi yondiidi gimba goõ, idoo sugwaa ilii kaay gooay. 25 Musaa gii leehhi hida gu koomee waaway tla⁄aã gu Waisraeeligo. Ina gigi hida gu deni tleehhidisi tla⁄aã gu raqoo gu hida elefafaa, miyaa leẽ, mibeeri koakoani haa mibimibi. 26 Balalu sliimaa hida hhakee gi kereꞌemisiri gimba gu hida. Gimbakira gwaa karahhu, gugi leehhisiri daqa Musaage, haa gimbakira gu digidaku gugi kereꞌemisiri inay kilakoina.
27 Da hheꞌesi, Musaa higi aareesi kumbaꞌa gosi Yeetiro, Yeetiro tosaa ki⁄i hhapee dosii.