Waisraeeli oõ gu Sinaayige
19
1 Baloo da pandaa da slehheẽ gu tami, qariqaaqari Waisraeeli giyaa ilii waaudiri hhapee da Misirigo, nama baloteesii leẽ gi dayri kongoqomee da Sinaayige. 2 Qatlay giyaa iliiwaaudiri Refidiimugo, inay gii guniri kongoqomee da Sinaayige. Teꞌesii Waisraeeli gi tluhhusiri kambii iladifaa gu oõ gu Sinaayige.3 Da hheꞌesi, Musaa gi ilakhiinaaꞌadi rawaa gu onke, mangu slaslay haa Iliitleemu. Teꞌesaa rawaa gu onko Taataa Iliitleemu gugi eteedi Musaa, gi kaay tuba, “Taqay ganoo ilii gimbuusida haa laqwaloo da Yakoobo, hhaã Waisraeeli tuba, 4 ‘Unkuray haã antiri idoo gaa yondiidi daqa Wamisirige, haa idoo hangwaa ilii geregedi tambayicira⁄a gooay, idoó giyoó ilii geregete yaꞌay kosi hhababeege, hanguragi khay daqa dooii. 5 Inkoo, bere hani itatiisiday ana haa gi iliikontay ila⁄imbidu goy, hida koi tleehhitay gaa hiileehhi tla⁄aã gu hhapapu gongo, sa gimba khooroti goõ ti toyi, 6 kara, unkuray daqa dooi ti tawaaloo da hhapalooee tleehhitay haa hida gu hhapee daa tlintiꞌisi sa Iliitleemu.’ Hikee na gimba ga kaade sa Waisraeeli.”
7 Musaa yaagii ⁄eeti onko, gi eteedi daqa lenge gaduũ gu Israeeli haa gi kaay sa inay gimba sliimaa Taataa Iliitleemu giyaa ilafahhi ina. 8 Hida goõ gi ilaki⁄isiri sliimaa tuba, “Yondiidana gimba goõ, idoo sindii ilii kaay gooay ha Taataa Iliitleemu.” Teesaaqay, Musaa hirigi day daqa Taataa Iliitleemuge gimba daa kaay hida.
9 Taataa Iliitleemu gi kaay sa Musaa tuba, “Yuꞌudiyaa, ana haa khaw hari amoo da tlongiya da hiilooi, Waisraeeli mani akhasiri ana, qatlay ga ilii cocoe haa ugu. Teꞌesii, magu ⁄imbiri ugu balalu sliimaa.”
Da hheꞌesi, Musaa gi kaay sa Taataa Iliitleemu, idoo hida giyaa iliikaayri. 10 Taataa Iliitleemu gi kaay sa Musaa tuba, “⁄eetii daqa hida hhankii, ligi ilabuuslida letuti haa heetlaalee. Slime, sigi kaadee ma fuliiliniri qayroo koina. 11 Hingi ilakhuukhuꞌusiyee sa baloo da tami, sa gimba baloteesii, ana Taataa Iliitleemu hamaa hii⁄eeta oõ gu Sinaayigo, pandaa da hida gonge. 12 Kara, ugu laqaasida digimi sa hida hhakee, niini⁄ida da oõ goõ, lasigi kaada ubee, ‘Hangu ga⁄aydee naraꞌa! Hoo hhanti ilakhiinaaꞌatay oõ ma nangusa see digimi kosi. Gu lou, heedi goo nangusa okee, dugu gaasi. 13 Daba gu heedi lensee hhanti nangusi heedikee baku kuꞌunaanimoo gu tlo⁄osa digimaa. Teesaaqay, bere gimati heedi baku kuꞌunaanimoo kwanda dugu cakhadine hari tle⁄eẽ baku hari fayee, ti amoolaa gwaai.’ Teꞌesii, qatlay paranda dugumaa iliifahhiye hiifiifisa see hhaka, hida goõ gumaa asu ilii satiyay onkee.”
14 Musaa yaagii ⁄eeti onko, gi ilii hadakay hida, gigi ilabuusli, haa gi fuliiliniri qayroo koina. 15 Da hheꞌesi, ina gi kaay sa hida tuba, “Hangu ilakhuukhuꞌusidee sa baloo da tami. Hhawata lensee hhanti iliisati hadee.”
16 Inkoo, baloo da tamige hari heetlawaa, daagii ca⁄i tiiriꞌisinoo, gwaasla⁄aa haa tlongiya da hiilooi rawaa gu onke. Kara, afoo da didiri da paranda dagagi akhasi, hida goõ gwaa kambiige waaree yaati amoolaa dakhadakhiri. 17 Musaa hirigi giyaadi hida hhakee kambiigo, gi waaudiri mangu slaslaw kayri haa Iliitleemu. Inay giyaa ilii dayri iladifaa gu onke, gi qadimidiri teꞌesii. 18 Oõ gu Sinaay dugugi ilaslaabi ha eehha, sa gimba Taataa Iliitleemu yaatii ⁄eeti rawaa kosii aslaa pahha. Eehha gu aslatee gi cindarooisi rawaage ubee, eehha gu tanuuri da didiri pahha daganii da⁄i. Kara, okee goõ yaati amoolaa rinqirinqidi hari ⁄uuru. 19 Teꞌesii, afoo da paranda gi ilakonti hiiroogida hari khisla, Musaa gi gimbuusi haa Iliitleemu. Iliitleemu gugi ilaki⁄isi ina hari afoo da tiiriꞌisinoo pahha.
20 Taataa Iliitleemu yaagii ⁄eeti rawaa gu oõ gu Sinaayige. Teꞌesii, ina gi eteedi Musaa cina da onke. Musaa gi ilakhiinaaꞌadi rawaa gu okeesii. 21 Teꞌesii, Taataa Iliitleemu gi kaay sa Musaa tuba, “Ugu taa⁄a ⁄eetii, ilii⁄oo⁄ii hida, yaa hhanti tlo⁄osiyay digimi, yaagi khayay sa arimaa ana. Bere yoo teesaaqay laqiyay, hida wa⁄a kaka⁄iyay. 22 Hhapalooee see, hini hhanti iliisatida, hingiti gesaa ilabuusliyee. Bere teesaaqay gooba, ana Taataa Iliitleemu hagi ⁄agitima inay.”
23 Musaa gi kaay sa Taataa Iliitleemu tuba, “Hida hhanki hiidahhasiyaaiiba ilakhiinaaꞌada oõ gu Sinaay, sa gimba ugu handaa ilii⁄oo⁄odi gi kaadi tuba, ‘Qaasa digimi niini⁄ida da oõ goõ haa Daqa daa Tlintiꞌisi tleehhidiye.’ ” 24 Teꞌesii, Taataa Iliitleemu gi kaay sa Musaa tuba, “Ugu ⁄eetii, laakhayda tiꞌii sliimaa haa Haruuni. Hhapalooee haa hida wakinay hagiyaa hhanti hiigeemayda, maa khayri daqa dooii. Bere yoo teesaaqay laqiyay hagi ⁄agitima.”
25 Teesaaqay, Musaa gii ⁄eeti daqa hida hhakeesii, haa gi kaay sa inay gimbakira goõ daani kaay ha Taataa Iliitleemu.