Ilakaawa da akhamisu sariyaa da Iliitleemu
4
1 Musaa gi ilakoomi kaawa tuba, “Inkoo, ye hida koi Waisraeeli, akhamisa ilakaawa goõ haa sariyaa goõ ga caacaahhamise unkuray. Sirakooma, unkuray ma slaydiri ibinaa haa ma hiiguntiri gi hii⁄utliday hhapee sangu hadisiye ha Taataa Iliitleemu, Iliitleemu gu ayiĩ kokuna. 2 Ana sangu kaawa unkuray ilakaawa goõ da Taataa Iliitleemu, Iliitleemu googuna, maga ilakontiri, hhantii roogisiday gimba lensee baku hiideehha see hhantii deehhiday.3 Unkuray haã antiri hari ilaa kokuna loi, idoo Taataa Iliitleemu giĩ yondiidi yade Baali oõ gu Peyoorige. Taataa Iliitleemu, Iliitleemu googuna yaa hhamisi hida goõ tla⁄aã googunay, hhaã gwaa firiirimee Baali oõ gu Peyoorige. 4 Inkoo, unkuray gwaa meetee ⁄imbaraa da Taataa Iliitleemuge, Iliitleemu googuna, wantay gonkokunaa slafiday letuti naqatloo.
5 Yuꞌudaa, ana hanguũ caacaahhamisi ilakaawa goõ da haaki haa sariyaa goõ, Taataa Iliitleemu, Iliitleemu goy gooay, idoo hinaa ilii ilafahhi ana, unkuray maga sirakontiri hhapeteesii ga ilii guuma kaydee, gaga hii⁄utliday. 6 Unkuray khuꞌuma naraꞌa la yonditay, idoo da iliislaiye gooay ilakaawatee goõ haa sariyatee. Bere teesaaqay laqaday, gani iliilaqantay waaway haa caahhamuu googuna daqa hida gu hhapapu wakinay, gimaa ilii caahhiyee ilakaawatee goõ, inay himaa kaayay tuba, ‘Gu lou, hida gu hhapeti da didiri konay waaway haa caahhamuu hari khisla.’ 7 Guti lou, hhaka hhapee lensee waka gimati dama malee didiri baku damati coko⁄i see, haã Iliitleemu gosi gu ilaciyaage waara haa ina. Taataa Iliitleemu, Iliitleemu goori gooay gi ilii ilaciyaage wana haa dandiray, qatlay goó ilii firine hindoóti cira iliiay dandiray. 8 Gu lou, hhaka hhapee lensee waka gimati dama malee didiri see, da kooma ilakaawa goõ haa sariyaa goõ, da haã gooay hangu caacaahhamise letuti.
9 Inkoo, unkuray hangu khuꞌunte haa hangu ga⁄aydee hari khisla, danguma may afahhama gimbakira gaa antiri hari ilaa kokuna loi daqa Iliitleemuge. Letu lensee, damaa hhantii ca⁄i ibinaa doogunay gimbakee dangugi afahhana muunaiĩ kokunay. Gimbakee kaawa sa yaꞌay kokuna haa okookoiĩ kokuna. 10 Slawaw, baloo gaa ilii qaditiri iladifaa gu oõ gu Horeebuge pandaa da Taataa Iliitleemuge, Iliitleemu googuna. Ina giyaa iliikaay sa ana tuba, ‘Musaa, siniĩ kurunkuride hida gu Israeeli, mayaa khayri pandaa dooi. Ana ma kakaami ilakaawatira toy da mibi, mangu caacaahhamisiri gwaa⁄amee haa akhamisu ana balalu sliimaa ibinaa dooinay. Slime, inay see ma caacaahhamisiri yaꞌay koina, hinima muriidiri haa akhamisiri ana.’
11 Unkuray haa hiisatidiri ilaciyaage haa gi qadimitiri iladifaa gu okiray, qatlay giyaa ilii ooyiiyine aslaa cufeeri kosi gi dayri rawaa gu raw naqatloo, tay ⁄oona dii looi hinti ilaslaabidi haa tlogiya dii looi. 12 Da hheꞌesi, Taataa Iliitleemu yaa gimbuusi haa unkuray tla⁄aã gu aslateesaa. Unkuray haa akhasidiri afoo da gimba gosi. Teesaaqay see, ina loi gwaa antiriiba, afoo dosi kilesi ganaati akhasidiri. 13 Ina sangugi kakaami ila⁄imbidu gosi sa unkuray, hangugi ilafahhi tuba, oowa ila⁄imbidukee, kwanda ga akhamisidee ilakaawatira da mibi, giyaa handikimi rawaa gu khongoroꞌosay cadage gu tle⁄eẽ. 14 Nama qatlaykeesii leẽ, Taataa Iliitleemu, hinaa ilafahhi mangu caacaahhamisi ilakaawa goõ haa sariyaa goõ, ga yonditee hhapeteesii ga hii⁄utla kaydee hari tlo⁄osaa guri ilacindoo gu biraa gu duudu gu Yoridaani.”
Firiiriru gu sanaamuu dugwaa tlaatlahhasi
15 Musaa gi kaay sa Waisraeeli tuba, “Inkoo, hangu ga⁄aydee naraꞌa! Unkuray dangu hhanti afahhana tuba, balotira Taataa Iliitleemu giyaa ilii gimbuusi haa unkuray tla⁄aã gu aslaago yade oõ gu Horeebuge, gwaa antiriiba ina. 16 Ana hati kakaakama taqay mangu hhanti slasla⁄eesidiri unkuray kilakokuna hari amoo da boo⁄imisu sanaamuu gu khafinay da idoo lensee slanqasa, gini da hhawata goo baku da hadee, 17 baku da kuꞌunaanimoo haa makimoo lensee slanqasa baku cira⁄oo goó tlatlawee rawge, 18 baku da khulukhumbay goó hhumbaadee haa samaakii. 19 Kara, qatlay ga ilii yuꞌute rawaa gu rawge haa gi anta letu, slehheẽ haa tica⁄eerii, yaꞌaani idadu goõ gu waaree rawaa gu rawge, muunaiĩ kokuna digi hhantii dafidi gi keebeeꞌemitay hhapeege haa gi firiirintay idadu hhakee. Taataa Iliitleemu, Iliitleemu googuna idadu hhakee giyaati tleehhi sa hida hhapapu goõ. 20 Inkoo, unkuray na hida daa ilabuꞌumi ha Taataa Iliitleemu hhapee da Misirigo. Teꞌesii, unkuray haa kontay labaꞌasu gu dihhu, ubee hida hhakaꞌa gu tanuuri da hiicooboꞌosa pahha sikhima. Dangwaatii ca⁄asi ma hida kosi loi tleehhitiri balalu sliimaa, haa gani ilii wantay letuti naqatloo.
21 Gimati teesaaqay see, Taataa Iliitleemu, sinaa slahhaai ana, sa gimba googuna. Ina gi seelimi tuba, ana tlo⁄osaaba duudu gu Yoridaani, hagii guuma hhapeteesii da hhoi, haã sangu hadiidimisiye ha Taataa Iliitleemu, Iliitleemu googuna, ma tooguna tleehhiti. 22 Ana hati gwaaꞌa hhapetii, tlo⁄osaaba duudukee gu Yoridaani. Unkuray ilaciyaage wantay, tlo⁄osa da duudukee haa gii ⁄utla kayday hhapetee da hhoi. 23 Unkuray hangu ga⁄aydee hari khisla, dangu hhanti afahhana ila⁄imbidu gu Taataa Iliitleemu, Iliitleemu googuna giyaa qaasi haa unkuray. Hhanti boo⁄imisiday sanaamuu gu khafinay da idoo lensee slanqasa, dangwaa ilii tlaatlahhasi gooay ha ina. 24 Hhanti teesaaqay laqaday, Taataa Iliitleemu, Iliitleemu googuna ti aslaa da dihhi pahha doó hhamisa sumuku idadu sliimaa, ina ti Iliitleemu gu kooma tloomu.
25 Qariqaaqari, unkuray gamaa ilii ibitee hhapeteesii da Kanaanige balalu wa⁄a, haa gi slayday yaꞌay haa okookoiĩ, kara bere hangumaa slasla⁄eedeesiday haa gi boo⁄imisiday sanaamuu gu idoo lensee, bere hamaa yonditay tlakwaroo pandaa da Taataa Iliitleemuge, Iliitleemu googuna, haa gi ⁄isintay ma qupidi, 26 letuti ana hati eteeda raw haa hhapee, ma masaydii tleehhidiri daqa doogunay. Ana sangu kaawa ambee, gu lou ha hhantay cira hhapeteesii ga hii⁄utla kayde hari tlo⁄osaa gu duudu gu Yoridaani. Unkuray ibitaaiiba taysi koraraa wa⁄a, danguti hhamisi sumuku ha fa⁄ayaa dooguna. 27 Da hheꞌesi, Taataa Iliitleemu hangu pasidisi unkuray, gi ibinaa kayday tla⁄aã gu hhapapu wakinayge, ti hida coko⁄o kilesi na meetiyay tla⁄aã googunay taysi, daqateesii Taataa Iliitleemu gi iliigusine unkuray. 28 Unkuray taysi hati firiirintay iliitleemamee gu khai haa tle⁄eẽ daa boo⁄imisi ha hida, hhaã gooba hiidahhasa arimaa, akhamisu ma ⁄agoo baku cuuꞌuda. 29 Teesaaqay see, bere hhapapu hhakeesii hagu firiirintay Taataa Iliitleemu, Iliitleemu googuna hangwaa ilaki⁄isi unkuray. Hari amotee unkuray hagu slayday, bere haguti dabitay hari ilahudaa kokuna goõ haa hari slafimaa kokuna goõ. 30 Qatlay gamaa ilii maanage wantee, gimbakee himaa hiica⁄i balalu hhakeesii, hagumaa iliiki⁄iday Taataa Iliitleemu, Iliitleemu googuna haa gugi akhamisiday ina. 31 Taataa Iliitleemu, Iliitleemu googuna, ti Iliitleemu gu kooma ⁄awaariru. Inkoo, ina hangumaa mayaaba baku hangumaa hhamisiyaaba ma afahhama see dugumaa afahhanaaba, Ila⁄imbidu giyaa qaasi haa ayiĩ kokuna hari amoo da seeliru daqa dooinay.
Taataa Iliitleemu ti Iliitleemu
32 Inkoo, unkuray ilahudeesa gimba gwaa hiica⁄u balalu gu wakaꞌalee, dandaa ilii kahhiye laqwaloo, tlaatleesi balotiraa Iliitleemu giyaa ilii tleehhi heedi khoorotii. Maasa khooroo goõ, sooma lengo gu caduu naqatloo, daa hiica⁄ii gimba waku gu didiru da hiĩ gooay, baku wana gimba waku da hikee gooay daa akhasi? 33 Wanaaii hida wakinay gwaa akhasee afoo da Iliitleemu cocoꞌoda tla⁄aã gu aslaago, idoo gaa ilii akhasidiri gooay, gi meetiri slafiyay? 34 Wanaa Iliitleemu lensee gwaa koisu hadakawa gii oy hida kosi daqa hhapee wakaa, Taataa Iliitleemu, Iliitleemu googuna gooay giyaa ilii laqi sa unkuray? Ina yaati teesaaqay laqi, hari amoo da koimisu haa dari laqaru gimba gu bakaꞌasa, hari qwatla haa hari daba gosi gu kooma ⁄uuru, ina gi ⁄isimi gimba gu hiitlaꞌameedeesa, hiĩ gwaa antiri hari ilaa kokuna yade hhapee da Misirige. 35 Unkuray sangwaati laqami gimbaki, ma caahhadiri tuba, Taataa Iliitleemu na Iliitleemu gu lou kilesi, wanaaba waku see. 36 Ina yaa cocoi rawaa gu rawgo gi itatiisidiri afoo dosi, mangu caacaahhamisi unkuray, magu akhamisidiri. Kara, tiꞌii khoorotii gi ⁄isimi, ma antiri aslaa dosi da didiri haa gi akhasiday gimba gosi tla⁄aã gu aslateesaa. 37 Kara, sa gimba ina yaa slai ayiĩ kokuna, ina yaa hiileehhi laqwaloo dooina, ma hida kosi tleehhidiri. Ina loi nangwaa hiica⁄asi hhapee da Misirigo hari ⁄uuru gosi gu didiri, 38 ma gusimi pandaa doogunaa raqoo gu deni gu hida gu hhapapu haa gu koomee ⁄uuru ba⁄ay gu kooguna see. Ina hiraagi khay unkuray tiꞌii letuti, ma sangu hadisi hhapee dooina, ma aalimee dooguna tleehhiti. 39 Inkoo, letuti ⁄imba haa tiaatiaa slaslawuu muunaiĩ kokunay tuba, Taataa Iliitleemu, ina na Iliitleemu gu rawaa gu raw haa gu khooroti. Hhaku Iliitleemu waku. 40 Unkuray iliikoomaw ilakaawa dosi goõ, haã hanguũ ilafahhi unkuray letuti, haa teesaaqay danguni ilii pihhi ibinaa da hhoi, unkuray sliimaa haa laqwaloo dooguna. Slime, unkuray gi ibitay balalu wa⁄a hhapeteesii, sangu hadiidimisiye ha Taataa Iliitleemu, Iliitleemu googuna, maga hii⁄utlidiri gi tooguna tleehhita balalu sliimaa.”
Yaamu daa iliilakidi hida
41 Da hheꞌesi, Musaa gi tlintiꞌisi yaamu tami hari bara da ilacindoo gu rawaa gu duudu gu Yoridaani. 42 Yaamu hhakeesii, bere heedi hiĩ gaasi danaꞌa gosi taariru see guba, hiidahhasi lakidimoo haa gi ba⁄ana. Bere, hinti gaasi danaꞌa gosi goó ilaciyaa gosii ibiida, taariru see guba haa balalu gwaa hiicatee gwaa wakiyaaba ina, heedi da hikee gooay hiidahhasi lakidimoo leẽ gu yaamu hhakeesi haa gi ilabuꞌuna ibinaa dosi. 43 Yaamu hhakee daa tlintiꞌisi naa, Beseeri gwaa paapaahhasa da kongoqomeege waara sa kabiraa da Rubeeni: yaamu gu Ramooti gwaa hhapee da Gileyaadige waara sa kabiraa da Gaadi: yaamu gu Golaani gwaa hhapee da Basaanige waara sa kabiraa da Manaase.
Gimba guri giyaada gu sariyaa da cadii da Iliitleemu
44 Hiĩ na caacaahhamisu goõ daa qaasi ha Musaa pandaa da Waisraeelige, 45 yaꞌaani ilakaawa goõ haa sariyaa goõ giyaa kaay sa Waisraeeli giyaa iliica⁄iri Misirigo. 46 Qatlaykee inay haraati tlo⁄osaa guri bara da ilacindoo gu rawaa gu duudu gu Yoridaani wanay, hiihuuꞌuma gwaa pandaa da yaamu gu Beeti-Peyoorige waara, daa hhapee da mutemi Sihooni gu Waamoori, gwaa tawaaliilima yaamu gu Hesiboonigo. Musaa haa Waisraeeli gi iliitlairi mutemikee, giyaa iliica⁄iri Misirigo. 47 Waisraeeli gii ⁄utliri hhapee dosi haa hhapee da mutemi Oogu gu Basaani. Watemitee cada da Waamoori yaa tawaaliniri taysi hari bara da ilacindoo gu rawaa gu duudu gu Yoridaani. 48 Hhapeti yaatii qonti yadaa yaamu gu Aroyeerigo, khansu gu hiihuuꞌuma gu Arinooni, yade naqatloo oõ gu Siyooni, (hari uma waku Herimooni), 49 sliimaa haa daqa goõ da ilacindoo gu rawaa hari tlo⁄osaa gu duudu gu Yoridaani, yade naqatloo tlawa da didiri da Araaba, yaati fucuqusi iladifaa gu hiigweegwe⁄eda da oõ gu Pisigaa naqatloo.