Akhamisu gu hhaku gu hida
9
1 Ye Waisraeeli, itatiisa! Inkoo, haã daadaausidiri tlo⁄osa duudu gu Yoridaani, ma hiiguntiri haa gi hii⁄utliday raqoo gu deni gu hida gu hhapapu gu koomee ⁄uuru ba⁄ay kooguna see. Yaamu koina gonkoinaa guti deni haa digaa hiikhangaꞌasi hari bi⁄eenaa gwaa dawee raw naqatloo. 2 Hida kosi guti tledi haa ti wa⁄a. Inay ti laqwaloo da Waanaaki. Unkuray khuꞌuday gimba gooina haa haã akhasidiri hida cocoiyay tuba, ‘Miyaa nii dahhasi kaba⁄a Waanaaki gauge?’ 3 Letuti, unkuray caahha tuba, hiĩ gu giyaada pandaa doogunay aslaa pahha, idoo giyoó iliihhamiside khai, na Taataa Iliitleemu, Iliitleemu googuna. Ina kaba⁄i haa hhamisi Waanaaki pandaa doogunay. Inkoo, inay gi gusintay haa giti cira hhamisiday, idoo Taataa Iliitleemu sangwaa iliifadidi gooay unkuray.4 Qariqaaqari, Taataa Iliitleemu, Iliitleemu googuna giyoo iliigusine Waanaaki pandaa doogunaa, hhanti kaaday muunaiĩ kokunay tuba, ‘Taataa Iliitleemu, hindiranti khay tay, ma hii⁄utli hhapeti, sa gimba dandiray kona ibinaa daa tafaꞌadi.’ Teesaaqay gooba, ti sa gimba gu tlakwaroo da hida gu hhapapu hhakee, Taataa Iliitleemu sigini gusisina inay pandaa doogunaa. 5 Hhapetee tooina ga hiidahhasiday hii⁄utla unkuray, ti sa gimba gu haaki doogunaaba baku ti sa ibinaa doogunaaba daa tafaꞌadi. Taataa Iliitleemu, Iliitleemu googuna, ginti gusina hida gu hhapapu hhakee pandaa doogunaa, sa gimba gu tlakwaroo dooina, ina ma hiigaasi gimbakira giyaa seelimi daqa ayiĩ kokunay, Aburahaamu, Isaaka haa Yakoobo. 6 Inkoo, unkuray caahha tuba, Taataa Iliitleemu, Iliitleemu googuna, sanguti hadiidimisi hhapeti da hhoi, maga hii⁄utlidiri, ti sa gimba gooba unkuray kontay ibinaa daa tafaꞌadi, unkuray ti hida gwaa muunaiĩ karaarahhe.”
Sanaamuu da damaa daa boo⁄imisi hari sahaabu
7 Musaa gi kaay sa Waisraeeli tuba, “Slawaw gimbaki, etaa dangu hhanti afahhana, idoo gwaa ilii lagusidiri gi slahhaaꞌasidiri Taataa Iliitleemu, Iliitleemu googuna yade kongoqomeege. Tlaatleesi balotira gaa iliica⁄adiri hhapee da Misirigo, baloo gaa iliidaadiri naqatloo daqatii, unkuray hagoóti kanimisiday Taataa Iliitleemu. 8 Kara, unkuray gaa ilii oõ gu Horeebuge wantee see, hagwaa slahhaaꞌasidiri Taataa Iliitleemu hari khisla, yaati slai hhamisaraa see unkuray. 9 Ana gaa ilii ilakhiinaaꞌadi onke, ma sinaa hadisi khongoroꞌosay gu tle⁄eẽ, khongoroꞌosaykira daa ilii handikimi ila⁄imbidukira Taataa Iliitleemu giyaa qaasi haa unkuray, ana haati ibiidi onke balalu mibeeri cigahha tleemaa haa amasi, haa ⁄agimiiba ma kitahhu see idoo lensee. 10 Qatlay, Taataa Iliitleemu sinaa ilii hadisi khongoroꞌosay cada gu tle⁄eẽ, daa handikimi hari daba gosi ina loi. Khongoroꞌosaykee dugwaati ilii handikimi ilakaawa goõ Taataa Iliitleemu giyaa kaay sa unkuray onke tla⁄aã gu aslaago, baloo da hiikurunkuridage.
11 Teesaaqay, daganaa iliiwana, hiifaakoo da baloo da mibeeri cigahha, tleemaa haa amasi, Taataa Iliitleemu sinaa hadisi khongoroꞌosaykee cada gu tle⁄eẽ, daa ilii handikimi ila⁄imbidu. 12 Da hheꞌesi, Taataa Iliitleemu gi kaay tuba, ‘Tlayii, taa⁄a ⁄eetii cira biraa gu onke, sa gimba hida koku giyaa hiica⁄asidi hhapee da Misirigo, hingii slasla⁄eesiri inay kilakoina, hiĩ mayri cira amoo gaa ilakaay magi sirakoniri, haa hiĩ boo⁄imisiri sanaamuu da damaa hari sikhima.’
13 Slime, Taataa Iliitleemu gi kaay sa ana tuba, ‘Hagiĩ arimi hida hhanki, gu lou ti hida gwaa sagaiĩ karaarahhee hari khisla! 14 Hani mayde magi hhamisi, haa teesaaqay, uma gooina dugu kara hiislayaaba khoorotii. Ana hagu ⁄isima ugu, taataa gu hhapee da didiri tleehhita da kooma ⁄uuru hari khisla hiicata da inay see.’
15 Da hheꞌesi, ana gii fookidi haa gii ⁄eeti onko, oõ yaa ooyiiyina aslaa, ana haa kooma khongoroꞌosay cada gu tle⁄eẽ gu ila⁄imbidu dabaiĩ koii. 16 Qatlay gaa ilii yuꞌudi, hagi arimi unkuray haã yonditiri tlakwaroo pandaa da Taataa Iliitleemuge, Iliitleemu googuna. Unkuray haa hheꞌesidiri haa boo⁄imisidiri sanaamuu da damaa hari sikhima, haa teesaaqay handii fookitiri cira amotiraa da Taataa Iliitleemugo, dangwaa ilakaay, maga sirakontiri unkuray. 17 Da hheꞌesi, ana hagi ooy naraꞌa khongoroꞌosaykira cada gu tle⁄eẽ, hagugi ilii cakhadimi hhapeege hari ⁄uuru, hagugi tlupitlupidi pandaa doogunay.
18 Da hheꞌesi, kara hagi khuupuuꞌudi hhapeege pandaa da Taataa Iliitleemuge balalu mibeeri cigahha tleemaa haa amasi. Ana haa ⁄agimiiba ma kitahhu see idoo lensee, sa gimba gu tlakwaroo goõ gaa yonditiri, pandaa da Taataa Iliitleemuge, gugi slahhaaꞌasidiri ina. 19 Ana haa tlaꞌamuudi, Taataa Iliitleemu yaa qupidi hari khisla sa unkuray, hangwaati amoolaa slai hhamisa unkuray. Teꞌesii, Taataa Iliitleemu hinigi kara itatiisi ana. 20 Kara, Taataa Iliitleemu yaa slahhaai hari khisla sa Haruuni, gwaati amoolaa slai hhamisa ina. Nama qatlaykeesii loiloi, slime hagi firimi Taataa Iliitleemu sa Haruuni. 21 Da hheꞌesi, ana hagii oy sanaamutira da damaa giyaa boo⁄imisi hari sahaabu haa gagi da⁄i aslaage. Slime hagagi tlupidi haa hagagi saadimi gi gubara gu niqimee tleehhiti, ceceiya pahha. Ceceiyatee hagagii kuꞌusi waꞌay gu duudu gwaa gumagaaguuma maꞌay onko.
22 Slime, unkuray Waisraeeli hagwaa slahhaaꞌasidiri Taataa Iliitleemu, Iliitleemu googuna, yade Tebeerage, Maasage haa Kibirooti Hataafage.
23 Kara, qatlay Taataa Iliitleemu hangwaa iliiya⁄abi Kadeesi-Barineeyago, yaati kaay tuba, ‘Taa⁄amida ⁄utlaw hhapee sanguũ hadisi.’ Teesaaqay see, unkuray gi siꞌidiri idoo sangwaa ilakaay ha Taataa Iliitleemu, Iliitleemu googuna. Ina hagwaa ⁄imbidiriiba ma akhamisu see. 24 Unkuray goóti sisiꞌiday Taataa Iliitleemu, tlaatleesi balotiraa hangwaa iliicaahhi unkuray.
25 Inkoo, ana haa teꞌesii waara, haã khuupuuꞌudi hhapeege pandaa dosii Taataa Iliitleemu balalu hhakeesii gu mibeeri cigahha, tleemaa haa amasi, sa gimba ina yaati kaay tuba, hangu hhamisi unkuray. 26 Ana haa firimi ina, gi kaay ambee, ‘Ye Taataa Iliitleemu, Looimoo gu Goõ, hagi hhanti hhamisida hida koku, balalu sliimaa inay ti hida koku loi gaa afiigweti hari hiidahhasa doogu da didiri, inay hagiyaatii ca⁄asidi hhapee da Misirigo hari ⁄uuru googu. 27 Slayii yondimiisee doogu, Aburahaamu, Isaaka haa Yakoobo. Ugu hhanti khuꞌunta atana gu hida hhanki, dakoo dooina ma tlakwaroo dooina see. 28 Hida gu hhapetira handaa iliica⁄asidi dandiray yoo hhanti kaayay tuba, “Taataa Iliitleemu, hangwaatii ca⁄asi yadaa unkuray, mangu cu⁄i kongoqomeege, sa gimba hangwaa hiidahhasiiba hiiguumisa unkuray hhapetaꞌay giyaa hiifadidi, haa sa gimba giyaa waki inay.” 29 Inkoo, balalu sliimaa inay ti hida koku, giyaa afiigweti hhapee da Misirigo hari hiidahhasa doogu da didiri haa hari daba googu gu kooma ⁄uuru.’