Slaꞌaku haa akhamisaku Taataa Iliitleemu
11
1 Musaa gi kaay sa Waisraeeli tuba, “Sa gimbakee, unkuray slaꞌa Taataa Iliitleemu, Iliitleemu googuna, balalu sliimaa gi iliikontay caacaahhamisu gosi haa ilakaawa dosi goõ haa sariyaa dosi. 2 Letuti ilahudeesa naraꞌa, ⁄agitiruki gwaa daqa Taataa Iliitleemu, Iliitleemu googuna dahha, sa gimba hati gimaamisaaba haa yaꞌay kokuna gwaa hhidimee haa gwaaba arimaa ⁄agitirukee, yaati unkuray ayiĩ naa antiri hiidahhasa dosi haa daba gosi gu kooma ⁄uuru, 3 qatlay giyaa ilii yondiidi gimba gu denu gu bakaꞌasa hhapee da Misirige daqa mutemi Faraawge haa hida gu hhapee dosi. 4 Kara ilahudeesa naraꞌa gimba giyaa yondiidi daqa sirikaarii da Misirige, faraasi haa kokoteenanuu koina gu gau, idoo giyaa ilii hhamisi idadu goõ tlawa da didirige da Saamu giyaa ilii siragusiisine unkuray. Teesaaqay, Taataa Iliitleemu giĩ hhamisi inay haa letuti naqatloo. 5 Slime slawaw, yaati yaꞌay kokunaaba, gwaa arimee gimbakira daa yondiidi ha Taataa Iliitleemu sa unkuray yade kongoqomeege, hanti amoolaa daadiri tiꞌii hhapee da Kanaanige. 6 Yaꞌay kokuna yaa aniriiba hari ilaa koina loi, Taataa Iliitleemu idoo giyaa ilii yondiidi daqa Dahaanige haa Abiraamu yaꞌay gu Eliyaabu nanku Rubeeni, hhapee idoo giyaa iliitlaaꞌati pandaa da Waisraeeli goõ, gi qwi⁄idi inay sliimaa haa hida gu maraai koina, hemamuu koina haa idadu koina goõ gu koomee slafimaa. 7 Ana hati gimaamisa sa unkuray, sa gimba ilaa kokuna loi naa aniri gimba sliimaa gu denu, Taataa Iliitleemu giyaa yondiidi hari ⁄uuru gosi.”Hhoinay gu didiru gu hhapee daa hiifadidi
8 Musaa gi ilakoomi kaawa sa inay tuba, “Inkootuutuu tlo⁄osiday duudu gu Yoridaani, unkuray akhamisa ilakaawa goõ hanguũ ilafahhi unkuray letuti, ma slaydiri ⁄uuru gu hiiguuma haa gi hii⁄utliday hhapetee ga ilii hadakakaakaydee. 9 Slime, unkuray ma ibitiri balalu wa⁄a hhapeteesii doó guuma ilibaa haa dinu hari khisla, hhapeti Taataa Iliitleemu giyaa hiifadidi hadisa sa ayiĩ kokuna haa laqwaloo dooina. 10 Hhapee ga ilii guuma kaydee haa gagi hii⁄utliday ti hhapee da Misiri pahhaaba gaa dahhadee, haã gaa ilii daamisidiri pisagaroo dooguna haa gagi ilii tuutuquntiri maꞌay, hari amoo da fereejii tindigaa da naanu pahha. 11 Teesaaqay see, hhapetee ga hii⁄utla kaydee, ti hhapee da kooma omeeri haa hiihuuꞌuma, haã doó slawa tlubay rawaa gu rawgo. 12 Ti hhapee doó ga⁄aye ha Taataa Iliitleemu, Iliitleemu googuna. Balalu sliimaa, ilaa kosi yoó hhapeteesii wanay tlaatleesa da korigo, hiifaakoo da kori naqatloo.”
13 Teesaaqay, bere gu lou, hati akhamisiday ilakaawa dosi hanguũ ilafahhi unkuray letuti, gugi slaꞌaday Taataa Iliitleemu, Iliitleemu googuna, sugugi yonditay hari ilahudaa kokuna goõ haa slafimaa kokuna goõ, 14 ina tlubisi tlubay, ma tlubi hhapee doogunay qatlaykaꞌa giyoó ilii tlubiye gu madeẽ haa hiifaakoo da agenge, unkuray gi buꞌuntay baruũ googuna, haa gi slayday difaay da ⁄abi haa du⁄iya dooguna da seyituuni. 15 Slime, ina sangu hadisi sluufaa ma tiꞌidi sa kuꞌunaanay googuna. Unkuray see ⁄agintay ti amoolaa akhaakhantay. 16 Hangu ga⁄aydee, muunaiĩ kokuna digi ba⁄atii hiicori, gii fookitay haa gi yonditay sa iliitleemamee wakinay, hagigi firiirintay haa gi khuupuuꞌumitay hhapeege daqa dooinay. 17 Da hheꞌesi, qupidaa gu Taataa Iliitleemu ooyiyay aslaa pahha daqa doogunay, ina gi khiidina raw, dagi may tlubaraa haa hhapee gi mayda hiica⁄asa ⁄aamu gosi. Da hheꞌesi, unkuray gi cira kaka⁄aday hhapeteesii da hhoige sangu hadisiye ha Taataa Iliitleemu.
18 Gimbaki gu Taataa Iliitleemu haguu slaslayday muunaiĩ kokunay haa ibinaa doogunay. Ilakaawatee handikima haa khiidimakana dabaiĩ kokunay haa tla⁄aã gu pandaca⁄aai kokunay, ma idoo da hiislaslaw tleehhiti daqa doogunay. 19 Caacaahhamisa yaꞌay kokuna gimbaki hari maguuma. Inay sigi ilakontee catimisu qatlay goó ilii ibitee ayage haa inay, haa qatlay goó ilii hhiyuumage wantee, qatlay goó ilii qaaqaatee haa goó iliitlaydee hari heetlawaa. 20 Slime handikimakana gompaai gu afamaraaee gu maraai kokunay haa kaꞌafafee gu yaamu kokunay. 21 Yondiida gimbakee goõ, unkuray haa yaꞌay kokuna, ma ibitiri ibinaa da koraraa haa koraraa goóba hiifaakoo hhapeteesii sangu hadisiye ha Taataa Iliitleemu, Iliitleemu googuna, giyaa seelimi hadisa sa ayiĩ kokuna, ma tooguna tleehhiti, balalu sliimaa idoo raw gooay gi ilii rawaage wane hhapeego.
22 Bere akhamisiday naraꞌa ilakaawati goõ sangu hadiidimise unkuray, gi slaꞌaday Taataa Iliitleemu, Iliitleemu googuna, haa gi sirakontay amamu kosi goõ haa gugi iliinakafiday ina, 23 Taataa Iliitleemu kaba⁄i hida gu hhapapu hhanki goõ pandaa doogunay. Kara, unkuray hii⁄utliday raqoo gu deni gu hida gu hhapapu gu koomee ⁄uuru ba⁄ay kooguna see. 24 Daqeemoo goõ gi ilii kala⁄adee hari yeꞌeeroo kokuna, ti kokuna tleehhidiyay. Hhapee dooguna hiitlakhwayda kongoqomeego, omeeri gu Lebanooni naqatloo, haa duudu gu Efuraatigo, tlawa da didiri da Mediteraaniya naqatloo dari ilacindoo gu biraa waara. 25 Hhaku heedi lensee gu hiidahhasa kanisa unkuray. Taataa Iliitleemu, Iliitleemu googuna, idoo giyaa iliifadidi gooay, ⁄isina hida ma gwaa⁄iri haa ma tlaꞌamuudiri daqeemoo goõ ga kaydee unkuray.
26 Yuꞌudiyaa! Letuti kwanda ga hiileehhedee gimbaki gu cada. Unkuray slaꞌadaaii Taataa Iliitleemu mangu ⁄aafi baku mangu ilawaasi! 27 Hangu ⁄aafi, bere akhamisiday ilakaawa da Taataa Iliitleemu, Iliitleemu googuna, haã hanguũ ilafahhi unkuray letuti. 28 Hangu ilawaasi, bere akhamisidaaiiba ilakaawa da Taataa Iliitleemu, Iliitleemu googuna haa gi mayday amamu hangu ilafahhaahhade letuti, gi sirakontay iliitleemamee wakinay gaa hhidintee. 29 Qatlay Taataa Iliitleemu, Iliitleemu googuna hangurimaa iliidaye hhapeteesii ga hii⁄utla kaydee, unkuray hamaa kakantay oõ gu Gerisiimugo, idoo ina gi ilii ⁄aafiye inay, haa oõ gu Ebaaligo, idoo gi ilii ilawaasiye unkuray. 30 Omeeri hhanki hari tlo⁄osaa gu duudu gu Yoridaani wanay, hari bara da ilacindoo gu biraa gu balabalaa, yade khuꞌusa bara da hiihuua da letu, hhapee da Wakanaanige goó ibiidee Araabage yade khuꞌusa yaamu gu Giligaali, ilaciyaa haa khaimoo gu mualooni gu tongoo da Mooreege waara. 31 Unkuray haã daadaausidiri tlo⁄osa duudu gu Yoridaani, ma hiiguntiri haa gi hii⁄utliday hhapetee sangu hadiidimisiye ha Taataa Iliitleemu, Iliitleemu googuna. Qatlay gamaa ilii ⁄utlidee haa gi ibitay teꞌesii, 32 khuꞌuma naraꞌa, la iliikontay ilakaawa goõ haa sariyaa goõ sangu hadiidimise letuti.