Kori gu ilamooyiru iinanu
(Gimba gu Walaawi 25:1-7)
15
1 Musaa gi kaay sa hida gu Israeeli tuba, “Hiifaakoo gu kila kori gu fanquge kwanda ga ilamooyintee iinanu goõ ga kontee daqa hidage. 2 Taqay gani iliiyonditay. Kila heedi gu kooma iinaa daqa Israeelimoo danaꞌa gosii, ilamooyine iinatee, ma maasa see gi hhanti koisi maasa, sa gimba Taataa Iliitleemu loi, niĩ teesaaqay kaay. 3 Korikeesii ba⁄ay unkuray ti maamisa iinanu kokuna gu waaree daqa hhakaꞌay gu yaamulooee gooba. Teesaaqay see, kwanda ga ilamooyintee iinanu kokuna goõ gu daqa Waisraeeli danaee kokunay waara. 4 Teesaaqay see, kwaꞌalimoo maa wanaaba tla⁄aã googunay, sa gimba Taataa Iliitleemu, Iliitleemu googuna hangu ⁄aafi hari khisla hhapeteesii, sangu hadiidimisiye, balalu sliimaa ma aalimee dooguna tleehhiti. 5 Taataa Iliitleemu, Iliitleemu googuna, hangu ⁄aafi hari khisla, bere hati iliikontay naraꞌa ilakaawa dosi goõ, hanguũ ilafahhi unkuray letuti. 6 Taataa Iliitleemu, Iliitleemu googuna hangu ⁄aafi giyaa iliifadidi gooay. Unkuray hadimisiday peesay iinaa pahha sa hida gu hhapapu wakinay. Teesaaqay see, unkuray oodaaiiba peesay iinaa pahha daqa dooinaa. Slime, unkuray tawaalintay hhapapu wakinay, teꞌesii ma hhapee lensee tawaalintaaba unkuray.”7 Musaa gi ilakoomi kaawa tuba, “Bere wana kwaꞌalimoo tla⁄aã gu Waisraeeli danaee kokunay yaamu lenge see gu hhapetee sangu hadiidimisiye ha Taataa Iliitleemu, Iliitleemu googuna, hhanti kontay muunaiĩ gu hhitaa ma kondadaisa see dabaiĩ kokuna sa kwaꞌalimoo. 8 Unkuray kwanda ga tlaaꞌasidee dabaiĩ kokuna, haa sugugi hadisiday idoo gi slaiye iinaa pahha hari muunaiĩ kokuna. 9 Unkuray hangu ga⁄aydee hhanti ilahudeesiday gimba gu tlaku muunaiĩ kokunay gi kaaday tuba, ‘Inkootuutuu ti kori gu fanqu, kori gu ilamooyiru iinanu.’ Unkuray hhanti laqantay ilahudaa gu tlakwi daqa hhiee kokunay gu slaee idoo lensee daqa doogunay, hagi mayday hadisa idotee gi slaiyee inay. Inay hiidahhasiyay ilii⁄aa⁄imu Taataa Iliitleemu sa unkuray, haa gimbakee gi tlakwaroo tleehhidi daqa dosii. 10 Kwaꞌalimoo suguti hadisidee hari muuna gu cabuuma, quru⁄umoo see hhaku. Teesaaqay laqaraa, Taataa Iliitleemu, Iliitleemu googuna hangu ⁄aafi yondu googunay goõ, goó yonditee hari dabaiĩ kokuna. 11 Balalu sliimaa, kwaeeli yoó hhanaaiiba hhapee doogunaa. Inkoo, hangu slaꞌa ilafahha ambee, kwanda ga cabuumitee daqa Waisraeeli danaee kokunay gu kwaeeli.
Geemawaraa tongimoo
12 Bere, kirigida tongimoo baku tongitoꞌoo da Eburaanaisoo danaoo dooguna, yondiidi baku yondita sa ugu koraraa lahhoꞌo. Kori gu fanquge, tongimoo tleehhidiyaaba baku tongitoꞌoo tleehhitaaba, ina guti baku gati geemayda, gi waaudi baku gi waauta daqa doogwaa. 13 Qatlay gu iliigeemayde baku ga iliigeemayde ina, hagu baku haga hhanti geemayda gi waaudi baku gi waauta hari dabaiĩ kilesi. 14 Ina sugu hadisidee hari muuna gu cabuuma, idoo dangwaa ilii ⁄aafi unkuray ha Taataa Iliitleemu, Iliitleemu googuna, gini aaraa goo baku bee⁄u, gini baruũ goo gaa difidiri biiraago haa difaay gaa tinqintiri. 15 Slawaw tuba, unkuray see yaati tongee yade hhapee da Misirige, dangwaagi afiigweedi ha Taataa Iliitleemu, Iliitleemu googuna. Haã na idoo, sangu ilafahhaahhade letuti teesaaqay.
16 Teesaaqay see, bere tongimokee koku kaay tuba, ‘Ana waaudaaba,’ sa gimba ina gu slai ugu haa hida gu mara googu, haa ina kona ibinaa da hhoi haa ugu, 17 oyii laqawaa, la cihhida eea dosi laqawatee ti amoolaa kiisida bangasiya da afamaraage, ina ginoo asu ilii tongimoo googu tleehhidiye ibinaa dosii goõ. Nama teesaaqay leẽ laqe, daqa tongitoꞌoo dooguu.
18 Unkuray hhanti ilahudeesiday tuba, daati karahhi geemawaraa tongimoo googu, sa gimba ina hiĩ yondiidi sa ugu koraraa lahhoꞌo, yondu gosi guti kaaru waa cada da yondimiisay doó buiye. Teesaaqay laqa, Taataa Iliitleemu, Iliitleemu googuna hangu ⁄aafi yondu sliimaage ga yonditee.
Badiisasaa da kuꞌunaanay
19 Tlintiꞌisa sa Taataa Iliitleemu, Iliitleemu googuna badiisasaa da kuꞌunaanay googuna. Karamu gu badiisasaa hagiri hhanti yonditay, badiisasaa da bee⁄u hagi hhanti sikiday quubu gooina see. 20 Kila kori, ugu haa hida gu mara googu ⁄agintay fuꞌumay gu badiisasatee da kuꞌunaanay pandaa da Taataa Iliitleemuge, Iliitleemu googuna, daqateesii gimaa hiileehhiyege. 21 Teesaaqay see, bere karamu baku bee⁄u kona sletu, baku tlakwaroo lensee, etaa hagu hhanti hadisiday sadaaka daqa Taataa Iliitleemuge, Iliitleemu googuna. 22 Kuꞌunaanimoo da hikee gooay ba⁄ay ti ⁄agimakuna ayeemaa kokunay. Hida goõ, goóba slasla⁄iima haa hhaã gwaa slasla⁄uumidee, kuꞌunaanimokee gu hiidahhasiyay ⁄agoo, idoo giyoó ilii⁄aginee gooay damaau haa maneꞌeerii. 23 Teesaaqay see, etaa unkuray hhanti ⁄agintay haa hhanti kitahhantay ceedee, ba⁄ay ti kuꞌusakana hhapeege maꞌay pahha.”