Waisraeeli kaba⁄araa da mutemi Oogu
(Faadoo 21:31-35)
3
1 Da hheꞌesi, Musaa gi kaay sa Waisraeeli tuba, “Qariqaaqari gaa ilii gaasani mutemi Sihooni, gii fookidani bara da goraage, gi oowani balabalaa da Basaani khuꞌusa. Mutemi Oogu gu hhapee da Basaani yaagii ca⁄i haa sirikaarii dosi goõ, ma qwaatli haa dandiray tongoo da Edireeyge. 2 Taataa Iliitleemu sinigi kaay tuba, ‘Mutemikee hagu hhanti tlaꞌamutay, sa gimba ina, sirikaarii dosi goõ haa hida gu hhapee dosi haginii lu⁄i dabaiĩ kokuu. Ugu ligi hhamisida inay, idoo gaa ilii sakhamuti gooay Sihooni mutemi gu Waamoori, gwaa tawaalimu yadaa yaamu gu Hesiboonigo.’ ”3 Teesaaqay, Taataa Iliitleemu, Iliitleemu goori, gugii lu⁄i dabaiĩ kotii mutemi Oogu gu hhapee da Basaani haa sirikaarii dosi goõ. Gonkoinaa gigi hhamisani, heedi lensee yaa meetiiba. 4 Qatlaykee haay ⁄utlani yaamu kosi goõ mibeeri lahhoꞌo gu hhapee da Arigoobu daa tawaaliiline ha ina, haa meesaniiba yaamu lensee. 5 Yaamu hhakee goõ digaati niini⁄idi ha bi⁄eenaa gu tledi gu koomee kaꞌafafee haa gompaai. Slime tongagu wa⁄a yaa wanay daaba niini⁄idisa hari bi⁄eenaa. 6 Dandiray giyaati hhamisani inay sumuku hukumuu gu Iliitleemuge, gi hhamisani kila yaamu, hhawatee, digay haa yaꞌay, idoo gaa ilii yondiidani gooay daqa yaamu goõ gu mutemi Sihooni, hiĩ gwaa tawaalimu yaamu gu Hesiboonigo. 7 Teesaaqay see, kuꞌunaanay goõ haa idadu goõ gu kaari gaa hii⁄utlani yaamu koinaago gi koori tleehhidiri.
8 Teesaaqay see, dandiray hagii ⁄utlani hhapetee daqa mutemi Sihoonigo haa Oogugo gu Waamoori, yaati tawaaliniri Waamooni hari tlo⁄osaa gu bara da ilacindoo gu rawaa gu duudu gu Yoridaani. Hhapee dooina yaati tafaꞌadi teꞌesaa bara da wayee gu hiihuuꞌuma gu Arinoonigo yade naqatloo oõ gu Herimooni guri bara da goraa waara, haa gii ⁄utlani hhapetee goõ. 9 (Okee gu Herimooni, Wasidooni goóti eteedinay na Siriyooni, haa Waamoori goóti eteedina na Seniiri.) 10 Dandiray haatii ⁄utlani yaamu goõ gwaa daqa daa paapaahhatige waaree, hhapee da Gileyaadi goõ haa hhapee da Basaani goõ, taysa naqatloo tongoo da Saleeka haa Edireey, yaamu doó tawaaline mutemi Oogu Basaanige. 11 (Mutemi Oogu kilesi gu Basaani naa meeti tla⁄aã gu Warefaayge. Buburua gosi daa boo⁄imisi hari sikhima, tlederuũ kosi ti fuuti mibi haa cigahha, haa hiitlakhwaruũ kosi yaa fuuti lahhoꞌo. Buburukee kahhi wana yaamu gu Raabage doó ilii ibiidiye Waamooni.)
Deehhoo da hhapee
(Faadoo 32:1-42)
12 Hhapee goõ gaa hii⁄utlani hagagi hadisani sa kabiraa haa kabiraa. Kabiraa da Rubeeni haa Gaadi sigigi hadisi teꞌesaa tlaatleesi bara dari goraa gu Aroyeeri waara ilaciyaa haa hiihuuꞌuma gu Arinooni, haa nusuu gu daqa da omeeri gu Gileyaadi naqatloo, sliimaa haa yaamu kosi. 13 Da hheꞌesi, nusuu gu kabiraa da Manaase, sagagi hadisi daqa daa meti da hhapee da Gileyaadi sliimaa haa hhapee da Basaani goõ, daa tawaaliiline ha Oogu. (Hhapee goõ da Arigoobu, yaꞌaani Basaani goõ, dagaati eteediidina na hhapee da Warefaay. 14 Yayiiri, heedi gu kabiraa da Manaase, yaatii oy hhapee goõ da Arigoobu, daa eteediidine Basaani, hhapetee yaatii qonti digimi gu Wagesuuri haa Wamaaka naqatloo. Tongagu gu hhapetee digaati uꞌumi uma gosi. Letuti naqatloo Basaani dagoóti eteedina Hawaasi-Yayiiri.) 15 Ana gi hadisi hhapee da Gileyaadi sa laqwaloo da Makiiri da kabiraa da Manaase. 16 Teesaaqay, ana hagi hadisi sa kabiraa da Rubeeni haa Gaadi daqa daa tlaatleesidi Gileyaadigo duudu gu Arinooni naqatloo, digimaa gooina gu wayee yaa tla⁄aã gu duuduge wana. Slime digimaa gu goraa yaati duudu gu Yabooki, hiĩ naa digimaa gu hhapee da Waamooni. 17 Hari bara da ilacindoo gu biraa hhapetee da kabiraa da Rubeeni, Gaadi haa Manaase da ilacindoo gu rawaa, yaatii qonti duudu gu Yoridaani naqatloo, tlaatleesi tlawa da Galilaayago hari bara da goraa, digimakee gii ⁄eeti tlawa da didiri da Araaba naqatloo (tlawa da didiri da cakhasaa), yaati fucuqusi hiigweegwe⁄emidu gu Pisigaa naqatloo guri bara da ilacindoo gu rawaa waaree.
18 Qatlaykee, ana sangwaa hadisi ilakaawati ambee, “Taataa Iliitleemu, Iliitleemu googuna, sanguũ hadisi hhapeti dari bara da ilacindoo gu rawaa gu duudu gu Yoridaani waara, ⁄utlakanay ma tooguna tleehhiti. Inkoo, unkuray gwaa ⁄atlaa⁄atlee gu tla⁄aã gu hida kokunay waaree, owaw khasima la tlo⁄osiday hari bara da cadii da duudu gu Yoridaani, tay pandaa da hida kokunay wantay Waisraeeli. 19 Teesaaqay see, tigay kokuna, yaꞌay kokuna haa kuꞌunaanay googuna (khua kontay kuꞌunaanay wa⁄a), meetiyee yaamu sanguũ hadisige unkuray. 20 Unkuray kwanda ga iliiaydee hhiee kokuna Waisraeeli, qatlaykaꞌa naqatloo Taataa Iliitleemu gimaa ilii hadisiye kaba⁄amuu sa danaee kokuna Waisraeeli, giyaa ilii yondiidi gooay sa unkuray, haa gii ⁄utliyay hhapetee Taataa Iliitleemu, Iliitleemu googuna gi hadiidimisiye sa inay dari bara da ilacindoo gu biraa gu duudu gu Yoridaani waara. Da hheꞌesi, ginoo ilii dahhasiyay ibinaa teꞌesii hari qasaw. Qariqaaqari, unkuray kabiraa goõ ganoo asu ilii ki⁄iday hhapee doogunay sangwaa hadisi, ma tooguna tleehhiti.”
21 Nama qatlaykeesii leẽ, slime ana gi ilafahhi Yosuuwa, sugugi kaay ambee, “Ugu haã arinti hari ilaa koku gimba goõ, Taataa Iliitleemu, Iliitleemu googuna, idoo hanguu iliiay hhamisaraa mutemi Sihooni haa mutemi Oogu. Nama teesaaqay leẽ, ina hangu iliiay, ma iliitlaꞌadiri hhapapu goõ garii catidee unkuray. 22 Unkuray hagi hhanti tlaꞌamutay inay, Taataa Iliitleemu, Iliitleemu googuna, ina loi na qwaatli sa unkuray.”
Musaa dugwaa tlaatlahhasi tlo⁄osa Yoridaani
23 Qatlaykeesii, ana haa tlaatlaqasi Taataa Iliitleemu gi kaay tuba, 24 “Ye Taataa Iliitleemu, Looimoo gu Goõ, ugu sininti tlaatleesidi kilesi laqaru ana yondimiisay googu hiidahhasa doogu haa ⁄uuru googu. Ti iliitleemu mala gu rawaa gu rawge waara baku gu khoorotii waara gu hiidahhasa yondiida yondu gu didiru haa yondu gu bakaꞌasa hiĩ gooay goó yondite ugu? 25 Ana haguũ firimi, may na tlo⁄osi, ma arimaa kay hhapetee da hhoi, dari bara da cadii waara, hari ilacindoo gu biraa gu duudu gu Yoridaani, hhapetee da hhoi da kooma tioo, sliimaa haa omeeri gu Lebanooni.” 26 Inkoo, Taataa Iliitleemu yaa slahhaai sa ana, Musaa, sa gimba googuna unkuray, hinigi siꞌi akhasa ana. Ina sinigi kaay tuba, “Diĩ buꞌudi! Sini hhanti kara kaada gimbaki. 27 Ugu ilakhiinaaꞌadi cina da oõ gu Pisigaa naqatloo, yuꞌudi naraꞌa bara da ilacindoo gu biraage, goraage, wayeege haa ilacindoo gu rawaage. Yuꞌudi hhapetee naraꞌa, sa gimba tlo⁄osidaaba duudukee gu Yoridaani. 28 Ugu ya⁄abi Yosuuwa, muuna ⁄atlisakuu haa sugu qayde ⁄uuru, sa gimba ti Yosuuwa nari giyaadi hida gu Israeeli, ma tlo⁄osiri duudu gu Yoridaani. Ina na sigi hadisi hhapetee ga ante, ibiidiyee teꞌesii.” 29 Teesaaqay, dandiray gi ibiidani hiihuuꞌuma gu duudu gu Yoridaanige gwaa pandaa gu yaamu gu Beeti-Peyoorige waara.