Hiislaslaw gu Sariyaa
Ilakaawa da waaudimoo oõ gu Horeebugo
1
1 Hiĩ na gimba, Musaa giyaa kaay sa Waisraeeli goõ kongoqomeege hari bara da ilacindoo gu rawaa gu duudu gu Yoridaani, da waara daqa wakay doó eteedine Araaba. Kongoqometee ya ilaciyaage wanta haa Suufu tla⁄antla gu yaamu gu Paraani haa Tofeeli, Labaani, Haserooti haa Disahaabu. 2 Inkoo, teꞌesaa oõ gu Horeebugoa ti khocu gu balalu mibi haa leẽ hhaahhiya da Kadeesi-Barineeya naqatloo, bere hiicati hari amoo da omeeri gu Seyiiri.3 Teesaaqay see, yaati baloo da pandaa da slehheẽ gu mibi haa leẽ, kori gu mibeeri cigahha naqatloo, qariqaaqari Waisraeeli giyaa ilii waaudiri Misirigo, Musaa gi kaay gimba sliimaa daa ilafahhi ha Taataa Iliitleemu, magu kaay sa inay. 4 Gimbaki yaa teesaaqay hiica⁄i, qariqaaqari Taataa Iliitleemu giyaa ilii kaba⁄i mutemi Sihooni gu Waamoori, gwaa tawaalimu yaamu gu Hesiboonigo. Slime, ina yaa kaba⁄i mutemi Oogu gu hhapee da Basaani, hiĩ gwaa tawaalimu yaamu gu Asitarootigo haa yaamu gu Edireeygo.
5 Qatlay giraa ilii taysi wanee hari bara da ilacindoo gu rawaa gu tlo⁄osaa gu duudu gu Yoridaani hhapee da Moaabuge, Musaa gi tlaatleesi ilakeesa sa hida ilakaawa haa caacaahhamisukee gu Iliitleemu gi kaay tuba,
6 “Waisraeeli, Taataa Iliitleemu, Iliitleemu goori, sindaa kaay gaa ilii tluhhusani kambii yade oõ gu Horeebuge tuba,
‘Tiꞌii haã ibitiri hari khisla okii. 7 Inkoo, unkuray ilacata kambii googuna, ilakooma haa hhiyuuma dooguna, yade khuꞌusa hhapee da kooma omeeri da Waamoori. Unkuray la hadakayday hhapeteesii daqa hida goõ goó ibiidee daqeemoo gu hhapapu gu ilaciyaa waaree haa kongoqomee da Araaba, omeerige, hiihuuꞌumage, taysi Negeebuge haa hhapapu gu kengeemoo. Gu lou, unkuray la hadakayday hhapee da Wakanaani haa hhapee da Lebanooni naqatloo, gi daaday duudu gu didiru naqatloo gu Efuraati. 8 Yuꞌudiyaa! Ana hhapeti goõ sanguũ hadisi unkuray. Inkoo, iliitlaꞌaw ⁄utlaw hhapetee, haã ana Taataa Iliitleemu gaa hiifadidi hadisaraa sa ayiĩ kokuna, Aburahaamu, Isaaka haa Yakoobo sliimaa haa laqwaloo dooina.’ ”
Hiilehhidu gu giyaadimiisee
9 Slime Musaa gi kaay sa hida tuba, “Qatlaykira gaa ilii kahhane oõ gu Sinaayge, sangwaa kaay ambee, ‘Yondu guri giyaadaraa unkuray gutii loou hari khisla daqa dooii, malee hidahhasa ana lenkooi. 10 Taataa Iliitleemu, Iliitleemu googuna, hingii roogisi faadoo dooguna. Yuꞌudaa! Letuti unkuray hanti hacidiri wa⁄a tica⁄eerii pahha rawge. 11 Taataa Iliitleemu, Iliitleemu gu ayiĩ kokuna hiiroogisiye waa elefu, hangugi ⁄aafi giyaa iliifadidi gooay. 12 Inkoo, ana lenkoy malee hiidahhasa geregeda gimbadiira dooguna da hiilooi haa naanaqamoo googuna? 13 Unkuray leehhaw hida gu koomee waaway, caahhamuu haa doó muriidiye daqa kabiraa doogunaa, ana hagi giyaadimiisee dooguna tleehhidisa.’
14 Unkuray haa ⁄imbidiri, hanigi ilaki⁄isidiri tuba, ‘Gimba gaã kaadi guti lou dandiray yondiidana naraꞌa.’
15 Teesaaqay, harigi waaudi giyaadimiisetira da kooma waaway haa doó muriidiye, ana hagigii leehhi daqa kabiraa doogunaa goõ, ma koniri hiidahhasa giyaadimiisee da deni pahha, doó wariiqadimida raqoo gu hida elefafaa, miyaa leẽ, mibeeri koakoani haa mibimibi. 16 Qatlaykira, ana haa ilakaay ilabuꞌumiisee dooguna, sigigi kaay ambee, ‘Itatiimisa naanaqamoo tla⁄aã gu hida kokunay. Unkuray gi kereꞌemisiday gimba hari amoo da haaki, gimbakee gimati tla⁄aã gu hhia googunay Israeelimoo haa Israeelimoo wana baku tla⁄aã gu Israeelimoo haa heedi gu yaamulooay gooba goó ibiida sliimaa haa unkuray. 17 Unkuray hhanti lanqatay hiilehhidu, daqa heedi lenge see kereꞌemisu gu gimbage. Hida goõ itatiisakini naraꞌa, gu kwaeeli haa hindaqeeri see. Hhanti tlaꞌamutay heedi lenseei, sa gimba hukumuu guti Iliitleemu. Ana siniraa khaydee gimba gwaa karahhu hari khisla daqa doogunay, ana hagu itatiisa.’ ” 18 Qatlaykira ana sangwaa kaay unkuray gimba sliimaa ga yonditee.
Cangicangimiisee dagaa ya⁄abi
(Faadoo 13:1-33)
19 Da hheꞌesi, Taataa Iliitleemu, Iliitleemu goori gooay, idoo hindaa ilii ilafahhi, haati tlaatleesani hhiyuuma doori oõ gu Sinaayigo, haa gi yade khuꞌusani hhapee da kooma omeeri da Waamoori. Hhiyuuma doorii gii catani hari kongoqometira da didiri doó hiitlaꞌamuudisa, hatira gaa antiri unkuray, gi daani hhaahhiya da Kadeesi-Barineeyage. 20 Da hheꞌesi, ana sangwaa kaay unkuray ambee, “Haã daadiri hhapee da kooma omeeri da Waamoori, haã sandaa hadisi haa Taataa Iliitleemu, Iliitleemu goori. 21 Yuꞌudaa, Taataa Iliitleemu, Iliitleemu googuna sanguũ hadisi hhapeti. Aarimida! Guumaw, ⁄utlaw, ma hhapee dooguna tleehhiti, idoo sangwaa ilii kaay gooay ha Taataa Iliitleemu, Iliitleemu gu ayiĩ kokuna. Hhanti tlaꞌamutay ma simbariigwaaꞌa see.”
22 Da hheꞌesi, unkuray hanaagi iliikhaydiri ana haa gi kaadiri tuba, “Ya⁄abane hida wakinay ma giyaadiri, ma sandi cangicangimisu kayri hhapetee. Qatlay giyoo ilii ki⁄iyee, ma sandi kaayri amamu haloo garinii catana haa yaamu haloo gini slayna, ma daani taysi.”
23 Gimbaki gugi arimi guti hhou daqa dooii. Ana gii leehhi hida mibi haa cada, heedi leẽ daqa kila kabiraago. 24 Hida hhakee yaa hadakayri hhapeteesii da kooma omeeri, gi dayri hiihuuꞌuma gu Esikooli haa gigi kwaꞌadiri. 25 Qatlay giyaa ilii ki⁄iri sindiraagi khayri ⁄aamu waku hhapeteesaa. Slime sandigi kaayri tuba, “Hhapetee sandi hadiidimisiye ha Taataa Iliitleemu, Iliitleemu goori, dati hhoi hari khisla.”
Siaraa Taataa Iliitleemu
26 Teesaaqay see, unkuray haa siꞌidiri ilakaawa da Taataa Iliitleemu, Iliitleemu googuna, gi siꞌidiri hadakawa hhapeteesii. 27 Unkuray haati quru⁄udiri waꞌay gu hemamuu kokunay kakantay tuba, “Taataa Iliitleemu hindi waki na idoo ina sindaa hiica⁄asi hhapee da Misirigo. Ina hindaati slai hiilu⁄a dabaiĩ gu Waamoorige, ma hindi hhamisi dandiray. 28 Inkoo, ti naraꞌaa hadakawa taysi? Hida koti hiĩ ⁄isiniri muunaiĩ koti ma simbariigwaairi. Inay sindii kaayri tuba, ‘Hida gu yada guti deni hari khisla haa guti tledi ba⁄ay da dandiray. Kara, yaamu koina guti deni haa digaa hiikhangaꞌasi hari bi⁄eenaa gwaa dawee raw naqatloo.’b Slime hiĩ kaayri tuba, yade hiĩ ariniri laqwaloo da Waanaaki.”
29 Teesaaqay, ana gi kaay sa ayiĩ hhakee kokuna ambee, “Dangu hhanti tlaatlaꞌasi ma tlaꞌamuuda see hagi hhanti tlaꞌamutay inay! 30 Taataa Iliitleemu, Iliitleemu googuna goó giyaada sa unkuray, ina loi gwaatli sa unkuray, idoo gwaa ilii arintiri gooay ina giyaa ilii yondiidi sa unkuray hhapee da Misirige. 31 Slime, unkuray gaa ilii kongoqomeege wantee, haa antiri Taataa Iliitleemu, Iliitleemu googuna, idoo hangwaa ilii geregedi hhiyuumateesii, ubee taataa giyoó ilii geregediye daa⁄u gosi, amoo sliimaa haati amoolaa daadiri daqatii.”
32 Inkoo, gaamati kaay gimba goõ, unkuray hagwaa ⁄imbidiriiba Taataa Iliitleemu, Iliitleemu googuna, 33 hiĩ gwaa giyaadu sa unkuray hhiyuuma doogunay. Hari amasi ina sangwaati giyaamaamidi pandaage hari aslaa, haa hari tleemaa sangwaati giyaamaamidi hari tlongiya, ma sangu laqami amoo ga kaydee haa sanguma dabiidi daqa ga ilii tluhhusidee kambii.
Taataa Iliitleemu ⁄agitiru gu Waisraeeli
(Faadoo 14:20-45)
34 Qatlay Taataa Iliitleemu giyaa ilii akhasi quru⁄umoo googuna, gi slahhaai hari khisla, gi seelimi, gi kaay tuba, 35 “Gu lou, hhaku heedi lensee laqwalotii da tlakwi gu arimaa hhapetee da hhoi gaa hiifadidi haysaraa sa ayiĩ kokuna, 36 Kaleebu nanku Yefuune, ina kilesi naga arina. Ana sugu hadisa ina haa yaꞌay kosi hhapetee gingii kala⁄i hari yeꞌeeroo kosi, ma tosi tleehhiti, sa gimba hari muuna gosi hinoó sirakomamidi ana.”
37 Taataa Iliitleemu, yaa slahhaai sa ana Musaa, sa gimba unkuray gwaa akhasidiriiba ina, gi kaay tuba, “Ugu see Musaa hiiguntaaba hhapeteesii. 38 Teesaaqay see, iliiaymiisay googu, Yosuuwa nanku Nuuni, hiiguna. Muuna ⁄atlisakuu, sa gimba ina gi iliiay Waisraeeli, ma aaliniri hhapetee.” 39 Da hheꞌesi, Taataa Iliitleemu gi kaay sa unkuray tuba, “Yaꞌay hhakiray kokuna gu digidakwi gaa kaadiri tuba, digii ⁄utli, hhaã gu kahhee caahha gimba gu hhou haa gu tlaku, hiigunay hhapeteesii. Ana sigi hadisa inay hhapetee, magii ⁄utliri. 40 Inkoo, unkuray fookidaw (tiaa Kadeesi-Barineeyago) haa ki⁄a kongoqomeege hari amoo da tlawa da didiri da Saamu.”
41 Da hheꞌesi, hanigi ilaki⁄isidiri ana tuba, “Haã yondiidani tlakwaroo pandaa da Taataa Iliitleemuge. Inkoo, qwatla kayna, Taataa Iliitleemu, Iliitleemu goori gooay hindaa ilafahhi dandiray.” Teesaaqay, kila heedi giioy khasima gosi sa qwatla gau, haa gi ilahudeesidiri unkuray beelaa ti slahharuũ hiiguuma hhapeteesii da omeeri.
42 Inkoo, Taataa Iliitleemu sinigi kaay tuba, “Sigi kaade inay ubee, hhanti qwatla kayay, sa gimba ana sliimaa waaraaba haa inay. Hhanti hadakayay, digoo ba⁄atii kaba⁄i ha fa⁄ayaa dooina.”
43 Ana sangwaa teesaaqay kaay, unkuray hanaa akhasidiriiba. Unkuray haa siꞌidiri ilakaawa da Taataa Iliitleemu, darabimaa kokunay gii guntiri hhapeteesii da omeerige. 44 Teꞌesii, Waamoori gwaa ibimaamidee omeeri hhakeesii, yaagii gweegwe⁄ediri yaamu koinaa, mangu slaslayri haa unkuray Waisraeeli, gi gusiniri unkuray, ubee danguuti gusimi pahha ha raqa da baꞌara, tay dangu tooinaa difi amoo sliimaa teꞌesaa hhapee da Seyiirigo, yaamu gu Horimaa naqatloo. 45 Unkuray haa ki⁄idiri haa gi ⁄aa⁄adiri pandaa da Taataa Iliitleemuge, ina yaa siꞌi itatiisa ⁄aa⁄imu googuna, ma iliiqaasa see dangwaa ilii qaasiiba. 46 Teesaaqay, unkuray haa ibitiri Kadeesige balalu wa⁄a, qatlaykee sliimaa gu koraraa mibeeri tami haa gweleti gaa ibitiri taysi.