Firiiriru iliitleemamee wakinay
13
1 Bere tletimiisay baku hikira goó tletima hari amoo da tletiitiru, hiica⁄i tla⁄aã googunay haa sangugi kakaana gimba gu bakaꞌasa, 2 haa gimbakee gu bakaꞌasa gii ca⁄i, ina gi kaay tuba, “Sirakomamidane iliitleemamee wakinay, haa gi firiirinee,” (iliitleemamee ga hhidintee), 3 etaa hhanti itatiimisiday gimba gu tletimiisaykee ma heedikee see gwaa tletimu tletaa. Taataa Iliitleemu, Iliitleemu googuna hanguti koiiꞌimisi, ma arimi bere hagu slaꞌaday hari ilahudaa kokuna goõ haa hari slafimaa kokuna goõ. 4 Unkuray kwanda ga sirakomamitee Taataa Iliitleemu, Iliitleemu googuna kilesi haa kara kwanda gu gwaa⁄adee ina kilesi. Oowa ilakaawa dosi haa akhamisakuna ina, sugu yonditee haa nakafaw daqa dosii. 5 Inkoo, tletimiisaykee baku heedikee goó tletima tletaa kwanda dugu gaasiye, sa gimba hiĩ kakaami sa hida ma siꞌiri Taataa Iliitleemu, Iliitleemu googuna, hiĩ gwaa hiica⁄asu haa hangugi afiigweedi unkuray tongaiimaago hhapee da Misirigo. Kara, tletimiisaykee yaa koisi ⁄isiru unkuray, ma maydiri sirakomamidu, amoo dangwaa ilafahhi ha Taataa Iliitleemu, Iliitleemu googuna. Teesaaqay hagani iliifiiciday tlakwaroo tla⁄aã googunaa.6 Bere hhia googu loi, baku nankoogu baku hotoogu, baku hadee doogu ga slaꞌade, baku danaꞌa googu gu ilaciyaa loi, gugi ilakwikwihhi hari hhaaboo, gi kaay tuba, “Poo ma firiiriru kayni iliitleemamee wakinay,” iliitleemamee hhaã unkuray ma ayiĩ kokuna see gi hhidintay, 7 iliitleemamee gu hida goó ibiidee hangugi niini⁄idiyay unkuray, (hhaã goó ibiidee ilaciyaa kokunay baku hhaã goó ibiidee segenge daqa doogunaa, goó ibiidee sooma lengo gu khooroti sooma gu caduu naqatloo), 8 bere heedi waku kaay sa ugu tuba, firiirine iliitleemametee, hhanti ⁄imbida hiifaafahharu gosi, ma itatiisa see baku ⁄awaariru see sa ina! Ina mayku duguma gaasi ma goiru see hagu hhanti gointa. 9 Gu lou, ina kwanda dugu gaasiye. Ugu kwanda daba googu gi giyaadiye geesaa, gaasaraa ina. Da hheꞌesi, dabaiĩ gu hida wakinay goõ asu sirakonay. 10 Cakhadimakuna hari tle⁄eẽ ti amoolaa gwaai, sa gimba yaa koisi hiifooka unkuray, maa hiica⁄adiri amoo da Taataa Iliitleemu, Iliitleemu googunaa, hiĩ gwaa hiica⁄asu unkuray hhapee da tongaiimaago da Misiri. 11 Da hheꞌesi, Waisraeeli goõ akhasiyay gimbakee gungii ca⁄u haa tlaꞌamuudiyay. Etaa, heedi lensee tla⁄aã googunay, maa yondiidiyaaba gimba gu tlaku da hikee gooay.
12 Bere, unkuray akhasiday tuba, yaamu wakinayge hhaã Taataa Iliitleemu, Iliitleemu googuna sangwaa hadisi, magi ilii ibitiri, 13 wanay hida goó yondiidee gimba gu tlaku tla⁄aã googunay, gungii tlawee sa papa⁄eedeesa da hida gu yaamu, kakaakanay tuba, “Paaree ma firoo kayni iliitleemamee wakinay,” iliitleemamee gi kahhadee caahha unkuray Waisraeeli. 14 Unkuray kwanda ga maamisidee haa gi ilatahhaday haa gi cangicangimisiday naraꞌa. Bere, gimbakee guti lou, kara dagi mai tuba, gimbaki gu slahhaaꞌasa duguũ yondiidi tla⁄aã googunay, 15 gu lou, hida hhakee goõ goó ibiidee yaamu hhakeesii kwanda gi cu⁄udee hari pangaaee. Yaamu hhakee hhamisakini sumuku hukumuu gu Taataa Iliitleemuge, hida kosi goõ sliimaa haa kuꞌunaanay gosi goõ. 16 Teꞌesii, unkuray kurunkuraw khooslay goõ gu yaamu hhakee, gugi upaintay daqa da cenceege. Yaamu hhakee haa khooslaykee goõ da⁄akina sumuku, sadaaka da da⁄araa pahha aslaage daqa Taataa Iliitleemu, Iliitleemu googuna. Yaamu hhakee ti meetiyay hiĩ tlakwaakwayri koraraa haa koraraa gooba hiifaakoo, digi hhanti kara tleehhi. 17 Hhantii ooday idoo lensee, daa hiica⁄asi dagama hhamisi aslaage, Taataa Iliitleemu, Iliitleemu googuna, ma may slahhaaꞌamee dosi da dihhi, ma sangu laqami ⁄awaariru gosi gu didiru daqa doogunay. Slime, ina gi ⁄isina, hida ma hiiroogidiri hari khisla, idoo giyaa iliifadidi gooay sa ayiĩ kokuna. 18 Taataa Iliitleemu, Iliitleemu googuna ⁄awaarina sa unkuray, bere ha itatiimisiday afoo dosi, haa gi iliikontay ilakaawa dosi goõ, sangu kakaakame letuti, haa gi yonditay yondukaꞌa gu haaki pandaa dosii.