Niini⁄imidu kongoqomeege
2
1 Musaa gi kaay sa Waisraeeli tuba, “Da hheꞌesi gii fookidani alunge, gi hhiyuudani yade khuꞌusa kongoqomeege, hari amoo da tlawa da didiri da Saamu, idoo sinaa iliikaay gooay ha Taataa Iliitleemu. Qoomay gu koraraa mibeeri tami haa gweleti, hagi niini⁄imidani oõ gu Seyiirige.2 Da hheꞌesi, Taataa Iliitleemu sinigi kaay ana tuba, 3 ‘Haã niini⁄imitiri hari khisla hhapetii da kooma oõ. Inkoo, fookidaw la hhiyutay bara da goraage. 4 Musaa, hadisi ilakaawati sa hida, sigi kaade ubee, “Haã daadaausidiri hiicata hari tla⁄aã gu hhapee da Seyiiri. Hhapetee dati hhiee kokuna gu laqwaloo da Esaaw. Inay hangoo tlaꞌamuudiyay, teesaaqay see, hangu ga⁄aydee naraꞌa, 5 hagi hhantii lagusiday gi qwaatliday haa inay, sa gimba unkuray sangu hadisaaba daqa lensee da hhapee dooina. Ana sangu hadisaaba ma daqa day kala⁄a see yaaee. Hhapetee da omeeri gu Seyiiri hagaã hadisi sa laqwaloo da Esaaw, ma tooina tleehhiti. 6 Bere slaꞌaday ⁄agoo baku maꞌay daqa dooinay, kwanda ga kirigidee.
7 Inkoo, slawaw, idoo Taataa Iliitleemu, Iliitleemu googuna hangwaa ilii⁄aafi daqa kila idoo gaa yonditiri. Ina hangwaa omi gaa ilii niini⁄imitiri kongoqometeesii da didirige. Ina hiĩ sliimaa wana haa unkuray koraraa hhanki goõ gu mibeeri cigahha haa dangwaa afariislaꞌadiiba idoo lensee.” ’
8 Teesaaqay, dandiray haailakoni haa hhiyuuma doori, gii catani hari tluntlubaa da daqa daa ilii wane hhiee koti, laqwaloo da Esaaw gwaa ibimaamidee Seyiirige. Amotira da Araaba haa slime daa yaamu gu Elaati haa Esiyooni-Geeberi khuꞌusidi, hagagi mayni alunge. Da hheꞌesi, gii fookidani haa gii catani hari kongoqomee da Moaabu.
9 Da hheꞌesi, Taataa Iliitleemu sinigi kaay ana tuba, ‘Hhanti ilahufita hida gu Moaabu, ma gau see hhanti gauuꞌusiday haa inay, sa gimba sangu hadisaaba daqa lensee da hhapee dooina. Yaamu gu Aari hagiĩ hadisi sa laqwaloo da Looti, ma aalimee dooina tleehhiti.’
10 (Wakaꞌalee hhapetee da Aari, dagaati ilii ibimaamidi ha Waeemi, hida gwaa koomee ⁄uuru haa gwaa tledi Waanaaki pahha. 11 Hida hhanki Waeemi, idoo daa iliiwane gooay Waanaaki, slime digaati khui Warefaay pahha. Teesaaqay see, Wamoaabu giyaati eteediidina Waeemi. 12 Wakaꞌalee, slime Wahoori see yaa ibiidiri Seyiirige, teꞌesaa digigi gusimi haa digigi hhamisi ha laqwaloo da Esaaw. Da hheꞌesi, laqwalotee loi da Esaaw gi ibiti daqa teesii, Waisraeeli gooay, idoo giyaa ilii laqiri hhapee sigaa hadisige ha Taataa Iliitleemu, ma tooina tleehhiti.)
13 Slime, Musaa gi ilakoomi kaawaraa sa Waisraeeli tuba, ‘Inkoo, waauda la tlo⁄osiday hiihuuꞌuma gu Sereedi.’a Teesaaqay gi tlo⁄osani hiihuuꞌumakee.
14 Koraraa mibeeri tami haa dagati yaa hiicatiri, tlaatleesi baloo gaa iliiwaaudani Kadeesi-Barineeyago, gaa ilii tlo⁄osani naqatloo hiihuuꞌuma gu Sereedi. Qatlaykee laqwalotira goõ da hida hhakira gu koomee sagala gu koraraa gu gau kawa yaa hheꞌesiri yaa kaka⁄iri, idoo daa ilii seelimi gooay ha Taataa Iliitleemu. 15 Gu lou, daba gu Taataa Iliitleemu gi ilakoomi sagadadahhu, ina giyaati amoolaa hhamisi gonkoinaa, hhaku lensee gwaa meetu kambiige.
16 Inkoo, hida hhakee goõ gu koomee koraraa gu gau kawa, giyaa ilii kaka⁄iri, 17 Taataa Iliitleemu yaa kaay sa ana tuba, 18 ‘Letuti, unkuray kwanda ga hiicatidee hari yaamu gu Aari, haa gi tlo⁄osiday hhapee da Moaabu naqatloo. 19 Qatlay goo iliidaadee ilaciyaa da Waamooni, hagiyoo hhanti ilahufitay ma gau see hhanti gauuꞌusiday haa inay, sa gimba sangoo hadisaaba daqa lensee da hhapee da laqwalotee da Waamooni, ma tooguna tleehhiti. Hhapetee hagaã hadisi sa Waamooni, laqwaloo da Looti, ma aalimee dooina tleehhiti.’
20 (Hhapetee slime dagaati ilahudeesi tuba, yaati hhapee da Warefaay, gwaa ibimaamidee teꞌesii. Teesaaqay see, Waamooni giyaati eteediidinay inay Wasamsuumi. 21 Warefaay yaati hida gu koomee ⁄uuru haa yaati wa⁄a, hida gu deni haa gu tledi Waanaaki pahha. Taataa Iliitleemu gigi hhamisi pandaa da Waamoonigo, inay gi ibiidiri daqateesii tooinay. 22 Taataa Iliitleemu yaa teesaaqay laqi, giyaa iliilaqi gooay daqa laqwaloo da Esaawge doó eteedine Waedoomu, hhaã goo ibiidee hhapee da Seyiirige. Ina yaati hhamisi Wahoori, qatlay Waedoomu giyaa ilii dayri taysi, gi tooinaa afii⁄utliri hhapee dooina haa gi ibiidiri teꞌesii letuti naqatloo. 23 Nama idotee leẽ yaa hiica⁄adi daqa Waafigo gwaa ibimaamidee tongagu gwaa slaaburaa gu tlawa da didiri da Mediteraaniya waaree, haa bara da wayee gu Gaasage naqatloo. Wakafutoori gwaa hhapee da Kafutoorib dahhee, daa niini⁄idi ha tlawa da didiri, gi hhamisiri Waafi haa inay gi ibiidiri daqateesii tooinay.)
Waisraeeli kaba⁄araa da mutemi Sihooni
(Faadoo 21:21-30)
24 Qariqaaqari gaa iliicatani hhapee da Moaabu, Taataa Iliitleemu hindigi ilafahhi gi kaay sa dandiray tuba, ‘Naraꞌa! Unkuray waauda, la tlo⁄osiday hiihuuꞌuma gu Arinooni. Yuꞌudiyaa, ana hagungii lu⁄i dabaiĩ kokuu Sihooni, mutemi gu Waamoori goó tawaalima inay yaamu kosaa gu Hesiboonigo haa hhapee dosi goõ. Unkuray ilii tlaꞌakunay gauge haa gii ⁄utliday hhapee dosi. 25 Balotaa da letutigo, tlaatleesa hacisa tlaꞌamee haa gwaa⁄amee daqa hida goõ gu khooroti, ma tlaꞌamuudiri unkuray. Inay qatlay giyoo ilii akhasiyee gimba googuna, yooti dakhadakhiyay haa bahhangaruusiyay sa unkuray.’ ”
26 Musaa gi ilakoomi kaawaraa sa Waisraeeli tuba, “Kongoqomee da Kedemootigo, ana haa ya⁄abi ya⁄abimiisee daa kooma gimba gu qasaw daqa mutemi Sihoonige gu yaamu gu Hesibooni, ma sugu kaawa kayri tuba, 27 ‘Handi mayde, ma hiicatani hari hhapee doogu. Hati fucuqusana hari balabalaa da didiri, hiifookidanaaba bara da ⁄uyage ma bara da basage see. 28 Slime ⁄agoo haa maꞌay gu kitahhu hagiyoo daqa dooguu kirigana. Idoo ga slaꞌane, handi mayde kilesi, ma hiicatani hari hhapee doogu, 29 ma tlo⁄osani duudu gu Yoridaani haa gii guna hhapee sandaa hadisi haa Taataa Iliitleemu, Iliitleemu goori. Laqwaloo da Esaaw goó ibiidee hhapee da Seyiirige haa Wamoaabu goó ibiidee Aarige, hindaa hiigeemayri ma hiicatani hari hhapapu koina.’ ” 30 Teesaaqay see, Sihooni, mutemi gu Hesibooni, hindaa hiigeemayba, ma hiicatani hari hhapee dosi. Taataa Iliitleemu, Iliitleemu googuna, gugi ⁄isimi ina ma muuna haa saga karahhi, ina magu kaba⁄ani haa ma hiiowani hhapee dosi, hhaã gaa hiiowani gi toori tleehhiti.
31 Da hheꞌesi, Taataa Iliitleemu sinigi kaay sa ana tuba, “Yuꞌudiyaa, ana haã tlaatleesi hiilu⁄a mutemi Sihooni haa hhapee dosi dabaiĩ kokunay. Inkoo, unkuray tlaatleesa iliitlaꞌa hhapetee haa ⁄utlakanay tooguna tleehhite.”
32 Teꞌesii Sihooni haa sirikaarii dosi goõ yaagii ca⁄iri yaamu gu Hesiboonige, ma gauusiri haa dandiray ilaciyaa gu yaamu gu Yahaasa. 33 Taataa Iliitleemu, Iliitleemu goori gugi taatahhi mutemikee dabaiĩ kotii, dandiray gugi kaba⁄ani ina, yaꞌay kosi haa sirikaarii dosi goõ. 34 Qatlaykeesii gii ⁄utlani yaamu kosi goõ haa gi cu⁄ani sumuku hhawatee, tigay haa yaꞌay hukumuu gu Iliitleemuge. Haa meesaniiba ma heedi lensee. 35 Teesaaqay see, kuꞌunaanay haa idadu goõ gu kaari gaa hii⁄utlani yaamu hhakeesaa goõ gwaatii owani. 36 Tlaatleesi tongoo da Aroyeerigo da khansu gu hiihuuꞌuma gu yaamu gu Arinoonige waara, haa yade naqatloo hhapee da Gileyaadi, hhaki yaamu lensee gwaa qadidee naraꞌa, dandirigi slanqadi kaba⁄araa hii⁄utla. Taataa Iliitleemu, Iliitleemu goori giyaatii lu⁄i dabaiĩ kotii. 37 Teesaaqay see, dandiray haa daadaausaniiba hhapee da Waamoonige baku kenga gu duudu gu Yabookige ma yaamu gu hhapee da kooma omeeri, ma daqa lensee hataꞌa dandaa tlaatlahhasi ha Taataa Iliitleemu, Iliitleemu goori.