Daqa da iliifiroo kilesi
12
1 Haã na ilakaawa goõ haa sariyaa goõ, kwanda ga iliikontee naraꞌa gi akhamisiday balalu sliimaa ga ilii ibitee hhapeteesii, sangu hadisiye ha Taataa Iliitleemu, Iliitleemu gu ayiĩ kokuna, ma tooguna tleehhiti. 2 Hhapee ga hii⁄utla kaydee, unkuray kwanda ga muumu⁄untee sumuku, daqeemoo goõ hida gu hhapapu hhanki giyoó iliifiriirinee iliitleemamee koina, yaꞌaani omeeri gu tledige, tiooge haa khai gu denige. 3 Muumu⁄uma sumuku masabaahu dooina haa loolokhoma tle⁄eẽ daa waraqamidi unguruꞌu pahha giyoó firiirinee. Hhamisakini hari aslaa sanaamamuu koina gu unguruꞌu doó Aseera eteedine, haa tlaaqa sumuku sanaamamuu gu iliitleemamee koina daa khafidi. Teesaaqay laqa, umaiĩ koina digima may hiislawa daqeemoo hhakeesii.4 Unkuray hagu hhanti firiirintay Taataa Iliitleemu, Iliitleemu googuna, idoo giyoó ilii firiirinee gooay iliitleemamee koina. 5 Taataa Iliitleemu, Iliitleemu googuna sanguu leehhi daqa, daqeemoo gongo doó ilii ibiidiye kabiraa doogunay goõ, daqa uma gosi gimaa ilii ibiidiye. Unkuray daqatee gani ilii hadakakayday, 6 daqatee gani ilii leehhimisiday sadaaka dooguna da da⁄araa haa sadaaka da kuꞌunaanay daqa Taataa Iliitleemuge, leẽ da mibi dooguna da hadimisu googuna, sadaaka da slagumu googuna, sadaaka da idoo gaa seelintiri hadisa, hadimisu sadaaka hari muunaiĩ kokuna haa sadaaka da badiisasaa gu kuꞌunaanay googuna. 7 Teꞌesii pandaa da Taataa Iliitleemuge, Iliitleemu googuna, unkuray sliimaa haa hida gu ayeemaa kokuna, gani ilii ⁄agintay haa gi hhaꞌaluumitay sa idadu sliimaa ga yonditee hari dabaiĩ kokuna, sa gimba ina hanguũ ⁄aafi.
8 Inkoo naqatloo, dandiray hoóti hadimisana sadaaka daqa Taataa Iliitleemuge, kila heedi daqa gi ilii slaiye ina. Hhanti teesaaqay laqaday, yade daqa ga kaydee, 9 sa gimba kahhaday hiiguuma hhapee ga ilii fiifisa kaydee hari qasaw haa hhapee sangu hadiidimisiye ha Taataa Iliitleemu, Iliitleemu googuna, balalu sliimaa ma aalimee dooguna tleehhiti. 10 Inkoo, unkuray goo ilii tlo⁄osidee duudu gu Yoridaani, haa gi ibitay hhapeteesii sangu hadiidimisiye ha Taataa Iliitleemu, Iliitleemu googuna, ma aaliru googuna tleehhiti laqwaloo haa laqwaloo. Qatlaykee, ina hangu ga⁄ay, danguma may ilahufidu ha fa⁄ayaa dooguna goõ, gumaa niini⁄idee unkuray, ma ibitiri hari qasaw. 11 Qatlaykeesii, Taataa Iliitleemu, Iliitleemu googuna, daqa gii leehhiyege, uma gosi ma ibiidi teꞌesii, daqa ga ilii leehhimisidee idadu goõ hangu ilafahhaahhade letuti. Sadaaka da da⁄araa aslaage, sadaaka dooguna, leẽ da mibi, sadaaka da slagumu, haa sadaaka dooguna gonkosaa gaa hiifaditiri hadimisu sa ina. 12 Teꞌesii unkuray hhaꞌaluumitay pandaa dosii Taataa Iliitleemu, Iliitleemu googuna, unkuray sliimaa haa yaꞌay kokuna gu hhawatee haa gu tigay, tongee dooguna da hhawatee haa da tigay. Slime laqwaloo da Walaawi doó ibiida yaamu kokunay hhaꞌaluumita, sa gimba inay konaaiiba daqa da aaliru tla⁄aã googunay. 13 Hangu ga⁄aydee hhanti hadimisiday sadaaka dooguna da da⁄araa aslaage daqa lenge see ga ilii slaꞌadee unkuray. 14 Sadaakatee ti hadisakana daqataꞌay gimaa ilii hiileehhiye Taataa Iliitleemu tla⁄aã gu leẽ gu kabiraa doogunay. Teꞌesii na daqa ga ilii hadimisidee sadaaka dooguna da da⁄araa aslaage, haã na daqa ga ilii yonditee gimba sliimaa hangu ilafahhaahhade unkuray.
15 Teesaaqay see, unkuray hiidahhasiday isooqutlidu kuꞌunaanay googuna daqa nama daqa yaamu kokunay giyoó ilii ibitee, haa gi ⁄agintay fuꞌumay, idoo ga ilii slaꞌadee, ubee damaaimoo baku maneeu guniĩ isahiiquutlidiri pahha, idoo sangoó iliipihhiye gooay ⁄aafa ha Taataa Iliitleemu, Iliitleemu googuna. Hida goõ, goóba slasla⁄iima baku gu koomee slasla⁄iima hiidahhasiyay ⁄agoo fuꞌumay gu makay hhakee. 16 Inkoo, unkuray hhanti ⁄agintay baku hhanti kitahhantay ceedee. Ceedee tuutuqakana hhapeege, maꞌay pahha. 17 Unkuray hhanti ⁄agintay ayeemaa kokunay sadaaka lensee da leẽ da mibi da baruũ haa difaay da ⁄abi haa da du⁄iya, baku da badiisasaa da kuꞌunaanay googuna goó selintee haa goó hadimisidee sadaaka hari muunaiĩ kokuna sa Taataa Iliitleemu. 18 Idadu hhakee hagiti ⁄agintay pandaa da Taataa Iliitleemuge, Iliitleemu googuna, daqa gimaay leehhiyege ina. Giti ⁄agintay sliimaa haa yaꞌay kokuna gu hhawatee haa gu tigay, tongee dooguna da hhawatee haa da tigay, haa laqwaloo da Walaawi doó ibiida yaamu kokunay goõ. Unkuray danguti slai ti hhaꞌaluumitay pandaa dosii sa ⁄agoo da idadu sliimaa gaã hadimisidiri hari dabaiĩ kokuna. 19 Hangu ga⁄aydee, Walaawi hagi hhanti mayday iliiqaasa qatlay sliimaa ga ilii ibitee hhapee doogunay.
20 Qatlay Taataa Iliitleemu, Iliitleemu googuna gimaa ilii tlakhweesiye hhapee dooguna, idoo giyaa iliifadidi gooay, unkuray gi kontay kwayru gu fuꞌumay haa gi kaaday tuba, “Dandiray slaꞌana ⁄agoo fuꞌumay,” teꞌesii hiidahhasiday ⁄agoo fuꞌumay wa⁄a, idoo ga ilii slaꞌadee gooay unkuray. 21 Inkoo, Taataa Iliitleemu, Iliitleemu googuna sanguu leehhi daqa gimaa ilii ibiidiye uma gosi, bere daqatee segenge wanta daqa doogunaa, hiidahhasiday isooqutlidu raqoo gu kuꞌunaanay googunaa, hiĩ sangwaa pihhi ha ina, idoo hangwaa ilii ilafahhi gooay. Bere ti segenge wantay yaamu kokunaa, hiidahhasiday ⁄agoo fuꞌumay idoo ga ilii slaꞌadee. 22 Unkuray ⁄agintay fuꞌumay hhakee, idoo doó ilii⁄agine gooay fuꞌumay gu damaaimoo haa maneeu. Hida goõ hiidahhasiyay ⁄agoo, hhaã goóba slasla⁄iima haa hhaã see gu koomee slasla⁄iima. 23 Teesaaqay see, caahha tuba, ha ⁄agintaaiiba haa kitahhantaaiiba ceedee, sa gimba ceedee ti slafimaa. Teesaaqay, etaa hhanti ⁄agintay haa hhanti kitahhantay slafimaa sliimaa haa fuꞌumay! 24 Hhanti ⁄agintay ceedetee. Ceedee tuutuqakana hhapeege, maꞌay pahha. 25 Hhanti ⁄agintay ceedee, ma dangu pihhi ibinaa da hhoi unkuray haa laqwaloo dooguna, sa gimba hati yonditay gimba gu haaki pandaa da Taataa Iliitleemuge. 26 Teesaaqay see, unkuray owaw idadu kokuna gaa tlintiꞌisidiri sa Taataa Iliitleemu sliimaa haa sadaaka dooguna da seeliru, leehhisakina daqa gimaa hiileehhige ina. 27 Teꞌesii, hadimisa rawaa gu masabaahu da Taataa Iliitleemuge, Iliitleemu googuna sadaaka dooguna da da⁄araa aslaage, fuꞌumay haa ceedee. Ceedee da sadaaka dooguna waka, hitimisakana rawaa gu masabaahuge, fuꞌumay ⁄agima. 28 Unkuray kwanda hangu ga⁄aydee naraꞌa, akhamisa gimbakee goõ hanguũ ilakaay, balalu sliimaa danguma pihhi ibinaa da hhoi unkuray haa laqwaloo dooguna, sa gimba, gimba gu hhou haa gu haaki guni yonditay pandaa da Taataa Iliitleemuge, Iliitleemu googuna.
29 Qatlay, Taataa Iliitleemu, Iliitleemu googuna gimaa iliica⁄asiye sumuku pandaa doogunaa hida gu hhapapu, hhaã gi iliitlaꞌa kaydee gigi gusitay haa unkuray gi ibitay hhapee dooinay, 30 qariqaaqari, inay digoo ilii hhamisiye pandaa doogunay, hangu ga⁄aydee hangu hhantii lu⁄uday hatliroo dooinay. Hangu hhanti ilahufitay sa maamisu gu iliitleemamee koina, gi kaaday tuba, “Hida gu hhapapu hhanki yaa malee firiirinay iliitleemamee koina? Dandiray see, firiirine nama teesaaqay.” 31 Taataa Iliitleemu, Iliitleemu googuna, hagu hhanti firiirintay teesaaqay inay gooay, sa gimba firiiriru gu iliitleemamee dooinay, yoóti yondiidiyay gimba goõ goó slahhaaꞌasa Taataa Iliitleemu. Inay gimati laqwaloo dooina da hhawatee haa da tigay giyoóti hhamisiyay aslaage, ma hadisiri sadaaka sa iliitleemamee koina!
32 Hangu ga⁄aydee naraꞌa, gi yonditay gimba sliimaa hanguũ ilakaay. Hhantii roogisiday gimba lensee baku hiideehha see hhantii deehhiday.