Ou gu ⁄aa⁄iya daa kitlakuusi
14
1 Musaa gi kaay sa hida gu Israeeli tuba, “Unkuray ti yaꞌay gu Taataa Iliitleemu, Iliitleemu googuna. Qatlay ga ilii⁄aa⁄iyage wantee sa heedi guũ hhamu, hangu hhanti santay ma hhadinay see sagaiĩ kokuna. 2 Unkuray ti hida daa tlintiꞌisi daqa Taataa Iliitleemuge, Iliitleemu googuna. Ina hangwaatii leehhi unkuray tla⁄aã gu hida gu hhapapu wakinaygo khoorotii, ma hida kosi loi gu kaari tleehhitiri.⁄agoo da hhoi haa ⁄agoo da kooma slasla⁄iima
(Gimba gu Walaawi 11:1-47)
3 Hhanti ⁄agintay idoo lensee, daa kitlakuusi ha Iliitleemu. 4 Hiĩ na kuꞌunaanay haa makay fuꞌumay koina gi ⁄agintee; yakway, aaraa, bee⁄u, 5 manaeerii, damaau, tlaaqitaa, cakanay, cawadeerii haa gumadeerii. 6 Kuꞌunaanimoo baku makimoo gu kooma batlinqisay yeꞌeerooge haa goó ⁄aaruusa, hikee fuꞌumay kosi gii dahhasiday ⁄agoo. 7 Teesaaqay see, tla⁄aã gu kuꞌunaanaykeesii haa makay hhakeesii, yeꞌeeroo koina daa hiikaꞌamisi tla⁄ange haa goó ⁄aaruusee, hhanti ⁄agintay fuꞌumay gu gamiyaa, kwa⁄ii haa kuunimoo. Inay giyoómati ⁄aaruusiri see, yeꞌeeroo koina digaa hiikaꞌamisiiba tla⁄ange. Teesaaqay, fuꞌumay gu makay hhakee ti slasla⁄iima ⁄agoo ou googunay. 8 Slime, hhanti ⁄agintay fuꞌumay gu biinimoo, gimati koomi see yeꞌeeroo daa hiikaꞌamisi tla⁄ange, yoó ⁄aaruumisiyaaba. Fuꞌumay gu makimokee, daqa doogunay ti slasla⁄iima ⁄agoo, ma nangusa see sayni gosi, bere hiĩ gwaai.
9 Makay goõ gu maꞌayge waaree, hiidahhasiday ⁄agoo samaakii paslaapasloo gu kooma cangafeerii tluntlubaage haa khankhafaa. 10 Inkoo, makay gu maꞌay goóba cangafeerii tluntlubaage haa khankhafaa, hagi hhanti ⁄agintay, daqa doogunay ti slasla⁄iima.”
11 Musaa gi kaay sa hida gu Israeeli tuba, “⁄agima fuꞌumay gu cira⁄oo goõ doóba slasla⁄iima. 12 Teesaaqay see, fuꞌumay gu cira⁄oti hagi hhanti ⁄agintay; pongay, tambaycira⁄a haa gwaadiisiya, 13 kwangwalaalay, humpuhumpu, ⁄oron⁄ooru, haa cira⁄oo goõ da teesaaqay slaqamisa, 14 khwankhwaraara paslaapasloo, 15 igiisiya, tlambarakwiya, untumu, bataa, kumbi, haa kwangwalaalaaee paslaapasloo, 16 untumu gu coko⁄o, untumu gu didiru, 17 tlambarakwiya, tlabiya, bataa da maꞌay, 18 booboo, dalooma, senkoo haa kurukuruu.”
19 Khulukhumbay goõ gu kooma hhababee, hagu hhanti ⁄agintay, ti slasla⁄iima daqa doogunay. 20 Inkoo, ⁄agima cira⁄oo goõ, daa kitlakuusiiba.
21 Hhanti ⁄agintay fuꞌumay gu idoo gaã slaydiri hiĩ gwaꞌati. Idotee hadisakana sa yaamulooay gooba goó ibiida yaamu kokunay, ina giĩ dahhasi ⁄agoo baku unkuray hiidahhasiday naadiru sa heedi gu hhapee waka. Unkuray ti hida daa tlintiꞌisi daqa Taataa Iliitleemuge, Iliitleemu googuna.
Hhanti iladahhasiday fuꞌumay gu dakhwadimoo ilibaa gu iyoo dosii.
Hadimisu daqa da leẽ da mibi
22 Musaa gi kaay sa hida gu Israeeli tuba, “Kila kori, hadimisa daqa da leẽ da mibi da baruũ goõ gu qaymamu kokuna. 23 Taa⁄amida daqateesii damaa hiileehhiye ha Taataa Iliitleemu, Iliitleemu googuna, uma gosi ma ibiidi teꞌesii, qatlay gamaa ilii pandaa dosi wantee, la⁄agintay daqa da leẽ da mibi da baruũ googuna, difaay da ⁄abi, du⁄iya da seyituuni haa badiisasaa goõ da kuꞌunaanay googuna. Teesaaqay laqa, mangu caacaahhamisidiri gwaa⁄araa Taataa Iliitleemu, Iliitleemu googuna balalu sliimaa. 24 Bere unkuray daqatee goó ilii ibitee segenge loii wanta, haa daqa haã Taataa Iliitleemu, Iliitleemu googuna gimaa hiileehhiye uma gosi ma ibiidi teꞌesii, dangumaa ilii⁄aafiye ha Taataa Iliitleemu, Iliitleemu googuna, hiidahhasiday teesaaqay laqa, 25 kiriga baruũ googuna hari peesay, qaasa peesay naraꞌa haa gi leehhisiday peesaykee daqateesii damaa hiileehhiye ha Taataa Iliitleemu, Iliitleemu googuna, ina uma gosi ma ibiidi teꞌesii. 26 Peesaykee guri kirigidee idoo ga slaꞌadee; fuꞌumay, difaay baku kitahhu gu dihhu. Idadu hhakee ⁄agimakina haa kitahhamakina sliimaa haa hida gu ayeemaa kokuna, gi hhaꞌaluumitay teꞌesii pandaa da Taataa Iliitleemuge, Iliitleemu googuna.
27 Unkuray dangu hhanti afahhana Walaawi goó ibiidee tongagu kokunay, sa gimba inay konaaiiba daqa da aaliru see tla⁄aã googunay. 28 Hiifaakoo da kila kori gu tamige, hadisa daqa da leẽ da mibi da baruũ haa ⁄aamu googuna goõ gu koriki, haa gi qaasiday kuugiyoo gu tongagu kokunay. 29 Kuugiyoo hhakee ti sa Walaawi, haa hhakaꞌa gu yaamulooee gooba, makeebee, mogombiisee haa hhaã goó ibiidee tongagu kokunay, ma ⁄aginiri haa ma akhaakhaniri, sa gimba inay konaaiiba daqa da aaliru tla⁄aã googunay. Teesaaqay laqa, ina Taataa Iliitleemu, Iliitleemu googuna, ⁄aafi yondu goõ gu dabaiĩ kokuna.”