Khongoroꞌosay waku gu ila⁄imbidu mibi
10
1 Qatlaykira, Taataa Iliitleemu sinigi kaay ana tuba, ‘Gongoriisi khongoroꞌosay cada gu tle⁄eẽ hhakira pahha gu pandaa, slime, ugu laboo⁄imisida sandikoo da bangasay, goo hheꞌeside laa khayda daqa dooii rawaa gu onke. 2 Ana handikima khongoroꞌosay keesii, gimbakira gwaa waara daqa khongoroꞌosaykiray gu pandaa gaa cu⁄udi. Da hheꞌesi, ugu la qaasida khongoroꞌosaykee waꞌay gu sandikooge.’3 Teesaaqay, hagi boo⁄imisi sandikoo hari bangasay gu lawau haa hagi gongoriisi khongoroꞌosay cada gu tle⁄eẽ, hhakira pahha gu pandaa. Da hheꞌesi hagi ilakhiinaaꞌadi onke, tay kooma khongoroꞌosaykee cada dabaiĩ koii. 4 Taataa Iliitleemu gi handikimi ilakaawa mibi khongoroꞌosaykeesii, nama gimbakira leẽ giyaa handikimi wakaꞌalee. Hatee na ilakaawatira giyaa kakaami sa unkuray rawaa gu onke, ina giyaa ilii gimbuusi tla⁄aã gu aslaago, baloo da hiikurunkurimidu. Ina sinigi hadisi ana khongoroꞌosaykee. 5 Da hheꞌesi, ana hagii fookidi, haagii ⁄eeti onko, hagi qaasi khongoroꞌosaykira gu tle⁄eẽ waꞌay gu sandikoteesii gaa boo⁄imisi. Teꞌesii gini iliiwanay letuti naqatloo, idoo Taataa Iliitleemu hinaa ilii ilakaay gooay ana.”
Gwaaꞌaraa da Haruuni
6 (Teꞌesaa wa⁄eemaa gu hida gu Yaakaanigo, Waisraeeli gi hhiyuudiri teꞌesaa Moseera naqatloo. Teꞌesii Haruuni gi hhami haa dugugi qaasi. Nankosi Eleyasaari gi tosaa gii oy daqa da taataa gosi, gi hhapalooay tleehhidi. 7 Teꞌesaa Waisraeeli gi hhiyuudiri Gudigooda naqatloo, slime gi ilakoniri hhiyuuma hhapee da Yotibaata naqatloo, daa kooma hhaahhiyoo wa⁄a gu maꞌay. 8 Musaa gi kara kaay tuba, qatlaykeesii, Taataa Iliitleemu yaa hiileehhi kabiraa da Laawi, inay na hida gu geregediru Sandikoo da Ila⁄imbidu gu Taataa Iliitleemu. Slime, ina giyaatii leehhi inay, ma yondiidiri yondu gu hhapalooaisoo haa gi ⁄aafiyay hida hari uma gosi, idoo giyoó ilii lalaqiyee gooay letuti naqatloo. 9 Inkoo, hatee na idoo, Walaawi sagani konaaiiba daqa da aaliru tla⁄aã gu hhiee koinay. Inay yaati slayri idadu giyaa slaiyee daqa Taataa Iliitleemugo, Iliitleemu googuna hari amoo da yondu gooina daqa dosii balalu sliimaa hhapalooee pahha, idoo giyaa iliifadidi.)
10 Musaa gi ilakoomi cocoꞌomoo sa Waisraeeli tuba, “Ana haati ibiidi onke balalu mibeeri cigahha, tleemaa haa amasi gaa iliilaqi gooay qatlaykira gu pandaa, qatlaykii see, Taataa Iliitleemu hinigi itatiisi ana, ina gi ⁄imbi tuba, hangu hhamisaaba unkuray. 11 Da hheꞌesi, Taataa Iliitleemu gi kaay sa ana tuba, ‘Tlayii, taa⁄a ilakoomi haa hhiyuuma doogu, giyaadi sa hida, ma hiidahhasiri hiiguuma haa gii ⁄utliday hhapee gaa seelimi sa ayiĩ koina ambee, sigi hadisa inay.’
Taataa Iliitleemu idoo gi slaiye
12 Inkoo, ye Waisraeeli, Taataa Iliitleemu, Iliitleemu googuna, mala slai daqa doogunay. Ti slai, haguti gwaa⁄aday kilesi ina, gi sirakontay amamu kosi goõ, hagugi slaꞌaday haa sugugi yonditay ina hari ilahudaa kokuna goõ haa hari slafimaa kokuna goõ. 13 Slime, ilakaawati goõ da Taataa Iliitleemu, sangu hadiidimise letuti, ilakoomaka sa faydaa doogu loi.
14 Yuꞌudiyaa, raw haa khooroo haa idadu sliimaa see gu waꞌay koinay waaree ti khooslay gosi Taataa Iliitleemu, Iliitleemu googuna. 15 Teesaaqay see, Taataa Iliitleemu yaa slai hari khisla ayiĩ kokuna haa hangugii leehhi unkuray. Teesaaqay, laqwaloo dooina gi hida kosi tleehhitiri ba⁄ay da hida gu hhapapu wakinay goõ, da iliiwane gooay letuti. 16 Inkoo, unkuray ilabuusla muunaiĩ kokuna haa gi mayday sagaiĩ karaarahhu. 17 Taataa Iliitleemu, Iliitleemu googuna, ina na Iliitleemu gu iliitleemamee haa Looimoo gu looee. Ina na Iliitleemu gu didiru gu kooma ⁄uuru haa dugoóti tlaꞌamuudi. Slime, ina yoó hiilehhidiyaaba, hukumuu gosi guti haaki, yoó hiioyaaba tlupa. 18 Ina yoóti hadisi haaki sa makeebee haa mogombiisee. Kara, ina yoóti slai hhakaꞌa gu yaamulooee gooba goó ibiidee hhapee doori, haa sigoóti hadisi ⁄agoo haa qayroo. 19 Inkoo, unkuray slaꞌa hida hhakaꞌa gu yaamulooee gooba, sa gimba unkuray see yaati yaamulooee gooba yade hhapee da Misirige. 20 Unkuray gwaa⁄a Taataa Iliitleemu, Iliitleemu googuna haa sugu yonditee ina. Nakafaw daqa dosii, haa gi seelintay hari uma gosi. 21 Ina kilesi na Iliitleemu googuna, leẽ guni hhaꞌaleesiday ina. Ina naa yondiidi, gimbaki sliimaa gu denu goó bakaꞌasa, haa goó tlaꞌamuudisa gimba gaa antiri hari ilaa kokuna loi. 22 Qatlay ayiĩ kokuna giyaa ilii waaudiri gi ibinaa kayri hhapee da Misirige, faadoo dooina yaa hida mibeeri fanqu kilesi. Inkoo, Taataa Iliitleemu, Iliitleemu googuna, hanguugii roogisi faadoo dooguna, letuti unkuray hanti hacidiri wa⁄a tica⁄eerii pahha rawge.”